Read Manikion KISAH 15 Bible Online

KISAH 15 - Manikion bible

KISAH 15

¹Sug Paulus dara Barnabas lan marugwengga se Antiokia gin, kaba, leng Krisden merug hosa dau leng Yahudi se leng Yudea meren hancob len naugb ledebeij len sungga toua. Doba sug len ledebeij lenohob, kaba, len lenara laineg leng Krisden dau lugmahara merdoc mes, lendagai: Sug yen yemaimo Musa men gomnomna naugb yen yec meijus dau, dara yen yemaimo men gomnomna aud gousanara touwero, kaba, Allah emeigdoc yen dau sesar men gogom naugb en eic maireseb menau geb huhugb dou yen touwero. Doba meijen sesar eb naugb yen terimda toua.

²Doba sug Paulus dara Barnabas lan lauman dau gini, kaba, lan lanara laugbtarera dougwo len merir an gin namcir. Sug len lenara laisedim eisaugb gin terimda, kaba, leng se goucimdeb se Antiokia gin, kaba, len larougb Paulus dara Barnabas an meren lusud merug hosa dig Yerusalem naugb len leden aremer gin dou Yesus men logodeh merug sisa hobjerai dara mougtir len laugwan sungga toua. Anai len ledag gembala mebin naugb lenohob.

³Sug goucimdeb ingga larougb len an dag ginohob, kaba, len ledarges len dig liga medigo, hanoba len leihwedig Yerusalemeda. Doba sug Paulus, dara Barnabas, an mesir, len leraga leng Pinisia dara Samaria meren hancob aud Yerusalem dag gin, kaba, len lecic dau sug lugmahara se cinogo gus len leineg dau meren seiseij naugb len laimo Allah enohob men meijouhw augwan asesa, amomo dou leng Krisden sungga sungga toua. Sug len meraguner dara len merdamouwer leng Krisden sungga sungga len louman dau gin, kaba, len lagahugouhw medam an Allah icira gin toua namcir.

⁴Dangga sug len ledebeij Yerusalem ginohob, kaba, leng merug sisa hobjerai dara mougtir gus an goucimdeb len laugwan lebin len. Hanoba Paulus dara Barnabas lacic dau Allah men geicara areg ogdoc lan dou lugmahara meijouhw augwan asesa dou len toua.

⁵Doba merug hosa dau leng Parisi gedig len merdoc ebdebin an Yesusohob, kaba, len leisa lesa. Hanoba len lenara dou len laugwan, lendagai: Esloulougb naugb maman man dou lugmahara gedig len merdoc ebdebin an Yesusohob, kaba, len toua lec merus dau. Dara len laimo Musa men gomnomna an gousanara augwan touahabi. Anai augwan gini aimo dau areg Allah ogod an deb naugb maman sug nosohob.

⁶Sug Yesus men logodeh merug sisa hobjerai dara mougtir louman dau gini, kaba, len led debinim naugb len lenara eisaugb aremer areg leng Parisi len len dou len gragohob.

⁷Doba sug len merir agadadem eisaugb gin terimdohob, kaba, Petrus en eisa besa. Hanoba en enara dou len, endagai: Indagunerij, indagtorij, yen yecinaga dag sug nosa, kaba, Allah en ouci dan naugb dan desai Mer Geigouhw eisaugb Krisdus dou leng lugmahara. Dauntoba sug len louman Mer Geigouhw gini, kaba, eic cumougt dou len naugb len merdoc ebdebin an Yesus toua. Anai gini aimo dau areg asesa Allah enin medoc mes ginohob.

⁸Dara en emouma debin gin toua naugb sug en esa Mena Gogoufu se len merdoc mes, aninim dag en esa Mena Gogoufu gin se maman mamdoc sug nosa touohob. Anai enin eng ecinaga areg geb se lusud merdoc mes augwan dag misen namcir.

⁹Hang en emesi maman hom dous emedreg dau len touwero. Doba en edu len merdoc mes ecabeci dau sug len merdoc ebdebin an Yesus, aninim dag en edu maman mamdoc mes ecabeci dangga sug nosa touohob.

¹⁰Sug Allah edu len merdoc ecabeci, aninim dag mamanohob, kaba, dagiro, naugwe hang, yen yemarougb lugmahara gedig len merdoc ebdebin an Yesusohob naugb len lemec merus dau? Hanoba len lemaimo Musa men gomnomna an gousanara gin toua? Yen youwan yainyen Allah naugb sug len ledreg dau gomnomna gin, kaba, yen yemeiya dag en emeic gogom dou lendei? Era naroei? Anai Musa men gomnomna gin, kaba, dag aguci medam namcir. Hang maman mamjemouwer dara maman toua mamaimo gin augwan touebma.

¹¹Dangga yen yemos debin gin terimlo. Anai Allah emeigdoc mamang Yahudi dau sesar men gogom emogdoc sug maman mamec maman mamus dau, dara maman mamaimo Musa men gomnomna aud gousanara gin touwero. Doba en eigdoc maman dau sesar men gogom aud maireseb menau geb huhugb ogdoc sug maman mamdoc ebdebin an maman Adehsud Yesus gin dous. Aninim dag Allah eigdoc leng lugmahara dau sesar men gogom ogdoc sug len merdoc ebdebin an maman Adehsud gin touohob. Anai maman Adehsud gin, kaba, en medoc an maman. Hang en omom taiba sogo salib naugb maman maugwan maman sesarohob.

¹²Sug Petrus esulou len dougwo ginohob, kaba, len merir emagadadem deitero, doba len laugwan lodinanir namcir. Hanoba len leigtou loc merums naugb sug Paulus dara Barnabas lacic dau ganusbus dara gansins areg Allah eic goubesa dou lan sug lan lasai Mer Geigouhw gini dou lugmaharohob dou len toua.

¹³Sug lan lacic dau aremer augwan gin dou len dauwohob, kaba, Yakobus, Yesus magto, ouma debin ucan dou len deit, endagai: Dan indagunerij, Simon ecic dou maman dau sug Allah ouci leinyana dau lugmahara dag enin men lusud touohob, kaba, en ens enin ainyes aimougtut dou maman dag en medoc an mamang Yahudi dousero, doba dag en medoc eineg an leng lugmahara toua namcir. Yen youman dan indir an areg dan den dou yen gin deigeigouhwahabi.

¹⁴

¹⁵Anai areg Simon en ecic gin, kaba, misen namcir. Anai esogwa deisa areg maman Adehsud en enara deb dou sud hom gesai en moro, moho Amos, deb sug nosa touohob, endagai: Se lona daiyamo gacin, kaba, dan demecicugb naugb dan demouci Daud medebeitor len laugwan dag indan meijouhuda hom ucugb deits. Anai se lona ingga, kaba, len ledag tu geij gaisoborohob. Doba areg odgodohob, kaba, dan demesinsin augwan se mohw ucugb toues. Sug dan deigdoumesa Daud medebeitor len meroho agas ucugb dag ginohob, kaba, lusud se cinogo augwan len lehilon dan. Dara lugmahara gedig dan douci len debinim dag danin indan lusud deb sug nosohob, kaba, len laugwan len aud dan se lona ingga toua. Danin meijen Adehsud denara dangga dou yen. Hang dan demens dau augwan gini dou len deb touohob.

¹⁶

¹⁷

¹⁸

¹⁹Sug Yakobus ecic dau areg graga augwan dou lenohob, kaba, en enara dou len ucan deit, endagai: Sug Allah ouci lugmahara debinim dag enin men lusud dag gin touohob, kaba, dan dogod an dag maman mameigdoumesa gogom debin lugmahara gedig len leineg aud enohob naugb len lemaimo Musa men gomnomna toua deitero.

²⁰Doba maman mag surad dou len naugb maman man dougwo len, dauntoba len lemet mog gedig lusud lesijaresa dou seiseijero. Hanoba len lemogo ara gaihim, dara len lemohw meraga doum debin gini. Dara len lemet mog gedig mogwihi omgomsa, dara len lemeg aremeta mogwihi toua deitero. Doba len lehig dau gin namcir, anai sug len let mog gedig lusud lesijaresa dou seiseijohob, kaba, eic gogor dou len deseino maman Adehsud touohob.

