Read Manikion KISAH 7 Bible Online

KISAH 7 - Manikion bible

KISAH 7

¹Sug len lauweila Sdepanus toutou dag gin, kaba, Gembala Gesa Taij Meren Mougt Mera Medam eijidougwo en, endagai: Areg lusud len len gin, kaba, ban ben dag misenohobei? Era naroei?

²Sug Sdepanus ouman Gembala Gesa Taij Meren Mougt Mera Medam eijidougwo en dag gin, kaba, en enara bauni ucugb dou Majelis len laugwan, endagai: Indagunerij, dara dan indinerij, yen youman dan indir an areg dan dauni ucugb dou yen gin deigeigouhwahabi. Anai sug Allah ens enin ainyes se men gogouf cucugb dou maman mamjemouwa Abraham sug nosa, kaba, en emens enin ainyes dou en se men tuari suginero, dara sug en moongga se mena men tu se Haran touebma. Doba en ens enin ainyes dou en sug en edag lugmahara se leng Mesopotamia meren hancobaba dous. Sug Allah ens enin ainyes dou maman mamjemouwa se lugmahara meren hancob dag ginohob, kaba, dagiro, naugwe hang, yen yenara dou dan dag Allah ens enin ainyes dou maman se men Tuari se Yerusalem gin dousa? Dara dan deic Tuari gin, en moho, dacecim touohoba?

³Sug Allah ens enin ainyes dou Abraham dag ginohob, kaba, en arougb en naugb en emeigtou se leng Mesopotamia meren hancob gin deitero. Doba en eisa dau men meijouhuda aud cinogo menau areg Allah emens dou en toues.

⁴Dangga hang, Abraham eisa dau leng Kasdim, era leng Mesopotamia, meren hancob. Hanoba en eihwedig mena men cinogo, moho Haran, naugb en atou desij en sungga deit. Doba sug en mena omom dau enohob, kaba, Allah arougb en dau sungga naugb en en se meijen cinogo gedig yen yesesa gin toua.

⁵Dara Allah emeic meijen cinogo gini mohw gurerei hom dou Abraham sug aimougtut gin touwero. Doba en os dou en deb dag augwan gin, kaba, enin men dara en medebeitor meren deb dous. Dara se lona sug Allah enara dangga dou en, kaba, en mesouwa Sarai emouwadan en meh hom touebma.

⁶Sug Allah os maman cinogo gin dou Abraham ginohob, kaba, en esulou en ucan deit dag gini, endagai: Cinogo augwan gin, kaba, dan deic dou ban naugb ban abdebeitor len laugwanohob. Doba aimougtut, kaba, len ledag irinya dara sogougb se len gus meren cinogo nosahabi.

⁷Dangga sug len leic mog erij dou ban abdebeitor gin se arisogomoc huntun hogu dag ginohob, kaba, dan demesa gogom medam debin lugmahara gin toues. Dauwohob, kaba, ban abdebeitor len len dau cinogo ingga naugb len lesijaresa dan sugin toua deit.

⁸Sug Allah os gin augwan dou Abraham dauwohob, kaba, en arougb en an men lusud naugb len lec merus dau toua. Anai gini ansins dag len louma debin areg Allah os dou len, hanoba len lebin dara laimo toua terimda. Dangga hang, sug Abraham mesouwa Sarai en ouwadan meisi Isag, hanoba lona senggemoi debin ginohob, kaba, Abraham ec mos dau en. Dara Isag, kaba, en eicara dangga dara en meisi Yakub. Hanoba Yakub en ec mamang Yahudi maman mamjemouwer mebin merug sisa hobjerai len merus dau toua.

⁹Doba maman mamjemouwer mebin gin, kaba, len merdoc esdigeij len meragto hom, moho Yusub, en namcir. Hang len lemohw en dag sogougb dig cinogo Mesir toua.

