Read Manikion KISAH 16 Bible Online

KISAH 16 - Manikion bible

KISAH 16

¹Sug Paulus dara Silas lanara lad leng se goucimdeb se leng Siria dara Kilikia meren hancob dauwohob, kaba, lan laihweda deit dig Derbe naugb lan lanara lad leng se goucimdeb sungga len laugwan merdoc mes toua. Dangga sug lan lanara lad len merdoc mes dauwohob, kaba, lan laihwedig cinogo Lisdra deit. Se Lisdra gin, kaba, Yesus men godeh hom, moho Timotius, en toua moongga se cinogo ingga. Sud hom gin, kaba, en mem dau leng Yahudi. Dara en medoc ebdebin an Yesus touohob. Doba en mena, kaba, lugmahara dau leng Grika.

²Dara leng merdoc ebdebin an Yesus se cinogo Lisdra gini, kaba, sud hom ingma emowun Timotius en moho an men geicara touwero. Doba len laugwan leigdoumesa en moho agas namcir. Anai men geicara augwan edag beim terimda. Dara leng Krisden se cinogo Ikonium, kaba, len laugwan leigdoumesa en moho an men geicara gedag beim gin toua.

³Dangga Paulus en ouwan Timotius naugb en aicira lan toua, kaba, en ec mos dau enahabi. Dauntoba gini emedag sogo maga dougwo leng Yahudi sug len lesai Mer Geigouhw eisaugb Krisdus dou lenero. Anai leng Yahudi se cinogo Lisdra dara Ikonium gini len laugwan lecinaga dag Timotius mena, kaba, eni lugmahara dau leng Grika. Hang en emec Timotius mos dau touebma.

⁴Sug Paulus ec Timotius en mos dauwohob, kaba, len lecic dau areg Yesus men logodeh merug sisa hobjerai dara goucimdeb se Yerusalem meren mougtir len logod anohob, meijouhw augwan asesa dou leng merdoc ebdebin an Yesus se astesda cinogo areg len ledebeij gin toua. Hanoba len lesulou meraguner gini, dauntoba len lemedreg areg len logod an ginohob, kaba, mougwa hom touwero, doba len laimo augwan gin terimda.

⁵Dangga goucimdeb len laugwan gin, kaba, len laiyan merdocesem naugb len merdoc ebdebin an Yesus bedreg dau nosa deit. Dara astesda lona, kaba, lusud leinyana lobsara aud len naugb len merdoc ebdebin an Yesus gin toua.

⁶Sug len lecic dau areg mougtir se Yerusalem len logod an gini dou goucimdeb augwanohob, kaba, len leihwedig leng Prigia dara Galatia meren hancob deit. Anai len louwan lesai Allah moro dou leng se Asia meren hancob. Doba Mena gogoufu en dougwo Paulus dara Silas naugb lan lamesai Allah moro dou len sungga touwero.

⁷Dangga sug len ledebeij leng Misia meren hancobohob, kaba, len lainyen naugb len leinesa leng Bitinia meren hancob deit, dauntoba len lesai Allah moro dou len toua. Doba Mena Gogoufu areg Yesus esa dou lanohob, kaba, en en dougwo len an gin toua namcir.

⁸Dangga hang, len leiwededau sungga, kaba, len larges meraga se leng Misia meren hancob, terimda len ledebeij cinogo moho Troas.

⁹Doba sug len latou se loba, kaba, Mena gogoufu ogod Paulus dag en omom namcir. Hanoba en eiya, doba sud hom dau leng Makedonia meren hancob, en esa desij en naugb en acgeij en an Allah mer eisaugb Krisdus gin, endagai: Yen gina, yen yeisa ij aud emen se Makedonia naugb yen yousa emen touahaba?

