Read Manikion KISAH 18 Bible Online

KISAH 18 - Manikion bible

KISAH 18

¹Sug Paulus ens aremer graga augwan dou leng se Atena dauwohob, kaba, en emeigtou se cinogo ingga deitero. Doba en eihwededau sungga dig Korintuseda.

²Sug en edebeij cinogo ingga, kaba, en agasa dara sud hom dau leng Yahudi, moho Akwila, sungga toua. Anai leng Roma meren mougt mera medam, moho Klaudius, en ocirma leng Yahudi laugwan leisa dau men cinogo Roma ginohob. Hang eni dara mesouwa, moho Priskila, kaba, lan toua lamen dau leng Italia meren hancob se Korintus gin toua. Doba Akwila gini sug en gun, kaba, dau leng Pontus meren hancob.

³Sug lan ladebeij Korintus ginohob, kaba, Paulus edebeij lan se maran tu. Hanoba en atou desij lan dara en ousa lan. Anai len laugwan meren geicara aninim dag len logon hugbei naugb laumara dou len gus toua.

⁴Dara astesda leng Yahudi meren Lona Gemeicaresero, kaba, Paulus einesa meren tuari naugb en enara baga leng Yahudi, dara leng Grika gedig len lesijaresa Allah, len laugwan merdoc mes. Dauntoba len merdoc eica areg en esai dou len eisaugb Yesus gin, kaba, augwan se geica namcirohob.

⁵Doba sug Silas dara Timotius lan toua lan dau Makedoniohob, kaba, en emogon hugbei deitero. Doba en arges deb namcir naugb en esai Mer Geigouhw eisaugb Krisdus dou leng Yahudi astesda lona terimda. Dara en os badi dou len dag Yesus gin, kaba, enin eng Sud Hom Geigdoc Len Dau Meren Gogom Augwan, aimo dau areg Allah os dou len sug nosohob.

⁶Doba sug leng Yahudi gin, kaba, len lenara laised en mer, dara leic en moho lacecim an gin toua terimda, kaba, en etitir men sansun an meren aremoslos ucugb debin len. Hanoba en enara dou len, endagai: Sug Allah eic mor mor dou yen, kaba, yen meijugwihi emeb se dan insira deitero, doba ogdoc yenin dous. Anai dan desai augwan dag misen dou yen, doba yen yasid dan indir an namcirohob. Dangga hang, dau iteitogini, kaba, dan demebedbed dou yeng Yahudi deitero. Doba dan deihwedaud lugmahara naugb dan desai Mer Geigouhw eisaugb Krisdus dou len dous.

⁷Sug Paulus enara debin len dag gin dauwohob, kaba, en ematou desij Akwila dara Priskila se maran tu deitero. Doba en eihwededau lan namcir. Anai gini ansins dag en arges dau leng Yahudi namcirohob. Hanoba en edatou desij sud hom dau lugmahara, en moho Titius Yusdus, se men tu deit. En men tu gin, kaba, eb deinyor leng Yahudi meren tuari. Dara en toua aimo leng Yahudi naugb en esijaresa Allah touohob.

⁸Doba Krispus gedig en esedougwo leng Yahudi meren tuari gin, kaba, en medoc ebdebin an maman Adehsud. Dara leng leigtou desij en se men tu, dara leng Korintus leinyana gus sug len louman dau areg Paulus esai dou lenohob, kaba, len merdoc ebdebin an maman Adehsud gin toua namcir. Hanoba Paulus dara mesir logun len laugwan se duhu ansins debin gin toua.

⁹Doba se loba hom yom, kaba, Mena Gogoufu ogod Paulus dag en omom. Dangga en eiya maman Adehsud sug en oho mer debin en, endagai: Ban bemahau dau leng Yahudi ginero. Anai dan indugwengga desij ban naugb dan deseyeiyo ban dougwo len. Hang sud hom ingma en emeic gomom dou ban touwero, doba ban abina agau terimda. Dangga hang, ban bemarges dau sug ban besai Mer Geigouhw eisaugb dan dou lusud se cinogo gin touwero. Doba ban beic abus naugb gin namcir. Anai indan lusud gedig dan desedeb len naugb len merdoc ebdebin an dan, kaba, leinyana merugwengga se cinogo ginaba.

