Read Manikion KISAH 8 Bible Online

KISAH 8 - Manikion bible

KISAH 8

¹Dara gigbaba hom, moho Saulus graga, kaba, en emen dougwo len touwero. Doba en medoc aninim dara len naugb len leic gomom dou Sdepanus ben omom namcir toua. Dara se lona ingga, kaba, lusud lebiji naugb len leic mog erij dou leng Krisden gus laugwan se Yerusalem toua. Dangga hang, Yesus men logodeh merug sisa hobjerai lenin dous eng leigtou se cinogo ingga. Doba leng Krisden gus, kaba, len laugwan lougb laisoboro se leng Yudea dara Samaria meren hancob dous.

²Dara leng Yahudi gedig len lesijaresa Allah dara merdoc hom dag misen namcir, kaba, merug hosa dau len, kaba, len leic merus. Hanoba len len naugb len ledec Sdepanus en maga. Doba sug len ledec en, kaba, len leiyogoseser dara merir medam an en toua namcir.

³Doba Saulus, kaba, en eic mouwemougb esesa naugb en eic mor mor dou leng Krisden len laugwan terimda. Hang en emeinesa astesda tu se Yerusalem ingga. Dauntoba en eiya, doba gareg dau len en medoc ebdebin an Yesusohobei? Era, naroei? Dangga sug en ecinaga dag gareg en edag Krisdenohob, kaba, en ohugouhw len laugwan dig medigo. Hanoba en ouf len se tu gesisug toua.

⁴Doba leng lougb laisoboro dau cinogo Yerusalem ginohob, kaba, len lemahau dau sug len lemesai Allah Mer Geigouhw gini dou lusud touwero. Doba len leic merus naugb len lesai en mer gini dou lusud sungga sungga terimda.

⁵Dangga sud hom, en moho Pilipus, kaba, en toua eihwedig cinogo Samaria naugb en ebedbed Mer Geigouhw eisaugb Krisdus gini dou len toua. Hanoba en enara dou len, endagai: Sud hom areg Allah os dou maman naugb sug en eigdoc maman dau sesar men gogom augwan, kaba, en en naugb mamanohob.

⁶Sug leng Samaria louman dau gini, dara len leiya dau sug Pilipus en eic ganusbus einyana debin gin dou len toua, kaba, leinyana gougwa merdoc eica en mer an areg en esai dou len gin namcir.

⁷Anai len leiya, doba sug merna mog lagunya dau lusud leinyana merdoc mes, kaba, len leiyaga dareg merir medam namcir. Dara len leiya, doba leng merohora omom dara leng merohora agaim, kaba, leinyana leigouhw ucugb touohob.

⁸Dangga len laugwan se cinogo ingga, kaba, len lagahugouhw medam an Allah toua.

⁹Doba se cinogo Samaria ingga, kaba, sud hom, moho Simon, en toua moongga. En gin, kaba, en mou ouforoho dara men goubesa inggebga naugb en eic gomom dou lusud. Dara en agaresa len merdoc mes aud ara ara toua terimda. Dara en eicara baimo gini an len se igda aibibra touohob. Hang en eimiman enin deseino leng Samaria dag en moho agas medam namcir. Anai men gagaresa gin, kaba, eic dag len laugwan merdoc omom dau ginohob.

¹⁰Dangga, kaba, leng meroho eb taiba dara leng meroho eb tainya len laugwan merdoc eica en mer an areg en en dou len toua terimda. Dara len lecic en moho doum, lendagai: Simon gin, kaba, en edag Allah gedig maman maiya en dag mobisamougb namcir, gedig en ouwaden dau bogo naugb mamanohob.

¹¹Dara len lemarges dau sug len lei merums naugb areg en en dou len touwero. Doba len merdoc eica en an areg en en dou len terimda. Anai sug en agaresa lusud merdoc mes se igda einyana dag ginohob, kaba, eic dag len merdoc ouwarahara en icira gini namcir.

¹²Doba sug Pilipus en esai Mer Geigouhw dau sug Allah oiharaga lusud ucugb, dara en os badi Yesus Krisdus, en moho, dou len toua, kaba, len merdoc ebdebin an areg Pilipus en esai dou len gin dous. Hanoba en ogun ligida dara ligiji len laugwan se duhu bansins debin gin toua.

