Read Manikion KISAH 2 Bible Online

KISAH 2 - Manikion bible

KISAH 2

¹Sug Lona Pentakosda edebeijohob, kaba, Yesus men logodeh len laugwan loucimdeb se tu hom deit. Anai se lona gin, kaba, leng Yahudi laugwan len len dau dingan dingan naugb len lougwanara debin meren ared geraimeij. Dara len len sijo dou Allah naugb meren ared gin toua.

²Doba sug len loucimdeb gin, kaba, moung medam dag loungmen eisa en dau bogo debin len augwougb becinten tu mes gedig len leigtousa augwan namcir.

³Dangga len leiya, doba edag smougb mouf gou metemouwu doum, agaha bastesda len laugwan se tu mes ingga toua.

⁴Sug edag smougb mouf gini eb se len laugwanohob, kaba, eic dag len merdoc atij an Mena Gogoufu men goubesa. Hanoba en eic mou ouforoho dou len naugb len lec merir aingma aingma se len gus meren leci augwan, aimo dau areg Mena Gogoufu ousa len naugb gin toua.

⁵Dara se Yerusalem gin, kaba, leng Yahudi gedig len louwan naugb lesijaresa Allah terimda, kaba, len len dau meren cinogo dingan dingan. Hanoba len ledag lugun se cinogo ingga toua. Anai len gin, kaba, len loudesa dag se Allah Men Tuari geb se Yerusalem gin eng len lesijaresa en dag misen dous.

⁶Dangga sug len louman moung medam en dau bogo debin Yesus men logodeh dag gin, kaba, leinyana len len naugb lou acec tu an Yesus men logodeh sug len loucimdeb se graga toua. Doba sug len louman dau areg Yesus men logodeh len lec gin, kaba, len lomi dau gin namcir. Anai astesda dau len, kaba, en ouman dau meren leci sug Yesus men logodeh len lenara gini.

⁷Hang len leijidougwom ucucugb dareg len leimiman dau gini namcir, lendagai: Len gin, kaba, len laugwan dau leng Galilea mogud dous.

⁸Dangga dagiro, naugwe hang, maman mamouman dag len leci dau maman mamir augwan gina?

⁹Anai maman gin, kaba, maigbum dau leng Partia. Dara ligbum deit, kaba, dau leng Media, Elam, dara Mesopotamia. Dara ligbum deit, kaba, dau leng Yudea, Kapodokia, Pontus, dara Asia toua.

¹⁰Dara ligbum, kaba, dau leng Prigia dara leng Pampilia. Dara ligbum, kaba, dau leng Mesir. Dara ligbum, kaba, len len dau leng Libia meren hancob deinyor cinogo Kirene. Dara ligbum dau mamang Yahudi. Dara ligbum dau lugmahara, kaba, len len dau cinogo Roma toua. Anai lugmahara gini, kaba, len lemecguna dou meren seiseij deitero. Doba len laimo maman naugb len lecguna dou maman Allah touohob.

¹¹Dara ligbum dau maman, kaba, len dau lomos Kreta, dara leng Arab toua. Doba maman macinaga areg len lec gini men meijouhw augwan asesa namcir. Anai maman mauman, doba len leigdoumesa Allah en moho agas medam an men geicara dag ganusbus gini se maman leci augwan touohoba?

¹²Sug len leimiman doum dag gini, kaba, len leijidougwom an, lendagai: Len lebara dag gin, kaba, men meijouhw dagiro, inggina? Len leijidougwom dag gini ucucugb terimda, anai len merdoc eijesa dara len merdoc omom an namcirohob.

¹³Doba ligbum, kaba, len lesbes anir, lendagai: Len gin, kaba, len leg ahwei mohwohob, hang len lemenara aibibra dag gin toua.

¹⁴Sug Petrus ouman len merir dag len lesbes an Yesus men logodeh dag gin, kaba, en eisa besa. Dara en mesir merug sisa hobjerem len toua merugwengga desij en. Hanoba en enara dara mer goubesa dou len gedig lesbes an Yesus men logodeh gini, endagai: Yeng dau mamang Yahudi, dara yeng yugun se Yerusalem gini, dan douwan dens dau areg yen yeiya dara yen youman gini meijouhw augwan asesa dou yen, dauntoba yen yemauwam an didiero. Doba yen yecinaga dag misen toua. Dangga hang, yen yemoc yen meijums dougwo areg dan den dou yen touwero. Doba yen youman deigeigouhw namcir.

