Read Manikion KISAH 19 Bible Online

KISAH 19 - Manikion bible

KISAH 19

¹Sug Apolos eni moongga se Korintus, kaba, Paulus ec mohora se leng Galatia dara leng Prisgia meren hancob naugb en enara bad leng se goucimdeb len laugwan merdoc mes amomo terimda en edagunya se Epesus deit. Sug en edebeij se Epesus ginohob, kaba, en agasa merug hosa dau leng merdoc ebdebin an Yesusohob sungga toua.

²Hanoba en eijidougwo len, endagai: Sug yen meigdoc ebdebin an Yesus gini, kaba, en esa Mena Gogoufu se yen meigdoc mes touohobei? Doba len launi ucugb dou en, lendagai: Naro, anai emen ememouman dau Mena Gogoufu gini moho mougwa hom touebma.

³Dangga Paulus en eijidougwo len deit, endagai: Sug len logun yen se duhu gin, kaba, len laimo gara men geicara an yena? Doba len launi dou en deit, lendagai: Sug len logun emen se duhu gini, kaba, len laimo Yohanes men geicara an emen dous.

⁴Dangga Paulus ens meijouhw dau Yohanes men geicara asesa dou len deit, endagai: Yohanes, kaba, en esedeb lusud merdoc mes naugb len merdoc ebdebin an sud hom Yesus dous. Anai en enara dou len dag cum, kaba, sud hom gini en emaimo ucan ens. Dangga en arougb len naugb len lesga meren sesar dara len lahau an dougwo dauwahabi, en emogun len se duhu debin gin toua.

⁵Sug len louman dau gin, kaba, len lacgeij Paulus naugb en ogun len se duhu. Sug len lacgeij Paulus dag gin, kaba, en ogun len se duhu se maman Adehsud Yesus moho debin gin toua. Dauntoba lusud lecinaga dag len ledag Yesus men logodeh touohob.

⁶Dangga sug Paulus ogun len se duhuohob, kaba, en ob mesira se len merugt toua. Sug en ob en mesira se len merugtohob, kaba, Mena Gogoufu einesa len laugwan merdoc mes namcir. Hanoba Mena Gogoufu eic mou ouforoho dou len naugb len lec merir susugb. Dara en eic goubesa dou len naugb len lesai Allah moro dou lusud toua.

⁷Doba len gedig Mena Gogoufu einesa len merdoc mes gini, kaba, len laugwan merug edebeij sisa hobjerai.

⁸Sug Paulus ogun lusud merug sisa hobjerai gin se duhuohob, kaba, en einesa leng Yahudi meren tuari naugb en enara baga len merdoc mes toua. Dangga se igda homoi gin, kaba, en eic mos naugb en enara bad len merdoc mes terimda. Dauntoba len merdoc eica en mer dag Allah men lona naugb sug en oiharaga len ucugb, kaba, edebeij lenohob.

⁹Doba ligbum dau len, kaba, len merdoc agadgeij dougwo areg Paulus ebedbed dou len ingga namcir. Dangga, kaba, len lesbes an maman Adehsud men ucina naugb sug en eigdoc len dau meren gogom augwan ogdoc Yesus gin namcir. Anai len lemouwan naugb sug len merdoc emebdebin an Yesus touwero. Sug len leicara dag gin, kaba, Paulus arges len ingga deb. Hanoba en eihwedan leng merdoc ebdebin an Yesusohob laugwan se sud hom, moho Tiranus, men dimei gouji hom naugb en enara baga lusud merdoc mes sungga astesda lona an areg graga deit. Anai Tiranus men dimei gouji hom gin, kaba, naugb sug en edidib aremeijouhw dou men logodeh se toua.

¹⁰Sug Paulus ens meijouhw dau sug Allah ouwan oiharaga lusud ucugb se arisogomoc hwai dou len, kaba, leng Yahudi dara lugmahara se leng Asia meren hancob, len laugwan lecinaga Mer Geigouhw eisaugb maman Adehsud augwan dag misen namcir.

¹¹Dara Allah ens men ganusbus edreg dau mohw ogdoc Paulus dou lusud naugb en auma debin areg Paulus esai dou len toua.

¹²Anai Paulus enin emaben ganusbus deseino lusud dousero. Doba sug len loho Paulus men minc gahud mecdemaga dougwo mengebouf, dara men sansun geg gaicara naugb leng areber, kaba, goubesa geb se sansun gin, kaba, eic geingmos agauwesa dou leng areber len laugwan. Dara merna mog mog agunya dau lusud toua.

¹³Dara merug hosa dau leng Yahudi gedig len lesebesa naugb locirma merna mog mog dau lusud merdoc mes, kaba, len toua merugwengga se Epesus.

¹⁴Leng leicara dag gin, kaba, Gembala Gesa Taij Meren Mougt Mera Medam dau leng Yahudi, moho Skewa, meisir merug senggai gini. Dangga sug len leiya, doba Paulus ocirma merna mog mog dau lusud, ogdoc maman Adehsud Yesus en moho dag gin, kaba, len toua louwan leicara lainyen dangga. Hanoba len larougb mena mog hom, lendagai: Se moho Yesus gedig Paulus esai dou lusud gin, kaba, emen emarougb ban naugb ban beihwededau sud hom gin namcir.

¹⁵Doba mena mog mog gin, kaba, en enara bauni len merir ucugb, endagai: Yesus, kaba, dan decinaga enohob. Dara eisaugb Paulus toua, kaba, dan decinaga touohob. Doba yen gin, kaba, yen meijoho dagiro? Anai dan demecinaga yenero.

¹⁶Sug mena mog mog auni dou len dangga ineg dauwohob, kaba, en eic goubesa se sud hom gin naugb en ougb debin len dara mobgos maha namcir. Hanoba en esa debin len laugwan toua. Dangga len laugwan lesogwa lougwan merug mogud dau tu ingga. Anai sud hom gin, kaba, en ekris meren sansun dau len. Hanoba en asgun len toua merugwihi aijahasem namcirohob.

¹⁷Sug leng Yahudi dara lugmahara se Epesus ingga len louman dau gin, kaba, len leigdoumesa maman Adehsud Yesus en moho agas medam bedreg dau nosa namcir. Anai len laugwan merdoc ahau dau enohob.

¹⁸Dangga leng merdoc ebdebin an Yesus ginohob, kaba, leinyana lesga dau meren geicara gecgu areg len laimo nosohob, augwan asesa deseino lusud laugwan toua.

¹⁹Dara leng meru ouforoho naugb len lagaresa lusud merdoc mes, dara leng loho aremoung mohu, dara leng lohudara, kaba, len laugwan lemaimo meren geicara gin toua deitero. Doba len leineg dau namcir. Hanoba len louci meren surad an aremeijouhw debinim hom naugb len lec se smougb abeba lusud laugwan merires toua. Doba areg len lec se smougb gin, kaba, sug len lecic men mera augwan ladedim, kaba, edebeij aregoufu perag mogo ribu mos sergem toua.

²⁰Dangga aremer graga augwan, kaba, eic dag maman Adehsud en mer gin agaha becinten cinogo augwan dara goubesa terimda. Hanoba eic lusud leinyana lou aud maman Adehsud gin toua. Anai aremer augwan gin, kaba, edag ganusbus namcir.

²¹Sug aremer graga augwan ouwa dauwohob, kaba, Paulus ogod an naugb en edoumuma dougwo leng merdoc ebdebin an Yesusohob len laugwan se leng Makedonia dara leng Akaya meren hancob deit. Hanoba en eihweda terimda en edebeij cinogo Yerusalem toua deit. Dangga, kaba, en enara dou leng se Epesus gini, endagai: Sug dan dedebeij Yerusalemohob, kaba, dan douwan naugb dan dedesai Mer Geigouhw eisaugb Yesus dou leng se Roma toua. Anai gini aimo dau areg Allah esedeb naugb danohob.

