Read Manikion KISAH 13 Bible Online

KISAH 13 - Manikion bible

KISAH 13

¹Doba se goucimdeb se Antiokia gin, kaba, lusud merug hosa len toua merugwengga, gedig Allah eigdoumesa len meroho naugb sug len lesai en moro eisaugb aremer aingma aingma. Dara en eic mou ouforoho dou len naugb len lens dau ara ara se lona daiyamo gacin augwan asesa dou lusud. Dara ligbum deit, kaba, en eic mou ouforoho dou len naugb len ledidib dau Allah en Mer Geigouhw eisaugb Krisdus meijouhw augwan asesa dou lusud toua. Len meroho dag Barnabas, dara Simeon gedig len leija en moho toua dag Adeh Gogor, dara Lukius dau cinogo Kirene, dara Manahen gedig mougt mera medam Herodes lan laiji aninim, dara Saulus toua.

²Dangga se lona hom sug len lesijaresa maman Adehsud, dara len lehig dau ared naugb locuncum dou en toua, kaba, Mena Gogoufu enara dou len, endagai: Yen youci Barnabas dara Saulus lan dou dan. Hanoba yen yeigdoumesa lan maroho, dauntoba lan laicara laimo dau areg dan desedeb naugb lan touohob.

³Dangga sug len lehig dau ared dara len locuncum dou Allah bouwa dauwohob, kaba, len lob len merisira se lan marugt, bansins dag Allah ouci lan debinim naugb sug lan lasai Mer Geigouhw eisaugb Krisdus dou lusud toua. Hanoba len lesa lan laihweda namcir.

⁴Dangga hang, sug Mena Gogoufu arougb lan dag ginohob, kaba, Barnabas dara Saulus lan laihwededau cinogo Antiokia dig cinogo hom se dum mebera, moho Seleukia. Sug lan ladebeij cinogo inggohob, kaba, lan laisa ij dau sungga dig lomos, moho Siprus. Hanoba lan ladebeij cinogo hom, moho Salamis, se lomos ingga toua.

⁵Sug lan ladebeij Salamis ginohob, kaba, lan lasai Allah en Mer Geigouhw eisaugb Krisdus dou leng Yahudi se meren tuari sungga augwan. Dara Yohanes gedig len leija en moho dag Markus, en ousa lan toua.

⁶Sug lan lasai Allah en mer dou leng se Salamisohob, kaba, lan lasai Allah en mer gini dau sungga, terimda lan ladebeij cinogo hom, moho Papos, dig lomos ingga nagama toua. Sug lan ladebeij Papos ginohob, kaba, lan lagasa sud hom dau leng Yahudi gedig en mou ouforoho dara men goubesa inggebga naugb en eic gomom dou lusud. Dara en agaresa len merdoc mes aud ara ara sungga toua. En moho Bar-Yesus, era Yesus meisi. Sud hom gin, kaba, en eimiman enin moho deseino lusud se Papos ingga, dag Allah eigdoumesa en moho naugb sug en esai en moro eisaugb aremer aingma aingma dou lusud. Dara en eic mou ouforoho dou en naugb en ens dau areg se lona daiyamo gacin augwan asesa dou len toua. Dobnaro. Eni sud hom dag areibahau dous. Dangga hang, areg en emesai gin, kaba, dag areibahau toua namcir.

⁷Dara Bar-Yesus gin, kaba, Sergius Paulus gedig en edag mougt mera medam gesedougwo Lomos Siprus gin, kaba, en eija en dag en mesi touohob. Doba Sergius Paulus gin, kaba, en mou ouforoho dara en mou obrugb an aremer einyana namcir. Dangga hang, sug en ouman, doba Barnabas dara Saulus lan lasai Mer Geigouhw eisaugb Krisdus dou lusud, kaba, en acgeij lan lan aud en, dauntoba lan lasai Allah en mer gini, ingma dou en toua.

⁸Doba Elimas, kaba, en emouwan naugb Barnabas dara Saulus lan lamesai Mer Geigouhw eisaugb Krisdus dou Sergius Paulus touwero. Anai men gagaresa gin, kaba, eic dag Sergius Paulus od mena debsa en an gin toua terimdohob. Dangga hang, en emenara emaugtarera dougwo en, dauntoba en emouman Mer Geigouhw gin touwero, doba en eigtou dau namcir. (Elimas gini aninim dag Bar-Yesus, doba sug len leija en moho se Grika mer, kaba, len leija en dag Elimas.)