¹⁵Anai yen youdesa dag len laugwan gin, kaba, len leg ahwei mohu bed len bomomohob. Dobnaro. Anai iteitogin, kaba, inenihi meijaba naugb sug maman masijaresa Allah dauwahabi. Dangga hang, len gin, kaba, mersdemaga emembreijbuma, anai maman mameg dara mametara touebma.

¹⁶Doba areg yen youman dara yen yeiya gin, kaba, augwan gini esogwa deisa areg Allah en os deb dou maman mamjemouwer ogdoc sud hom gesai en moro, moho Yoel, se Surad Injil Meb Mohon deb sug nosa touohob, endagai:

¹⁷Edebeij lona sug ouwedoc, kaba, dan demesa Mena Gogoufu dou lusud se cinogo augwans. Dangga hang se lona ingga, kaba, yen meigdebeitor ligib dara ligdob, kaba, Mena Gogoufu emeic mou ouforoho dou len naugb len lemesai dan induro dou lusud. Dara yen meigdebeitor ledag lugdeh mesaba, kaba, en emogod len dag lomom, hanoba en emens dau areg se geica dau dan augwan asesa dou len. Dara yen meigdebeitor gedig len ledag lusudbodohob, kaba, en emens dau areg asesa danin indoc mes augwan se augwa dou len, hanoba len lemens dau augwan gini dou len gus se lona ingga toua.

¹⁸Dara gin dousero. Doba indan logodeh ligiji dara ligida, gedig len ledag sogougb, kaba, dan demesa Mena Gogoufu aud len se lona ingga naugb en eic mou ouforoho dou len, dauntoba len lemesai dan induro dou lusud.

¹⁹Dara dan demaben ganusbus se bogo meniha taiba, dara dan demeic gansins se cinogo tainya debin areg len lesai gin toues. Anai sug meijen Adehsud indan lona gouji emedebeijbuma, kaba, dan demesa mogwihi, dara smougb, dara smougb mouf ocninim se bogo dara cinogo gin toua.

²⁰Dangga hang, igda lona emeic moufesa toua deitero. Doba edag lobeigbogo namcir. Dara igda loba emerba mouf touero, doba eperwei bedag mogwihi toua namcir.

²¹Doba gareg en eiyagarij meijen Adehsud dan se lona ingga, kaba, dan demeigdoc en dau sesar men gogom aud maireseb menau geb huhugb gin toues.

²²Sug Petrus enara dara mer goubesa dou leng graga dauwohob, kaba, en enara ucan dou len deit, endagai: Yeng dau mamang Israel, yen youman dan indir an areg dan den dou yen gin deigeigouhw deitahabi. Anai Allah ens ainyes dou yen dag Yesus dau cinogo Nasared, kaba, enin eng sud hom gedig en esai en moro eisaugb areg graga augwan dou yenohob. Dara Allah ouma debin gin dou yen, anai en eic goubesa dou en naugb en aben ganusbus, dara en eic gansins, dara areg geic geimiman debin areg en esai gin dou yen toua. Dara yen yenin toua yecinaga dau gini dag misen namcir. Anai en aben augwan gini abeba yen meijiresi touohob.

²³Doba Allah enin eng ogod deinaugb en debohob dag sud hom emohw en se yen meisira naugb yen yeic gomom dou en, aimo dau areg enin ouwan dous. Anai enin eng ecinaga aremer augwan dau acgunogohob. Dangga hang, sug sud hom gini ohw en deisa yen meisirohob, kaba, yen yogugwo en se lusud gedig len lebesesar len merisira toua deit naugb len letob en se sogo salib bomom namcir.

²⁴Doba gomom men goubesa emedeinyum naugb sug esedougwo en se tu gesisug, moho Seol, gin touwero. Hang Allah eigdoumesa en dau gomom ucugb, dauntoba gomom emeic mog erij dou en toua deitero. Doba en arges dau namcir.

²⁵Anai Daud en erba Ugwaremer eisaugb gin deb sug nosa touohob, endagai: Adehsud, dan deiya, doba ban abugwengga dara dan astesda lona loba. Hanoba ban beigtou desij dan dig dan insira misen naugb ban bousa dan toua terimda.

²⁶Dangga hang, dan indoc emesgiraha, dara dan demagahugouhw an ban toua terimda. Dara dan daimo ucina aud gomom, anai dan indaga toua dag getaha. Doba dan dod indina debsa ban. Hang dan indoc momogo touwero, doba dan indoc ebtou namcir.