¹⁰Dobnaro. Allah eseyeiyo en, hanoba en eigdoc en dau areg gogom geb debin en augwan. Dara en eic mou ouforoho dara gedag beim dou en sug en edeseino leng Mesir meren mougt mera medam, moho Piraun, naugb en enara dou en. Dangga hang, Piraun eigdoumesa en moho naugb en esedougwo en men tu dara men cinogo Mesir augwan toua. Anai Yusub men geicara eic dag Piraun medoc eigouhw an en namcirohob.

¹¹Doba cum, kaba, sir gogoufu medam einesa cinogo Mesir dara Kanaan augwan toua. Dangga hang, sug Yakub en ouman, doba tramdad einyana inggebga se cinogo Mesir, kaba, en arougb maman mamjemouwer merug sisa hobjerem len leihweda sungga aimougtut naugb ledouma tramdad dau len toua. Anai len lemesma ared hom se cinogo Kanaan ginero. Hang lusud leinyana sireber, lomom namcir toua.

¹²

¹³Sug len leihweda se cinogo Mesir ucan deitohob, kaba, Yusub ens enin ainyes dou en magto dara en maguner. Hanoba se lona ingga, kaba, Piraun en ecinaga Yusub magto dara maguner gin dag misen toua.

¹⁴Dauwohob, kaba, Yusub esa mer dou en mena Yakub naugb en eisan mosur len laugwan dau cinogo Kanaan dig Mesireda. Len laugwan gin, kaba, merug mos senggai sergem edeisu.

¹⁵Sug Yakub ouman Yusub acgeij en dag gin, kaba, eni an maman mamjemouwer len laugwan leisa dig cinogo Mesir namcir. Hanoba len laugwan ledomom deb sungga toua.

¹⁶Dangga sug len merdebeitor len ledecicugb dau Mesir, kaba, len lodo maman mamjemouwer merur toua ucugb naugb len ledec len se igdohos mes se Sikem toua. Igdohos mes gin, kaba, Abraham en ouma dara aregoufu dau Hemor medebeitor deb sug nosohob.

¹⁷Doba sug Allah men lona naugb sug en aimo areg en os dou Abraham an en medebeitor ebeij deinyorohob, kaba, maman mamjemouwer se cinogo Mesir ingga, kaba, lebedero medam namcirohob.

¹⁸Dangga sug Piraun menau en eperwei Piraun mohon en mohw naugb en edag leng Mesir meren mougt mera medam deitohob, kaba, en augwohosa maman lusud ingga naugb en aresbes len. Hanoba en arougb maman mamjemouwer gini naugb len lerba merihir mahaniheni len laugwan dig medigo naugb len lomom dau len teitei toua. Anai en, kaba, en medoc emeiseisan Yusub men geicara naugb leng Mesir sug nosa deitero. Hang en medoc emeigouhw an len touwero.

¹⁹

²⁰Se lona ingga toua, kaba, Musa mem ouwadan eni, doba en mebes eigouhw namcir. Dangga hang, len lemerba en touwero, doba len lecgoneh en se mena men tu se igda homoi. Anai len lecinaga dau sug en mebes ecabeci dag ginohob, kaba, Allah esedeb en naugb ara ara touohob.

²¹Sug igda homoi gin dauwohob, kaba, len ledob en deb se duhu mebera. Dangga sug Piraun mehida eiya enohob, kaba, en eigdoumesa en naugb edouwaha en dag en meisi misen deit.

²²Hanoba en arougb leng meru ouforoho an ara ara se cinogo Mesir ingga naugb len larautut en eisaugb meren gaben augwan dou en toua. Dangga hang, sug en edag sudohob, kaba, en eic mos naugb en enara dou lusud dara goubesa namcir. Dara men geicara augwan aimo debin gin toua.

²³Doba sug men arisogomoc ebeij deinyor sud hwaiyohob, kaba, en medoc eineg an en maguner dau leng Israel. Dangga hang, en esebesa naugb en edeiya dougwo len endag len merugwengga dara geigouhwei? Era naroei?