⁹Doba Mena Gogoufu atij an Saulus medoc mes namcir naugb en eic goubesa medam dou en toua. Doba lugmahara, kaba, len leija Saulus en moho toua, dag Paulus. Dangga sug Mena Gogoufu eic geic mos dou enohob, kaba, en ei mairesi dara Elimas.

¹⁰Hanoba en esa mer debin en, endagai: Ban bedag Bilis meh ban teiteiyohob. Anai ban bedag sogo maga dougwo lusud sug len louwan laimo areg asesa Allah enin medoc mes. Dara ban abu agamgema, hang ban bemarges dau sug ban besma areg geigouhw dau lusud merisira touwero. Doba ban bouti maman Adehsud men ucina gobosboro gin naugb sug en eigdoc lusud dau sesar men gogom aud maireseb menau geb huhugb agabgebi dag gini toua namcir.

¹¹Dangga hang, ban bouman dan indir deigeigouhwahabi. Anai maman Adehsud, kaba, en eh mesira dougwo ban abiresohob, ban bemeiya lo asesa se lona aibibra touwero. Doba ban abires mougb dous. Sug Paulus enara dou Elimas dag gin inegohob, kaba, areg dag umer gogor eb dougwo en mairesi toua, bebeigbogo namcir. Dangga, kaba, en ou mesira baihiron dougwo lusud, dauntoba sud hom ingma dau len, en os en mesira naugb einoisa en dig men tueda toua.

¹²Sug mougt mera medam Sergius Paulus en eiya dau gin, kaba, en medoc ebdebin an Yesus. Dara areg Barnabas dara Paulus lan lasai eisaugb maman Adehsud gin dou en, kaba, eic dag en medoc omom an gin toua namcir.

¹³Sug Barnabas dara Paulus lan lasai Mer Geigouhw eisaugb Krisdus se Lomos Siprus edeinyumohob, kaba, Paulus an mesir len laugwan leisa ij dau Papos dig cinogo hom, moho Perga, se leng Pampilia meren hancob deit. Doba Yohanes gedig len leija en moho toua dag Markus, kaba, en ecicugb dau len sungga dig Yerusalemeda.

¹⁴Doba leng gus, kaba, len lec merohora dau sungga terimda len ledebeij cinogo hom, moho Antiokia, se leng Pisidia meren hancob deit. Dangga sug leng Yahudi meren Lona Gemeicaresero edebeijohob, kaba, len leisa Ari dara len se meren tuari toua. Sug len leinesa tuari ginohob, kaba, len leigtou desij leng Yahudi gin toua.

¹⁵Sug len lecic dau Musa men gomnomna dara leng lesai Allah moro sug nosa meren surad ingma bouwa dauwohob, kaba, mougtir gesedougwo goucimdeb ingga, kaba, len larougb sud hom aud Paulus an mesir naugb en eijidougwo len, endagai: Emagunerij, yen youwan yebir emen emdoc mes dara yen youwan yenara yad emen medoc mes, kaba, emen emeic cumougt dou yen deit naugb yen yebedbed dou emen iteitogini toua.

¹⁶Dangga sug Paulus en eisa besohob, kaba, en ecgun mesira debin len. Hanoba en enara dou len, endagai: Yeng dau mamang Israel, dara yugmahara gedig yen yesijaresa Allah gin touohob, kaba, yen yaugwan youman dan indir deigeigouhwahabi.

¹⁷Anai emeng Israel emen Allah gin, kaba, en ouci maman mamjemouwer debinim dag enin men meijouhuda deb sug nosohob. Dara en oiharaga len sug len ledag lugmahara se cinogo Mesir naugb len leh merih terimda len lebedero toua namcirohob. Hanoba en esga len dara en ecgun mesira debin len naugb en ahwan len dau cinogo ingga ogdoc men goubesa medam gin toua.

¹⁸Dara sug len lec merohora se lomougwisa se arisogomoc sud hwai, kaba, en emarges dau len touwero. Doba en eigtou ateteij len, hanoba en eseyeiyo len dara en agauwesa len sug len leicara gecgu an en toua terimda.

¹⁹Dara en eic gomom dou meijouhuda senggai dau lugmahara se leng Kanaan meren hancob dou len toua. Hanoba en ekeba cinogo gini an men lusud maman mamjemouwer len laugwan dag lenin meren deit.

²⁰Doba sug len latou se cinogo Mesir, hanoba len lec merohora se lomougwisa arisogomoc sud hwai, terimda en ekeba leng Kanaan meren hancob dou len, kaba, augwan gini adedim bedebeij arisogomoc huntun hogu mos sergem edeisu toua. Dangga sug en ekeba hancob augwan graga dou lenohob, kaba, en eigdoumesa leng ledag mofu merug hosa naugb len, terimda edebeij lona sug sud hom gesai Allah moro nosa, moho Semuel, en edag mofu naugb len toua deit.

