Read Manikion KISAH 10 Bible Online

KISAH 10 - Manikion bible

KISAH 10

¹Doba se cinogo hom, moho Kaisarea, kaba, sud hom, moho Kornelius, en toua moongga. Sud hom gin, kaba, en edag mougt mera naugb leng Roma meren sadodor merug huntun hom. Dara lusud leija men lusud merug huntun hom dara mersir merug huntun sergem len laugwan dag sadodor dau leng Italia meren hancob. Anai merug huntun senggem gin, kaba, len laugwan ledag hom namcir naugb sug len lesara.

²Sud hom gin, kaba, en toua ahau dau Allah naugb en aimo areg asesa enin medoc mes augwan namcir. Dangga hang, en emecguna dou seiseij toua deitero. Doba eni dara leng leigtou desij en se men tu, kaba, len laugwan laimo leng Yahudi naugb len lesijaresa Allah. Dara en agaha mesira naugb sug en ousa leng Yahudi gedig len merunggwereij len laugwan. Hanoba en aimo meren gaben naugb sug en ocuncum dou Allah esesa terimda toua.

³Doba se lona hom sug en ocuncum se igdedeij, kaba, Mena Gogoufu eic dag omom dou en. Dangga en eiya, doba Allah men malaikad hom en en aud en se men dimei mes ingga dag misen namcir. Sug malaikad edebeij enohob, kaba, en eija en, endagai: Kornelius.

⁴Doba Kornelius eisan gahau baijidougwo en, endagai: Adehsud, ban beija dan, anara? Hanoba en auweila en toutou terimda. Doba malaikad ingga, kaba, en oho mer debin en, endagai: Allah en medoc an ban namcir, anai en eiya dau areg ban beic dag mogud dou leng merunggwereij len laugwan. Dara en medoc eiseisan aban gocuncum. Anai ban besijaresa en dara ban abdoc hom besesa terimda touohob. Hang en emesedeb naugb en auni areg geigouhw ucugb dou ban toues. Anai areg ban beic dou lusud dara aban gocuncum dou en gin, kaba, eic dag en medoc an ban toua namcirohob.

⁵Dangga iteitogin, kaba, ban barougb aban logodeh naugb len leihweda se cinogo, moho Yope, dauntoba len ledeija len sungga dougwo sud hom, moho Simon, gedig len leija en moho Petrusahabi. Hanoba len ledahwan en aud ban sugin toua.

⁶Anai sud hom gin, kaba, en atou desij sud hom gesinsin aremeta mos becabeci, en moho toua dag Simon, se men tu geb deinyor dum mebera se cinogo ingga.

⁷Sug malaikad enara dou Kornelius ouwa dauwohob, kaba, en eihwededau en namcir. Sug en eihwededau enohob, kaba, Kornelius en eija men sogougb lahwai gedig lan lasedougwo en men tu naugb lan lan aud eni. Hanoba en eija men sadodor hom gesedougwo en naugb en toua, en en aud eni. Anai men sadodor hom gin, kaba, en aimo areg asesa Allah enin medoc mes augwan, dara en esijaresa en toua namcirohob.

⁸Sug merug homoi gini ledebeij enohob, kaba, en ecic dau areg en eiya graga augwan meijouhw asesa dou len toua. Hanoba en arougb len dig cinogo Yopeda.

⁹Dangga sug loneinda, kaba, merug homoi gini len lec merohora dig Yopeda. Doba irir sug len lec merohora terimda bedebeij deinyor Yopohob, kaba, Petrus en toua eisaugb se tu medgomori se igdabogo naugb en edocuncum dou Allah.

¹⁰Doba irir sug en ocuncum gini, kaba, en sireba namcir. Hang en ouwan etara, doba len lemougwan ared emecbuma. Dangga irir sug len lougwan ared gin, kaba, Mena Gogoufu eic dag en omom toua.

¹¹Hanoba en eiya, doba misis se bogo ec dau, kaba, len losus aigdaga an minc gebehibera meida hogu dig cinogon.

¹²Dara minc meida graga, kaba, atij an aremeta aingma aingma dau areg mohora hogu, dara aremeta gedig mohumes agrigrilo, dara ba geigtou se lomesmes toua. Aremeta dara ba augwan gin, kaba, Musa men gomnomna en dougwo leng Yahudi an ginohob, dauntoba len lemet touwero. Anai sug len let, kaba, eic gogor dou len deseino Allah namcirohob.

