Read Manikion YOHANES 9 Bible Online

YOHANES 9 - Manikion bible

YOHANES 9

¹Sug Yesus dara men logodeh len lededau Allah Men Tuariohob, kaba, len lec merohora ledreg sud hom mairesmougb teitei dau mem menuhwa gedig en eigtou se ucina mebera deb gini.

²Dangga, kaba, Yesus men logodeh leijidougwo eni, lendagai: Adehsud, gareg en ebesesar, hang emeic en mairesmougb dag gina? Eninei? Era mena dara mem lanei?

³Doba Yesus enara bauni len merir, endagai: Sud hom gin, kaba, en maires mougb emogdoc enin men sesar dara mena dara mem, maran sesar touwero. Doba en mairesmougb gin, kaba, eic cumougt dou dan naugb dan dens dau Allah men goubesa dou lusud naugb len leiyahabi.

⁴Anai sug loba osun dougwohob, kaba, sud hom ingma emeicara toua deitero. Dangga hang, eigouhw naugb maman mamarges dau sug maman maicara gin touwero. Doba sug lona ebaba gin, kaba, maman maimo areg sud hom gesa dan aud yen gini en arougb maman an gin terimda.

⁵Anai sug dan indugwengga desij lusud se cinogo ginaba, kaba, dan dedag mouf naugb dan dens dau areg se geica dou len toua.

⁶Sug Yesus esulou men logodeh dag ginohob, kaba, en eigdores se cinogo. Dauwohob, kaba, en mesira mob arilarahabi. Sug en mesira mob arilarohob, kaba, en eic mesira mob an cinogo graga. Hanoba en ehinsa sud hom ingga mairesi.

⁷Sug en ehinsohob, kaba, en arougb en, endagai: Ban beihweda naugb bededu cinogo dau ban abiresi se duhu geindaredeb, moho Siloamahabi. Dangga sud hom graga, kaba, en aimo Yesus en mer naugb en eihwedig Siloam gin toua. Sug en edebeij duhu geindaredeb ginohob, kaba, en edu cinogo dau en mairesi. Hanoba enin eihwededau sugada dig men tueda, anai en maires esga namcirohob.

⁸Sug en mesir dara len gus len leijesan, doba en maires esgohob, kaba, len leimiman dau gin namcir. Hanoba len leijidougwom, lendagai: Sud hom mairesmougb gohwiaga lusud an aregoufu grag, ingginei? Len leijidougwom dag gini, anai len lecinaga dag sug nosa, kaba, sud hom gin en eigtou se ucina mebera naugb ohwiaga lusud an aregoufu terimdohob.

⁹Dangga ligbum, kaba, len lousa deisa merir, lendagai: You, sud hom inggangga. Doba ligbum, kaba, len loto merir, lendagai: Sud hom gin, kaba, en mocbobaga aninim dag sud hom ingga dous. Doba sud hom ingga, kaba, en auni len merir, endagai: Dani sud hom inggang gini.

¹⁰Sug len louman en mer dag gin, kaba, len leijidougwo en ucugb, lendagai: Areg eberou ban, hang ban abires emesga naugb ban bemeiya lo asesa ucugb deit gina?

¹¹Dangga hang, en auni dou len, endagai: Sud hom, moho Yesus, kaba, en esinsin cinogo mor dag uluto. Hanoba en ehin se dan indires. Dauwohob, kaba, en arougb dan naugb dan dededu dan indibes an indiresi se duhu geindaredeb, moho Siloam, gin toua. Sug dan daimo en mer naugb dan dededu dan indibes se duhu ginohob, kaba, dan indires toua esga naugb dan deiya lo asesa ucugb namcir.

¹²Sug len louman en mer an gin, kaba, len leijidougwo en, lendagai: Sud hom gini moonggiro? Doba en auni dou len, endagai: Dan demecinaga sug en eigtou touwero.

¹³Doba lona sug Yesus eic cinogo mor dag uluto naugb asga sud hom gin maires egsa, kaba, leng Yahudi meren lona naugb len lemeicaresero. Dangga hang, en mesir graga, kaba, len lahwan en naugb en edens enin dou leng Parisi se meren tuari touahabi.

¹⁴

¹⁵Sug len ledebeij leng Parisi se meren tuariohob, kaba, len toua leijidougwo en deit, lendagai: Ban abires esga naugb ban beiya lo asesa ucugwohob gini ogdoc ara? Dangga en emecic dau augwan dou len deit, endagai: Sud hom eic uluto baugb dan indiresi. Hanoba dan dededu dan indibes an gin se duhu. Dauwohob, kaba, dan indires toua esga naugb dan deiya lo asesa namcir.

¹⁶Dangga ligbum dau leng Parisi, kaba, len lowun Yesus en moho an gin namcir, lendagai: Sud hom gin, kaba, Allah emesa en aud maman, anai en emaimo maman gomnomna eisaugb Lona Gemeicaresero gin touwero. Doba ligbum, kaba, len loto merir, lendagai: Yen youdesa sud hom gebesesarohob, kaba, en aben ganusbus ingma dag ginohobei? Hang len merdoc dag hom se aremer ginero. Doba len lenara merir eisaugwim icira gin namcir.

¹⁷Sug len merir eisaugwim icira gin terimda, kaba, len leijidougwo sud hom ingga enin deit, lendagai: Ban beigdoumesa sud hom graga en moho dag ara, anai ban bos badi en dag en esga ban abiresi dou emenohoba? Dangga hang, en auni dou len namcir, endagai: Allah esa en aud maman naugb en esai en moro dou maman dag misenohob.

¹⁸Doba leng Yahudi meren mougtir, kaba, len merdoc emebdebin an sud hom graga en mer dag en mairesmougb teiteiyohob ginero. Anai len leiya, doba en eiya lo asesa namcir. Hang len larougb lusud naugb len ledahwan sud hom graga en mena dara mem aud lenahabi. Dauntoba len leijidougwo lan eisaugb aremer gin toua deitahabi.

¹⁹Dangga sug lan ladebeij lenohob, kaba, len leijidougwo lan, lendagai: Yan yaiya sud hom gin endag yan maijisi misen ingginei? Era naroei? Anai sug nosa, kaba, yan yan dou emen dag yan maijisi gini en mairesmougb teitei dau sug mem ouwadan enohoba? Gedangga, kaba, dagiro, naugwe hang, sud hom gini en eiya lo asesa ucugb dag gina?

²⁰Doba lan launi dou len, landagai: Sud hom gini, kaba, aman amecinaga eni aman ameisi misen. Dara aman amecinaga dag sug mem ouwadan en, kaba, en mairesmougb teitei touohob.

²¹Doba ogdoc ara, hang en maires emesga naugb en emeiya lo iteitogini. Dara gareg en esga en maires gin, kaba, aman amecinaga dau ginero. Yen yeijidougwo enin anahabi. Anai en edag sudohob, hang emedeinyum naugb sug enin auni dou yen toua.

²²Lan laideido dag gin dou len, anai lan lacinaga dag gareg en os badi Yesus en edag Sud Hom Geigdoc Lusud Dau Meren Gogom Augwan, kaba, mougtir gini len lohw merdocedoumohob naugb len lerba sud hom gin dau meren tuari gini. Dangga lan lahau dau mougtir gin toua terimdohob.

²³Hang lan lamarougb len dag graga toua, landagai: Yen yeijidougwo en ai yenin meijir se dous, anai en edag sudohob.

²⁴Sug mougtir graga len louman lan marir an gini, kaba, len leija sud hom mairesmougb graga aud len deit. Sug en edebeij lenohob, kaba, len lenara lad en medoc mes, lendagai: Ban becic areg se geica dou emen dous. Hanoba ban bou Allah en moho debin gini toua. Dauntoba emen emecinaga dag areg ban ben dou emen, kaba, misen namcir. Anai ban beigdoumesa sud hom graga dag en esga ban abiresohob. Doba emen emecinaga dag sud hom ingga, kaba, en ebesesar namcirohob, hang emedeinyum naugb sug en emesga ban abires gin touwero.

²⁵Doba sud hom graga, kaba, auni dou len ucugb, endagai: Sug sud hom gini en ebesesarohob, era en emebesesar touebma, kaba, dan demecinagero. Doba aremer hom, kaba, dan decinaga dag misen namcir. Anai sug nosa, kaba, dan indires mougb. Doba iteitogin, kaba, dan indires esga naugb dan deiya lo asesa ucugwohob.

²⁶Dangga len leijidougwo en ucugb deit, lendagai: En ebara dara ban, hang ban abires emesga gina?

²⁷Doba sud hom mairesmougb graga, kaba, en esa mer debin len, endagai: Dan decic augwan gini dou yen iteitogragohob. Doba yen meigdoc emebdebin an gin touwero. Dangga dagiro, naugwe hang, yen youwan naugb dan decic dau augwan gin dou yen deita? Yen youwan naugb yen yedag men logodeh gin touei?