²¹Doba se lona sug Semuel en edag mofu naugb len gin, kaba, len lenara ucucugb dou Allah dag en emeigdoumesa leng mofu naugb len deitero. Doba len lacgeij naugb en eigdoumesa sud hom edag mougt mera medam naugb len dous. Dangga hang, Allah en emousa deisa len merir an. Hanoba en eigdoumesa Kis meisi, moho Saul, dau meijouhuda Benyamin, en edag meren mougt mera medam naugb en esedougwo len se arisogomoc sud hwai toua deit.

²²Doba sug Allah asid en dauwohob, kaba, en eigdoumesa sud hom, moho Daud, en edag mougt mera medam naugb len deit. Anai en enara eisaugb en dag gin deb nosohob, endagai: Isai meisi Daud gin, kaba, en edag sud hom gedig dan indoc gororougb en namcir, anai en emedreg dan indir touwero. Doba en owun enin medoc mes arjaga naugb en aimo areg dan darougb en an gin toua terimda.

²³Dara en eigdoumesa Daud medebeito hom, moho Yesus, enin eng naugb en edag Sud Hom Geigdoc Mamang Israel Dau Sesar Men Gogom Augwan toua. Anai gini aimo dau areg en os dou maman mamjemouwer sug nosohob.

²⁴Doba sug Yesus emebiji naugb sug en esai Allah en moro dou maman lusud Israel ginbuma, kaba, Yohanes en dou len deb, endagai: Yen yesga meijen sesar, dara yen yahau an dougwo namcir. Hanoba dan dogun yen se duhu, bansins debin gin deb naugb sud hom sug en en gin toua.

²⁵Dara deinyor sug Yohanes men geicara ouwedoc, kaba, en enara dou len deit, endagai: Yen youdesa dan dedag sud hom gedig yen meigdoc ebehibeh naugb en, dauntoba en eigdoc yen dau sesar men gogom augwan touei? Naro, dan demedag sud hom ginero. Doba yen youman dan indir deigeigouhwahabi. Anai cum, kaba, sud hom gin en emaimo ucan dans. Dara dan demedeinyum naugb sug dan demesga men aumaga dau hwigbeimos icira en mohora touwero. Anai en moho agas medam namcir.

²⁶Doba indagunerij, gedig yen yedag Abraham medebeitor yen, dara yeng yugmahara gedig yen yesijaresa emen Allah dara yen yahau en touohob, sug Allah esa en mer ogdoc Krisdus dou maman dag en ouwan eigdoc maman dau sesar men gogom aud maireseb menau geb huhugb gin deit, kaba, en emesa en mer gini dou leng se Yerusalem an meren mougtir len laugwan touwero. Doba en esa en mer gini dou maman dous.

²⁷Anai len gin, kaba, len merdoc emeica Yesus dag Allah eigdoumesa en moho naugb en eigdoc len dau sesar men gogom augwan. Dara astesda Lona Gemeicaresero sug len lecic dau areg leng lesai Allah en moro len log deb se meren surad eisaugb Krisdus gin, kaba, len meru emobgesa areg len lecic gini meijouhw augwan asesa touwero. Anai len meru emaiyero namcirohob. Doba inggaida. Anai sug len logod aremer gomom deinaugb en, hanoba len letob en se sogo salib, kaba, len laimo dau areg leng lesai Allah en moro len log deb eisaugb Krisdus ginohob augwan an en toua. Doba areg len leicara laimo gin, kaba, dag augwougb dous.

²⁸Anai len lemesma aremer hom naugb sug len laic gomom dou en touwero. Doba len leic merus naugb logod aremer gomom deinaugb en. Hanoba len larougb Pilatus naugb en etob en se sogo salib toua.

²⁹Dangga sug len leicara lesogwa deisa areg leng lesai Allah moro sug nosa len merugtimei mohw an enohob, kaba, len leic en maga dau sogo salib. Hanoba len ledec en se igdohos mes toua.

³⁰Doba Allah, kaba, eigdoumesa Yesus dau gomom ucugb. Hanoba en edens enin ainyes dou men logodeh areg len laimo en dau Galilea dig Yerusalem len laugwan se lona einyana debin gin toua. Hang len lemouma debin gin dou leng Israel len laugwan toua, anai len leiya dau augwan gini dag misenohob.