²⁴Sug en edebeij lenohob, kaba, en eiya, doba sud hom dau leng Mesir eic mog erij dou sud hom dau leng Israel namcir. Dangga, kaba, en erba sud hom dau leng Israel dig medigo. Hanoba en auni gogom ucugb dou sud hom dau leng Mesir ben omom toua. (

²⁵Musa eicara dag gini anai en oudesa endag sug len leiya dau gin, kaba, len lecinaga dag Allah eigdoumesa en naugb en emesga leng Israel dau sogougwes. Dobnaro. Len meru emobgesa meijouhw ginero, anai len meru emaiyero namcir.)

²⁶Loneinda deit, kaba, en eiya, doba lahwai dau leng Israel lanin logodim. Dangga en ouwan esesa lan marufu naugb en dougwo lan, endagai: Yan gin, kaba, yaingma dau meijouhuda susugb, hang yan yamogodim dag ginei? Naro, yan yahwas dau meijouhuda hom, hang yan yamogodim touwero.

²⁷Doba sud hom gogod mesi graga, kaba, en ahacugb Musa dau lan. Hanoba en en dougwo en, endagai: Gareg eigdoumesa ban bedag mougt, hang ban bemogod aremer se aman amufu gina?

²⁸Ban bouwan bogod dan toua domom, aninim dag sud hom dau leng Mesir gia, ingginei?

²⁹Sug Musa ouman en mer an gini, kaba, en arges maga bougbdedau cinogo Mesir namcir. Hanoba en edatou dag lugmahara se lomougwisa se leng Midian meren hancob sungga, kaba, en mesouwa ouwadan meisi lagiji lahwai dou en toua.

³⁰Sug Musa atou se Midian edebeij arisogomoc sud hwaiyohob, kaba, maman Adehsud Geis Huhugb edag malaikad agunya debin en se smougb mouf gousa sogomon hom se lomougwisa ingga deinyor menmod, moho Torsina.

³¹Dangga sug Musa en eiya smougb mouf gousa sogomon gini, doba emaitero, kaba, en medoc omom dau gin namcir. Hanoba en eihweda bedesa deinyor naugb ogmac touahabi. Doba sug en edebeij deinyorohob, kaba, en ouman maman Adehsud Geis Huhugb enara dau smougb mouf ingga dou en, endagai:

³²Dan gini, kaba, ban abjemouwer Abraham, dara Isag, dara Yakub meren Allah. Sug Musa ouman maman Adehsud enara dou en dag gin, kaba, en ahau beijesa medam namcir. Hang en emeic mos naugb emdogmac sogomon ingga deitero.

³³Doba maman Adehsud enara dou en deit, endagai: Ban beg hwigbeimos deb dau ban abohorahabi. Anai cinogo gedig ban besa se gini, kaba, ecabeci namcirohob.

³⁴Sug maman Adehsud en dougwo en dag graga dauwohob, kaba, en enara dou en ucan gin deit, endagai: Dan deiya dara dehigdecin, doba gogom medam akebin indan lusud se cinogo Mesirohob. Dara dan douman, doba len leiyagan gogom geb debin len touohob. Hang, ban bin, anai iteitogin, kaba, dan desa ban aud len ucugb deit. Anai dan douwaden dau bogo naugb dan deigdoc len dau gogom geb debinir gin toua namcir.

³⁵Dangga hang, Musa gin, kaba, eni sud hom gedig maman mamjemouwer len loguro en sug en ouwan ogod aremer se len merufu sug aimougtut gin toua. Anai len lesbesan en, lendagai: Gareg en eigdoumesa ban aboho dag emen mougt mera naugb ban bogod emen aremer se emen emufu gina? Dara en gin, kaba, eni sud hom gedig Allah esa en aud maman mamjemouwer leng Israel se cinogo Mesir ucan toua deit. Dauntoba en edag meren mougt mera medam. Hanoba en ahwan len dau cinogo ingga, dauntoba len lemedag sogougb sungga deitero. Doba en eigdoc len dau gogom areg akebinir gin toua. Anai maman Adehsud Geis Huhugb graga, kaba, en ousa en se aremer augwan gin touohob. En, kaba, eni sud hom gedig en enara dou Musa se smougb mouf gousa sogomon dag malaikad sug nosa.