¹³Sug Petrus eiya augwan ginohob, kaba, en ouman mer hom dau bogo arougb en, endagai: Petrus, ban beisa, bogug aremeta ingga ingma. Hanoba ban bet toua.

¹⁴Doba Petrus agada mos dau namcir, endagai: Adehsud, dan doguro gin namcir. Anai areg Musa men gomnomna emoiharagabuma, dara areg eic gogor dou dan deseino Allah, kaba, dan demet augwan gin mougwa hom touabuma.

¹⁵Doba mer graga oho mer debin en deit, endagai: Areg Allah en moho oiharaga becabecohob, kaba, ban bemowun augwan gini dag gogor touwero, doba ban beic bet namcir.

¹⁶Sug mer dau bogo arougb en an areg graga augwan bedebeij mougwa homoiyohob, kaba, len lesera aigdaga an minc gebehibera meida hogu gini ucugb dig bogada.

¹⁷Sug len lesara aigdaga an minc graga ucugb dig bogohob, kaba, Petrus eija mouwesa areg en eiya gini men meijouhw ucucugb namcir. Anai en mou emobgesa areg en eiya gini men meijouhw touebma. Doba sug Petrus auwam an ginaba, kaba, lusud merug homoi gedig Kornelius arougb len aud en, kaba, len ledebeij misis moc se Simon men tu, anai len leijidougwo leng se Yope an ginohob.

¹⁸Sug len lesa se misis moc ginohob, kaba, len leijidougwo leng se Simon men tu an Petrus, lendagai: Sud hom, moho Simon gedig lusud leija en toua dag Petrus, kaba, en atou suginei? Era naroei?

¹⁹Dangga Mena Gogoufu enara dou Petrus, endagai: Ban bouman dan indir gin deigeigouhwahabi. Anai lusud merug homoi len ledebeij misis mocohob naugb len lehilon dougwo ban. Hang ban bouwada se cinogo dedemeda, dara ban bemeija ban abdocesa len touwero. Doba ban baimo len namcir. Anai dan eng denara dou meren mougt, hanoba en arougb len aud ban sugin toua. Mena Gogoufu arougb Petrus an dag gini, anai en auwam an areg en eiya graga men meijouhw ucucugb terimdaba.

²⁰

²¹Sug Petrus ouman Mena Gogoufu arougb en an dag ginohob, kaba, en ouwada dig cinogoda. Dangga sug en edebeij merug homoi graga se misis mocohob, kaba, en eijidougwo len, endagai: Yen yen sugin naugb ara? Anai dani sud hom areg yen yeijidougwo lusud anohob.

²²Doba len launi ucugb dou en, lendagai: Gia, kaba, Allah men malaikad hom ens enin ainyes dou emen mougt mera, moho Kornelius. Hanoba en arougb en naugb en acgeij ban beihwedaud en se men tuahabi. Dauntoba en toua ouman dau areg ban besai dou lusud augwan gini deigeigouhw toua. Dangga hang, emen mougt gin, kaba, en emarougb emen aud ban naugb emen emahwan ban aud en. Dauntoba ban bens dau areg ban besai dou lusud gini meijouhw augwan asesa dou en toua. Anai eni leng Roma meren sadodor huntun hom meren mougt mera. Doba en aimo areg asesa Allah enin medoc mes namcir. Dara en esijaresa Allah, dara en medoc ahau dau en toua terimda. Dara leng Yahudi laugwan, kaba, len leigdoumesa en moho an men geicara gedag beim dou len touohob.

²³Sug Petrus ouman len merir an dag ginohob, kaba, en ebin len naugb len latou desij en toua. Dangga sug loneindohob, kaba, en eisa baimo lenda. Dara leng merdoc ebdebin an Yesus se cinogo Yope gin, kaba, merug hosa laimo en toua.

²⁴Dangga sug len lec merohora se lona homohob, hanoba se loneinda deit, kaba, len ledebeij se Kaisareohob. Sug len ledebeij Kornelius men tuohob, kaba, len leiya, doba Kornelius en esa mer dou mosur dara mesir len laugwan lacinim deb se men tu naugb lenohob.