²¹Maman man dougwo len an dag gini, anai astesda Lona Gemeicaresero, kaba, maman macic dau Musa men gomnomna se maman tuari se arisogomoc einyana. Hang agaha dou lugmahara se meren cinogo augwan touohob.

²²Sug Yakobus ogod an dag gin dou lenohob, kaba, Yesus men logodeh merug sisa hobjerai dara leng se goucimdeb an meren mougtir len laugwan louci sud hom, moho Silas, dara Sabas meisi, moho Yudas, lan lahwai gini naugb lan laucan Paulus dara Barnabas dig Antiokia. Dauntoba lan lans dau areg len logod an ginohob, meijouhw augwan asesa dou len toua. Anai lan gini, kaba, lan meraguner se goucimdeb len laugwan leigdoumesa lan maroho agas medam an maran geicara touohob.

²³Sug len louci lanohob, kaba, len leic surad dou lan naugb lan lado toua. Dara areg len log se surad dou leng Krisden dau lugmahara ginohob, kaba, len log dag gini, lendagai: Emeng dau Yesus men logodeh emug sisa hobjerai, dara emen mougt mera se goucimdeb se Yerusalem, kaba, emen emaugwan emou emagunerij, dara emagtorij se cinogo Antiokia, dara leng Siria dara Kilikia meren hancob, gedig yen yedag yugmahara yen yaugwan namcir. Anai emen emedag yen meijaguner se Krisdus naugb yen touohob.

²⁴Emen emog surad gin dou yen, anai emen emouman dag merug hosa dau emen goucimdeb sugini, kaba, len lecbo aud yen naugb len leic yen meigdoc momogo dara eijesa dou yen touohob. Anai len lebedbed dou yen dag yen meigdoc emebdebin an Yesus gin dousero. Doba yen yec meijus dau dara yen yaimo Musa men gomnomna an gousanara yaos dara touahabi, Allah emeigdoc yen dau sesar men gogom augwan aud maireseb menau geb huhugb gin touwero. Doba areg len lebedbed dou yen gin, kaba, emen ememarougb len an touwero. Doba len leic augwan dau lenin merdoc mes naugb len lebedbed dou yen dous.

²⁵Dangga hang, sug emen emoucimdeb, kaba, emen emohw emdocedoum. Hanoba emen emouci lahwai dau emen goucimdeb sugini naugb len laimo emen emsi Barnabas dara Paulus gedig emen emdoc gororougb lan aud yen se Antiokia toua.

²⁶Anai emen emsi lahwai gini, kaba, lan toua laohw marugt edug icira sug lan lasai maman Adehsud Yesus Krisdus en moro dou lusud mougwa einyana touohob.

²⁷Dangga hang, emen emarougb lahwai, lan maroho Yudas dara Silas, aud yen sungga. Dauntoba lan lans dau areg emen emog se surad gini meijouhw augwan asesa dou yen toua.

²⁸Anai Mena Gogoufu dara emen, kaba, emen emdoc dag homohob. Hang emen emen dougwo yen dag yen yemet mog gedig lugmahara lesijaresa dou seiseij, hanoba yen yemogo ara gaihim, dara yen yemohw yen meijaga doum debin gin, dara yen yemet mogwihi, dara yen yemet mog gedig mogwihi omgomsa touwero. Anai moho hogu gin, kaba, edag meiyo naugb maman maugwanohob. Doba Musa men gomnomna gus augwan, kaba, emen ememeigdoumesa gin debin yen naugb yen yemaimo toua deitero. Dangga hang, sug yen yehig dau moho hogu gin namcir, kaba, yen yaimo areg edag beim touohob. Gin dous. Meijiresou.