¹³Dara Simon enin toua medoc ebdebin an areg Pilipus esai dou len ingga. Dangga sug Pilipus ogun en toua se duhuohob, kaba, en aiseisa en terimda. Hanoba sug en eiya Pilipus eic gansins dara ganusbus einyana dou lusud, kaba, en eimiman dau gin namcir.

¹⁴Sug Yesus men logodeh merug sisa hobjerai se Yerusalem len louman dag leng Samaria, len toua, lebin Allah en mer se len merdoc mesohob, kaba, len lesa Petrus dara Yohanes audi len toua.

¹⁵Sug lan ladebeij lenohob, kaba, lan lacuncum an leng merdoc ebdebin an Allah mer gini, dauntoba en esa Mena Gogoufu se len merdoc mes toua.

¹⁶Anai terimda lona ingga, kaba, Mena Gogoufu emeinesa sud hom ingma dau len naugb en edag mougt mera se en medoc mes touebma. Doba sug Pilipus ogun len se duhu sug nosa, kaba, en ogun len se maman Adehsud Yesus en moho dous, dauntoba lusud lecinaga dag len ledag en men logodeh lenohob.

¹⁷Dangga sug Petrus dara Yohanes lan laob marisira taiba len merugtohob, kaba, Mena Gogoufu einesa len merdoc mes toua.

¹⁸Dangga sug Simon en eiya, doba Allah esa Mena Gogoufu se leng Samaria merdoc mes, icira sug Petrus dara Yohanes laob marisira se len merugtohob, kaba, en odo aregoufu dou len.

¹⁹Hanoba en enara dou lan, endagai: Yan yaic goubesa gin ingma dou dan toua, dauntoba astesda sud hom areg dan dob dan insira se en mougt, kaba, Mena Gogoufu einesa en medoc mes toua.

²⁰Doba Petrus etaha en mer an namcir, endagai: Ban beihweda an aban aregoufu augwan dig dum smougweda. Anai ban boudesa dau sug ban beic aregoufu dou Allah, kaba, edeinyum naugb en eic goubesa dou ban dauntoba ban besa Mena Gogoufu se lusud merdoc mes toua.

²¹Hang aban geicara gin, kaba, emedeinyum naugb sug ban baimo emen se emen geicara naugb sug emen emesai Mer Geigouhw eisaugb Krisdus dou lusud touwero. Doba ban beigtou dau emen, anai ban abdoc emedag beim deseino Allah namcirero.

²²Dangga eigouhw naugb ban besga aban geicara gecgu augwan gini dou Allah. Hanoba ban bacgeij maman Adehsud dag en medoc esgirahesa, kaba, en aigdougwo aban gauwamara graga dau ban touei? Era, naroei?

²³Anai dan decinaga ban bedag sesar men sogougb namciraba. Hang ban abdoc emetrij icira emen an emen goubesa dag gin touohob.

²⁴Doba sug Simon ouman Petrus mer an gini, kaba, en eiyaga dougwo Petrus dara Yohanes, endagai: Yan yacuncum dou maman Adehsud, dauntoba areg yan yan dou dan gini, kaba, Allah emesa debin danlo.

²⁵Sug Petrus dara Yohanes laos ladi Yesus, en moho, deseino lusud, dara lan lasai maman Adehsud en moro dou len touohob, kaba, lan lacicugb dig Yerusalemeda. Doba sug lan ladebeij se ucina mogums, kaba, lan lasai Mer Geigouhw eisaugb Yesus dou lusud se cinogo einyana se leng Samaria meren hancob gin toua.

²⁶Doba Pilipus, kaba, maman Adehsud men malaikad hom agunya debin en. Hanoba en arougb en, endagai: Ban besedeb naugb ban bederagasa ucina gededau Yerusalem dig cinogo hom, moho Gasa. Hanoba ban beraga ucina hom gini aud dig dum mer. (Ucina gin, kaba, esugwes namcir. Anai lusud merohora emedregim se gin toua deitero.)

²⁷Dangga sug Pilipus en ouman malaikad mer an ginohob, kaba, en eihweda. Doba Teopilus, ban bouman deigeigouhwahabi. Sug en eraga ucina gin, kaba, en agasa sud hom, gedig dag gigbaba, dau cinogo Etiopia. En aimo men keropo naugb en ecicugb dig men cinogoda. Anai en en naugb edesijaresa Allah se Yerusalemohob, hanoba en ecicugb dangga. Sud hom gin, kaba, en moho agas medam. Anai en edeijan gida mougt mera medam se leng Etiopia meren hancob, moho Kandake, naugb en esedougwo men ariloboc augwan toua.

