Read Manikion KISAH 21 Bible Online

KISAH 21 - Manikion bible

KISAH 21

¹Sug mougtir dau goucimdeb se Epesus graga lahwan emen se ijohob, kaba, emen emou len. Hanoba emen emaingmo ij dau len toua. Sug emen emeisa ij dau lenohob, kaba, emen emeisa ij namcir se lomos hom, moho Kos. Dangga se loneinda deit, kaba, emen emeisa ij dau sungga terimda emen emedebeij lomos hom, moho Rodos. Dau sungga deit, kaba, emen emeisa ij namcir terimda emen emeigdoc leng Likia meren hancob hom, moho Patara.

²Se Patara gin, kaba, emen emesma ing medam hom geihwededau sungga dig leng Pinisia meren hancob deit. Dangga sug emen emeisaugb ingmesohob, kaba, emen emededau sungga toua.

³Sug emen emaingmo ij dag ginohob, kaba, emen emogod dobogougb dig leng Siria meren hancob namcir. Dangga sug emen emeiya Lomos Siprus, doba eb ucugb dig emsira metigohob, kaba, ij edreg an emen namcir, terimda emen emedos leng Siria meren usi hom, moho Tirus toua. Anai leng leisa ij ingga len louwan leida meren aremougb ingma deb sungga dauwahabi.

⁴Dangga sug emen emesogwa dau ij dig lonogohob, kaba, emen emehilon dougwo leng merdoc ebdebin an Yesus sungga toua. Sug emen emesma lenohob, kaba, emen ematou desij len se ari hom deb sungga toua. Doba sug emen emeigtou desij len dag gini, kaba, len len dougwo Paulus dag en emeihwedig Yerusalem touwero. Anai Mena Gogoufu ens dou len dag leng Yahudi lesedeb gogom naugb enohob.

⁵Doba Paulus en emouman len merir an areg len len inggaro. Dangga sug emen lona naugb sug emen emeigtou desij len sungga edeinyumohob, kaba, emen ememeigtou deitero. Doba emen emeihwededau len naugb emdaingmo ij deitda. Sug leng Krisden sungga leiya dau gini, kaba, len leilan mersouwer dara merihir laugwan naugb len larougb emen terimda dig liga medigo toua. Dangga sug emen emedebeij dum meberohob, kaba, emen emaugwan emohorbrida emadedeij cinogo. Hanoba emen emocuncum deb sungga.

⁶Sug emen emocuncum dauwohob, kaba, emen emoum. Hanoba emen emaingmo ij dau len toua. Doba len, kaba, len lecicugb dig meren tueda.

⁷Sug emen emaingmo ijohob, kaba, emen emeisa ij namcir dau Tirus ingga dig Pitolemais deit. Sug emen emedebeij cinogo inggohob, kaba, emen emdeiya leng merdoc ebdebin an Yesus sungga naugb emen emou len. Hanoba emen ematou desij len sungga se lona hom toua.

⁸Se loneinda deit, kaba, emen emeisa ij dau sungga terimda emen emedebeij Kaisarea. Dangga sug emen emesogwa dau ijohob, kaba, emen emeihweda se sud hom gesai Krisdus moro, moho Pilipus, en men tu naugb emen ematou desij en sungga. Sud hom gin, kaba, dau lusud merug senggai gedig goucimdeb se Yerusalem louci len naugb len lekeba aremougb an leng debdesir sug nosohob.

⁹Dara en mehider ligdob merug hogu sungga, kaba, Allah eic mou ouforoho dou len naugb len lesai Allah Mer Geigouhw eisaugb Krisdus gin dou lusud touohob.

¹⁰Doba sug emen emeigtou sungga se lona aibibrohob, kaba, sud hom gesai Allah moro, moho Agabus, en en dau Yudea naugb en edebeij emen sungga toua.