¹⁰Sug Paulus eiya gin dangga inegohob, kaba, emen emesedeb naugb emen emeihweda se leng Makedonia meren hancob namcir. Anai emen emohw emen emdoc anim dag areg Paulus en eiya ginohob, kaba, gini ansins dag Allah ouwan naugb emen emesai Mer Geigouhw eisaugb Krisdus gin dou len sungga toua.

¹¹Dangga sug emen emeisa ij dau Troas ginohob, kaba, emen emedebeij lomos Samotrake mougwo. Sug emen ematou sungga se loba homohob, kaba, emen emeisa ij dau sungga terimda emen emedebeij cinogo hom, moho Neapolis, se lonog deit.

¹²Dau sungga, kaba, emen emec emohora terimda emen emedebeij leng Makedonia meren beimes hom, moho Pilipi, geb se meren hancob gaimougtut ingga. Dara cinogo Pilipi gin, kaba, leng Roma meren mougt mera medam en moho aiga len touohob. Sug emen emedebeij cinogo ginohob, kaba, emen emehigben se lona hosa deb sungga toua.

¹³Dangga sug leng Yahudi meren Lona Gemeicaresero edebeijohob, kaba, emen emeihwededau cinogo ingga dig liga medigo aud usi hom geb deinyor duhu mebera. Anai emen emoudesa dag leng Yahudi meren usi naugb sug len locuncum dou Allah, kaba, eb sunggohob. Sug emen emedebeijohob, kaba, emen emeiya, doba ligida mogud eng loucimdeb naugb locuncum sungga dous. Dangga, kaba, emen emeigtou naugb emen emesai Mer Geigouhw dau Yesus dou len toua.

¹⁴Doba gida hom dau leng ingga, kaba, en moho Lidia, dau cinogo Tiatira. En gin, kaba, en ohw minc gedag lobeinya geirir mera eisaugb dou lusud. Dara en aimo leng Yahudi naugb en esijaresa Allah sug nosa touohob. Dangga sug en ouman Paulus esai Mer Geigouhw gini dou len, kaba, Adehsud eses en medoc mes naugb en ebin en mer an areg Paulus esai dou len toua namcir.

¹⁵Sug en medoc ebdebin an Yesus dag ginohob, kaba, emen emogun en dara leng leigtou desij en se men tu len laugwan se duhu toua. Sug emen emogun len laugwan se duhu dauwohob, kaba, Lidia oho mer debin emen, endagai: Indagunerij, yen youma debin dan, dag dan indoc ebdebin an maman Adehsud dag misenohob, kaba, yen yen naugb yatou desij dan se indan tu. Sug en aganini emen terimda, kaba, emen emousa deisa en mer toua.

¹⁶Doba se lona hom sug emen emeihwedaud leng Yahudi meren usi gedig len locuncum dou Allah se graga deit, kaba, emen emagasa gida sogougb hom gedig minderi eisa en medoc mesohob. Dangga hang, lusud lemeic aregoufu einyana dou men mougtir. Anai minderi eic mou ouforoho dou en naugb en ens areg acgunog dou lusud se lona daiyamo gacin dou len toua.

¹⁷Dangga sug en agasa emenohob, kaba, en oucan Paulus emen namcir. Hanoba en ouma debin areg emen emesai dou lusud dara mer medam dou len toua, endagai: Lusud gin, kaba, len ledag Adehsud Gedig En Moho Eb Taiba Augwanohob meren sogougwir naugb len lesai en moro dou yen. Dauntoba yen yecinaga men ucina naugb sug en eigdoc yen dau sesar men gogom augwan aud maireseb menau geb huhugb gin toua.

¹⁸Sug en eicara dangga se lona einyanohob, kaba, Paulus medoc eriragasa en namcir. Dangga, kaba, en emeigtou emateteij en deitero, doba en eineg aud en. Hanoba en arougb minderi geisa medoc mesohob, endagai: Dan darougb ban se moho Yesus Krisdus naugb ban beihwededau gida gin namcir. Anai dan deperwei en mohw naugb ginohob. Sug en arougb en dangga inegohob, kaba, mena mog mog eihwededau en toua.