³¹

³²Dangga emen toua, emedebeij yen sugini naugb emen emesai Mer Geigouhw eisaugb Yesus gin dou yen.

³³Anai sug Allah eigdoumesa Krisdus dau gomom ucugb, kaba, esogwa deisa areg en os dou maman mamjemouwer augwan an maman. Anai maman madag len merdebeitor maman touohob. Dara areg Allah os dou len deb, kaba, dag se lona daiyamo gacin en emesa sud hom aud maman, dauntoba maman mamom terimdero. Doba en eigdoc maman dau sesar men gogom augwan aud maireseb menau geb huhugb gin toua namcir. Dara sug Allah eigdoumesa Yesus dau gomom ucugb gin, kaba, augwan gini esogwa deisa areg Allah enara dou en se Ugwaremer gedig hwai an gin deb sug nosa touohob, endagai: Irogini, kaba, dan dedag ban Abina. Dara ban bedag dan Indisi toua deitohob.

³⁴Dangga toua, eisaugb sug Yesus emomom deitero, doba Allah eigdoumesa en dau gomom ucugb naugb sug en maireseb huhugb terimda, kaba, Allah enara se Surad Injil Meb Mohon dag gin dou en, endagai: Areg dan dos dou ban abjemouwa Daud dag ban beperwei en mohw se men maija moc beb huhugb terimda, kaba, dan demeperwei dan indoc mes an gin deitero, doba ebsugeb naugb ban namcir. Anai areg dan dos dou en gin, kaba, en dau danin indoc mes gecabeci. Hang se geica namcir touohob.

³⁵Dara Daud enin eng erba Ugwaremer an gin deb sug nosa touohob, endagai: Ban bemamsoho aban sogougb gedig en medoc hom dou banohob, kaba, en maga emetaha deb se cinogo mes touwero. Doba ban besedougwo en dau gin namcir.

³⁶Doba Daud gin, kaba, sug en aimo areg asesa Allah enin medoc mes sug nosohob, doba en toua omom. Hanoba len lec en maga desij maman mamjemouwer ben etaha deb touohob. Hang areg Daud en erba Ugwaremer an gin, kaba, en emerba an eninero, doba eisaugb Yesus hom gin dous.

³⁷Anai en, kaba, Allah eigdoumesa en dau gomom ucugwohob. Hang en maga emetaha deb touwero. Doba en maireseb huhugb terimda.

³⁸Dangga hang, dan indagunerij, emen emouwan dauntoba yen yaugwan yecinaga dag areg emen emesai dou yen naugb sug Allah aigdougwo meijen sesar augwan dau yen namcir, kaba, dag augwan gini ogdoc sug Yesus en omom taiba sogo salib naugb meijen sesar gin dous.

³⁹Dara emen emouwan naugb yen yecinaga dag gareg en medoc ebdebin an Yesus dag misenohob, kaba, Allah eigdoc en dau sesar men gogom augwan toua namcir. Anai Musa men gomnomna gin, kaba, emedeinyum naugb sug eigdoc yen dau sesar men gogom augwan ginero.

⁴⁰Dangga hang, eigouhw naugb yen yemesbes an areg emen emesai dou yen touwero. Doba yen yei meijums deinaugb gin deigeigouhw namcir. Dauntoba gogom areg maman Adehsud eic dou maman mamjemouwer sug nosohob, kaba, augwan emobsara debin yen, aninim dag len touwero. Doba en amsoho yen dau gin dous. Anai en enara dou len ogdoc sud hom gesai en moro se Surad Injil Meb Mohon deb sug nosa touohob, endagai:

⁴¹Yen youman dan indir an areg dan den dou yen gini augwan deigeigouhw namcir. Anai cum, kaba, dan daben aremer hom abeba yen meijiresi sug yen meijiresebaba gedig yen meigdoc emeica. Dara yen meigdoc emobgesa sug sud hom ens meijouhw dou yen touwero. Doba yen meiju emaiyero an gin dous. Dangga hang, sug yen yeimiman dau ginohob, kaba, eic gomom dou yen toua. Anai yen yesbes dan an areg dan darougb yen an gini toua namcirohob.

⁴²Sug Paulus dara Barnabas lebiji naugb lan laihwededau leng Yahudi meren tuari, kaba, lusud laugwan lenara dou lan, lendagai: Lona Gemeicaresero gen daiyamo gacin, kaba, yan yan naugb yan yans meijouhw dau augwan gini ingma dou emen deitahabi.