¹¹Sug en edebeij emenohob, kaba, en eic Paulus men hwigbei mos dau meihw. Hanoba en ohud enin mohora dara mesira darem toua. Sug en ohud dag ginohob, kaba, en enara dou emen debin gini, endagai: Sud hom gedig men hwigbeimos gin sug en edebeij Yerusalemohob, kaba, leng Yahudi lemohud en mohora dara mesira hwas darem dag dan gins. Hanoba len lemohw en se lugmahara merisira toua. Anai gini aimo dau areg Mena Gogoufu ens deb dou danohob.

¹²Sug emen emouman Agabus mer an ginohob, kaba, leng Krisden se Kaisarea emen emaugwan emen dougwo Paulus dara goubesa namcir, dag en emeihwedig Yerusalem touwero.

¹³Doba Paulus enara bauni emen emir ucugb, endagai: Dagiro, naugwe hang, yen yeb an dan dag gina? Yen youwan yeic dan indoc meh obogougb dou danei? Era dagiro? Naro, yen yemeicara dag gini dou danero. Anai sug leng se Yerusalem lagaigeij dan, hanoba len leic gomom dou dan toua. Doba augwan gin, kaba, inggaida. Anai dan desedeb dan indoc mes naugb dan dohw dan indugt edug icira sug dan dedag maman Adehsud Yesus men sogougb ginohob.

¹⁴Dangga sug emen emeiya, doba en ohoiya emen emir dag gin namcir, kaba, emen ememen dougwo en deitero. Doba emen emamsoho en. Hanoba emen emenara doum, endagai: Inggaida, maman maimo areg maman Adehsud enin ouwan naugb en dous.

¹⁵Sug emen ematou sungga se lona aibibra debin ginohob, kaba, emen emed emen aremougb augwan debinim. Hanoba emen emeihwededau len dig Yerusalemeda.

¹⁶Sug emen emeihweda, kaba, emen emsir leng Krisden merug hosa dau Kaisarea ingga len toua laimo emen naugb lahwan emen aud sud hom dau Lomos Siprus, moho Menason, se men tu. Anai en edag Yesus men logodeh sug aimougtutohob. Hang emen emesedeb naugb sug emen emdatou desij en toua.

¹⁷Sug emen emedebeij se Yerusalemohob, kaba, emen emsir leng Krisden sungga len laugwan lebin emen dara len merdoc agahugouhw an emen namcir.

¹⁸Se loneinda deit, kaba, Paulus dara emen emaugwan emeihweda naugb emen emdeiya Yakobus dara mougtir dau goucimdeb len laugwan se men tu toua. Anai len laugwan lacinim deb sungga naugb emenohob.

¹⁹Sug Paulus ou len laugwanohob, kaba, en ecic dau Allah men geicara dou lugmahara ogdoc en meijouhw augwan asesa dou len toua.

²⁰Sug len louman dau augwan ginohob, kaba, len lagahugouhw an Allah namcir. Doba sug len lagahugouhw an Allah dauwohob, kaba, len lesulou Paulus an aremer hom ucan gin deit. Hanoba len lenara dou en, lendagai: Emsi, eigouhw naugb emen emens dau leng Yahudi se cinogo gini merdoc mes augwan asesa dou banahabi. Dauntoba ban becinaga dag misen namcir. Anai leinyana gougwa dau len, kaba, len merdoc ebdebin an Yesus dag misenohob. Doba len lemarges dau Musa men gomnomna gin touebma. Doba len leic meruwemougb esesa naugb len laimo augwan gin toua terimda.

²¹Hang len merdoc esrougb medam an ban. Anai len louman dag ban ben dougwo leng Yahudi gedig len leigtou se lugmahara meren cinogo dag len lemaimo Musa men gomnomna augwan deitero. Dara len louman dag ban besulou leng Yahudi ingga naugb len lemec len merihir merus dau, dara len lemaimo mamang Yahudi maman gaben augwan toua deiterohob.

²²Dangga emen emehilon ucina dagiro naugb bana? Anai emen emecinaga dag cum, kaba, leng Yahudi gini len louman dag ban abugwengga se cinogo gin touohoba?

²³Doba emen emsir merug hogu gedig len lehig dau ared, kaba, len toua merugwengga sugini. Dara meren lona naugb sug len legina merugt modi dau, kaba, toua ebeij deinyorohob. Dara emen emsir gedig len los dou Allah dag len lehig dau ara ara, kaba, len toua merugwengga sugini. Doba len laimo areg gogor deitohob. Dangga hang, areg emen emesulou ban an, kaba, dag gini:

²⁴Lonehibi, kaba, ban bahwan len dig Allah Men Tuari. Hanoba ban bouma ara ara dou len naugb len laimo ucina areg Musa men gomnomna arougb maman anohob naugb sug len lecabeci deseino Allah toua deit. Dara ban bousa len dag gini se lona senggai, aimo dau areg Musa arougb maman an touohob. Dangga sug len lecabeci deseino Allah namcirohob, kaba, ban bouma aremeta dou len toua. Dauntoba len leic lauwaharo dou Allah naugb meren areg gogor sug edouwedoc gin toua. Hang len legina len merug modi dag ansins debin gin, dauntoba lusud lecinaga dag len lemogor deseino Allah deitero, doba len lecabeci deseino en namcirohob. Hanoba len laimo areg len lehig dau terimda sug edebeij toua deit. Dara ban toua baimo merug hogu gin audi ucina gecabeci gini, anai ban beigtou desij leng lugmahara touohob. Ban beicara baimo dag gini, dauntoba sug leng Yahudi leiya dau gin, kaba, len lecinaga dag areg len gus len dou len eisaugb banohob, kaba, augwan dag misenero. Doba dag len lereiyaresa ban dous. Anai aban geicara gin, kaba, ens dou (...)

²⁵Doba eisaugb lugmahara gedig len merdoc ebdebin an Yesusohob, kaba, emen emog surad dou lenohob dag len lemet areg lusud lasijaresa dou seiseij. Dara len lemeg mogwihi. Dara len lemet mog gedig mogwihi omgomsa. Dara len lemohw len meraga aibibra doum touwero, anai gini aimo dau areg maman magod an deb dangga naugb lenohob.

²⁶Dangga se loneinda, kaba, Paulus, en aimo merug hogu graga se Allah Men Tuari. Hanoba len laimo areg Musa men gomnomna arougb len anohob, dauntoba len lecabeci deseino Allah toua. Sug Paulus aimo augwan dag en ecabeci deseino Allah deitohob, kaba, en einesa Allah Men Tuari, dauntoba en ens dau merug hogu graga meren lona naugb sug len louwaharo dou Allah deit dou leng Yahudi laugwan sungga toua. Dangga sug en edebeij lenohob, kaba, en enara dou len, endagai: Ari hom debin gin, kaba, astesda dau merug hogu gini len louwaharo dou Allah. Anai meren lona naugb sug len lecabeci deseino en deit, kaba, augwan edeinyumohob.

²⁷Doba sug ari hom gini deinyor sug ouwedocohob, kaba, leng Yahudi merug hosa dau leng Asia meren hancob len leiya Paulus se Allah Men Tuari gini.

²⁸Dangga sug len leiya en inegohob, kaba, len lagaigeij en. Hanoba len longgoij lusud debin en toua, lendagai: Yeng dau mamang Israel, yen yousa emenahabi. Anai sud hom gin, kaba, en eihwedig sungga sungga, hanoba en enara bedegeing mer an mamang Israel, dara Musa men gomnomna, dara Allah Men Tuari gin toua terimda. Dara en emedegeing mer dag gin dousero. Doba iteitogini, kaba, en eic gogor dou Allah men usi gecabeci gini. Anai en ahwan lugmahara len leinesa usi gin touohob. (

²⁹Len longgoij leng Yahudi gus dag gini, anai dag gibeca, kaba, len leiya Paulus mesi hom dau lugmahara, en moho Tropimus dau cinogo Epesus, en oucan Paulus se cinogo Yerusalem inggohob. Hang len loudesa endag Paulus ahwan en toua se Tuariohob.)