³⁶Dara enin eng sud hom gedig en aben ganusbus dara en eicara einyana dag geimiman deseino leng se cinogo Mesir. Hanoba en ahwan len dau cinogo ingga naugb len laiga Dum Gahani. Dara len lec merohora se lomougwisa se arisogomoc sud hwai gin toua.

³⁷Dara Musa gin, kaba, eni sud hom gedig en enara deb dou maman mamjemouwer leng Israel deb sug nosohob, endagai: Se lona daiyamo gacin, kaba, Allah en emesa sud hom aud yen naugb en esai Allah en moro dou yen deits. Aninim dag en esa dan naugb dan desai en moro dou yen touohob.

³⁸Dara sug maman lusud leng Israel len lacinim se lomougwisa sug nosa naugb len louman dau areg Allah arougb len an gin, kaba, Musa gini en toua moongga desij len. Dara en eng sud hom gedig en esa taij se maman mamjemouwer dara malaikad merufu sug malaikad enara dou en taiba menmod, moho Torsina. Dara eni sud hom gedig malaikad ens Allah men gomnomna dou en naugb sug en esai Allah en mer gini dou len toua deit. Anai sug len laimo en mer gin, kaba, len lemomom touwero, doba eic dag maireseb menau geb huhugb eb naugb len toua terimda.

³⁹Dobnaro. Maman mamjemouwer gin, kaba, len louwan lecicugb dig cinogo Mesir dous. Anai len merdoc acincin an meren ared dara meren aremougb einyana sungga terimda. Dangga hang, len lemowun lenin merdoc mes arjaga deseino Musa naugb len lemaimo en an areg en arougb len an gin touwero. Doba len lotogoto en mer dara len lecicugb en dau len toua namcir.

⁴⁰Dangga sug Musa eisaugb se menmod Torsina se lona einyana dau lenohob, kaba, len larougb Gembala Gesa Taij Meren Mougt Mera Medam, moho Harun, naugb en esinsin seiseij hom dou len naugb eperwei Musa en mohw toua. Hanoba len lenara, lendagai: Ban besinsin seiseij merug aibibra naugb emenin. Dauntoba len leinoisa emen se lomougwisa, leperwei Musa en mohw deit. Anai en, kaba, en einoisa maman dau cinogo Mesir se lomougwisa ginohob. Doba iteitogini, kaba, en mog inggirodohoba?

⁴¹Sug len larougb Harun an dag ginohob, kaba, en esinsin seiseij hom men mocbobaga dag sapi moto naugb len. Hanoba len leic ara ara naugb lauwaharo dou seiseij gin toua. Dauwohob, kaba, len logo ara gaihim dara leinuhwera naugb len lagahugouhw debin areg lenin lesinsin gin toua.

⁴²Dangga hang, Allah ohw medigo dou len namcir. Hanoba en amsoho len naugb len lesijaresa tebeij geb se bogo augwan terimda. Augwan gini esogwa deisa areg en owun len an deb se Surad Injil Meb Mohon deb sug nosa touohob, lendagai: Yeng Israel, areg yen yogug naugb yauwaharo se arisogomoc sud hwai se lomougwisa ginohob, kaba, yen yemouwaharo dou danero. Doba yen youwaharo dou meijen seiseij dous.

⁴³Anai sug yen yodo hugbei naugb yec an, kaba, yen yemodo dou danero. Doba yen yodo hugbei an meijen seiseij, moho Molog. Dara yen yodo hugbei an meijen seiseij gedig men mocbobaga dag tebeij, moho Repan, naugb yen yesijaresa lan dous. Dangga hang, dan demarougb len gus naugb len lemdagaigeij yen dig cinogo Babel nagameda toua. Anai areg yen yesinsin se lomougwisa naugb yen yesijaresa gin, kaba, dag seiseijohob.

