Read Manikion KISAH 11 Bible Online

KISAH 11 - Manikion bible

KISAH 11

¹Dara Petrus mesir merug sisa hobjerem, dara leng merdoc ebdebin an Yesus se leng Yudea meren hancob, len toua louman dag merug hosa dau lugmahara len lebin Allah mer eisaugb Krisdus touohob.

²Dangga hang, sug Petrus eisaugb dig Yerusalem ucugwohob, kaba, ligbum dau leng Krisden dau leng Yahudi ingga, kaba, len merdoc esrougb an en namcir. Anai len gin, kaba, len loudesa esloulougb naugb lugmahara len toua lec merus dau. Dara len laimo Musa men gomnomna aud gousanara touahabi, len merdoc emebdebin an Yesus lemaos dara ucan deit.

³Hanoba len lenara gouji dou en namcir, lendagai: Dagiro, naugwe hang, ban beinesa lugmahara meren tu naugb ban beigtou desij lena? Anai len lemec merus daubuma. Dara gin dousero. Doba ban betara dara len, hang emeic gogor dou ban deseino Allah touohoba?

⁴Sug Petrus ouman len lenara gouji dou en dag gin, kaba, en ens meijouhw dau sug acgunog terimda ouwedoc augwan asesa dou len toua. Hanoba en enara dou len, endagai: Se lona hom sug dan docuncum se cinogo Yope, kaba, Mena Gogoufu eic dag dan domom. Hanoba dan deiya, doba len losus aigdaga an areg en mocbobaga dag minc gebehibera meida hogu dau bogo, terimda eb desij dan toua.

⁶Dangga sug dan dogmac, kaba, dan deiya, doba aremeta geic gogor dou maman dag aremeta hogu gedig lusud louwaha, dara aremeta gedig len lemouwaharo, dara aremeta gedig mohumes agrigrilo, dara ba geigtou se lomesmes, len laugwan leb se meida gin toua.

⁷Sug dan dogmac areg geb se minc meida ginohob, kaba, dan douman mer hom dau bogo arougb dan, endagai: Petrus, ban beisa, bogug aremeta ingga ingma, hanoba ban bet toua.

⁸Doba dan dagada dan indus dau namcir, dendagai: Adehsud, dan doguro gin namcir. Anai areg Musa men gomnomna emoiharagabuma, dara areg eic gogor dou dan deseino Allah, kaba, dan demet augwan gin mougwa hom touebma.

⁹Doba mer en dau bogo naugb oho mer debin dan deit, endagai: Areg Allah en moho oiharaga becbecohob, kaba, ban bemowun augwan gini dag gogor touwero. Doba ban beic bet namcir.

¹⁰Sug dan deiya dara douman augwan graga bedebeij mougwa homoi icirohob, kaba, len lesera aigdaga an minc gebehibera meida gini ucugb dig bogada.

¹¹Doba yen youman deigeigouhw. Sug dan deiya dara douman augwan ginaba, kaba, lusud merug homoi dau cinogo Kaisarea len ledesesa misis moc se tu sug dan datousa. Anai meren mougt mera en esa len aud dan naugb len lahwan dan aud en se cinogo Kaisarea toua.

¹²Dangga Mena Gogoufu arougb dan, endagai: Ban bemeija ban abdoc se lenlo. Doba ban baimo len namcir dig Kaisareada. Dara maman mamaguner merug senggem dau Yope, kaba, len laimo dan toua. Sug emen emedebeij Kaisareohob, kaba, emen emaugwan emeinesa sud hom, moho Kornelius, men tu.

¹³Hanoba en ecic dou emen dag lona homoi nosa, kaba, en eiya malaikad hom en edebeij en se men tu.

¹⁴Dara en ecic dou emen dag malaikad arougb en naugb en esa men lusud leihweda se Yope naugb len ledeiya sud hom, en moho Simon gedig lusud leija en moho toua dag Petrus. Dauntoba en esai dau areg geic maireseb huhugb dou en dara men lusud laugwan toua.

¹⁵Doba irir sug dan debiji naugb dan desai Mer Geigouhw eisaugb Krisdus dou len, kaba, Mena Gogoufu einesa len laugwan merdoc mes, aninim dag en einesa maman mamdoc mes se Lona Pentakosda sug nosa touohob.

¹⁶Sug dan deiya dau gin, kaba, dan indoc eiseisan areg maman Adehsud en os dou maman sug nosa touohob, endagai: Yohanes, kaba, en ogun yen se duhu dous. Doba cum, kaba, Allah emesa Mena Gogoufu se yen meigdoc mes namcir.

¹⁷Sug Allah esa Mena Gogoufu eb ainyes se lugmahara merdoc mes, aninim dag en esa en se maman mamdoc mes se lona sug maman mamdoc ebdebin an maman Adehsud Yesus Krisdus sug nosa touohob, kaba, dani garena, hang dan demen dougwo Allah en an gina? Naro.

¹⁸Sug len louman Petrus mer an ginohob, kaba, len lemenara gouji dou Petrus deitero. Doba len lagahugouhw an Allah an gin dous. Hanoba len lenara doum, lendagai: Dag gin, kaba, ansins misen dou maman dag Allah eic cumougt dou lugmahara naugb len lesga meren sesar asesa dou en. Dauntoba len lemomom se dum smougb touwero, doba en eic maireseb menau geb huhugb dou len. Aninim dag en eic cumougt dou mamang Yahudi sug nosa naugb gin touohob.

¹⁹Doba leng gedig len lougb laisoboro dau Yerusalem sug leng Yahudi leic gomom dou Sdepanus, hanoba len lebiji naugb len leic mog erij dou leng Krisden gus toua, kaba, ligbum len lougb dig leng Pinisia meren hancob. Dara ligbum, kaba, len lougb se Lomos Siprus. Dara ligbum deit, kaba, len lougb laisoboro dig beimes, moho Antiokia, toua. Sug len ledebeij sungga sunggohob, kaba, len lesai Mer Geigouhw eisaugb Krisdus dou lusud. Doba dou mersir dau Yahudi aiyei dous.

²⁰Doba lingma, kaba, sug len ledebeij beimes Antiokiohob, kaba, len lebiji naugb len lesai Mer Geigouhw eisaugb maman Adehsud Yesus dou lugmahara toua. Anai len gin, kaba, dau leng Yahudi dau Yerusalemero. Doba leni Krisden gedag lugun dau Lomos Siprus dara beimes, moho Kirene, dous.

²¹Dangga sug len lesai Mer Geigouhw dou lugmahara, kaba, Allah ousa len dara men goubesa naugb gin toua. Hang leinyana gougwa dau len gin, kaba, len lemecguna dou meren seiseij dag nosa deitero, doba len leineg dau namcir. Hanoba len leigdoumesa maman Adehsud Yesus en moho dag meren mougt mera medam deit.

²²Sug leng se goucimdeb se Yerusalem len louman dau gin, kaba, len lesa Barnabas dig Antiokia naugb en edogod dougwo ginahabi.

²³Dangga sug en edebeij cinogo ingga, hanoba en eiya, doba Allah eic geigouhw aingma aingma dou lugmahara touohob, kaba, en agahugouhw an Allah toua terimda. Hang en emenara emad len merdoc mes ucan deit. Dauntoba len lemobsara dau maman Adehsud ginero. Doba len laiyan merdocesem naugb len laimo en dara len merdoc augwan namcir.

²⁴Barnabas eicara dag gini, anai en, kaba, en medoc edag beim an lusud. Dara en medoc ebdebin an maman Adehsud toua dag misen namcir. Anai Mena Gogoufu atij an en medoc mes naugb eic goubesa medam dou enohob. Dangga hang, enin toua arautut lusud leinyana aud maman Adehsud naugb len merdoc ebdebin an en toua.

²⁵Sug Barnabas esulou len dauwohob, kaba, en eihwedig cinogo Tarsus naugb en edehilon dougwo Saulus.

²⁶Sug en edebeij enohob, kaba, lan lacicugb dig Antiokia en deit. Dangga sug lan ladebeijohob, kaba, lan latou desij leng merdoc ebdebin an Yesus sungga se arisogomoc hom naugb lan ladidib meijouhw eisaugb Yesus augwan asesa dou len toua. Dara se cinogo Antiokia gini, kaba, lusud lebiji naugb leija Yesus men logodeh dag Krisden aimougtut toua. Anai len leigdoumesa en moho dag meren mougt mera medam dous.

²⁷Doba sug Barnabas dara Saulus lan marugwengga se cinogo Antiokia gin, kaba, merug hosa dau leng lesai Allah moro naugb aremer. Dara len meru ouforoho naugb len lens dau areg se lona daiyamo gacin dou lusud toua, kaba, len len dau Yerusalem aud len sugin toua.

²⁸Sug len ledebeij lenohob, kaba, sud hom dau len, en moho Agabus, en eisa besa. Hanoba en enara dou goucimdeb len laugwan toua, endagai: Cum, kaba, sir gogoufu emeinesa cinogo augwans. En enara deb dag gini ogdoc Mena Gogoufu men goubesa. Anai Mena Gogoufu ens gin dou enohob. (Sir gini ebiji sug Klaudius en edag leng Roma meren mougt mera medam naugb lenohob.)

²⁹Sug leng Krisden se cinogo Antiokia len louman dau gini, kaba, len lohw merdocedoum naugb len lesa meren aregoufu dou len meraguner dara merdamouwer se leng Yudea meren hancob, aimo dau areg astesda sud hom yom en esma toua. Anai sir gogoufu ebiji se meren hancob ginohob.

³⁰Sug len louci augwan gini debinimohob, kaba, len larougb Barnabas dara Saulus lan an naugb lan loho dou mougtir se leng Yudea meren hancob gin toua.