²⁷Anai dan decinaga dag ban bemarges dan deb sug dan indugwengga se Seol touwero. Dara dan decinaga dag ban bemamsoho dan gedig dan daimo ban dara dan indoc augwanohob naugb dan indaga etaha namcir touwero. Doba ban beigdoc dan dara ban besedougwo dan dau augwan gin toua namcir.

²⁸Anai ban bens aban ucina aud maireseb menau geb huhugb deb dou danohob. Dangga hang, dan dagahugouhw medam an ban namcir, anai ban abugwengga dara danohob.

²⁹Dan indagunerij, dan douwan dens dau maman mamjemouwa Daud gini meijouhw augwan asesa dou yenahabi. Dauntoba yen yemauwam an didi eisaugb ginlo, doba yen yecinaga dag misen namcir. Anai en, kaba, en omom sug nosohob, hanoba len lec en betahohob. Dara en emeisa dau gomom ucugb touwero. Anai en moda, kaba, inggebga desij maman terimda iteitoginaba.

³⁰Doba sug en mairesebaba, kaba, Allah eic mou ouforoho dou en naugb en ens dau Allah men geicara areg en esedeb naugb lona daiyamo gacin augwan asesa dou maman toua. Hang en emecinaga dag en medebeito hom, kaba, eperwei en mohw naugb en edag maman mougt mera medam deit. Aninim dag Daud en edag mougt mera medam naugb maman mamjemouwer sug nosa touohob. Anai Allah os dangga dou enohob. Hanoba en ou en moho debin gin toua. Dauntoba Daud ecinaga dag augwan gin, kaba, asesa dag misen namcir.

³¹Sug Daud ecinaga dau areg Allah en esedeb naugb lona daiyamo gacin augwan deb dag ginohob, kaba, en ens deb dau sug Yesus en omomohob, kaba, dag en emomom terimda touwero. Doba en eisa dau gomom. Hanoba en eigdoc lusud dau sesar men gogom augwan toua namcir. Dangga hang, Ugwaremer areg Daud en erba an ginohob, kaba, en emerba eisaugb eninero. Doba sug en enara dag Allah emarges en deb se Seol. Dara en maga emetaha namcir touwero, kaba, en ens augwan gin deb eisaugb Yesus gin dous.

³²Dara emen, kaba, emen toua emecinaga dag Allah eigdoumesa Yesus gini dau gomom ucugb dag misenohob. Anai emen emeiya augwan gin se emen emiresohob. Hang emen emouma debin gin dou yen toua.

³³Dauwohob, kaba, en eigdoumesa Yesus gini dig bogo naugb en eigtou dig en mesira misen, dauntoba en edag mougt mera medam desij Allah namcir. Hanoba en Mena gin, kaba, en ogugwo Mena Gogoufu se en mesira toua. Anai gini aimo dau areg en Mena os dou en deb sug nosohob. Dangga hang, areg yen yeiya dara areg yen youman gini, kaba, emogdoc sug emen emeg ahwei mohu touwero. Doba ogdoc Mena Gogoufu gin dous. Anai sug Allah ogugwo en se Yesus mesirohob, kaba, en esa en aud emen toua deit.

³⁴Dara Daud erba Ugwaremer an gin sug nosa touohob. Anai enin eng, kaba, en emeisaugb dig bogoro. Doba Krisdus enin dous eng eisaugb dig bogo. Hanoba en enara, endagai: Adehsud Geis Huhugb sugragohob, kaba, en enara dou indan Adehsud, endagai: Ban beigtou dig dan insira misen terimda dan dowun aban moc augwan dag hotingga tainya ban abohora namcirahabi.

³⁵

³⁶Hang yeng dau mamang Israel, dan douwan naugb yen meigdoc eica namcir dag sud hom areg yen yetob en se sogo salibohob, kaba, Allah eigdoumesa Yesus gin eng en moho, dauntoba en edag mougt mera medam naugb laugwan. Dara en eic goubesa dou en naugb en eigdoc lusud laugwan dau sesar men gogom aud maireseb menau geb huhugb gin toua. Anai sud hom areg dan dens dou yenohob, kaba, eni Yesus hom gin dous.

³⁷Sug len louman Petrus mer an gin, kaba, ogod len merdoc mes beijesa medam namcir. Hanoba len leijidougwo en dara mesir len laugwan, lendagai: Emagtorij, emen emebara dagiro naugb emen geicara gin deita?