⁴⁴Doba len lodo hugbei an meren seiseij, anai Allah en moongga desij leneroei? Naro, Allah Men Tuari Dau Hugbei moongga desij len se lomougwisa ingga touohob. Dauntoba len lecinaga dag en moongga desij len terimda. Dara len lemesinsin hugbei gin dau lenin merdoc mes touwero. Doba len lesinsin hugbei gini, laimo dau areg Allah ens dou Musa dara arougb en an gin dous.

⁴⁵Dara len lemarges Allah Men Tuari Dau Hugbei deb touwero. Doba maman mamjemouwer gin, kaba, len logugwo hugbei gini se len merihir merisira deit. Dangga sug len merihir gini len laimo Yosua naugb len leinesa maman cinogo gin, kaba, len lodo hugbei gin toua. Anai Allah ocirma len lugun laugwan dau cinogo ginohob. Dara sug len leinesa maman cinogo ginohob, kaba, len lemarges dau Allah Men Tuari Dau Hugbei gin deb touwero. Doba inggebga desij len terimda edebeij lona sug Daud en edag meren mougt mera medam gin touohob.

⁴⁶Dara Daud gin, kaba, en men geicara augwan edag beim namcir. Hang Allah en medoc eigouhw an en medam gougwa toua terimda. Dangga hang, Daud en acgeij Allah, dauntoba sug en ouwan, kaba, en ohud tuari hom naugb en toua. Hanoba en enara dou en, endagai: Adehsud, ban bouwan, kaba, dan dohud tuari dau igdahab hom dou bani. Anai ban bedag emen emjemouwa mebin, moho Yakub, men Allah ban touohob.

⁴⁷Dobnaro. Daud meisi, en moho Solaiman, enin eng emohud tuari dau igdahab gini naugb en dous.

⁴⁸Doba Allah gin, kaba, en emeigtou se tu gedig lusud lesinsin naugb en ginero. Doba en eigtou se bogo dous. Anai en, kaba, en moho eb taiba augwan namcirohob. Augwan gini esogwa deisa areg maman Adehsud Geis Huhugb Sugraga en enara deb ogdoc sud hom gesai en moro, en moho Yesaya, se Surad Injil Meb Mohon deb sug nosa touohob, endagai:

⁴⁹Bogo, kaba, dag indan maija moc naugb dan deigtousa. Dara cinogo, kaba, dag indan hotingga naugb sug dan indohora ebsa toua. Dangga hang, yen yohud tu areng naugb dan gina, era dimei areng naugb sug dan datou se toua,

⁵⁰anai gareg en esinsin augwan ginohoba? Naro, danin dous eng desinsin augwan gin dous.

⁵¹Sug Sdepanus ens dau leng Yahudi merjemouwer meren geicara dou Majelis ginohob, kaba, en owun len meroho an meren geicara ucan gin deit. Anai meren geicara augwan, kaba, ecgu aninim dag len merjemouwer meren geicara toua namcirohob. Hanoba en enara dou len, endagai: Yen, kaba, yen meijugt mera dag igdahab namcir. Dara yen yemec meijus dau yen meigdoc mes dara yen meijums touebma, doba ebdougwo augwan ginaba. Anai sug lusud lesai en mer eisaugb Krisdus dou yen, kaba, yen yemei meijums naugb, dara yen yemebin en mer gini se yen meigdoc mes touwero. Doba meijen geicara augwan aninim dag leng lemec merus daubuma meren geicara toua namcir. Anai len, kaba, len lemei merums naugb Allah en mer. Dara len lemebin en mer se len merdoc mes touwero. Dangga hang, yen yemaimo areg Mena Gogoufu arougb yen an ogdoc leng lesai Allah en mer dou yen gin touwero. Doba yen yohoiya en mer, aninim dag yen meijemouwer len lemaimo areg Mena Gogoufu arougb len an ogdoc leng lesai Allah en moro sug nosa touwero. Doba len lohoiya en(...)

