Read Manikion KISAH 24 Bible Online

KISAH 24 - Manikion bible

KISAH 24

¹Lona hogu debin ginohob, kaba, Gembala Gesa Taij Moho Agas, moho Ananias, dara leng Yahudi meren mougtir merug hosa, dara sud hom genara an lusud, en moho Tertules, len laugwan leihwededau cinogo Yerusalem dig Kaisareada.

²Sug len ledebeij Kaisareohob, kaba, len leisaugb aud Gubernor Piliks naugb len loho las Paulus deseino en toua. Dangga sug len laugwan lacinimohob, kaba, Piliks eija Tertules naugb en ens dau areg leng Yahudi loho las Paulus an gini dou en touahabi. Sug Piliks eija en dag ginohob, kaba, Tertules enara bahasij gogom debin Paulus dag gini, endagai: Adehsud gedig ban aboho eb taiba augwanohob, kaba, ban abu ouforoho se aremer augwan namcir. Dangga hang, aremer gogom emeb naugb emen toua deitero. Doba ban beseyeiyo emen dougwo augwan se arisogomoc einyana. Dara sug emen emesma gecgu, kaba, ban bousa emen an gin mougwa einyana touohob.

³Augwan gin, kaba, eic dag emen emaugwan emeigdoumesa ban aboho agas medam astesda lona loba an gin namcir. Dara emen emen sijo medam dou ban an gin toua namcir.

⁴Doba dan demouwan naugb sug dan demenara emaciduhwa Adehsud ban, dau aban areg ban beicero. Dangga hang, dan dacgeij naugb ban abdoc eigouhw an emen. Hanoba ban boc ban abums naugb areg emen emerba debin sud hom gin toua. Anai emen emainyen naugb sug emen emen areg se garougb dou ban dous.

⁵Doba sud hom gin, kaba, emen emesma en dag sud hom mog mog namcirohob. Anai se astesda cinogo sug en eihweda sungga sungga, kaba, en oho aremer debin leng Yahudi laugwan dag len lebara eijideijo terimda. Dara en edag leng laimo sud hom, moho Yesus, dau cinogo Nasared len laugwan meren mougt mera medam hom gin touohob.

⁶Dara en emeicara gecgu dag gin dousero. Doba en ainyen naugb en eic gogor dou Allah Men Tuari. Hang emen emagaigeij en icira gini. [Dauwohob, kaba, emen emouwan naugb sug emen emogod gogom debin en icira gini, aimo dau emen gomnomna an en toua.

⁷Doba sadodor meren mougt mera hom, moho Lisias, en es an men logodeh naugb len leigdoc sud hom Paulus gin dau emen emsira dara goubesa namcir.

⁸Hanoba en arougb emen naugb sug emen emen aud ban naugb emen emerba ara debinim deseino ban dous.] Sug ban beijidougwo Lisias an gin, kaba, en ousa deisa emen dag areg emen emerba ara debin en deseino ban gin, kaba, emen ememereiyara hom dou ban touwero. Doba emen emenara augwan se geica dou banohob.

⁹Dara leng Yahudi gus, kaba, len laugwan toua louma debin Tertules an areg en enara dou Piliks, dag en emereiyara dou en touwero. Doba en enara augwan se geica namcirohob.

¹⁰Sug Tertules ahacugb gogom debin Paulus dauwohob, kaba, Gubernor Piliks en ou mesira debin Paulus, dauntoba en enara dau enin deseino en touahabi. Hanoba Paulus enara dou en, dag gini: Dan decinaga ban bedag mofu naugb ban bogod aremer an emeng Yahudi se arisogomoc einyanohob. Dangga hang, dan demahau dau sug dan demens dau aremer augwan gini meijouhw asesa dou ban touwero. Doba dan decic augwan dag misen dou ban namcir.

¹¹Anai sug dan deisaugb dig Yerusalem, kaba, dan demeigtou se lona einyanahabero. Doba dan dideisa lona sisa hobjerai naugb dedocuncum se Allah Men Tuari sungga dous. Dangga hang, sug Adehsud, ban bouwan naugb behilon aremer gin deit, kaba, eigouhw naugb ban bedeijidougwo len gus an gin touahabi. Anai sug ban beicara dag gin, kaba, ban besma dag areg dan den dou ban ginohob, kaba, augwan asesa dag misen namcir.

¹²Dara sug dan deinesa Allah Men Tuari naugb dan dedocuncum dou en sungga, kaba, sud hom ingma dau leng Yahudi gin len lemeiya dau sug dan denara daised lingma dau len touwero. Doba dan docuncum dou Allah dous. Dara len lemeiya dau dan sug dan doho aremer debin len se meren tu dara meren tuari, dauntoba len lebara eijideijo icira gin touwero.

¹³Dangga hang, areg len loho las dan dou ban gin, kaba, len loho las dan augwougb dou ban dous. Anai len lemos ara hom se geica naugb gin touwero.

¹⁴Doba aremer hom, kaba, dan dos dadi dou ban gin dag dan desijaresa emen emjemouwer meren Allah, aimo dau areg sud hom Yesus ens dou emeng Krisden ginohob. Hang leng Yahudi gin, kaba, len lemowun emen an gin endag ucina gin, kaba, dag areibahau namcir. Dobnaro. Anai augwan gin, kaba, aimo dau areg Musa ens dou emen touohob. Dangga dan demarges dau areg eni dara leng lesai Allah moro nosa len log deb gin touwero. Doba dan indoc ebdebin an augwan gin namcir.

¹⁵Hang dan toua dod indina debsa Allah, aninim dag leng Parisi gini, dag se lona daiyamo gacin, kaba, en emeigdoumesa leng leicara geigouhw dara leng leicara gecgu len laugwan dau gomom naugb en emogod aremer debin len laugwan toues.

¹⁶Dangga hang, dan demeic induwemougb esesa, dauntoba dan indoc emowun dan an aremer hom touwero. Doba ouma debin dan dag dan daimo augwan edag beim dara obosboro an Allah dara lusud len laugwan namcirohob. Anai sug dan deicara dag gin, kaba, aremer hom emdagunya debin dan se lona daiyamo gacin touwero. Doba dan decabeci deseino Allah dara lusud laugwan dous.

¹⁷Sug Paulus ens dau areg len merdoc edregim icira gin dauwohob, kaba, en ou meresa aremer graga ucugb se meiyo deit, endagai: Dangga hang, areg dan dedebeij Yerusalem gin, kaba, dan demen an gecgwero. Doba dan doho leng Krisden dau lugmahara meren aregoufu naugb dan insir leng Krisden dau emeng Yahudi se cinogo ingga dous. Anai sireba len namcirohob. Dara dan deisaugb se Yerusalem gada naugb dan douwaharo dou Allah se men Tuari ingga toua. Anai dan dedesesa lugmahara meren cinogo gini se arisogomoc einyana dau ginohob.

¹⁸Dara sug leng Yahudi leiya dan icira sug dan douwaharo dou Allah se Men Tuari gin, kaba, dan daimo emen gomnomna naugb sug dan decabeci deseino Allah touohob. Dangga dagiro, naugwe hang, dan demeic gogor dou Allah Men Tuari gina? Dara indan geicara naugb sug leng Yahudi lebara eijideijo, kaba, hom toua ingmaro. Anai sug dan deinesa Allah Men Tuari gin, kaba, sud hom ingma dau lugmahara emaimo dan touwero. Doba merug hosa dau emeng Yahudi len laimo dan dous.

¹⁹Doba merug hosa dau leng Yahudi dau leng Asia meren hancob, kaba, len loudesa dag dan dahwan sud hom dau lugmahara se Allah Men Tuari gini. Hang dan demeic gogor dou men Tuari gin touohob. Anai len leiya sud hom dau lugmahara en aimo dan naugb sug aman amesebesa se Yerusalem inggohob. Dangga sug len leiya, doba indan geicara gecgu ingma se Tuari mes, kaba, eigouhw naugb len inggang len len naugb lahacugb gogom debin dan deseino ban toua. Anai len toua merugwengga desij dan se Allah Men Tuari ginohoba?

²⁰Ga, naro, kaba, dan douwan naugb Majelis gini len lens dau indan geicara gecgu dou ban areg len lowun dan an sug dan desa deseino len sug nosa gin toua? Naro, dan decinaga dag indan aremer hom, kaba, ingmaro.

²¹Era len lahacugb gogom debin dan areg dan deijidougwo len an grag ingginei? Anai dan deijidougwo len, dendagai: Yen yogod aremer gogom debin dan sugini dau sug dan dod indina debsa Allah dag en eigdoumesa lusud dau gomom ucugb gin dousei? Era ara? Dangga ban beijidougwo leninahabi, endag len lahacugb gogom debin dan ogdoc hom gininggei? Era dagiro? Anai dan doudesa, doba ara gus ingmaro.

²²Doba Piliks, kaba, en ecinaga dau maman Adehsud men ucina areg en esai dou lusud sug nosa meijouhw einyana asesa touohob. Dangga hang, sug Piliks ouman Paulus mer an dag gin, kaba, en emogod aremer ingga touwero. Doba en ogugwo debahabi. Anai en ecinaga dag areg leng Yahudi los ladi Paulus dou enohob, kaba, augwan dag misen touwero. Hanoba en enara dou len, endagai: Yen yeigtou naugb sadodor meren mougt mera, moho Lisias, en toua enahabi, maman mamogod aremer gini deit.

²³Sug Piliks ogugwo aremer gin debohob, kaba, en arougb men sadodor, endagai: Yen yesedougwo Paulus ingga, doba yen yesga aumaga dau en, dauntoba sug en ouwan, kaba, en esebesa gurereito. Era en eigtou dag misen. Dara sug en ouwan ara ara, kaba, yen yemen dougwo en touwero. Doba yen yamsoho mesir naugb len leic ara ara dou en toua.

²⁴Lona hosa debin ginohob, kaba, Piliks dara en mesouwa Drusila lan ladebeij tu sug Paulus en atousa graga deit. Mesouwa gin, kaba, en toua dau leng Yahudi. Dangga sug lan ladebeij se tu inggohob, kaba, Piliks acgeij men sadodor naugb len lahwan Paulus aud lan, dauntoba lan louman dau sug Paulus ecic eisaugb Krisdus Yesus men ucina sug lusud merdoc ebdebin an en meijouhw augwan asesa dou lan toua.

²⁵Doba sug Paulus edidib meijouhw dau sug maman maimo areg asesa Allah enin medoc mes ucan dou lan. Dara en ebedbed dou lan dag Allah ouwan naugb maman mabehnehino mamanin mamdoc mes dougwo areg maman mamdoc etrij icira. Dara en ens dau sug Allah esedeb lonohob naugb sug ogod gogom deinaugb lusud meren sesar dou lan toua, kaba, Piliks medoc ahau medam dau gin namcir. Anai Paulus mer gini oihirir men geicara namcir. Hang en emarougb Paulus, endagai: Iteitogini, kaba, ban bihwedahabi. Sug cumougt ingmanggebga, kaba, dan demeija ban naugb nanan namecicara eisaugb augwan gin deits.

²⁶Piliks enara dangga dou Paulus, anai en od mena debsa en dag cum, kaba, en emeic aregoufu ingma naugb emahud sihwa ai ens. Dauntoba en esga Paulus dau tu gesisug gin toua. Hang en emarougb men sadodor naugb len lahwan Paulus aud en ucucugb terimda naugb en enara dou en eisaugb Krisdus gin toua.

²⁷Dobnaro. Dangga sug arisogomoc hwai debin ginohob, kaba, sud hom, moho Porkius Pesdus, en eperwei Piliks en mohw dag Gubernor deit. Doba Piliks, kaba, en ouwan eic leng Yahudi merdoc eigouhw an en. Dangga hang, en emesga Paulus dau tu gesisug touwero. Doba en amsoho en se tu gesisug terimda.