¹⁰

¹¹Sug Paulus ouman Adehsud oho mer debin en dag ginohob, kaba, en aiyan medocesem. Hanoba en eigtou sungga se arisogomoc hom mougwu deit naugb en edidib Allah mer eisaugb Yesus meijouhw augwan asesa dou len toua.

¹²Doba sug leng Roma meren mougt mera medam eigdoumesa sud hom, moho Galio, en edag mougt mera dougwo leng se Akaya meren hancob augwan deit, kaba, leng Yahudi dau Korintus len lohw merdocedoum naugb len loho ledas Paulus deseino en. Sug len lagaigeij enohob, kaba, len lahwan en aud Galio gin toua.

¹³Sug len ledebeij enohob, kaba, len lahacugb gogom debin en, lendagai: Sud hom gin, kaba, en enara baic emeng Yahudi emen emdoc mes, dauntoba emen emesijaresa Allah, emaimo dau areg Musa arougb emen an se men gomnomnohob gin toua deitero. Doba en arautut emen, dauntoba emen emaimo ucina menau gini naugb sug emen emesijaresa Allah dous.

¹⁴Dangga Paulus en ouwan enara bauni len merir gin ucugb dou Galio deit. Doba Galio enara bagod dougwo en mer. Hanoba en enara gouji dou leng Yahudi gin toua, endagai: Sug areg yen yoho yes en an deseino dan dau sug en edreg emen Roma emen gomnomna. Era en aimo areg mog mog medam an lusudohob, kaba, dan indoc esgirahesa naugb dan douman dau areg yen yahacugb gogom debin sud hom gin toua. Anai gin, kaba, esogwa deisa ucina gobosboro naugb sug dan daimo yen toua namcir.

¹⁵Dobnaro. Areg yen yoho yes en an deseino danohob, kaba, augwan gini eisaugb medagas dara moho meren meijouhw. Dara areg meijen gomnomna arougb yen an gin dous. Dangga hang, dan indoc emesgirahesa naugb dan dogod aremer ginero. Doba dan douwan naugb yen yenin yogod aremer gin dous.

¹⁶Sug Galio owun len meroho an dag ginohob, kaba, en arougb men sadodor naugb len lecicugb leng Yahudi len laugwan dau men tu gouji gedig len lowunaresa gin toua namcir.

¹⁷Sug leng Yahudi len leiya, doba Galio ecicugb len laugwan dau men tuohob, kaba, len lagaigeij sud hom gesedougwo meren tuari, en moho Sosdenes. Hanoba len logod en debin Galio sungga toua, anai en edag mougt naugb aremer ginohob. Doba Galio amsoho len namcir.

¹⁸Doba Paulus, kaba, en aiyan medocesem naugb en eigtou se cinogo Korintus debin gin terimda. Dangga sug en eigtou desij leng merdoc ebdebin an Yesus sungga se lona einyanohob, kaba, en ou len. Hanoba eni, dara Priskila, dara Akwila len leihwededau len sungga dig Kenkrea naugb len leisa ij dau sungga dig leng Siria meren hancob ucugb deit. Sug len ledebeij Kenkreohob, kaba, Paulus en egina mougt modedau. Anai men lona areg en ouwara debin naugb en ehig dau ara dou Allah, kaba, edeinyumohob.

¹⁹Dauwohob, kaba, len len leisa ij dau Kenkrea deit, terimda len ledebeij cinogo Epesus. Sug len ledebeij Epesusohob, kaba, Paulus en arges Priskila dara Akwila lan deb sungga. Hanoba en aimo leng Yahudi se meren tuari naugb en enara baga len merdoc mes eisaugb Yesus dou len toua deit.

