Read Manikion KISAH 4 Bible Online

KISAH 4 - Manikion bible

KISAH 4

¹Irir sug Petrus dara Yohanes lan lanara dou lusud gini, kaba, ligbum dau gembala gesa taij meren mougtir, dara leng lesedougwo Allah Men Tuari meren mougt mera, dara ligbum dau leng Saduki len laugwan len aud lan sungga toua.

²Doba sug len louman dau areg Petrus dara Yohanes lan labedbed dou lusud gin, kaba, len merdoc esrougb medam an lan namcir. Anai lan lanara dou lusud dau sug Allah eigdoumesa Yesus dau gomom ucugwohob, kaba, gini ansins dag len gus toua lemomom namcirero, doba len lemeisa dau gomom ucugb toues.

³Dangga hang, len lagaigeij lan. Hanoba len louf lan se tu gesisug naugb lan laigtou sungga terimda edebeij lonamen toua, anai deinyor lobohob.

⁴Doba lusud gedig len louman dau areg Petrus dara Yohanes lan labedbed dou lenohob, kaba, leinyana merdoc ebdebin an lan marir gin toua namcir. Dangga sug len lecic len gin laugwan ladedim, kaba, Yesus men logodeh se cinogo Yerusalem ingga edebeij merug ribu sergemohob.

⁵Sug lona esgohob, kaba, leng Yahudi meren mougtir an meren gedeijan, dara leng meru ouforoho se Musa men gomnomna, dara mougtir gus, kaba, len laugwan len len naugb len lacinim se Yerusalem ingga.

⁶Sug len lacinimohob, kaba, len loucimdeb dara leng meroho agas dag Hanas, dara Kayapas, dara Yohanes, dara Aleksander, dara Hanas mosur gus gus len laugwan toua. Anai Hanas, kaba, eni Gembala Gesa Taij Meren Mougt Mera Medam sug nosohob. Dara en maba Kayapas, kaba, en edag Gembala Gesa Taij Meren Mougt Mera Medam se lona ingga. Dara Yohanes dara Aleksander lani, kaba, Hanas en meisi lan toua.

⁷Dauwohob, kaba, len larougb sadodor naugb len ledahwan Petrus dara Yohanes aud len toua. Sug lan lanohob, kaba, len larougb lan naugb lan lasa deseino len. Sug lan lasa deseino len laugwanohob, kaba, len leijidougwo lan eisaugb maran geicara dou sud hom mohora agaim gia, lendagai: Sug yan yaic geigouhw dou sud hom mohora agaim gia, kaba, yan yaimo ara, dara yan yaigdoumesa gara en moho debin gini, hang emeic goubesa dou yan naugb gin toua?

⁸Sug len leijidougwo lan an dag ginohob, kaba, Mena Gogoufu eic mou ouforoho dara goubesa dou Petrus naugb en auni len merir ucugb dou len, endagai:

⁹Yeng yedag maman mougtir, dara yeng yedag meiju ouforoho naugb maman gaben, sug yen yeijidougwo aman eisaugb geigouhw areg aman ameic dou sud hom mohora agaim gini, dara ucina areg aman amaimo an en naugb sug en ec mohora ucugb, kaba, aman amens dou yen dara yeng Israel yaugwan, dag sud hom emesa deseino yen dag gini emogdoc amanin aman goubesa touwero. Doba aman ameigdoumesa Yesus Krisdus dau cinogo Nasared, en moho, naugb en dous. Hang en emeic geingmos agauwesa ucugb dou en touohob. Anai moho hom gin eng men goubesa edeinyum naugb gin dous. En gin, kaba, yen yetob en se sogo salib ben omom. Doba Allah eigdoumesa en dau gomom ucugb deitohob.

¹⁰

¹¹Augwan gini esogwa deisa areg sud hom erba Ugwaremer an en deb sug nosa touohob, endagai: Igdahab hom areg yeng yohud tu icira, doba yen yerbahaba deb, kaba, maman Adehsud enin eng eigdoumesa dag buc mandeij ucugwohob.

¹²Dangga hang, se cinogo gin augwan, kaba, Allah emeigdoumesa sud hom ingma, en moho, naugb sug en eigdoc maman dau sesar men gogom aud maireseb menau geb huhugb gin touwero. Doba en eigdoumesa Yesus enin dous eng, en moho, naugb gin dous.