³⁸Dangga, kaba, Petrus en emauni dou len, endagai: Eigouhw naugb astesda dau yen, kaba, yen yeineg dau meijen sesar. Hanoba yen yahau an dougwo namcir, kaba, emen emogun yen se duhu bansins se Yesus Krisdus en moho debin gin toua. Dauntoba lusud lecinaga dag yen yesga meijen sesar. Dara yen yedag men logodeh dag misenohob. Anai emen emeperwei en mohw naugb ginohob. Sug yen yemaimo sesar dag gin deitero, doba yen yobsara dau namcirohob, kaba, Allah emaigdougwo meijen sesar augwan dau yen. Hanoba en emesa Mena Gogoufu dag mogud bansins se yen meigdoc mes toues.

³⁹Anai areg Allah os dou yen naugb sug en aigdougwo meijen sesar, hanoba en esa Mena Gogoufu se yen meigdoc mes toua, kaba, augwan gini eb naugb yen, dara yen meijihir, dara yen meigdebeitor, yen yaugwan. Dara eb naugb lugmahara gedig leng leigtou aigusi dau maman len laugwan toua. Dangga gareg maman Adehsud Allah eija enohob, kaba, areg en os gini emediyebeiya dau en touwero. Doba eb naugb len laugwan toua namcir.

⁴⁰Dara Petrus emens meijouhw dau areg graga augwan dou len dousero. Doba en enara einyana bad len merdoc mes ucan gin toua deit. Hanoba en esulou len, endagai: Yen yemaimo leng letob maman Adehsud se sogo salib gin aud meren geicara gecgu gin touwero. Doba yen yeigdoc yenin dau meren geicara gin terimda. Dauntoba gogom areg Allah esedeb naugb leng merug mog gin, kaba, emaiyan yen touwero.

⁴¹Dangga lusud leinyana gougwa, kaba, len merdoc ebdebin an areg Petrus esulou len eisaugb Krisdus gin toua. Hanoba Petrus dara en mesir gembala gus len logun leng menenau gini len laugwan se duhu ansins debin gin deit. Dara leng Krisden menenau areg maman Adehsud eic bauloulo se lona ingga, kaba, len laugwan ladedim edebeij merug ribu homoi toua.

⁴²Sug Petrus dara en mesir logun len graga laugwan se duhuohob, kaba, len leic meruwemougb esesa astesda lona terimda naugb len louman areg leng merug sisa hobjerai gini len ledidib dou len. Dara len lemasid lenin dau mesir leng Krisden gus touwero. Doba len ledag hom naugb len loucimdeb dara letara aninim. Dara len ledag hom naugb len locuncum esesa toua terimda.

⁴³Dara Yesus men logodeh merug sisa hobjerai gin, kaba, len lens ganusbus dara gansins einyana debin meren gebedbed gin dou len toua. Hang lusud leinyana merdoc eijesa dara lahau medam dau len toua namcir.

⁴⁴Dara leng merdoc ebdebin an Yesusohob, kaba, len laugwan lemeigtou daum touwero. Doba len loucimdeb ucucugb terimda, anai len merdoc gororougwim namcir. Hang len lemecgun len merisira debin meren aremougb touwero. Doba len lagaha merisira an doum toua terimda.

⁴⁵Dangga gareg dau len sug en edohw men cinogo, era men tu, dara men aremougb naugb edauma aregoufohob, kaba, en emekeba ingma deb naugb enin touwero. Doba en ekeba dou len gus laugwan aimo dau leng meren ingmaro an len toua.

⁴⁶Dara len lemeigtou dau goucimdeb touwero. Doba astesda lona, kaba, len laugwan leihweda se Allah Men Tuari naugb len louwaharo dou en. Dara astesda dau len, kaba, en emetara dou enin se men tu touwero. Doba len laugwan letara aninim se astesda meren tu augwan terimda. Dara sug len letara aninim dag gin, kaba, len lagahugouhw an maman Adehsud, dara len merdoc arjaga anim toua namcir.

⁴⁷Hanoba len lemarges dau sug len leigdoumesa Allah en moho an men geicara geigouhw gini touwero. Doba len leicara laimo dangga astesda lona loba terimda. Dara lusud gus, kaba, len merdoc emesrougb an len touwero. Doba len leigdoumesa len meroho an meren geicara gin toua namcir. Dara astesda lona gareg maman Adehsud eigdoc len dau sesar men gogom aud maireseb menau geb huhugb ginohob, kaba, en eic leng Krisden menenau gini bauloulo beiseisaugb dara leng Krisden gus se cinogo Yerusalem gin toua.