²⁰Dangga, kaba, len lacgeij en, dauntoba en eigtou desij len terberbahabi, doba en emousa len merirero. Doba ebeij deinyor sug en ecahabi, en emenara dou len, endagai: Sug Allah ouwan, kaba, dan demecicugb aud yen deits. Sug en enara dangga dou len dauwohob, kaba, en eisa ij dau Epesus dig Kaisareada.

²¹

²²Sug en edebeij Kaisareohob, kaba, en eisaugb dig Yerusalem naugb en edou leng Krisden se goucimdeb sungga nosahabi. Sug en ou len dauwohob, kaba, en eihwedig Antiokieda.

²³Dangga sug en eigtou debin mog desij len sungga se lona aibibrohob, kaba, en eihwededau sungga dig leng Galatia dara leng Prigia meren hancob deit naugb en enara bad leng se goucimdeb len laugwan merdoc mes toua. Dauntoba len laiyan merdocesem dara les agadgeij namcir.

²⁴Sug Paulus eihwededau Epesusohob, kaba, sud hom dau leng Yahudi, en moho Apolos, en en se Epesus deit. Sud hom gin sug en gun, kaba, dau cinogo Aleksandria. En mers ohos naugb sug en enara dou lusud. Dara en mou ouforoho namcir naugb en ecinaga Surad Injil Meb Mohon men meijouhw augwan asesa toua.

²⁵Dara leng Krisden gus, kaba, len lens dau maman Adehsud men ucina areg maman maimo gin hom yom dou en sug nosa touohob. Doba eisaugb Allah men ucina naugb sug en ouwan eic maireseb menau geb huhugb dou lusud ogdoc Yesus, dara en ouwan esa Mena Gogoufu se len merdoc mes, kaba, en emecinaga meijouhw augwan asesa touebma. Doba en ecinaga dau Yohanes men geicara sug en ogun lusud se duhu deb gin dous. Dara sug en esai maman Adehsud men ucina gin dou lusud dara en edidib aremeijouhw dou len toua, kaba, en aimo augwan gin dara gerleij namcir.

²⁶Dangga hang, en eic mos naugb en einesa leng Yahudi meren tuari, dauntoba en esai maman Adehsud men ucina moho hom yom areg en ecinagohob gini dou len toua. Doba sug Priskila dara Akwila lan lauman en mer an gin, kaba, lan lahwan en dig maran tu naugb lan lans augwan asesa dou en deit, dag Allah emouwan naugb emeigdoc lusud dau meren gogom dousero. Doba en ouwan eic maireseb menau geb huhugb dou len, dara esa Mena Gogoufu se len merdoc mes toua.

²⁷Sug en esai maman Adehsud men ucina gin dou leng se Epesus dauwohob, kaba, en ogodan naugb en eihwedig leng Akaya meren hancob deit naugb en esai maman Adehsud men ucina gin dou len toua. Dangga leng merdoc ebdebin an Yesus se Epesus ingga, kaba, len log surad dara en dou len meraguner dara merdamouwer se Krisdus se leng Akaya meren hancob gini. Dauntoba sug en edaud lenohob, kaba, len lebin en dara geigouhw namcir. Sug Apolos edebeij cinogo Korintus se leng Akaya meren hancob, kaba, en ousa leng merdoc ebdebin an Yesus ogdoc Allah medoc an len, len laugwan dara goubesa namcir.

²⁸Anai eni dara leng Yahudi, kaba, len lenara laisedim eisaugb Yesus deseino lusud se usmougb. Doba en eic medagas dau Surad Injil Meb Mohon bagadro. Hanoba en ens se geica dara goubesa dou len dag Yesus enin eng Sud Hom Geigdoc Len Dau Sesar Men Gogom Augwanohob. Dangga en mer gin, kaba, eic dag en owun len lobsara dou en namcir.