²⁹

³⁰Dangga sug len lesulou lahwai graga debin ginohob, kaba, len larges len ingga dig Antiokieda. Sug len ledebeij Antiokiohob, kaba, len leija leng Krisden laugwan lacinim. Hanoba len leic surad graga dou len toua.

³¹Sug leng se goucimdeb len louman dau areg leng se Yerusalem logod an lenohob, kaba, len merdoc agahugouhw medam an gin namcir. Anai areg len louman gin, kaba, eic dag len laiyan merdocesem deitohob.

³²Dangga, kaba, Yudas dara Silas lan laigtou desij lan maraguner dara mardamouwer se goucimdeb se Antiokia se lona einyana toua deit. Hanoba lan lans meijouhw dau areg mougtir len log se surad dou lenohob men meijouhw augwan asesa ucan dou len toua. Anai Allah eigdoumesa lan maroho naugb sug lan lasai en moro eisaugb aremer gin dou lusud touohob. Sug lan lans meijouhw dou len dag gin, kaba, lan lanara lad leng Krisden ingga merdoc mes. Dauntoba len merdoc emomomtomero, doba len laiyan merdocesem naugb len les agadgeij terimda toua.

³³Sug lang laigtou desij len se ari aibibra dag ginohob, kaba, leng se goucimdeb ingga, kaba, len merdoc arges dau lan toua. Dangga sug len locuncum aga lan dou Allah enohob naugb sug en eic gesgigouhwesa dou lan, kaba, len larges lan aud leng se Yerusalem ucugb. Anai len gin, kaba, len lesa lan aud leng se cinogo Antiokia sug nosohob. [

³⁴Doba Silas, kaba, en medoc acincin an leng se Antiokia gin namcir. Hang en emaimo Yudas naugb en emecicugb dig Yerusalem touwero. Doba en eigtou desij len se Antiokia deitaba.]

³⁵Dara Paulus dara Barnabas, kaba, lan lameihwedig cinogo gus touwero. Doba lan laigtou se cinogo Antiokia ingga se igda hosa naugb lan lasai Mer Geigouhw eisaugb maman Adehsud dou len sungga. Dara lan ladidib aremeijouhw augwan asesa dou len toua. Dara sug lan lasai Mer Geigouhw gini, kaba, lan marsir leinyana lousa lan se gin toua.

³⁶Sug Paulus dara Barnabas lasai Mer Geigouhw gini se igda hosa ginohob, kaba, Paulus enara dou Barnabas, endagai: Nanan naihweda naugb nanan nadoumouma dougwo nanaguner, dara nandamouwer se astesda cinogo sug nanan nasai Mer Geigouhw eisaugb nanan Adehsud dou lenohob. Dauntoba nanan naiya dag len merdoc ebdebin an maman Adehsud gin terimdei? Era len merdoc emtereta dau endohobei?

³⁷Dangga sug Barnabas ousa deisa Paulus an ginohob, kaba, en ouwan naugb Yohanes gedig len leija moho toua dag Markus en oucan lan toua.

³⁸Doba Paulus, kaba, en emouwan Markus gini en emoucan lanlo. Anai sug lan lasai Mer Geigouhw eisaugb Krisdus dou lusud sug aimougtut, kaba, en emoucan lan terimda edebeij sug ouwedocahabero. Doba en oguro dau lan se leng Pampilia meren hancob naugb en eisa ij ucugb dig Yerusalemohob.

³⁹Dangga sug lan lanara marir edregim icira en medam namcirohob, kaba, lan lamekebim. Barnabas, kaba, en ouci Markus. Hanoba lan laisa ij dig Lomos Siprus ucugbda.

⁴⁰Doba Paulus, kaba, en ouci Silas eperwei Barnabas graga en mohw naugb en aimo en deit. Dangga sug lan maraguner se Krisdus len locuncum aga lan naugb maman Adehsud eic geigouhw dou lanohob, kaba, lan lac acec leng Siria dara leng Kilikia meren hancob augwan gin toua. Hanoba lan lanara lad leng se goucimdeb sungga len laugwan merdoc mes toua, dauntoba len lemobsara dau Krisdus touwero. Doba len les agadgeij namcir.