²⁸Dangga len louwara debin en, lendagai: Bang hom dous eng bedag sud hom ingga men godeh gini. Doba emen, kaba, emen emaugwan emedag Musa men logodeh gin dous.

²⁹Anai emen emecinaga dag sug nosa, kaba, Allah enara dou Musa dag misenohob. Doba eisaugb sud hom ingga, kaba, emen emecinaga dau sug en en ginero.

³⁰Doba sud hom mairesmougb graga, kaba, en owun len meroho an gin namcir. Hanoba en enara dou len, endagai: Sud hom gin, kaba, en esga dan indiresohob. Doba yen yenara dag yen yemecinaga sud hom gini sug en en dau sugiro touwero. Ara hom gin, kaba, dag ganusbus namcir.

³¹Anai maman macinaga dau sug sud hom en ebesesar, kaba, dag Allah en emouman en mer naugb ousa en touwero. Doba gareg en esijaresa eni, hanoba en aimo areg asesa enin medoc mes namcir, kaba, maman macinaga dag en ouman en mer naugb ousa en dous.

³²Dangga sug sud hom gini en emen dau Allah enero, kaba, men goubesa naugb ara ara toua ingmaro. Doba men goubesa naugb ara ara inggebga ginohob. Hang emens dou maman dag sud hom gini en en dau Allah aud maman dag misenohob. Anai dau sug Allah en ahasesei cinogo terimda iteitogin, kaba, lusud lemouman dau sud hom ingma dag en esga leng meriresmougb gin touebma.

³³

³⁴Sug mougtir gini len louman, doba sud hom mairesmougb graga en esbes an len dangga, kaba, len lenara gouji dou en, lendagai: Ban, kaba, ban bebesesar teitei dau sug ban abim ouwadan banohob. Dangga dagiro, naugwe hang, ban bouwan bens aremeijouhw dou emena? Sug len lenara gouji dangga dou en dauwohob, kaba, len locirma en dau meren tuari gin toua namcir.

³⁵Doba sug Yesus ouman dag leng Parisi locirma sud hom mairesmougb graga dau meren tuariohob, kaba, en ehilon en. Dangga sug en edagasa enohob, kaba, en eijidougwo eni, endagai: Ban abdoc ebdebin an Lusud Meraguna Mebin ginohobei?

³⁶Dangga sud hom mairesmougb graga, kaba, en eijidougwo Yesus ucugb deit, endagai: Adehsud, ban bens dau Lusud Meraguna Mebin gin dou danahabi. Dauntoba dan indoc ebdebin an en namcir toua.

³⁷Doba Yesus enara bauni en mer, endagai: Ban beiya enohob. Anai sud hom genara dou ban iteitogini, kaba, Lusud Meraguna Mebin en ingga.

³⁸Sug sud hom mairesmougb graga en ouman Yesus mer an gin, kaba, en auni dou en, endagai: Adehsud, dan indoc ebdebin an ban hom namcir. Sug en enara ineg dou en dag ginohob, kaba, en mohorbrida badedeijlo naugb en esijaresa Yesus toua.

³⁹Doba Yesus enara dou en deit, endagai: Dan douwaden dau bogo naugb dan dekeba lusud daum. Dangga gareg en ecinaga dag en mairesmougb dougwo augwan namcirohob, kaba, dan desga en mairesi naugb en ecinaga augwan asesa ucugb deit. Doba gareg en eigdoumesa enin moho deseino dan dag en ecinaga augwan dag misenohob, kaba, dan deic dou en dag en edag sud hom mairesmougb gini.

⁴⁰Dangga sug leng Parisi merug hosa gedig len lesa desij lan ingga, len louman Yesus mer an gin, kaba, len leijidougwo en, lendagai: Ban bauwam an dag emen gin toua emiresmougwei? Dangga, isnaro. Anai emen, kaba, emen emeiya augwan dag misen namcirohob.

⁴¹Doba Yesus auni dou len, endagai: Sug yen yowun yenin meigdoc mes arjaga dag yen meijiresmougb dougwo augwan namcirohob, kaba, sesar men gogom emeb naugb yen touwero. Doba iteitogini, kaba, yen yeigdoumesa yenin meijoho dag yen meijires esga naugb yen yeiya augwan dag misenohob, hang sesar men gogom eb naugb yen toua terimda.