Read Manikion KISAH 22 Bible Online

KISAH 22 - Manikion bible

KISAH 22

¹Dan indagunerij, dara dan indinerij, yen youman sug dan dens dau danin meijouhw augwan asesa dou yenahabi.

²Sug len louman, doba Paulus ec lenin merir benara dou len dangga, kaba, len laugwan lodinanir namcir.

³Sug len lodinanir namcirohob, kaba, Paulus ebiji naugb enara dou len deit, endagai: Dan toua dau mamang Yahudi. Dara dan indim ouwadan dan deb se Tarsus, se leng Kilikia meren hancob. Doba dau sug dan dedag dugdeh terimda dan dedag sudohob, kaba, dan deigtou se Yerusalem gin dous. Dara sud hom, moho Gamaliel, en ens dau gomnomna gedig Musa eic dou maman mamjemouwer meijouhw augwan asesa dou dan toua. Anai en mou ouforoho se Musa men gomnomna gin namcir. Hanoba en arautut dan toua, dauntoba dan demedreg Musa men gomnomna gini mougwa hom touwero. Doba dan daimo gin augwan dara dan indoc hom toua terimda. Hang dan demobsara dau gomnomna gin hom touwero. Doba dan deic gerleij naugb dan daimo areg Allah arougb dan an gini augwan, aninim dag yen se lona gin toua.

⁴Dangga, kaba, ligiji dara ligida areg en esogwesa sud hom moho Yesus se men ucina menau gin, kaba, dan dagaigeij len. Hanoba dan douf len laugwan se tu gesisug namcir. Dara ligbum dara len, kaba, dan deic mog erij dou len terimda len lomom icira gin toua.

⁵Eisaugb aremer gin, kaba, Gembala Gesa Taij Meren Mougt Mera Medam an Majelis laugwan, len toua lecinaga dag areg dan den dou yen gin, kaba, dag dan demereiyara dou yen touwero. Doba dan denara augwan se geica dou yen namcir. Anai sug nosa, kaba, len log surad dara dan naugb maman mamsir leng Yahudi se cinogo Damsig touohob. Dauntoba len lousa dan naugb emen emagaigeij leng lesogwa deisa Yesus men ucina sungga toua. Dangga sug len leic surad gin dou danohob, kaba, dan deihwedan naugb dedagaigeij len. Hanoba dan dahwan len se Yerusalem gin naugb sug leic gogom dou len toua.

⁶Doba sug dan deihweda dedebeij deinyor Damsig se igdabogohob, kaba, mouf gohonohona medam hom ouwaden dau bogo augwougb. Hanoba erbacec dan sungga toua. Dangga sug dan deila dau kuda medgomori dainda cinogohob, kaba, dan douman mer hom enara dou dan, endagai: Saulus, Saulus, ban beic mog erij dou dan, anara?

⁷

⁸Dangga dan dauni en mer deit, endagai: Adehsud, bang gara? Doba en auni ucugb dou dan, endagai: Dang Yesus dau cinogo Nasared gedig ban beic mog erij dou danohob.

⁹Dara dan insir gedig len loucan dan gin, kaba, len toua leiya mouf graga. Doba sud hom genara dou dan gin, kaba, len lemouman en merero.

¹⁰Sug en auni dag graga dou danohob, kaba, dan deijidougwo en deit, dendagai: Adehsud, ban bouwan dan deicara dagiro naugb ban deita? Hang en emauni dou dan, endagai: Ban beisa beihwedig Damsigedahabi. Anai sungga, kaba, lusud lemens dau areg Allah esedeb naugb sug ban beicara baimo augwan asesa dou ban toues.

¹¹Dangga, kaba, dan insir len los dan insira dig Damsigeda. Anai mouf medam graga, kaba, ogod dan indires ebeigbogo dougwo sug dan demeiya lo asesa deiterohob.

¹²Doba se cinogo Damsig gini, kaba, sud hom, moho Ananias, en toua moongga. En esijaresa Allah dara en medoc augwan namcir. Dara en aimo Musa men gomnomna augwan toua. Dangga leng Yahudi se cinogo Damsig ingga, kaba, len laugwan leigdoumesa en moho agas medam toua namcir.

¹³Enin eng en en aud dan se tu sug dan deigtousa. Sug en edebeij danohob, kaba, en enara dou dan, endagai: Indaguna, Saulus, ban besga ban abires naugb ban beiya lo asesa ucugb deit. Sug en enara dou dan dag gin inegohob, kaba, dan indires esga. Hanoba dan doho dan indirgo naugb dan deiya en toua.

¹⁴Sug dan indires esgohob, kaba, en enara dou dan deit, endagai: Maman mamjemouwer meren Allah en ouci ban naugb en ens dau areg en esedeb naugb lusud meijouhw augwan asesa dou ban. Dara en eigdoumesa ban aboho naugb en ens men sogougb mohora hom gen aimo areg asesa enin medoc mes, moho Yesus, en mog dou bani. Hanoba en ouci ban naugb sug ban bouman men sogougb gin en mer touohob.

¹⁵Anai Allah en ouwan naugb areg ban beiya dara boumanohob gin, kaba, ban bos badi dou lusud se cinogo augwan toua terimda.

¹⁶Dangga hang, ban bemeigtou terimlo. Doba ban beisa naugb lusud logun ban se duhu. Hanoba ban bacgeij Allah naugb sug en oguc dougwo aban sesar augwan ediyebeiya dau ban toua.

¹⁷Sug Ananias esulou dan dag gin dauwohob, kaba, dan decicugb se Yerusalem gini. Dangga sug dan dedocuncum se Allah Men Tuari gin, kaba, Mena Gogoufu ogod dan dag domom namcir.

¹⁸Hang dan deiya Adehsud Yesus sug en enara dou dan, endagai: Ban bemeigtou se Yerusalem gin deitlo. Doba ban beihwededau len dedemeda namcir. Anai areg ban besai dou len eisaugb dan, kaba, len lemeic ban abir an gin deitero. Doba len lasidged ban an gin terimda.

¹⁹Doba dan dauni ucugb dou en deit, endagai: Adehsud, dan deihwedaud len dagiro? Anai leng Yahudi gini len lecinaga dag sug nosa, kaba, dan deinesa meren tuari augwan naugb dan dagaigeij, dara dan deic mog erij dou leng merdoc ebdebin an ban len laugwan touohob, gina?

²⁰Dara sug Sdepanus os badi ban aboho deseino len sug nosa, hanoba len leic igdahab lad en bomom, kaba, len lecinaga dag dan toua indoc aninim dara lenohob. Anai sug len leic gomom dou en, kaba, dan toua indugwengga desij len. Hanoba dan dos meren sansun augwan dau len, bansins dag dan dousa deisa len an sug len leic gomom dou en touohob.

²¹Doba Adehsud en auni ucugb dou dan deit, endagai: Ban bemehig debero. Doba ban beihwededau suginda. Anai dan desa ban aud lugmahara gedig len lemec merus daubuma naugb ban besai dan induro dou len toua.

²²Sug Paulus ecic dau aremer gus augwan, kaba, len lesa lodinanir namcir. Doba sug len louman dag Adehsud eigdoumesa en naugb en edesai en moro dou leng lemec merus daubuma, kaba, len lemesa lodinanir deitero. Doba len lesa merir medam, lendagai: Sud hom gedag gin, kaba, yen yemamsoho en debero. Doba yen yeic gomom dou en namcir. Anai emedeinyum naugb sud hom gin en maireseb emeb touwero.

²³Sug len lesa merir medam dag gin, kaba, ligbum len lekris sansun icira merus. Dara ligbum, kaba, len lasgun cinogo mor. Hanoba len lerba augb bogo mor ouf namcir toua. Anai len lauwam endag Paulus mer hom gini, kaba, eic Allah moho bacecimohob.

²⁴Sug sadodor meren mougt mera medam en ouman dau gin, kaba, en arougb men logodeh, endagai: Yen yahwan sud hom gin se dimei mes. Hanoba yen yabosbos en sungga, dauntoba en esga dau areg leng Yahudi leisadesan graga moho asesa dou mamanahabi.

²⁵Doba sug leng sadodor ledohud en mesira hwas darem naugb sug labosbos enohob, kaba, Paulus eijidougwo leng sadodor meren mougt hom gesa deinyor en sungga, endagai: Eigouhw naugb yen yabosbos sud hom gedig leng Roma meren mougt mera medam en moho aiga enohob augwougb sug yen yemogod aremer naugb enbumei?

²⁶Sug mougt gesa desij en ingga ouman dag gin, kaba, en eihwedaud men mougt mera naugb en edecic dau aremer ingga dou en toua. Dangga sug en edebeij men mougt mera ginohob, kaba, en en dougwo en, endagai: Ban barougb emen naugb emen emabosbos sud hom gin augwougb anara? Anai leng Roma meroho aiga en touohob, gina?

²⁷Sug mougt mera ingga ouman dau gin, kaba, en eihwedaud Paulus naugb edeijidougwo en an gin deit, endagai: Ban ben dou danahabi, leng Roma meroho aiga ban dag misenohobei? Era naroei? Dangga Paulus ousa deisa en mer an, endagai: You, leng Roma meroho aiga dan touohob.

²⁸Sug mougt mera ingga en ouman gini, kaba, en ousa deisa Paulus mer, endagai: Dan toua leng Roma meroho aiga danohob. Doba dan deic aregoufu einyana dou lenahabi, len lemeigdoumesa dan toua. Doba Paulus auni dou en deit, endagai: Dan, kaba, leng Roma meroho aiga dan teitei, dau sug dan indim ouwadan danohob. Anai dan indina dara dan indim lan, kaba, leng Roma meroho aiga lan sug nosohob.

²⁹Sug sadodor louman dau gin, kaba, len lemobosbos enero. Doba len laisacij dau en namcir. Dara mougt mera graga en toua ahau medam. Anai en ecba sud hom gedig leng Roma meroho aiga enohob en mesira augwougb dara ranta touohob.

³⁰Doba mougt mera graga, kaba, en ouwan ecinaga dag aremer ara, hang leng Yahudi lemahacugb gogom debin Paulus gina? Dangga se loneinda deit, kaba, en esa mer dou gembala gesa taij meren mougtir dara Majelis, dauntoba len laugwan lacinimahabi. Sug len laugwan lacinimohob, kaba, en arougb men sadodor naugb len lesga ranta dau Paulus mesira. Hanoba en ahwan Paulus deseino len laugwan toua.