Read Manikion KISAH 1 Bible Online

KISAH 1 - Manikion bible

KISAH 1

¹Teopilus, sug nosa, kaba, dan dog dau Yesus men geicara sug ebiji terimda edebeij lona sug Allah eigdoumesa en dig bogo augwan asesa dou banohob. Dara areg en edidib dou men logodeh sug nosa, kaba, dan dens dau augwan gini asesa dou ban touohob.

²Dangga deinyor sug Allah eigdoumesa en dig bogo gin, kaba, en arougb men logodeh ogdoc Mena Gogoufu men goubesa naugb len lesai en moro dou lusud se cinogo augwan. Anai en ouci len sug nosa naugb ginohob.

³Dara sug en eisa dau gomom ucugwohob, kaba, en ens enin ainyes ucucugb dou len. Hanoba en eic ganusbus se lona sud hwai debin gin dou len toua. Dauntoba len lemeija meruwesa en deitero. Doba len lecinaga dag en eisa dau gomom ucugb dag misenohob. Dara en ens dau lona sug Allah oiharaga lusud ucugb meijouhw augwan asesa dou len toua.

⁴Dara en en dougwo len dag len lemesai en moro augwougb touwero. Doba len leigtou se Yerusalem dousahabi. Dangga sug en oucimdeb dara len sug ouwedoc dag ginohob, kaba, en enara dou len, endagai: Yen yemeihwededau Yerusalem naugb yen yemesai dan induro dou lusud augwougblobma. Doba yen yeigtou sungga terimda areg dan Indina en os dou yen sug nosohob, kaba, en esa dou yenahabi.

⁵Anai Yohanes, kaba, en ogun yen se duhu dous. Doba lona hosa debin gin, kaba, dan Indina en emesa Mena Gogoufu emaos dara dou yens. Augwan gini aimo dau areg dan den dou yen sug nosa touohob.

⁶Doba Yesus men logodeh sug len loucimdeb dara en sug ouwedoc gini, kaba, len leijidougwo en, lendagai: Adehsud, aiseba ban beigdoumesa mamang Israel maman madag mougt mera medam naugb len gus dag nosa deita? Iteitoginei? Era se lona daiyamo gacinei?

⁷Doba Yesus enara bauni ucugb dou len, endagai: Lona dara cumougt naugb sug areg ebiji, kaba, dan Indina enin dous eng esedeb augwan. Hang en emouwan naugb yen yemecinaga dau gin touwero. Anai enin dous eng edag mougt naugb ginohob.

⁸Doba sug Mena Gogoufu einesa yen meigdoc mesohob, kaba, yen yebiji naugb yen yos yadi dan indoho dou leng se Yerusalem, dara leng se Yudea, dara Samaria meren hancob augwan, terimda edebeij cinogo moc ougbdesa. Anai sug en einesa yen meigdoc mes dag ginohob, kaba, en emeic goubesa dou yen naugb gin toues.

⁹Sug Yesus esulou len dangga dauwohob, kaba, Allah eigdoumesa en dig bogo, abeba len meriresi, terimda umer ouf dougwo en namcir. Hanoba len lemeiya en toua deitero.

¹⁰Doba sug len lauweila bogo toutou an en, kaba, lagiji lahwai gedig lan lag sansun gogoufu lagunya debin len augwougb naugb lan lan dougwo len. Anai len merires emedug dau bogoro, doba len merires eb debin Yesus sug en eisaugb dig bogo gin terimda.

¹¹Dangga hang, lan lamenara dou len, landagai: Yusud dau Galilea, yen yesa sugin yauweila bogo toutou, anara? Anai Yesus gini, kaba, Allah eigdoumesa en dig bogo dau yenohob. Doba en emecicugb aud yens, aninim dag yen yeiya en eisaugb dig bogo dau yen gragohob.

¹²Sug Yesus men logodeh louman lan graga marir an dag ginohob, kaba, len lecicugb dau mengarougb, moho Saitun Meda, dig Yerusalemeda. Anai mengarougb gini, kaba, emebijes dau Yerusalemero. Doba len lec merohora mougwa huntun sisa, kaba, len ledebeijohob.

¹³Sug len ledebeij Yerusalemohob, kaba, Petrus, Yohanes, Yakobus, Andreas, Pilipus, Tomas, Bartolomeus, Matius, Alpius meisi Yakobus, Simon Patriot, dara Yakobus meisi Yudas, len laugwan leisaugb se dimei hom sug len latou sousougb naugb len locuncum. Anai len merdoc aninim naugb sug len locuncum dou Allah sungga ucucugb terimda.

¹⁴Dara astesda sug len loucimdeb dag gini, kaba, Yesus mem, dara magtor, an ligida gus gus, len toua laimo len naugb len locuncum dou Allah toua.

¹⁵Lona hosa debin dau sug Allah eigdoumesa Yesus dig bogo ginohob, kaba, Yesus men logodeh lacinim deit. Doba leng loucimdeb gini, kaba, merug edebeij huntun hom sud hom edeisu. Dangga sug len laugwan lacinimohob, kaba, Petrus en eisa besa.

¹⁶Hanoba en enara dou len, endagai: Dan indagunerij, dara dan indamouwerij, yen yecinaga eisaugb Yudas men geicara dag augwan gini esogwa deisa areg Mena Gogoufu ens dou Daud naugb en og se Surad Injil Meb Mohon debohob. Anai gini aimo dau areg Allah enin ogod an deb touohob. Dangga hang, en emedag mougt beino leng sadodor naugb len lagaigeij Yesus sug nosa gini.

¹⁷Dara yen yecinaga dag Krisdus eigdoumesa en moho, kaba, en toua aimo emen naugb emen emaugwan emesai Krisdus moro dou lusud laugwan sug nosa touohob. (

¹⁸Doba sug leng Yahudi meren mougtir leic momsi dau men geicara gecgu gini dou enohob, kaba, en eic aregoufu gini naugb edauma lo naugb enin toua. Sug en ouma lo gini naugb eninohob, kaba, en edobsara menuhwa einya bomom se lo ingga namcir.

¹⁹Sug leng se Yerusalem len louman dau gini, kaba, len leija Yudas men lo gini se meren leci dag Akeldama. Era Lo Gedig Mogwihi Ebsa, anai en mogwihi eir deb se lo ginohob.)

²⁰Dangga hang, sug en omom dag ginohob, kaba, Allah en ouwan naugb maman mauci sud hom, dauntoba en eperwei Yudas en mohw deit. Hanoba en ousa emen naugb sug emen emaugwan emos emadi maman Adehsud Yesus en moho deseino lusud dag en eisa dau gomom ucugwohob toua. Anai augwan gini esogwa deisa areg Allah en enara se Ugwaremer an gin deb ogdoc Daud sug nosa touohob, endagai: Dan demouwan sud hom ingma, kaba, en ematou se men tu deitero, doba eb bedinebena deb namcir. Dara en enara se Ugwaremer hom toua, endagai: Dan douwan sud hom gus eperwei en mohw deit.

²²Doba sug maman mauci sud hom gin, kaba, esloulougb dag en toua aimo emen se lona augwan sug maman Adehsud Yesus eni moongga desij emen, ebiji dau lona sug Yohanes ogun en se duhu, terimda edebeij lona sug Allah eigdoumesa maman Adehsud ucugb dig bogo toua.

²³Sug Petrus esulou len dag gin dauwohob, kaba, len lens lahwai maroho doum. Laingma, kaba, en moho dag Matias. Laingma, kaba, en moho Yusub, gedig lusud lesagai en moho toua dag Sabas meisi. Dara ligbum, kaba, len lesagai en moho toua deit dag Yusdus.

²⁴Sug len lens lan maroho dauwohob, kaba, len locuncum an gin dou Yesus, endagai: Adehsud, ban, kaba, ban becinaga areg geb se lusud merdoc mes augwanohob. Dangga hang, ban bens dau lahwai gin dou emenahabi, dag gareng ban bouci en, dauntoba en eperwei Yudas en mohw naugb en esai ban aburo dou lusud toua deit. Anai Yudas gin, kaba, en obsara dau men geicara ginohob. Hanoba en eihwedig men usi gedig men geicara gecgu gini ahwan en aud gin sedohob.

²⁶Sug len locuncum dag gin dauwohob, kaba, len log lan gin maroho se igdahab geihwidua hwai naugb len lob se biruwa mes. Hanoba sug len letitir anohob, kaba, Matias eng moho agunya nosa. Dangga len leigdoumesa en toua desij Yesus men logodeh merug sisa hobjerem graga naugb sug len lesai Krisdus moro dou lusud deit.