¹⁹Sug gida sogougb graga men mougtir len leiya, doba en mou ouforoho naugb sug en ens areg acgunog se lona daiyamo gacin dou lusud emeb se en deitero, kaba, len lagaigeij Paulus dara Silas. Anai len lecinaga dag meren cumougt naugb sug lusud leic aregoufu dou len, kaba, ediyebeiya dau len namcirohob. Hanoba len lohugouhw lan aud leng Roma meren mougt mera se usmougb, dauntoba len logod aremer naugb lan toua.

²⁰Dangga sug len lohugouhw lan deseino mougt mera goujir ginohob, kaba, len loho las lan deseino len toua, lendagai: Lahwai dau leng Yahudi gin, kaba, lan laho aremer debin maman se maman cinogo gin namcir.

²¹Doba areg lan larautut emen naugb sug emen emaimo, kaba, augwan edreg dau maman Roma maman gaben gin terimda. Hang emedeinyum naugb sug emen emebin dara emaimo areg lan larautut emen aud gin touwero. Anai meijen mougt mera medam en moho aiga emen, aninim dag yeng Roma gin touohob.

²²Dangga sug leng gus louman len merir an ginohob, kaba, len laimo leng graga naugb len logod Paulus dara Silas lan toua. Dara leng Roma meren mougt mera, kaba, len toua lekris maran sansun dau lan. Hanoba len larougb meren sadodor naugb len leic dagamougb an lan namcir.

²³Sug len leic dagamougb medam an lanohob, kaba, len ledouf lan se tu gesisug toua. Sug len louf lan se tu gesisugohob, kaba, len lesulou sud hom gesedougwo tu gesisug gini, dauntoba en esedougwo lan dagadgeij namcir.

²⁴Dangga sug sud hom gesedougwo tu gesisug en ouman dau areg len larougb en an ginohob, kaba, en ouf lan se dimei mes geb taiji. Hanoba en eic sogomehir medam bakebin lan marohora toua. Anai len lesulou en ucucugb an lan ginohob.

²⁵Doba edebeij deinyor lobeingmod, kaba, Paulus dara Silas lan lacuncum dara lohwaresgwemer naugb lagahugouhw an Allah terimda. Dara leng gus gedig len leigtou se tu gesisug hom ingga, kaba, len laugwan louman lan marir an gin toua.

²⁶Dangga sug lan lacuncum dara lagahugouhw an Allah dag gin, kaba, inyomda eisa medam augwougb, betitir tu gesisug ingga an buc augwan beinyeinya namcir. Hanoba misis augwan ec dau len. Dara ranta geb debin leng se tu gesisug ingga, kaba, augwan esga dau len merohora dara len merisira toua.

²⁷Sug sud hom gesedougwo tu gesisug gini en eisa beijesan, doba misis augwan ec dau lendohob, kaba, en ouwan eigdesa men krawan dau meihw naugb edesugb enin namcir. Anai en oudesa endag lusud laugwan lougb dau tu gesisugdohob.

²⁸Doba Paulus eiyaga dougwo en dara mer medam namcir, endagai: Ban bemedesugb baninlo. Anai emen emaugwan emug ingginaba.

²⁹Sug sud hom gesedougwo tu gesisug gini en ouman Paulus eiyaga dougwo en danggohob, kaba, en eija men gedeijan, dauntoba en ei smougb ingma dou enahabi. Dangga sug gedeijan odo smougb dou enohob, kaba, en obga se dimei mes namcir. Hanoba en eij amuhumlo deseino Paulus dara Silas, anai en eijesa dara ahau medam namcir.

³⁰Sug en eisa ucugwohob, kaba, en ahwan lan dig medigoda. Hanoba en eijidougwo lan, endagai: Yasuda, dan deb ara, dauntoba Allah eigdoc dan dau sesar men gogom augwan aud maireseb menau geb huhugb gina?

