Read Manikion KISAH 9 Bible Online

KISAH 9 - Manikion bible

KISAH 9

¹Doba se lona augwan gin, kaba, Saulus en emarges dau sug en medoc esrougb an leng merdoc ebdebin an maman Adehsud Yesus len touwero. Doba en eic mog erij dara gomom dou len laugwan terimda.

²Dangga hang, en emeihwedaud Gembala Gesa Taij Meren Mougt Mera Medam naugb en edacgeij surad dau en toua, hanoba en enara dou en, endagai: Ban bog surad ingma dou dan naugb dan dedeic dou mougtir gesedougwo maman goucimdeb augwan se cinogo Damsigahabi. Dauntoba sug dan desma ligiji dara ligida gedig len lesogwa deisa Yesus se men ucina, kaba, len lousa dan naugb len lagaigeij len dou dan. Dauntoba dan dahwan len aud ban sugin toua.

³Doba sug Saulus eihweda bedebeij deinyor cinogo Damsigohob, kaba, mouf medam dau bogo augwougb, hanoba agacgec en toua.

⁴Dangga sug en eila dau kuda medgomori bainda cinogohob, kaba, en ouman mer hom enara dou en, endagai: Saulus, Saulus, ban beic mog erij dou dan anara?

⁵Sug Saulus ouman mer gin, kaba, en auni ucugb dou en, endagai: Adehsud, bang gara? Doba sud hom en auni ucugb dou Saulus, endagai: Dang Yesus gedig ban beic mog erij dou danohob.

⁶Doba ban beisa besa, hanoba ban beinesa cinogo Damsig gini. Anai sungga, kaba, lusud lemens dau areg dan desedeb naugb ban augwan asesa dou ban toues.

⁷Dangga leng laimo Saulus graga, kaba, len lahau medam. Hanoba len lesa dag losum namcir. Anai len toua louman mer graga, doba len lemeiya sud homero.

⁸Doba sug Saulus en eisa besa ucugwohob, kaba, en esga en mairesi naugb en auweila lo. Doba en emeiya lo deitero. Dangga, kaba, len gedig laimo en, len len los en mesira. Hanoba len lahwan en dig cinogo Damsigeda.

⁹Dara en emeiya lo asesa se lona homoiyerohob. Dangga hang, en emetara dara emegara se lona homoi gin touwero.

¹⁰Doba se cinogo Damsig ingga, kaba, sud hom dau Yesus men logodeh, moho Ananias, en toua moongga. Dangga maman Adehsud eic dag omom dou en. Hanoba en eija en, endagai: Ananias.

¹¹Sug Ananias ouman maman Adehsud en mer dag ginohob, kaba, en auni dou en, endagai: Adehsud, dan indugwenggini. Dangga, kaba, maman Adehsud enara dou en, endagai: Ban beihwedig ucina, moho Ucina Gobosboro, hanoba ban beijidougwo lusud se Yudas men tu an sud hom, moho Saulus, dau cinogo Tarsus. Anai en medoc emesrougb an dan deitero. Doba iteitogini, kaba, en ocuncum dou danohob.

¹²Dara dan dens dou en dag ban ben aud en naugb ban bob ban absira deb se en mougt, dauntoba en eiya lo asesa ucugb toua. Anai dan deic dag gomom dou en, hang en emeiya augwan gini asesa touohob.

¹³Doba sug Ananias ouman Adehsud en mer an dag gini, kaba, en auni en mer ucugb, endagai: Adehsud, lusud leinyana lecic dau men geicara dag en eic mog erij medam dou aban lusud leinyana se cinogo Yerusalem dou danohob.

¹⁴Dara dan douman, doba Gembala Gesa Taij Meren Mougt Mera Medam en eic goubesa dou en naugb en agaigeij emen gedig emen emeigdoumesa ban aboho dag emen mougt mera medam se cinogo Damsig gin touohob.

¹⁵Doba Adehsud arougb en namcir, endagai: Ban beihwedaud eni. Anai dan deigdoumesa en moho naugb en os badi dan indoho dou lugmahara, dara meren mougtir, dara leng Israel laugwanohob.

¹⁶Dara danin demens dau ucina mog erij areg Allah esedeb naugb enohob augwan asesa dou en toues. Anai sug en esai Allah en mer geigouhw eisaugb dan dou lusud dara en os badi dan indoho dou len, kaba, len leic gogom medam dou en icira gin toua namcir.

¹⁷Dangga, kaba, Ananias en edehilon se Yudas men tu. Sug en eiya Saulus se Yudas men tuohob, kaba, en ob mesira deb se en mougt. Hanoba en enara dou en, endagai: Indaguna Saulus, Yesus maman Adehsud enin eng arougb dan aud ban naugb dan dousa ban, dauntoba ban beiya lo asesa ucugb deit. Dara en emesa Mena Gogoufu einesa ban abdoc mes naugb en eic goubesa dou ban toues. Anai sug ban ben aud emen sugin, kaba, en ens enin ainyes dou ban se ucina mogumsi naugb en enara dangga dou ban touohob.

¹⁸Sug Ananias enara dag graga dou en dauwohob, kaba, areg edag hosei merila obsara dau en maires namcir. Hanoba en eiya lo asesa ucugb deit. Dangga sug en eisa besa ucugwohob, kaba, Ananias ahwan en aud duhu naugb en ogun en se duhu, bansins dag en edag Yesus men logodeh touohob.

¹⁹Sug Ananias ogun en se duhuohob, kaba, Saulus et ared. Hang goubesa einesa en maga ucugb se mohw deit.

²⁰Dangga Saulus, kaba, en emecicugb dig Yerusalem dedemeda touwero. Doba en eigtou desij Yesus men logodeh se Damsig se lona aibibra toua. Dara en emeigtou dau sug en os badi Yesus en moho deseino lusud touwero. Doba sug Ananias ogun en se duhu inegohob, kaba, en einesa leng Yahudi meren tuari naugb en esai Mer Geigouhw eisaugb Yesus dou len laugwan sungga toua. Hanoba en enara dou len, endagai: Yesus gin, kaba, en edag Allah Meisi mohora hom, gedig en eigdoumesa en moho naugb en eigdoc maman dau sesar men gogom augwan dag misen namcirohob.

²¹Sug leng Yahudi louman en mer an dag gini, kaba, len leimiman dau gin namcir. Hanoba len leijidougwom ucucugb, lendagai: Sud hom gin, kaba, en eic gomom dou lusud gedig len leigdoumesa Yesus, en moho, dag meren mougt mera medam se Yerusalem len laugwanohob. Dara en en sugini naugb en agaigeij leng leigdoumesa Yesus, en moho, dag meren mougt mera medam len laugwan sugin touohob. Hanoba en ahwan len aud gembala gesa taij meren mougtir naugb len leic mog erij dou len toua deit. Dangga, dagiro, naugwe hang, en os badi Yesus, en moho, gini dag en edag Allah Meisi mohora hom dou maman dag gina?

²²Doba Mena Gogoufu ousa Saulus naugb en esai Mer Geigouhw eisaugb Yesus dara goubesa edreg beiseisaugb terimda. Dara en eic mou ouforoho dou en naugb en ens dau medagas einyana se Surad Injil Meb Mohon debin gin dou leng Yahudi, dag Yesus enin eng Sud Hom Geigdoc Lusud Dau Meren Gogom Augwan dous. Dara areg en ens gin, kaba, augwan eic dag leng Yahudi losum an en mer gin toua namcir.

²³Sug en ebedbed dangga dou leng Yahudi ingga se lona einyanohob, kaba, len loucimdeb, dauntoba len lehilon ucina naugb sug len leic gomom dou en dougwodaha.

²⁴Dangga hang, len lemesedougwo misis geb dougwo beimes ingga augwan an en astesda lona loba terimda naugb sug len leic gomom dou en namcir. Doba Saulus en ouman dau areg len lesedeb naugb en touohob.

²⁵Dangga se loba hom, kaba, Saulus men logodeh len lob en deb se aigdaga mes. Hanoba len losus aumagan en dau liga moro dig cinogoda.

²⁶Sug Saulus en ecicugb bedebeij cinogo Yerusalemohob, kaba, en ouwan edag hom dara Yesus men logodeh laugwan sungga toua. Doba len merdoc ahau dau en namcir. Anai len loududa en dag en emedag Yesus men logodeh dag misenbuma.

²⁷Doba sud hom, moho Barnabas, en edahwan Saulus. Hanoba en eino en men aud Yesus men logodeh merug sisa hobjerai toua. Sug lan ladebeij lenohob, kaba, en ecic dau sug maman Adehsud ens enin ainyes dara enara dou en se ucina mogumsi meijouhw augwan asesa dou len. Dara en ens dou len dau sug Saulus eni moongga se cinogo Damsig, kaba, dag en emahau dau leng Yahudi touwero. Doba en eic mos naugb en eperwei Yesus, en mohw. Hanoba en esai Mer Geigouhw eisaugb en dou len laugwan sungga touohob.

²⁸Sug len louman dau gin, kaba, len lebin en naugb en eigtou desij len toua. Dangga Saulus en eic mos naugb en eperwei maman Adehsud, en mohw, deit. Hanoba en esai Mer Geigouhw eisaugb Krisdus dou len laugwan sungga toua.

²⁹Dara en esai Mer Geigouhw eisaugb Yesus dou leng Yahudi gedig len lec Grika mer mogud len laugwan. Hanoba eni dara len, kaba, len lecic meijouhw laos denim ucan toua. Doba areg Saulus ens ainyes dou len gin, kaba, eic dag len merdoc esrougb medam an en. Dangga hang, len lehilon ucina terimda naugb sug len leic gomom dou en. Dobnaro.

³⁰Doba sug Saulus men maguner se Krisdus len lecinaga dau ginohob, kaba, len lahwan en dig cinogo Kaisarea. Hanoba len lesa en dau sungga dig men cinogo Tarsuseda.

³¹Dangga goucimdeb se Yudea, dara Galilea, dara Samaria, kaba, len laugwan merdoc ebtou toua. Anai Saulus en aimo Yesus dauwohob. Hang lusud lemeic mog erij dou len toua deitero. Doba Mena Gogoufu ousa len naugb len leiji dag lusud mos se Krisdus namcir. Dara en esa lingmadara dou len toua, kaba, len laimo areg asesa maman Adehsud enin medoc mes dara merdoc ahau dau en toua terimda.

³²Dara Petrus, kaba, en toua ec mohora naugb en edoumuma goucimdeb sungga sungga. Dangga hang, se lona hom, kaba, en edebeij Allah men lusud se cinogo Lida toua.

³³Sug eni moongga se cinogo ingga, kaba, en esma sud hom, moho Eneas. Sud hom gin, kaba, en mohora omom namcir. Hang en emeijobur se arisogomoc senggemoi gin touohob.

³⁴Dangga sug Petrus esma enohob, kaba, en arougb en, endagai: Eneas, ban beisa bod aban sidgwa, anai Yesus Krisdus eic geigouhw dou banohob. Sug Petrus arougb en dag gin inegohob, kaba, en eisa bec namcir.

³⁵Dangga leng se cinogo Lida ingga, dara leng leigtou se Saron meren hancob augwan sug len leiya dau gini, kaba, len toua merdoc ebdebin an maman Adehsud gin terimda.

³⁶Dara se cinogo hom, moho Yope, kaba, gida hom, moho Tabida, en toua moongga. En moho se lec Grika mer dag Dorkas, era rusa. En toua medoc ebdebin an Yesusohob. Dangga hang, astesda lona loba terimda, kaba, en eicara dag mogud einyana dou lusud aibibrida. Dara en eic aregoufu dou leng merunggwereij toua.

³⁷Doba se lona sug Petrus eni moongga se Lida, kaba, Dorkas en areba, hanoba en omom namcir. Dangga sug len ledu en magohob, kaba, len ledob en se dimei mes geb taiba.

³⁸Doba Yope gin, kaba, emeb aigus dau Lidero. Dangga sug Yesus men logodeh se Yope len louman dag Petrus eni moongga se Lidohob, kaba, len larougb lahwai dau len naugb lan laden dou Petrus dag en eijeijo dedemedahabi.

³⁹Dangga sug lan laden dou en inegohob, kaba, Petrus en eisa baimo lan namcir. Sug len ledebeij se Tabida men tu se Yopohob, kaba, len lahwan en se dimei geb taiba sug Dorkas maga eb se graga toua. Sug Petrus einesa dimeiyohob, kaba, ligida debdes laugwan lou acec en dara leb leingdara medam namcir. Hanoba len lens dau sansun geb aimei dara gagas gouji gedig en ogon sug mairesebaba augwan dou en toua.

⁴⁰Doba Petrus, kaba, en ocirma len laugwan dau dimei mes ingga namcir. Dangga sug len laugwan leihwedig medigo dau enohob, kaba, en eic mohorbrida adedeic dimei. Hanoba en ocuncum dou Allah toua. Sug en ocuncum naugb gin dou Allah dauwohob, kaba, en eineg medoc aud aremogougb. Hanoba en enara dou en, endagai: Tabida, ban bisa. Sug en arougb enohob, kaba, en maires esga. Dangga sug en eiya Petrusohob, kaba, en eisa beigtou namcir.

⁴¹Sug en eisa beigtouohob, kaba, Petrus ou mesira bos en mesira. Hanoba en eigdoumesa en besa namcir. Sug en eigdoumesa enohob, kaba, en eija leng merdoc ebdebin an Yesus se tu ingga, dara leng debdes graga laugwan leinesa ucugb. Sug len leinesohob, kaba, en arges Dorkas deb se len merisira, anai en eisa dau gomom ucugwohob.

⁴²Sug leng se Yope louman dau ganusbus gin, kaba, len leinyana merdoc ebdebin an maman Adehsud, dag en eng Sud Hom Geigdoc Len Dau Sesar Men Gogom Augwan gin toua.

⁴³Dangga hang, Petrus en emecicugb dig cinogo Lida touwero. Doba en eigtou desij sud hom gedig en esinsin aremeta mos becabeci, en moho Simon, se lona hosa debin gin toua.