⁴³Sug len lenara dou lan dag ginohob, kaba, len leihwededau tuari dig meren tueda. Doba leinyana dau leng Yahudi, dara lugmahara gedig len laimo leng Yahudi se Musa men gomnomna, dara len laimo len naugb len lesijaresa maman Adehsud gin touohob, kaba, len leila ucan Paulus dara Barnabas lan toua. Dangga sug len lec asa ucina dag gin, kaba, lan lanara lad len merdoc mes, dauntoba len lemobsara dau geigouhw areg Allah eic dou lenohob gini touwero. Doba len laiyan merdocesem naugb len laimo augwan gin terimda. Anai Allah medoc an len namcirohob.

⁴⁴Dangga edebeij Lona Gemeicaresero deit, kaba, leng se cinogo ingga len laugwan len len naugb len louman dau sug Paulus esai maman Adehsud en mer eisaugb Yesus dou len deit.

⁴⁵Sug leng Yahudi gus len leiya, doba leng Antiokia len laugwan len louwa aud Paulusohob naugb sug len louman dau areg en ebedbed dou len gin, kaba, len merdoc esdigeij en an namcir. Dangga hang, len lenara laugbtarera dougwo en mer an areg en enara dou len eisaugb Yesus. Dauntoba len merdoc emebdebin an Krisdus gin touwero, doba len leigtou dau gini namcir. Hanoba len lenara dou lusud, lendagai: Areg Paulus ebedbed dou yen gin, kaba, augwan dag misenero. Doba dag en ereiyara dou yen dous. Dau, kaba, len lenara ceg ceg en toua.

⁴⁶Doba Paulus dara Barnabas lan laic marus edreg dau nosa deit. Hanoba lan lanara dou leng Yahudi meren mougtir graga, landagai: Aman amesai Mer Geigouhw eisaugb Krisdus sug aimougtut gini dou yen. Anai gini aimo dau areg Allah esedeb naugb aman sug nosohob. Doba yen, kaba, yen yemouwan en mer ginero. Dangga hang, emen emarges yen deb namcir. Hanoba emen emeihweda se cinogo gus naugb emen emdesai Allah Mer Geigouhw gini dou meijouhuda dau lugmahara dous. Anai sug yen yohoiya en mer dag ginohob, kaba, yen yens yenin ainyes dag yen meigdoc emeisa naugb maireseb menau geb huhugb gin touwero. Doba yen youwan yeigtou dau gin dous.

⁴⁷Emen eicara dag gini, anai maman Adehsud arougb emen naugb sug emen emesai en mer eisaugb Krisdus dou lugmahara laugwan toua, aimo dau areg enin eng arougb Krisdus an se Surad Injil Meb Mohon deb sug nosa touohob, endagai: Dan deigdoumesa ban bedag mouf naugb lugmahara se cinogo augwan. Dauntoba ban bedag ucina geihwedaud maireseb huhugb naugb lusud se cinogo gin augwan toua.

⁴⁸Sug lugmahara graga len louman Paulus mer an gin, kaba, len merdoc agahugouhw an Allah. Hanoba len lenara doum, lendagai: Adehsud en mer gini, kaba, eigouhw naugb maman namcir. Dangga gareg dau len ingga areg Allah esedeb len dau acgunogohob naugb sug en eic maireseb menau geb huhugb dou len, kaba, len laugwan merdoc ebdebin an Yesus toua.

⁴⁹Hang Mer Geigouhw eisaugb maman Adehsud gin, kaba, agaha becinten leng se Pisidia meren hancob augwan namcir.

⁵⁰Doba leng Yahudi meren mougtir len lococ lusud gedig len meroho agas se cinogo ingga len laugwan. Dara len lococ ligida lugmahara gedig len meroho agas leinyana merdoc mes dau gin namcir. Anai len gin, kaba, len toua merdoc aninim dara leng Yahudi naugb len laimo Musa men gomnomna, dara lesijaresa Allah enohob. Dangga hang, sug leng Yahudi meren mougtir leineg len laugwan merdoc mes naugb lebemocedou Paulus dara Barnabas lanohob, kaba, len leic mog erij dou lan. Hanoba len locirma lan dau meren cinogo ingga toua.

⁵¹Doba Paulus dara Barnabas, kaba, lan latir marohora an leng Antiokia ingga meren cinogo mor ucugb debin len deb. Anai gini ansins dag lan, kaba, gogom emeb deinaugb lanero, doba eb naugb lenin dous. Hanoba lan laihwededau len dig cinogo Ikonium deit.

⁵²Doba leng merdoc ebdebin an Yesus se cinogo Antiokia ginohob, kaba, len lagahugouhw an Allah namcir. Dara len merdoc atij an Mena Gogoufu men goubesa toua.