⁵²Dara len lemohoiya len merir dousero. Doba astesda sud hom areg Allah esa en aud yen meijemouwer gin, kaba, len leic mog erij dou len. Hanoba len leic gomom dou leng lesai Allah en mer gini len laugwan toua. Anai len, kaba, len lens dau Allah men Sogougb mohora hom gedig en eigdoc maman dau sesar men gogom augwan deb dou yen meijemouwer ginohob. Hanoba len lenara dou len, lendagai: Se lona daiyamo gacin, kaba, Allah en emesa men Sogougb mohora hom aud yen meigdebeitor naugb en emeigdoc len laugwan dau sesar men gogom augwan aud maireseb menau geb huhugb gin toues. Anai en emedreg dau areg asesa Allah enin medoc mes mougwa hom touwero. Doba en owun enin medoc mes arjaga naugb en aimo augwan dara medoc hom namcir.

⁵³Dara Allah men gomnomna areg en eic dou Musa ogdoc malaikadir sug nosa, kaba, yen meijemouwer len logugwo augwan gini se yen meisira touohob. Dobnaro. Yen yemaimo areg Allah arougb yen an se men gomnomna gini mougwa hom touebma. Doba yen yedreg dau gin toua namcirohob. Dangga hang, yen yemebin sud hom gedig en aimo areg asesa Allah enin medoc mes gin touwero. Doba yen yohw en se leng Roma merisira. Hanoba yen yeic gomom dou en toua, anai yen yagodgod len an ginohob.

⁵⁴Sug Majelis len louman dau gin, kaba, len merdoc esrougb medam an en. Hanoba len leg merugta an en toua.

⁵⁵Doba Sdepanus, kaba, en auweila dig bogo. Hang en eiya Allah men gogouf cucugb. Dara en eiya Yesus esa dig Allah mesira misen toua. Dara Mena Gogoufu en toua eic goubesa medam dou en.

⁵⁶Hanoba en enara dou Majelis, endagai: Yen yeiyohobei? Dan deiya bogo ec dau. Dara dan deiya Maman Mamaguna Mebin Yesus en esa dig Allah mesira misen naugb en edag mougt mera medam desij enohob.

⁵⁷Sug len louman Sdepanus en mer an gini, kaba, len lesa merir medam dougwo len merums. Hanoba len loc dou merums dougwo, dauntoba en mer gini emeinesa len merdoc mes naugb emeic gogor dou len deseino Allah touwero. Doba len lecabeci deseino en terimda. Anai len loudesa dag areg en enara graga, kaba, dag en eic Allah en moho bacecim namcirohob. Dangga len laugwan leisa anim naugb lobga aud en, dauntoba len lagaigeij en toua.

⁵⁸Sug len lagaigeij enohob, kaba, len lohugouhw en dig cinogo Yerusalem medigo naugb sug len leded eni. Sug len ledebeij dig medigohob, kaba, leng merisira ed en, kaba, len leg meren sansun gagas augwan dau len. Hanoba len leic dou gigbaba hom, moho Saulus, naugb en esan dougwo len toua. Sug len leg meren sansun dou en dauwohob, kaba, len led Sdepanus ben omom namcir.

⁵⁹Dangga irir sug len led Sdepanus dag ginaba, kaba, en eiyagarij maman Adehsud. Hanoba en enara dou en, endagai: Adehsud Yesus, ban boc ban absira naugb sug dan desa dan indina se ban absira mes.

⁶⁰Sug en eiyagarij maman Adehsud danggohob, kaba, en eic mohorbrida badedeij cinogo toua. Hanoba en esa mer medam mougwa hom ucan deit, endagai: Adehsud, ban abdoc emeiseisan meren sesar gin naugb ban bemauni ucugb dou len touwero. Sug en esa mer medam dag ginohob, kaba, en omom namcir.