³¹Doba Paulus dara Silas lan launi ucugb dou en, landagai: Ban abdoc ebdebin an emen Adehsud Yesus dag en omom naugb aban sesar augwanohob, kaba, Allah emeigdoc ban, dara leng leigtou desij ban se aban tu, yen yaugwan dau sesar men gogom augwan aud maireseb menau geb huhugb gin toues.

³²Sug lan launi dangga dou enohob, kaba, lan ladidib maman Adehsud en mer meijouhw augwan asesa ucan gin dou en dara leng leigtou desij en se men tu, len laugwan toua.

³³Sug lan ladidib meijouhw augwan dou len dauwohob, kaba, sud hom gesedougwo tu gesisug ingga, kaba, en ahwan lan se dimei hom naugb en edu marlo mera se loba ingga toua. Sug en edu lan marlo mera dauwohob, kaba, Paulus dara Silas lan lagun en dara leng leigtou desij en se men tu len laugwan se duhu toua.

³⁴Dangga enin dara men lusud, kaba, len laugwan lagahugouhw medam an Allah namcir. Anai len merdoc ebdebin an enohob. Sug lan lagun len laugwan se duhu dauwohob, kaba, sud hom gesedougwo tu gesisug gini en ahwan lan se men tu naugb en eic ared dou lan toua.

³⁵Sug lona esgohob, kaba, leng Roma meren mougtir graga, len larougb meren sadodor aud sud hom gesedougwo tu gesisug, dauntoba en arges Paulus dara Silas dau tu gesisugeda.

³⁶Sug en ouman len merir an ginohob, kaba, en eihweda naugb en eden aremer gin dou lan toua. Dangga sug en edebeij lanohob, kaba, en enara dou lan, endagai: Yasud gina, leng Roma meren mougtir larougb dan naugb dan darges yan dau tu gesisug gini. Hang yan yaihweda iteitoginda, kaba, yan maijiresou.

³⁷Doba Paulus enara bauwun sadodor len merir an, endagai: Naro, aman amemeihwedau sugin augwougwero. Doba yen yeihweda naugb yedarougb leng Roma meren mougtir graga len laugwan suginahabi. Dauntoba lenin eng lemesga aman dau tu gesisug ginda. Anai len lemehilon aremer dau aman nosahabero. Doba len larougb yen naugb yen yesa dagamougb an aman ainyes abeba lusud laugwan merires namcir. Hanoba len larougb yen naugb yen youf aman se tu gesisug gin touohob. Dangga dagiro, naugwe hang, len louwan naugb aman ameihwededau sugin augwougb dag gina? Anai aman gin, kaba, toua yeng Roma meijen mougt mera medam en moho aiga aman touahaba?

³⁸Sug leng sadodor louman Paulus mer an gin, kaba, len leden augwan dou leng Roma meren mougtir graga laugwan toua. Dangga sug len louman dag meren mougt mera medam en moho aiga lan touohob, kaba, eic dag len lahau medam namcir.

³⁹Hang len leihweda naugb lesgigouhwesa lan ucugb deit. Sug len lesgigouhwesa lanohob, kaba, len lahwan lan dau tu gesisug. Hanoba len larougb lan dara geigouhw, dauntoba lan lamaitou se cinogo ingga debero, doba lan laihweda namcir.

⁴⁰Doba Paulus dara Silas sug lan laihwededau tu gesisugohob, kaba, lan lameihweda namcirdero. Doba lan laihweda se Lidia men tu deitahabi. Dangga sug lan lagasa dara leng merdoc ebdebin an Yesus len laugwan se tu inggohob, kaba, lan lanara lad len merdoc mes, dauntoba len les agadgeij namcir. Sug lan lasulou len gin dauwohob, kaba, lan larges maraga lac namcir.