²²Sug en enara dag gin dou leng Epesus ginohob, kaba, en arougb men gedeijan lahwai, lan maroho Timotius dara Erasdus, naugb lan laino en men dig leng Makedonia meren hancob naugb lan lasedeb leng merdoc ebdebin an Yesusohob len laugwan merdoc mes sungga deb. Doba enin, kaba, en eigtou se leng Asia meren hancob ingga deb se lona aibibra deitaba.

²³Doba se lona sug en eigtou gin, kaba, len lebara eijideijo medam dougwo Paulus an areg en esai dou lusud eisaugb maman Adehsud men ucina gini.

²⁴Anai se Epesus gini, kaba, sud hom gedig en mou ouforoho naugb en esinsin ara ara dau perag, en moho Demetrius, en toua moongga. Dangga men geicara gini ahwan aremougb einyana dou en an men logodeh laugwan namcir. Anai len lesinsin perag dag tuari mogurei hom, aninim dag meren seiseij gida, moho Artemis, men tuari misen gouji hom dou lusud laugwan toua. Doba sug Paulus esai Mer Geigouhw eisaugb Yesus dou leng se Epesus gin, kaba, leinyana lemouma tuari mogurei dau perag gin deitero, anai len merdoc ebdebin an Krisdus ginohob.

²⁵Hang Demetrius en eiya men logodeh dara mesir gus gedig len lesinsin tuari mogurei dau perag len laugwan naugb len lacinim hom. Sug len laugwan lacinimohob, kaba, en ococi len, endagai: Dan insirija, yen yecinaga sug maman masinsin Artemis men tuari mogurei dau perag dou lusud, kaba, ahwan aremougb einyana dou maman toua.

²⁶Doba iteitogini, kaba, yenin yen yeiya dau sud hom, moho Paulus, men geicara. Dara yen youman dau areg en esai dou lusud gin touohob. Anai en ococi len dag areg maman masinsin dag seiseij gin, kaba, Allah misenero, doba dag areibahau dous. Doba areg en eic bagadro dou len gin, kaba, eic dag leinyana gougwa dau leng se Epesus dara maman hancob se Asia len merdoc eica en mer an ginohob.

²⁷Dangga maman mamsoho gin touwero. Anai sug maman mamen dougwo ginero, kaba, cum, lusud leic maman mamoho an areg maman masinsin gin lacecim toua namcir. Dara gin dousero. Doba cum, kaba, len loudesa dag maman seiseij gida Artemis, moho agas gini, men tuari emesloulougb. Hang len lemoumara dau maman dag nosa toua deitero. Doba len larges dau gin namcir. Hanoba lusud lemeigdoumesa en moho emagas toua deitero. Doba len lowun en moho eb tainya namcir dous. Augwan gini ogom medam naugb maman. Anai maman seiseij gida hom gin, kaba, maman se mamang Asia maman hancob gini. Dara lusud se cinogo gus augwan, kaba, maman maugwan masijaresa en terimdohob.

²⁸Sug men lusud louman dag gini, kaba, eic len merdoc esrougb medam namcir. Hang len lesa merir, lendagai: Emeng Epesus emen seiseij Artemis gin, kaba, en moho emobsara deitero, doba en moho agas terimda.

²⁹Doba sug len lesa merir an dag gin terimda, kaba, eic dag lusud se cinogo ingga len laugwan lenara merir eisa medam an gin namcir. Dangga sug len laugwan lacinim debohob, kaba, len lagaigeij Paulus men mougt lahwai dau Makedonia, lan maroho Gayus dara Arisdarkus, lan namcir. Anai len lecinaga dag lan toua laimo Paulus naugb len lesai Krisdus moro sungga sungga touohob. Hanoba len lohugouhw lan deb se meren usmougb medam hom toua.