¹³Sug len Majelis len leiya dag Petrus dara Yohanes lan lamahau dau lenero, doba lan laic marus naugb lan lans aremeijouhw augwan asesa dou len, kaba, len leimiman dau lan namcir. Anai len lecinaga dag lan gini, kaba, lingma lemens aremeijouhw dou lan gin touebma. Hang emeic len merdoc eiseisan dag lan gin toua laimo Yesus sug nosa touohob.

¹⁴Dara aremer hom naugb sug len launi Petrus dara Yohanes lan marir ucugb dou lan, kaba, toua ingmaro. Anai len leiya, doba sud hom mohora agaim graga en toua moongga desij lan dougwodaha.

¹⁵Dangga, kaba, len larougb lan dig medigo dau len dous. Sug Petrus dara Yohanes lan laihwededau lenohob, kaba, len lohw merdocedoum eisaugb lan, lendagai:

¹⁶Maman mahilon ucina naugb lan gin dagiro? Anai maran ganusbus gini, kaba, agaha dou lusud se cinogo Yerusalem laugwan lecinagohob. Hang emedeinyum naugb sug maman maunun dougwo lan an maran ganusbus gin deb touwero.

¹⁷Doba maman man dougwo lan an namcir dag lan lemeigdoumesa Yesus, en moho, naugb ara ara dou sud hom ingma toua deitero. Dauntoba aremer gini emagaha dou len gusero, doba ogdoc sugin dous.

¹⁸Sug len louci ucina dag gin naugb lanohob, kaba, len leija lan naugb lan lainesa aud len ucugb deit. Sug lan lainesohob, kaba, len len dougwo lan, lendagai: Emen emen dougwo yen dara goubesa namcir, dauntoba yan yemeigdoumesa Yesus, en moho, dou sud hom ingma toua deitero. Dara yan yamedidib aremeijouhw eisaugb en dou len touwero, doba yan yarges dau namcir.

¹⁹Doba Petrus dara Yohanes lan lanara launi len merir an ucugb deit, landagai: Yen youdesa dag areg yen yen gin, kaba, asesa Allah enin medoc mes, hang aman amaimo yen meijir an ginei? Era aman amaimo Allah enin mer dousei?

²⁰Anai enin eng arougb aman naugb areg aman ameiya dara amoumanohob, kaba, aman amesai gin augwan dou len gus toua. Hang aman amemarges gin deb touwero.

²¹Sug Majelis louman lan marir an gin, kaba, len len dougwo lan dara goubesa bedreg dau graga deit, lendagai: Sug yan yadreg emen emir, hanoba yan yasai sud hom gin en moho dou lusud deit, kaba, emen emeic mog erij medam dou yan namcir. Sug len len dougwo lan dara goubesa dag ginohob, kaba, len larges lan laihweda dous. Anai len leiya, doba lusud laugwan lagahugouhw an Allah an sud hom gec mohora ucugb gin terimda. Hang emedeinyum naugb sug len leic gogom dou lan touwero.

²²Dara sud hom gedig Yesus eic geigouhw dag ganusbus dou en gin, kaba, men arisogomoc edreg dau sud hwai touohob.

²³Sug Majelis larges landohob, kaba, lan lacicugb aud lan marsir leng Krisden gus deit. Hanoba lan ladecic dau areg gembala gesa taij meren mougtir dara leng Yahudi meren mougtir gus, kaba, len len dougwo lanohob meijouhw augwan asesa dou len toua.

²⁴Sug lan marsir louman lan marir an ginohob, kaba, len laugwan locuncum an gin dou Allah dara merdoc hom namcir. Hanoba len lenara dou Allah, lendagai: Adehsud, ban abubisamougb naugb ban bahasesei bogo, dara cinogo, dara dum mohu. Dara ban besinsin areg geb se augwan gin touohob.

²⁵Dangga hang, ban bens dau len gin, kaba, meren geicara gecgu ogdoc Mena Gogoufu dou emen emjemouwa Daud deb sug nosa, anai en edag sogougb dou banohob. Hang en emerba Ugwaremer an gin deb sug nosa, endagai: Dagiro, naugwe hang, leng lecguna dou seiseij len merdoc esrougb an maman Adehsud, hanoba len lohw merdocedoum naugb len leic gogom dou men godeh gedig en esedeb en naugb en eigdoc maman dau sesar men gogom augwan gin toua?