²⁸Dangga sug en aimo men keropo gin, kaba, en ecic dau sud hom gesai Allah moro nosa, moho Yesaya, men surad asa gec toua.

²⁹Hang Mena Gogoufu emarougb Pilipus, endagai: Ban bobga dagasa keropo ginindahabi. Hanoba ban bec desisij toua terimda.

³⁰Sug en obga dagasohob, kaba, en ouman sud hom ingga en mer an sug en ecic dau areg Yesaya en og deb nosohob. Anai Yesaya gin, kaba, en edag sud hom gedig en esai Allah en moro sug nosohob.

³¹Dangga areg en ecic gini, kaba, dag gini: Len lahwan en aud gomom, aninim dag len lerei domba naugb sug logug toua. Doba en emauni mougwa hom dou len lenero. Aninim dag domba sug len lereba en modi dau, kaba, en emeiyaga dougwo len touwero.

³²Dara len lowun en moho obsara namcir, kaba, len lemaimo ucina misen naugb sug len lagod aremer aga en touwero. Doba len logod aremer gomom augwougb naugb en dous. Dangga gareg en emdecic dau en medebeitor ingma dou lusud gus toua deita? Anai en omom beihwededau cinogo gindohob.

³³Sug Pilipus ouman en mer an gini, kaba, en eijidougwo en, endagai: Adehsud, ban becinaga areg ban becic ingga men meijouhwohobei? Doba sud hom ingga en auni ucugb dou en, endagai: Dan demecinaga meijouhw augwougb dagiro? Anai sud hom ingma naugb emens meijouhw dou danero, gina? Sug en auni dangga dou Pilipusohob, kaba, en acgeij en, endagai: Ban besaugwin naugb beigtou desij dan, dauntoba ban bedidib aiyad gin meijouhw asesa dou danahabi.

³⁴Sug Pilipus eisaugb desij enohob, kaba, sud hom ingga eijidougwo en an gini, endagai: Areg sud hom gesai Allah moro en og gini, kaba, en og eisaugb eninei? Era eisaugb len gusei? Ban bens meijouhw asesa dou danahabi.

³⁵Dangga Pilipus en ebiji naugb en esai Mer Geigouhw eisaugb Krisdus dou en aimo dau areg sud hom gin en ecic ginohob.

³⁶Sug lan laingmo keropo terimda, kaba, lan ladebeij duhu geindaredeb se cinogo mes hom. Dangga mougt mera medam men gedeijan dau Etiopia gin, kaba, en eijidougwo Pilipus, endagai: Duhu ingmanggini. Hang ara eb dougwo dan naugb ban bemogun dan se duhu gineroei? [

³⁷Doba Pilipus auni dou en, endagai: Sug ban abdoc ebdebin an Yesus, dara ban abdoc augwan, kaba, edeinyum naugb sug dan dogun ban se duhu iteitogin toua. Dangga mougt mera medam men gedeijan graga, kaba, en auni dou Pilipus, endagai: Dan indoc ebdebin an Yesus Krisdus dag eni Allah Meisi mohora hom dag misenohob.]

³⁸Sug en auni dangga dou Pilipusohob, kaba, sud hom gedeijan arougb sud hom gos kuda an keropo naugb esan lan deb sungga. Sug keropo esan lanohob, kaba, eni dara Pilipus, lan lasogwa dau keropo se duhu. Hanoba Pilipus ogun en se duhu, bansins dag en toua edag Krisdus men logodehohob.

³⁹Doba sug lan laisa dau duhu inegohob, kaba, mougt mera medam men gedeijan en emeiya Pilipus deitero. Anai Mena Gogoufu ahwan en dau sunggohob. Dangga mougt mera medam men gedeijan gin, kaba, en aingmo men keropo gin terimda. Dara medoc agahugouhw an Allah toua namcir.

⁴⁰Doba Pilipus, kaba, en eijesan, doba eni moongga se cinogo Asdodohob. Dangga sug en ec mohora ucugb dig men cinogo Kaisarea gin, kaba, en ebedbed Mer Geigouhw eisaugb Yesus dou len, amomo terimda en edebeij men cinogo ingga toua.