Read Manikion KISAH 27 Bible Online

KISAH 27 - Manikion bible

KISAH 27

¹Sug leng Roma meren mougtir len logod an dag emen emeisa ij dig leng Italia meren hancobohob, kaba, len logugwo Paulus dara leng leigtou se tu gesisug ingga merug hosa se sud hom, moho Yulius, en mesira deit. Dauntoba en ahwan len aud mougt mera medam se cinogo Roma toua. Yulius gin, kaba, en edag mougt mera naugb sadodor merug sud sergem. Dara len leija Yulius an men sadodor gini len laugwan dag mougt mera medam se Roma enin men sadodor toua.

²Dangga sug emen emesma ij hom gen dau cinogo Adramitiumohob, kaba, emen emaugwan emaingmo ij ingga toua. Anai ij ingga esedeb naugb sug oho aremougb ucugb se astesda leng Asia meren usi augwanohob. Sug emen emaingmo ij ginohob, kaba, ij ingga eihwedan emenda. Dara sud hom dau leng Makedonia meren hancob, moho Arisdarkus gen dau beimes Tesalonika, kaba, en toua eisa ij desij emen.

³Dangga se loneinda, kaba, emen emdos se cinogo Sidon. Doba Yulius, kaba, en medoc eigouhw an Paulus namcir. Hang en arges Paulus naugb en edeiya mesir sungga, dauntoba len leic ara ingma dou en naugb lousa en toua.

⁴Sug len lob aremougb deisa ijohob, kaba, emen emeihwededau sungga dig leng Asia meren hancob deitda. Doba loungmen medam eisa dougwo emen namcir. Dangga, kaba, emen ememeisa ij dosusdero, doba emen emeisa ij emoci lomos Siprus ucugb aud dum moho dous. Anai sungga, kaba, loungmen mohora arjaga namcir.

⁵Sug emen emaihad Siprus mebesohob, kaba, emen emoho se medi irir leng Kilikia dara Pampilia meren hancob, terimda emen emaidoc Mira se leng Likia meren hancob toua.

⁶Sug emen emedebeij Mirohob, kaba, mougt mera Yulius en esma leng Aleksandria meren ij geihwedig leng Italia meren hancob hom deit. Dangga sug en edesma ij ginohob, kaba, en ahwan emen. Hanoba en arougb emen naugb emen emdaingmo ij ingga toua.

⁷Sug emen emeihwededau Mirohob, kaba, emen emeisa ij se lona aibibra deit. Doba ij emeijeijo an emendero, anai loungmen edeij emen namcir. Dangga sug emen emeteij duhu se lona hosa ginohob, kaba, emen emen egeiga beimes Snidus. Doba sug loungmen eisa bedeij emen dag gin terimda, kaba, emedeinyum naugb sug emen emeisa ij dosusdero. Hang emen emebib ij ucugb aud lomos Kreta naugb sug emen emaihad Salmone mebes se lomos ingga dous. Anai sungga, kaba, loungmen emeisa goujero.

⁸Hanoba emen emoci lomos Kreta gin toua terimda. Sug emen emeteij duhu dag gin terimdohob, kaba, emen emdos usi hom geb se mougwa mes, moho Usi Geigouhw, deinyor beimes, moho Lasea, gin toua. Lusud leija usi gini dag Usi Geigouhw, anai ij augwan eb dara geigouhw dau duhu mogo dara loungmen namcir.

⁹Dangga emen emeigtou se Usi Geigouhw gini se lona einyana toua terimda. Doba sug emen emeigtou sungga terimda, kaba, lona naugb sug lusud leisa ij dara gesgirahesa, kaba, obi toua namcirohob. Anai leng Yahudi meren Lona Gouji naugb sug len leic aremeta mogwihi dou Allah, dauntoba en aigdougwo meren sesar augwan dau len, kaba, edreg touohob. Dangga hang, Paulus en esulou mougt mera dara leng lesedougwo ij, dauntoba len lemekirsero. Doba len leigtou terimda igda goho dugurij ouwa dau lenahabi, len lemeisa ij deitda. Hanoba en enara dou len, endagai:

¹⁰Insirija, eigouhw naugb sug maman mamekirsedero. Doba maman maigtou sugin dousahabi. Anai dan indoc eiya debohob dau sug maman maihweda deit, kaba, dag maman madesma gecgu dag ij obrugb an aremougb augwan ediyebeiya namcir. Dara masud maigbum toua madomom dangga.

¹¹Doba sud hom gesedougwo ij, dara sud hom men ij gin, kaba, lan lanara laugbtarera dougwo areg Paulus esulou len an gin namcir. Dangga, kaba, mougt mera Yulius en toua emouman Paulus mer an areg en esulou len an ingga touwero. Doba en obsara dou len dous.

¹²Dara Usi Geigouhw gin toua, kaba, emeigouhw deinaugb sug lusud leigtousa dau igda goho dugurij touwero. Dangga hang, lusud leinyana se ij ingga, kaba, len toua lemouwan lemeigtou se usi gin deitero. Doba len louwan emen emeisa ij bemainyen bemedebeij cinogo hom se lomos Kreta ingga, moho Piniks, naugb emen emdeigtou sungga terimda igda goho dugurij augwan ouwa dauwahabi, emen emeisa ij deitda. Anai cinogo Piniks gin, kaba, edag mougwo, doba eb ainyes irir aud dig dum mer dara dum moho maraufu toua.

¹³Dangga sug len lesedougwo ij ingga, kaba, len leiya, doba loungmen ebiji naugb eisa dau dum mer dara mohora arjeijaga dous. Sug len leiya dag gin, kaba, len loudesa dag areg len logod anohob, kaba, len laimo toua. Hang sug len leic kemantu dau duhu se ing mesohob, kaba, emen emeisa ij emacuci mebera, terimda aud Pinikseda.

¹⁴Doba cum, kaba, loungmen eineg bobsara dau dig lonog dara mohora oubesa. Hang oto ij an emen toua namcir. Loungmen medam gini, kaba, lusud leija dag Matan.

¹⁵Leng lesedougwo ij ingga, kaba, len lainyen naugb lebib ij lagod loungmen mohora ingga terimda. Doba emedeinyum naugb touwero. Hang emen emarges emsira dau ij naugb loungmen enin oho ij an emen dous.

¹⁶Sug loungmen oho emen aud lomos mogurei, moho Kauda, nagama aud dig dum merohob, kaba, emen emeic emug erij icira ij mogurei naugb emesera aumagan deb se ing mes toua. Anai lomos nagama aud dum mer gin, kaba, loungmen mohora edina gurerei dau emenohob.

¹⁷Dangga sug emen emesera aumagan ij mogurei naugb emeigdoumesa se ing mesohob, kaba, emen emeic aumagasa dagadgeij dara ing maga namcir. Dauntoba duhu mogo emos bemadro touwero. Sug emen emahud ij mogurei dagadgeij dara ing magohob, kaba, leng lesedougwo ij ingga len ledug sarwir dau ij toua. Dauntoba loungmen oto ij mogud ebeij se duhu mod dous. Anai len lahau dag cum, kaba, loungmen oho ij an emen aud dibo mougb se usi, moho Sirtis, se leng Libia meren hancob dangga.

¹⁸Doba loungmen medam gini emedina dau emenero. Dangga sug loneinda, kaba, leng lesedougwo ij gini len lebiji naugb lahacugb aremougb dau ij se dum mohu namcir. Dauntoba ij eijouhw an emenahabi. Dobnaro.

¹⁹Hang edebeij lona hom debin deit, kaba, leni leic ij men aremougb geb se mes ingga ingma dau. Hanoba len lahasij augwan se duhu namcir toua.

²⁰Doba sug loungmen eisa dara goubesa ebsugeb debin emen dag gin terimda. Hanoba se lona einyana emen emeiya igda lona dara tebeij mougb touwero, kaba, emen emod emina debsa dag emen emina emagau deitero. Doba cum, kaba, emen emaugwan emomom dangga. Anai sug emen ememeiya igda dara tebeij mougb dag ginero, kaba, eic dag emen ememecinaga ucina naugb sug emen emeisa ij touwero. Doba emen emeisa ij augwougb dangga dous.

²¹Dara leng lesedougwo ij, kaba, len toua lemet ared se lona einyana touwerohob. Anai sug len lainyeinyen naugb ij emobrugb an emenero, kaba, emeic cumougt dou len naugb len let ared touwero. Doba len leigtou dau namcir. Dangga hang, Paulus en eisa besa se len merufu. Hanoba en ahadahada len, endagai: Indagunerij, eigouhw naugb yen yemeisa ij dau Lomos Kreta ginero. Doba yen yaimo dan indir an areg dan desulou yen an gin dous. Anai sug maman maigtou sungga terimda, kaba, maman mamesma gecgu. Dara maman aremougb emediyebeiya dau maman dag gin touwero. Doba augwan eb naugb maman toua terimda. Dobnaro. Yen yohoiya dan indir an namcir. Hang maman mamesma gecgu dag gin touohob.

²²Doba inggaida. Anai ij gin dous eng ediyebeiya namcir. Doba masud, kaba, maigbum mamomom deitero. Dangga hang, dan dacgeij dauntoba yen meigdoc emeijesa touwero, doba yen yaiyan meigdocesem.

²³Anai se loba greb, kaba, Allah gedig dan desijaresa en dara en moho aiga danohob, kaba, en esa men malaikad hom aud dan naugb en enara dou dan.

²⁴Dangga sug malaikad edebeij danohob, kaba, en oho mer debin dan toua, endagai: Paulus, Allah emeperwei medoc mes an banero. Doba en ouci ban naugb ban bedesai en moro dou leng Roma meren mougt mera medam se Roma namcir. Dangga hang, ban abdoc emeijesa touwero, doba ban baiyan abdocesem terimda. Anai ban bemomom deitero. Dara leng leisa ij dara ban, gin toua, kaba, len laugwan lemomom touwero. Doba len laugwan merna agau toua namcir. Anai Allah en medoc eigouhw an banohob, hang en emoiharaga len laugwan toua.

²⁵Sug Allah men malaikad os dangga dou danohob, kaba, yen meigdoc emeijesero, doba yen yaiyan meigdocesem namcir. Anai dan dod indina debsa Allah an areg men malaikad en dou dan ginohob, kaba, emedreg mogtimei mohw ginero. Doba obsara se mogtimei mohw gin augwan dangga toua.

²⁶Hang ij gini emomdia an maman deb sug ginero. Doba eihwedan mamandahabi, emdoclo deb se lomos homs. Anai gini aimo dau areg Allah ogod deb deinaugb mamanohob.

²⁷Sug loungmen odo emen naugb emen emeigbib se ari hwai se dum mod Adria ginohob. Hanoba edebeij se lobeingmod, kaba, leng lesedougwo ij gini len loudesa endag emen emedebeij deinyor meberohob.

²⁸Dangga sug len leic aumaga naugb len lan duhu meiyohob, kaba, len leiya, doba edebeij meter sud hwaiyaba. Doba emeb terba debin ginbuma, kaba, len leic aumaga lan duhu mei deit. Hang len leiya, doba edebeij meter sud hom sisedeisu dous.

²⁹Hang len lahau endag cum, kaba, ij oc lohoi an len. Dangga len lerba kemantu hogu dig ing moho. Dauntoba ij emec an len deitero. Hanoba len lesijaresa meren seiseij, dauntoba lona esga dau len dedemeda toua.

³⁰Sug leng lesedougwo ij ingga len lesijaresa meren seiseij dauwohob, kaba, len losus aumaga an ij mogurei se duhu ucan deit. Sug len losus an dauwohob, kaba, len lenara dou emen, lendagai: Emen emouwan emerba kemantu dig ing mebes toua deit. Doba areg len lenara dou emen gini, kaba, dag len launun dou emen dous. Anai len lohw merdocedoumohob naugb sug len lougb dig lonog dau emen toua, dauntoba len merna agau dous.

³¹Doba Paulus en dougwo leng sadodor meren mougt mera an men logodeh len laugwan, endagai: Sug leng lesedougwo ij gini len lemeigtou se ij mes namcirero, kaba, yen gin yaugwan toua meijina emagau deitero.

³²Sug leng sadodor louman dau gini, kaba, len logod aumaga an ij mogurei graga dau len toua. Hanoba len lamsoho duhu augwan dau len namcir.

³³Dangga ebeij deinyor sug lona esgohob, kaba, Paulus oho mer debin len laugwan, endagai: Yen yecinaga Allah os dou yen dag yen meijugt modi hom emog dau yen touwero. Hang dan demacgeij naugb yen yetara ingmahabi. Dauntoba yen meijaga emomomtomlo, doba yeic goubesa deitahabi. Anai se ari hwai gin, kaba, yen yemetara touwero, doba yen yeigtou augwougb dousohob.

³⁴

³⁵Sug en oho mer debin len dag gin dauwohob, kaba, en eic ared. Hanoba en en sijo dou Allah deseino len laugwan toua. Sug en en sijo dou Allah dauwohob, kaba, en eic ared ingma naugb en et aisa len laugwan toua.

³⁶Sug len leiya icira en dangga, kaba, oho gagadgeij dou len naugb len toua letara aninim.

³⁷Doba emeng emeisa ij gini, kaba, emen emug edebeij huntun hwai mos senggai senggem edeisu.

³⁸Sug len laugwan letara eicerohob, kaba, leng lesedougwo ij gini len lahasij tramdad mougweb augwan se dum mohu namcir. Dauntoba ij eijouhw se duhu mod an emen toua.

³⁹Sug lona esga goujohob, kaba, leng lesedougwo ij ingga len leiya lonogohob. Doba len lemecinaga asesa touwero. Anai len lemedebeij gin mougwa hom touebma. Dangga sug len leiya mougwa hom, doba dibo eb se mebera, kaba, len laugwan lohw merdocedoum. Dauntoba sungga edeinyum, kaba, len ledeic ij deb sungga toua.

⁴⁰Dangga hang, sug len logod aumaga an kemantu geb se ing moho augwanohob, kaba, len lamsoho bomdia namcir. Hanoba len lesga aumaga dau gurei hwai geb se ing moho toua. Dauwohob, kaba, len leh sarwir se ij mebes ucugb, dauntoba loungmen oto ij an emen aud lonogeda.

⁴¹Doba sug loungmen oto ij an emen dag gin, kaba, ing mebes edahatit dibo mougb namcir. Hang duhu mogo medam eisa bogod ing moho bobrugb an emen toua, anai ij ogodro bebsugebohob.

⁴²Dangga sug leng sadodor leiya, doba ing mebes edohudebes dibo anir deb dag ginohob, kaba, len lohw merdocedoum naugb leic gomom dou sogougwir laugwan toueda. Anai len lahau endag cum, kaba, len lesogwa lougb duhu dau len dangga.

⁴³Doba meren mougt mera en dougwo len namcir, anai en ouwan eseyeiyo dougwo Paulus. Dauntoba en mena agau dous. Dangga hang, en arougb lusud, endagai: Yeng yecinaga yougb duhu, kaba, yen yesogwesa duhu. Hanoba yen yougb duhu ino dig lonogeda.

⁴⁴Doba yen gus, kaba, yen yeic sogo mehir dara ing mehir, hanoba yen yemougb duhu ucan len toua. Emen emehilon ucina dag gin, hang emen emaugwan emedebeij lonog dara emen emina agau toua.