³⁰Sug leng Yahudi louman dau gin, kaba, eic dag leng se Yerusalem len laugwan lebara eijideijo medam namcir. Hanoba len laugwan lobgen naugb louwa debin Paulus naugb lagaigeij en. Sug len lagaigeij enohob, kaba, len lohugouhw en dau Tuari mes ingga dig medigada. Sug len lohugouhw en dig medigo inegohob, kaba, len louf misis gouji geb dougwo Tuari ingga dougwo en namcir. Dauntoba en emeinesa Tuari dougwo lenlo. Anai sug en einesa dougwohob, kaba, len merisira ogom naugb len lemogod en deitero.

³¹Dangga sug len louf misis dougwo enohob, kaba, len louwan leic gomom dou en namcir. Anai len laugwan mereiyeba lenohob. Doba ligbum, kaba, len lesa merir laic mougt mera medam dau leng Roma meren sadodor dag leng se Yerusalem len laugwan lebara eijideijo medam namcirohob.

³²Sug mougt mera ingga ouman dau gin inegohob, kaba, en ouci meren gedeijan, dara men logodeh merug aibibra, dara eni. Hanoba len laugwan locda dedemeda aud leng lebara eijideijo gragada. Sug leng lebara eijideijo ingga len leijesan, doba en agunyen an men logodehohob, kaba, len lemogod Paulus deitero. Doba len larges merisira dau en namcir.

³³Sug len ledebeij lenohob, kaba, sadodor meren mougt graga, en en aud Paulus naugb en agaigeij en toua. Hanoba en arougb men logodeh naugb len leic lanta hwas lahud mesira hwas darem namcir. Sug len lecba enohob, kaba, mougt mera ingga, en eijidougwo leng Yahudi ingga an en ucan gin toua, endagai: Sud hom gini garena? Dara men geicara toua dagiro?

³⁴Doba len lemens aremer ingga ingma dou en touwero. Anai ligbum, kaba, len lenara dag gaih. Doba ligbum, kaba, len lenara dag gaba, terimda len laugwan lenara merir edregim namcir. Dangga sug mougt mera ingga en emecinaga areg acgunog gin meijouhw asesa touwero, kaba, en arougb men sadodor naugb len lahwan Paulus aud meren tueda.

³⁵Doba leng lebara eijideijo gin, kaba, len leila ucan len namcir. Hanoba len leija se mer gouji dou sadodor ingga, lendagai: Yen yarges dou emen naugb emen emeic gomom dou en dous. Dangga sug len lahwan Paulus terimda edebeij igdecgwa meiyohob, kaba, len leigdoumesa en taibeibahabi, len lemeisaugb an dig tueda. Anai leng Yahudi gin, kaba, len leicara dag mereiyeba len namcirohob.

³⁶

³⁷Sug len leisaugb an en terimda len ledebeij misis mocohob, kaba, Paulus ec Grika mer bacgeij mougt mera ingga naugb en enara dou enahabi. Sug mougt mera ingga en ouman Paulus acgeij en se Grika mer dag gini, kaba, en eimiman dau gin namcir. Hanoba en enara dou en, endagai: Dan douman dag ban becinaga Grika merohob.

³⁸Dangga hang, dan decinaga ban bemedag sud hom dau leng Mesir gia gin touwero. Anai sug nosa, kaba, sud hom gini en ococi leng Yahudi merdoc mes naugb len locirma emen Roma dau meren cinogohob. Hanoba en ougwan merug ribu hogu dau leng merug mog se lomougwisa toua.

³⁹Doba Paulus auni en mer ucugb, endagai: Dan toua dau leng Yahudi dau cinogo moho agas hom, moho Tarsus, se leng Kilikia meren hancob. Dangga hang, sug ban abdoc esgirahesa, kaba, dan douwan denara dou leng Yahudi gaihahabi.

⁴⁰Sug mougt mera ingga ousa deisa Paulus mer an ginohob, kaba, Paulus eihweda besesa igdecgwa mougt. Hanoba en eh mesira dougwo len, dauntoba len lodina anirahabi. Dangga sug len lodina anirohob, kaba, en ec Ibrani mer benara dou len toua. Hanoba en enara dou len, endagai: