Read Manikion ROMA 1 Bible Online

ROMA 1 - Manikion bible

ROMA 1

¹Surad gini dau dang, Paulus, gedig dan dedag Krisdus Yesus men sogougb, dou yeng se cinogo Roma yen yaugwan. Anai Allah medoc gororougb yen. Hanoba en ouci yen debinim dag en men lusudohob. Dan dog surad gini dou yen, anai Allah enin eng ouci dan deb sug nosohob. Hanoba en eigdoumesa dan douwoswos naugb dan desai en Mer Geigouhw eisaugb Krisdus dou lusud se cinogo augwan toua.

²Mer Geigouhw gin, kaba, menenau touwero. Doba Allah os augwan gini ogdoc men lusud gedig len lesai en moro sug nosa. Hanoba len log areg en os gini augwan se Surad Injil Meb Gecabeci sug nosa touohob.

³Mer Geigouhw gin, kaba, eisaugb en Meisi Yesus Krisdus gedig en edag maman Adehsud naugb mamanohob. Anai sug en edag lusud misen se cinogo gin, kaba, en edag Daud medebeito misen.

⁴Doba se en medoc mes, kaba, en edag Allah gedig en eigtou se gogouf cucugb en Meisi mohora hom en toua teiteiyohob. Dara Allah ens ainyes dau augwan gini dara goubesa namcir. Anai en eigdoumesa en dau gomom ucugb sug nosa touohob.

⁵Ogdoc Krisdus gin hom, hang Allah medoc eigouhw an dan. Hanoba en eigdoumesa dan indoho naugb dan desai Mer Geigouhw eisaugb Krisdus dou lugmahara se cinogo augwan toua. Dauntoba len laugwan merdoc ebdebin an en. Dara len laimo en mer an areg en arougb len an gini toua namcir. Anai dan deperwei Krisdus en mohw naugb ginohob.

⁶Dangga hang, areg Allah arougb dan an ginohob, kaba, eb naugb yen se cinogo Roma toua. Anai yen toua yedag lugmahara. Hang en emeija yen dara eigdoumesa yen meijoho dag Yesus Krisdus men lusud touohob.

⁷Sug Allah eija yen, dara en eigdoumesa yen meijoho dag ginohob, kaba, dan dog indan surad gini dou yen se cinogo Roma yen yaugwan toua. Hanoba dan dacgeij maman Mamina Allah dara maman Adehsud Yesus Krisdus naugb lan mardoc eigouhw an yen. Dara lan laseyeiyo yen dara laic gesgigouhwesa dou yen dougwo areg gecgu augwan toua terimda.

⁸Aimougtut, kaba, dan den sijo medam dou Allah naugb yen. Anai yen yemobsara dau sug yen meigdoc ebdebin an Krisdus touwero. Doba yen yes agadgeij naugb yen yaimo en terimda. Dara lusud se cinogo augwan, kaba, len leimiman dau meijen geicara gin. Anai meijen geicara gin, kaba, agaha dou len laugwan touohob. Dangga hang, sug dan denara dou Allah, kaba, dan demesai dan indus augwougb touwero, doba ogdoc Krisdus men geicara naugb dan. Hang dan demeic indus naugb dan demenara dou en eisaugb yen toua namcir.

⁹Dara dan demarges dau sug dan docuncum dou Allah naugb yen touwero. Doba astesda sug dan docuncum dou en, kaba, dan dens yen meijoho dou en toua terimda. Dara Allah en toua ouma debin dan dag areg dan den dou yen gin, kaba, dan demereiyara touwero, doba dan den se misen namcir. Anai dan dedag men sogougb gedig dan desai Mer Geigouhw eisaugb en Meisi dara dan indoc augwan dou lusud ginohob. Dara dan dacgeij en, dauntoba sug en medoc esgirahesa dan, kaba, en ec misis dau dan iteitogini naugb dan dedebeij yen sungga toua.

¹⁰

¹¹Anai dan indoc erleij namcir naugb sug dan dedeiya yen, kaba, dan douwan deic dau areg Mena Gogoufu eic dou danohob gin ingma dou yen toua. Dauntoba areg yen meigdoc ebdebin anohob, kaba, yen yemobsara dau gin touwero. Doba yen yes agadgeij se gin terimda.

¹²Doba areg dan den dou yen gin, kaba, dag dan demens dou yen den den, isnaro. Doba yen toua yenara yad dan indoc mes toua. Dauntoba sug yen yeiya dag dan indoc ebdebin an Krisdus namcir dara dan deiya dag yen meigdoc ebdebin an Krisdus deigeigouhw touohob, kaba, gini eic dag maman maugwan maiyan mamdocesem ucucugb terimda.

¹³Dan indagunerij, dara dan indamouwerij, mougwa einyana, kaba, dan deic induwemougb esesa naugb dan dedeiya yen sungga. Dauntoba dan dahwan lingma dau yen aud Krisdus. Aninim dag dan dahwan leinyana dau lugmahara aud Krisdus se cinogo gus touohob. Anai leng mesinsin era leng lemedag mesinsinero, dara len leiya surad, era leng lemeiya suradero, kaba, len laugwan meren aremeij eb dou dan naugb dan desai Mer Geigouhw eisaugb Krisdus dou len toua. Doba terimda iteitogin, kaba, sogo maga eb dougwo danaba. Dan douwan dens dau augwan gini meijouhw asesa dou yen. Dauntoba yen yemeija meijuwesa gin deitero, doba yen yecinaga meijouhw augwan asesa toua.

¹⁴

¹⁵Dangga hang, sug lusud meren aremeij eb naugb dan dag ginohob, kaba, dan indoc erleij naugb dan desai Mer Geigouhw eisaugb Krisdus gin dou yeng se cinogo Roma yen yaugwan toua.

¹⁶Anai Mer Geigouhw gin, kaba, aninim dag Allah men goubesa naugb sug en eigdoc gareg en medoc ebdebin an Krisdus len laugwan dau sesar men gogom augwan namcir. Aimougtut, kaba, emeng Yahudi dara yeng yugmahara toua. Hang igdebes emeba dan naugb sug dan desai Mer Geigouhw gini dou lusud touwero. Doba dan deigdoumesa mer gini moho agas namcir.

¹⁷Anai ogdoc Mer Geigouhw gin, kaba, Allah ens ucina dou maman naugb sug en eic gesgigouhwesa dou maman ucugb deit. Ucina dag gini: Gareg en medoc ebdebin an Allah, hanoba en emobsara dau gin touwero, doba en es agadgeij namcir naugb sug en medoc ebdebin an en terimda, kaba, sesar men gogom emeb naugb en toua deitero. Doba Allah eic gesgigouhwesa dou en ucugb deit. Augwan gini aimo dau areg Allah en os dou maman se Surad Injil Meb Mohon deb sug nosa touohob, endagai: Gareg en medoc ebdebin an dan, kaba, dan deic gesgigouhwesa dou en ucugb deit. Hang en emomom touwero. Doba maireseb menau geb huhugb eb naugb en beb huhugb namcir.

¹⁸Doba lusud gedig len lebesesar dara meren geicara toua dag mog mog anim ucucugb terimda, kaba, Allah medoc esrougb medam an len namcir. Hang en emamsoho len deb touwero. Doba en ens ainyes dou len dag en esedeb gogom medam deinaugb lenohob. Anai meren geicara gecgu gini, kaba, edag sogo maga dougwo lusud naugb len lemecinaga areg asesa Allah enin medoc mes augwan dag misen touwero.

¹⁹Allah eicara baimo dag gin an len, anai ebiji dau lona sug en ahasesei cinogo dara en esinsin areg geb se cinogo gin toua, kaba, lusud lecinaga dag enin dous eng Allah misen mohora hom. Dara enin dous eng mobisamougb beb huhugb namcir. Anai Allah ens augwan ogdoc areg en ahasesei gini dag misen dou lenohob. Dangga hang, len leic ara ara ingma naugb sug len launun dougwo meren geicara gecgu gin toua deita? Naro, len lemeic ara ara hom naugb sug len lemaunun dougwo meren geicara dag mog mog gin touwero. Anai areg len meru edeinyum naugb sug len lecinaga eisaugb Allah gin, kaba, enin eng ens dou len. Hang len lemeija meruwesa en toua deitero. Doba len lecinaga areg eisaugb en augwan gini dag misen namcirohob.

²⁰

²¹Doba sug len lecinaga areg eisaugb Allah augwan dag ginohob, kaba, len lemesijaresa en dara len lemeigdoumesa en moho dag Allah misen, dara len lemen sijo dou en eisaugb areg en ahasesei, dara esinsin gin touwero. Doba len lamsoho dau gin namcir. Dangga hang, len lemauwam an areg gobosboro toua deitero. Doba meren geicara gin, kaba, arautut len naugb len lauwam an areg dag edgom mogud dous. Anai mouf emaisema len merdoc mes deit touwero. Doba augwan edag lobeigbogo terimda.

²²Hanoba len leigdoumesa lenin meroho an meren geicara gini dag len meru ouforoho namcir touohob. Dobnaro. Areg len leicara laimo gin, kaba, dag lusud gedig len meru emaiyero dous.

²³Anai sug len merdoc dag lobeigbogo ginohob, kaba, len lemesijaresa Allah Geis Huhugb sugraga toua deitero. Doba len leperwei en mocbobaga naugb len lesijaresa seiseij gedig len merucbobaga aninim dag lusud getaha, dara ba, dara aremeta gedig mohora hogu, dara aremeta gagrigrilo gin dous.

²⁴Sug len leic merus naugb len laimo areg len meru edgom an dag ginohob, kaba, Allah emesedougwo len toua deitero. Doba en amsoho len debin gin namcir. Hang len lemaimo areg geigouhw toua deitero. