Read Manikion KISAH 26 Bible Online

KISAH 26 - Manikion bible

KISAH 26

¹Sug Pesdus enara bouwa dauwohob, kaba, Agripa acgeij Paulus, endagai: Iteitogini, kaba, dan deic cumougt dou bani naugb banin benara dau banin abdoc mes dou emen deitahabi. Dangga sug Paulus ou mesira dougwo len laugwanohob, kaba, en ebiji naugb en ecic dau enin maireseb dou Agripa toua, endagai:

²Adehsud Agripa, dan indoc esgirahesa namcir naugb se lona gin, kaba, dan decic dau areg leng Yahudi loho las dan an ginohob meijouhw augwan asesa dou ban toua.

³Anai ban becinaga dau mamang Yahudi maman gaben. Dara ban becinaga dau areg maman mamir maisedim eisaugb maman gomnomna augwan asesa touohob. Dangga hang, dan dacgeij naugb ban beigtou bateteij. Dauntoba dan decic aremer gin augwan ouwa dou ban dauwahabi.

⁴Anai leng Yahudi, kaba, len laugwan lecinaga dau indan geicara dau sug dan dedag dugdeh mesaba augwan dag misenohob. Anai dau sug dan indim ouwadan dan, terimda dan dedag sud, kaba, dan demec se lugmahara meren hancob touwero. Doba dan dos indan cinogo dara se Yerusalem gin dous. Hang len lecinaga dau indan geicara dau acgunog augwan asesa touohob.

⁵Dangga sug len merdoc esgirahesa, kaba, len louma debin dan dag dau sug aimougtut, kaba, dan demaimo len gus meren gomnomna touwero. Doba dan daimo leng Parisi merir an Musa men gomnomna gin dous. Anai len lecinaga dag dan demedreg gomnomna hom gin touwero. Doba dan daimo augwan edreg dau leng Yahudi gus laugwan namcirohob. Anai gini emeng Parisi emen geicara dangga terimdohob.

⁶Sug dan daimo maman gomnomna dag gin namcirohob, kaba, dan demarges dau aremer hom areg Allah os dou maman mamjemouwer gin touwero. Doba dan dod indina debsa en an gin toua terimda. Anai en os dou len dag len lemomom namcirero. Doba se lona daiyamo gacin, kaba, en emeigdoumesa lusud laugwan dau gomom aud maireseb menau geb huhugb ucugb toues. Dangga eisaugb aremer hom gin eng dan desa deseino Adehsud, ban, naugb ban bogod gogom deinaugb dan toua.

⁷Dara dan demod indina debsa Allah an gin dousero. Doba mamang Israel meijouhuda sisa hobjerai gin, kaba, len laugwan lod merna debsa Allah an gin touohob. Dangga astesda lona loba sug len lesijaresa Allah, kaba, len merdoc moc dougwo gin touwero. Doba len merdoc leiseisan gini deseino en terimda. Sug len lod merna debsa Allah an dag ginohob, kaba, dagiro, naugwe hang, leng Yahudi lahacugb gogom debin dan deseino Adehsud bana? Anai areg len los ladi dan an deseino ban gin, kaba, dau sug dan dod indina debsa Allah dag en eigdoumesa lusud dau gomom ucugb touohoba?

⁸Doba sug Allah os dou maman dag en eigdoumesa lusud dau gomom ucugb dag ginohob, kaba, dagiro yeng Yahudi yen youduda en an gin terimda? Dara yen yesbes an dan sug dan dos dadi Krisdus dag Allah eigdoumesa en dau gomom deseino lusud touohoba? Yen youdesa endag men mobisamougb emedeinyumeroei? Era ara?

⁹Doba Adehsud, sug nosa, kaba, dan toua denara daugtarera dougwo lusud sug len loho las Yesus dau cinogo Nasared en moho deseino lusud. Anai dan doudesa dau sug len louma debin en dag Allah eigdoumesa en dau gomom ucugb, kaba, dag augwan gini edreg dau Musa men gomnomna namcirohob. Hang dan deic induwemougb esesa naugb dan deic mor mor dou leng Krisden len laugwan toua.

¹⁰Dan deicara dag gin sug dan indugwengga se cinogo Yerusalem sug nosa. Dangga hang, sug gembala gesa taij meren mougtir leigdoumesa dan indoho naugb ginohob, kaba, dan dagaigeij Allah men lusud leinyana gougwa. Hanoba dan douf len laugwan se tu gesisug. Dara sug leng Majelis logod gomom naugb len, kaba, dan indoc aninim dara len an gin toua.

¹¹Dara dan deinesa maman tuari augwan naugb dan dehilon leng merdoc ebdebin an Yesusohob sug len lesijaresa en sungga toua. Dangga sug dan dehilon lenohob, kaba, dan darougb len gus naugb len labosbos len merug erij medam. Dauntoba len merdoc emebdebin an Yesus deitero, doba len laideido dougwo en namcir. Dara dan deicara dag gin mougwa hom dousero. Doba dan deicara daimo dag gini astesda lona ucucugb an len terimda. Dara dan demeic mog erij dou leng Krisden se Yerusalem gin dousero. Doba dan desedeb naugb dan docigei len se lugmahara meren beimes toua. Anai dan indoc esrougb medam an len namcirohob.

¹²Dangga sug gembala gesa taij meren mougtir eic surad dou danohob, kaba, dan deihwedig cinogo Damsig naugb dan deic mog erij dou leng merdoc ebdebin an Yesusohob len laugwan sungga toua. Anai mougtir meren surad eic goubesa dou dan naugb ginohob.

¹³Doba, Adehsud, Agripa, sug dan dedebeij deinyor cinogo Damsig gini naugb igdabogo, kaba, dan deiya mouf medam gouji hom edreg dau igda mohora namcir ouwaden dau bogo. Hanoba erbacec dan an leng laimo dan ingga emen emaugwan toua.

¹⁴Dangga sug emen emaugwan emobsara dau kuda medgomori naugb emainda cinogohob, kaba, dan douman sud hom enara dou dan se lec Ibrani mer, endagai: Saulus, Saulus, ban beic mog erij dou dan dag gin terimda, anara? Anai sug ban bohoiya aban mougt mera en mer dag gin terimda, kaba, cum, aban geicara gini eic mog erij eiseisaugb dou banin ucugb toua.

¹⁵Doba dan deijidougwo en ucugb, dendagai: Adehsud, bang gara? Hanoba en ens enin moho dou dan, endagai: Dang Yesus, gedig ban beic mog erij dou danohob.

¹⁶Doba ban beisa besa ucugb. Anai dan dens danin ainyes dou ban naugb dan deigdoumesa ban dag indan sogougb. Dauntoba areg ban beiya dau dan iroginohob, dara areg dan demens dou ban se lona daiyamo gacin, kaba, ban bos badi dau augwan gini dou lusud gus len laugwan toua.

¹⁷Dara sug ban besai dan induro dou lusud, kaba, len lemeic gomom dou ban icira gin touwero. Doba dan deigdoc ban dau leng Yahudi dara lugmahara meren goubesa augwan toua namcir. Anai dan desedeb naugb dan demesa ban aud len toues.

¹⁸Dara dan desa ban aud len naugb ban besga len meriresi, dauntoba len meriresmougb deitero. Doba len leiya lo asesa ucugb. Hanoba ban bahwan len dau lobeigbogo aud mouf, dara dau Setan men uro mes aud Allah men uro mes toua. Dauntoba Setan men goubesa dara sesar men gogom emoiharaga len toua deitero. Doba sug len merdoc ebdebin an danohob, kaba, Allah aigdougwo meren sesar. Hanoba en eigdoumesa len meroho naugb len leigtou desij men lusud areg en ed len debinim naugb eninohob len laugwan toua namcir.

¹⁹Dangga hang, Adehsud Agripa, sug dan douman Yesus arougb dan an dau bogo dag ginohob, kaba, dan demohoiya en mer gin touwero.

²⁰Doba ebiji se Damsig dara Yerusalem, kaba, dan debedbed dou len dag len lemaimo meren sesar deitero. Doba len lesga meren sesar moho augwan asesa dou Allah namcir. Dara len leineg dau toua naugb len laimo areg asesa Allah enin medoc mes augwan deit. Hanoba len lens meren geicara debin gin dag len lahau an dougwo meren sesar augwan dag misen touohob. Dauwohob, kaba, dan debedbed dau augwan gini dou lusud se leng Yudea dara lugmahara meren hancob ucan dou len toua.

²¹Dangga ogdoc aremer hom gin, hang leng Yahudi lemagaigeij dan sug dan indugwengga se Allah Men Tuari. Hanoba len louwan leic gomom dou dan toua.

²²Doba dau sug nosa, terimda iteitogini, kaba, Allah eseyeiyo dan gin namcir. Hang dan demesa deseino yen naugb dan douma debin areg dan deiya dara doumanohob augwan asesa dou yeng meijoho eb taiba dara yen meijoho eb tainya yen yaugwan sugin toua. Dara areg dan douma debin dou yen gin, kaba, ingma susugwero. Doba aimo dau areg Musa dara leng lesai Allah moro len lesai dou maman mamjemouwer augwan deb sug nosa touohob.

²³Anai len len dou len deb dag Krisdus gin, kaba, en aimo ucina mog erij aud gomom naugb yen nosahabi. Hanoba en edag mebin dau leng lomom laugwan naugb eisa dau gomom ucugb toues. Dara len len dou len deb dag en eic mouf dou leng Yahudi dara lugmahara len laugwan. Dauntoba len lecinaga ucina naugb sug Allah eigdoc len dau meren gogom augwan gin toua namcir.

²⁴Doba sug Paulus en mer eb debin naugb en enara an enin dag gin terimda, kaba, Pesdus etaha en mer an. Hanoba en enara dou en dara mer gouji, endagai: Paulus, ban becic surad meijouhw aingma aingma, hang emeic dag mereiyeba ban touohob.

²⁵Doba Paulus en auni en mer ucugb, endagai: Adehsud, mereiyemeba danero. Doba dan indoc misen eng denara dou yen gini. Dara dan demereiyara dou yen touwero. Doba dan denara augwan gini se geica namcir.

²⁶Sug Paulus auni dou Pesdus dauwohob, kaba, en mer eb debin areg en en graga dou Agripa deit. Hanoba en enara dou en, endagai: Adehsud Agripa, dan decinaga dag areg dan den dou yen gin, kaba, ban becinaga dau augwan gini dag misen namcirohob. Dangga dan demaudud augwan gini dau ban touwero. Doba dan deic indus naugb dan dens augwan eb ainyes dou ban toua. Anai aremer augwan gin, kaba, hom emebdededero touwero. Doba eb ainyes dou lusud laugwan lecinagohob. Hang dan decinaga dag ban abdoc eica augwan dag misen toua.

²⁷Anai, Adehsud, Agripa, dan decinaga dag areg leng lesai Allah en moro len log deb se Surad Injil Meb Mohon eisaugb Krisdus deb sug nosa, kaba, ban abdoc ebdebin an augwan gin toua terimdohob. Gini misenei? You, gini asesa dag misen namcir.

²⁸Doba Agripa enara debin Paulus mer an gin namcir, endagai: Areg ban bebedbed dou dan gini, kaba, ban boudesa endag dan dobsara aud Krisdus iteitogin danggei? Naro.

²⁹Doba Paulus auni ucugb dou en, endagai: Ban bobsara aud Krisdus iteitogini, era se lona daiyamo gacin toua, kaba, augwan gini inggaida. Doba areg esloulougb, kaba, dag Adehsud, bani dara yeng youman dan indir gini yen yaugwan meigdoc ebdebin an Yesus, aninim dag dan gin toua. Dangga hang, dan docuncum dou Allah, dauntoba en arautut yen meigdoc mes aud gin toua terimda. Lanta gin dous eng dan democuncum dou Allah naugb emahud yen aninim dag danero.

³⁰Sug Paulus enara dou len dag graga dauwohob, kaba, mougt mera medam Agripa, dara Gubernor Pesdus, dara Agripa medemeito Bernike, dara leng gus laugwan, kaba, len leisa lesa. Hanoba len leihwedig medigoda.

³¹Sug len ledebeij se medigohob, kaba, lenin lenara doum ucucugb, lendagai: Sud hom gin, kaba, men aremer ingma naugb sug maman mauf en se tu gesisug, era maic gomom dou en toua, kaba, ingmaro.

³²Sug len lenara doum dangga dauwohob, kaba, Agripa enara dou Pesdus ucan deit, endagai: Edeinyum naugb sug nanan nasga sud hom ginohob. Doba en acgeij naugb maman masa en aud maman mougt mera medam se Romohob. Dangga hang, en eigtou se tu gesisug dous, terimda cumougt ingmahabi, maman mamesa enda. Anai nanan namen dougwo en dagiro?