²⁵Doba sug Petrus ouwan einesa Kornelius men tu gini, kaba, Kornelius en agunya dedemeda dagaseni. Hanoba en eic mohorbrida badedeij cinogo naugb ecguna dou en toua.

²⁶Doba Petrus en dougwo en, endagai: Ban beisa besa. Anai dang gin toua lusud misen dous.

²⁷Hanoba en enara dou en asa lacahabi, lan lameinesa dimeiyeda. Sug lan lainesa dimeiyohob, kaba, Petrus en eiya, doba lusud leinyana loucimdeb naugb enohob.

²⁸Hanoba en enara dou len, endagai: Yenin yecinaga dag emeng Yahudi emen gomnomna en dougwo emen dag emen ememeinesa lugmahara meren tu. Dara emen ememedag hom dara len touwero. Doba emen emasid emenin dau len namcir. Doba Allah ens dou danohob, dag sud hom ingma, kaba, emeic gogor dou dan deseino en, hang dan demasid danin dau en touwero. Doba Allah moho oiharaga len laugwan lecabecohob.

²⁹Dangga sug ban besa ban abir dou dan naugb dan den aud ban sugini, kaba, dan demohoiya touwero. Doba dan daimo aban lusud aud ban sugin namcir. Dangga areg ban bacgeij dan naugb gini, kaba, ban bens meijouhw augwan asesa dou danahabi.

³⁰Sug Kornelius ouman Petrus eijidougwo en an dag ginohob, kaba, en ens dau aremer hosa graga meijouhw augwan asesa dou en toua, endagai: Se lona homoi nosa sug igdedeij dag gini, kaba, dan docuncum se indan tu. Sug dan docuncum gin, kaba, giji hom geg sansun gogouf cucugb en agunya augwougb debin dan naugb en esa desij dan toua.

³¹Hanoba en enara dou dan, endagai: Kornelius, Allah en ouman areg ban bacgeij en an ginohob. Dara en medoc moc dougwo aban geicara gedag beim an leng merunggwereij touwero. Doba en mena eiseisan terimda.

³²Dangga hang, ban barougb aban lusud aud cinogo Yope naugb len lehilon sud hom, en moho Simon gedig lusud leija en moho toua dag Petrus. Anai en, kaba, eni moongga desij sud hom gesinsin aremeta mos becabeci, en moho toua dag Simon, se men tu deinyor dum mebera se cinogo ingga.

³³Sug dan douman malaikad arougb dan an dag gin inegohob, kaba, dan demamsoho en mer an gin touwero. Doba dan desa indan lusud aud ban dedemeda. Dangga ban toua bemamsoho dan indir an areg dan dacgeij dau ban touwero. Doba ban abdoc esgiraha an dan indir naugb ban ben aud dan sugin touohob. Hang iteitogin, kaba, emen emaugwan emacinim deb sugini naugb emen emouman dau areg maman Adehsud arougb ban an naugb ban besai dou emen toua.

³⁴Sug Kornelius ecic dau aremer graga meijouhw augwan asesa dou Petrusohob, kaba, Petrus ousa deisa en mer an gin toua. Hanoba en enara dou en, endagai: Indeic, iteitogin, kaba, dan decinaga dag Allah emeigdoumesa meijouhuda hom emedreg dau len gusero. Doba en aimo ucina hom an len laugwan dous.

³⁵Dangga hang, en emesi sud hom aiyei emaimo dau men meijouhuda touwero. Doba gareg en esijaresa en dara medoc ahau dau en, dara en aimo areg asesa enin medoc mes terimda, kaba, eigdoumesa en moho deseino en toua namcir.

³⁶Sug Petrus ousa deisa Kornelius an areg en ecic dou enohob, kaba, en esai Mer Geigouhw eisaugb Krisdus ucan dou len toua, endagai: Yen yecinaga dau Allah, en mer, areg en esa dou emeng Israel meijouhw augwan asesohob. Anai en esa Yesus Krisdus aud emen naugb en esai Allah Mer Geigouhw dou emen, dauntoba emen emecinaga dag en esedeb en medoc mesohob naugb sug en eic gesgigouhwesa ucugb dou emen ogdoc Yesus Krisdus men geicara taiba sogo salib gin toua. Anai Yesus gin, kaba, en edag mougt mera medam naugb lusud se cinogo gin augwanohob.

³⁷Dara yen yecinaga dau areg acgunog se lona sug Yohanes ebedbed dou emen meijouhw augwan asesa touohob. Anai sug en ebedbed dou emen dag emen emesga emen sesar, hanoba en ogun emen se duhu ansins debin gin, kaba, Yesus esai Allah mer an areg graga dou emen ucan deit toua, ebiji se leng Galilea meren hancob, terimda agaha becinten se emeng Israel emen hancob augwan toua namcir.

³⁸Dara yen yecinaga dau sug Yohanes ogun Yesus dau cinogo Nasared se duhu, kaba, dag Allah esa Mena Gogoufu se en medoc mes naugb en eic goubesa medam dou en. Hanoba en eihwedig sungga sungga naugb en eic geigouhw aingma aingma dou lusud. Dara leng ledag Bilis men sogougb, kaba, en esga len laugwan dau men goubesa toua. Anai Allah moongga desij en naugb ginohob.

³⁹Dara emen emouma debin men geicara geigouhw se leng Israel meren hancob dara Yerusalem toua. Anai emen emeiya dau augwan gini se emen emiresohob. Dara leng Yahudi gin, kaba, len letob en se sogo salib, ben omom namcir.

⁴⁰Doba lona hwai debin gin, kaba, Allah eigdoumesa en dau gomom ucugwohob. Hanoba en ens enin ainyes dou lusud toua.

⁴¹Dara en emens en ainyes dou len laugwan touwero. Doba en ens en ainyes dou emenin dous, anai Allah ouci emen naugb gin deb nosohob. Dauntoba emen emouma debin gin augwan dou lusud laugwan toua. Anai sug en eisa dau gomom ucugb, kaba, emen emetara dara emegara dara en touohob.

⁴²Hang en emarougb emen naugb sug emen emesai Mer Geigouhw eisaugb en dou lusud laugwan. Dara emen emouma debin en, dag Allah eigdoumesa en moho naugb en ogod aremer aga leng merireseb dara leng lomom len laugwan touohob.

⁴³Augwan gin, kaba, esogwa deisa areg leng lesai Allah moro sug nosa len laugwan log deb se Surad Injil Meb Mohon deb sug nosa touohob, lendagai: Gareg en medoc ebdebin an Krisdus, en moho, kaba, sesar men gogom emeb naugb en toua deitero. Doba Allah aigdougwo men sesar augwan, ediyebeiya dau en toua. Anai sug Krisdus en moho aiga en dag ginohob, kaba, emedeinyum naugb sug sesar emogod en toua deitero. Doba Krisdus en moho oiharaga en dougwohob, anai en moho gin, kaba, dag mobisamougb namcir.

⁴⁴Doba irir sug Petrus ens meijouhw dau areg graga augwan dou lenaba, kaba, Mena Gogoufu einesa leng louman en mer gini len laugwan merdoc mes toua.

⁴⁵Sug leng Krisden dau leng Yahudi gedig len laimo Petrus dau Yope len leiya gin, kaba, len leimiman dau gin namcir. Anai len leiya, doba Allah esa Mena Gogoufu gin dou lugmahara, aninim dag en esa en dou len sug nosa touohob.

⁴⁶Anai len louman, doba lugmahara gin toua lec merir susugb. Dara len leigdoumesa Allah en moho agas medam an toua namcir.

⁴⁷Dangga Petrus enara dou leng Yahudi gedig len laimo en dau Yope gini, endagai: Yen yeiya len gini. Anai len toua, Mena Gogoufu einesa len merdoc mes, aninim dag maman touohob. Dangga gareg dau maman en en dougwo len naugb sug maman magun len se duhu debin gin toua? Naro, sud hom ingmaro.

⁴⁸Sug Petrus enara dou mesir leng Yahudi gini dauwohob, kaba, en arougb len naugb len logun Kornelius an men lusud len laugwan se Yesus Krisdus, en moho, ansins debin gin toua. Dauntoba lusud lecinaga dag len toua ledag Yesus men logodehohob. Anai eni an mesir, len leperwei Yesus en mohw naugb ginohob. Sug Petrus dara mesir logun len se duhu dauwohob, kaba, Kornelius dara men lusud len dougwo Petrus naugb en eigtou desij len se lona hosa debin gin deitahabi.