²⁶Anai meren mougt mera medam se cinogo augwan, kaba, len lesedeb lenin merdoc mes. Hanoba len lacinim se usi hom naugb lesara dara lan touohoba? Dobnaro. Areg len lesedeb gin, kaba, emera mera dou len touwero. Doba dag augwougb dous.

²⁷Adehsud, areg ban bens deb gini, kaba, augwan acgunog dag misen namcirohob. Anai Herodes dara Pontius Pilatus an lugmahara, dara leng Israel, kaba, len laugwan lacinim se cinogo Yerusalem gin. Hanoba len lohw merdocedoum an aban sogougb Yesus gecabeci gini naugb len leic gogom dou en touohob. Anai en, kaba, en emedreg dau areg ban barougb en an gin mougwa hom touwero. Doba en owun enin medoc mes arjaga naugb en aimo augwan dara medoc hom an namcir. Hang ban beigdoumesa en moho naugb sug en eigdoc lusud dau sesar men gogom aud maireseb menau geb huhugb gin touohob.

²⁸Sug len lacinim gin, kaba, len lemedreg dau areg ban besedeb naugb aban sogougb Yesus gini hom touwero. Doba len laimo augwan an en, anai bani abubisamougb namcir. Hang ban barautut len merdoc mes. Dauntoba areg len logod an en, kaba, aimo dau areg ban bogod deinaugb en sug acgunog touohob.

²⁹Dangga, Adehsud, ban beiya dau areg len gin len len dougwo emen an ginohob. Hang ban beic goubesa dou emen, dauntoba emen ememahau dau sug emen emesai ban aburo dou lusud touwero. Doba emen emeic emus dara emen emaiyan emdocesem naugb gin terimda. Anai emen emedag sogougb dou ban touohob.

³⁰Dara sug emen emesai ban aburo dou lusud gin, kaba, emen emacgeij naugb ban beic goubesa dou emen, dauntoba emen emeic geingmos agauwesa dou leng areber. Dara emen aben ganusbus dara emen emeic gansins ogdoc aban sogougb Yesus, en moho, debin gin dou len toua. Anai en, kaba, en emedreg areg ban barougb en an gin touwero. Doba en aimo augwan dara en medoc hom touohob.

³¹Sug len locuncum dag gin inegohob, kaba, Allah etitir meren dimei sug len leigtousa ingga einyeinya an len namcir. Dangga hang, len lemahau toua deitero, doba len leic merus. Hanoba len lebiji naugb sug len lesai Allah Mer Geigouhw eisaugb Krisdus dou lusud laugwan toua. Anai Mena Gogoufu atij an len merdoc mes, dauntoba en eic goubesa dou len naugb gin toua.

³²Dara leng merdoc ebdebin an Yesus, kaba, len merdoc dara meren gauwamara emedregim touwero. Doba len laugwan merdoc aninim se ucina hom naugb len laimo dous. Dangga hang, sud hom ingma, kaba, en emeigdoumesa enin men aremougb dag enin men touwero. Doba len lekeba meren aremougb augwan anim ucucugb terimda.

³³Dara Yesus men logodeh merug sisa hobjerai, kaba, len louma debin maman Adehsud Yesus dara goubesa namcir dag en emomom terimdero, doba en eisa dau gomom ucugwohob. Dara Allah medoc an Yesus men logodeh len laugwan, hanoba en eic geigouhw aingma aingma einyana dou len toua namcir.

³⁴Hang sud hom ingma dau leng Krisden, kaba, en monggwereij touwero. Doba augwan edeinyum naugb enohob. Anai leng meren lo dara meren tu moongga, kaba, len ledohw ledauma aregoufu. Hanoba len lodo dou Yesus men logodeh merug sisa hobjerai len toua. Dauwohob, kaba, merug sisa hobjerai gini, len lekeba dou astesda sud hom dau len, aimo dau areg men ingmaro an en toua.

³⁵

³⁶Dangga sud hom dau Lewi medebeitor dau Lomos Siprus, en moho Yusub, en toua ohw men cinogo bauma aregoufu. Hanoba en odo men aregoufu gini dou Yesus men logodeh merug sisa hobjerai gin toua. Dara merug sisa hobjerai gin, kaba, len leija en moho dag Barnabas. (Gini men meijouhw dag sud hom genara bad lusud merdoc mes terimda.)