³⁰Doba sug Paulus en ouman gin, kaba, en toua ouwan eihwedaud len se usmougb ingga naugb en edenara bad len merdoc mes toua. Doba mesir leng Krisden gus, kaba, len len dougwo en namcir, lendagai: Ban bemeihwedero.

³¹Dara mesir mougt mera gouji dau leng Asia meren hancob merug hosa, kaba, len toua lesa merir dougwo en. Dauntoba en emeic maga ainyes touwero, doba en ecgoneh en mog namcir.

³²Doba irir sug len lesa merir dou Paulus gin, kaba, leng se usmougb ingga len lenara merir ecgwetagam terimda. Dangga ligbum, kaba, len lesa merir an aremer ingma dag gini. Doba lingma, kaba, len lesa merir an aremer ingma dag gaba. Anai len lemecinaga aremer areg len loucimdeb an gin touwero.

³³Dara lingma deit, kaba, len loudesa dag sud hom dau leng Yahudi, en moho Aleksander, en eng oho aremer gin debin len. Anai leng Yahudi gus larougb en naugb en eisa besa deseino leng se usmougb gini. Dauntoba en en dougwo len dag leng Yahudi len lemoho aremer gin debin lenero. Dangga sug en eisa besa deseino lenohob, kaba, en ecgun mesira debin len naugb sug en enara dou len toua.

³⁴Doba sug len leiya dag eni sud hom dau leng Yahudi, kaba, len laugwan leisa lesa merir medam deit, lendagai: Emeng Epesus emen seiseij Artemis gin, kaba, en moho emobsara touwero. Doba en moho agas terimda. Dara len merir eb debin gin terimda edag sug len los ared se smougb, kaba, ec dougwo namcir. Danggahabi, len lemarges merir an gin toua.

³⁵Doba sug len leigdoumesa Artemis en moho terimda dag ginohob, kaba, mougt mera gouji se Epesus men meijouhugwa hom en agunyen naugb en esa mer debin len an gin namcir. Dangga sug len lobsara dou en naugb lodina anirohob, kaba, en en dougwo len, endagai: Yeng dau Epesus, lusud se cinogo gin augwan, kaba, len lecinaga dag mamanin dous eng masedougwo seiseij moho agas Artemis men tuari gini. Dara mamanin dous eng masedougwo men igdahab gecabeci gouwaden dau bogo toua.

³⁶Dangga yen yemeicara ecgu dedemedero. Doba yen yowun yen meigdoc mesahabi. Anai aremer eisaugb Artemis dara men igdahab gouwaden dau bogo gin, kaba, sud hom ingma emen dougwo maman an ginero. Anai len laugwan lecinaga dag mamanin dous eng masedougwo ginohob.

³⁷Dangga dagiro, naugwe hang, yen yohugouhw lahwai sugini naugb ara? Anai lan lamesma ara ara dau maman seiseij men tuariero. Dara lan lameic Artemis en moho lamacecim touwero.

³⁸Sug Demetrius an men logodeh len louwan lahacugb gogom debin sud hom, kaba, eigouhw naugb len lahwan en deseino mougtir lenahabi, len lemderba ara debinim sungga toua. Anai len lesedeb lona naugb sug len logod aremer aga lusud debohob.

³⁹Dara yen toua, sug meijen ara ara ingmanggebga naugb sug lusud logod, kaba, yen yemouci dau yenin dag gin lo. Doba yen yodo augwan gini se usmougb gouji hom, dauntoba mougtir merir ocem an ginahabi, len lemogod toua.

⁴⁰Anai sug maman maicara dag gin, kaba, leng Roma lauwoho maman dag maman mabara eijideijo dou len se cinogo gin touohob. Dangga hang, maman mamauni dagiro dou lena? Anai maman bui mogu ingma emeb naugb gin touwero.

⁴¹Sug mougt mera gouji men meijouhugwa gin en en dougwo lenohob, kaba, en arougb len laugwan leihwedig meren tueda.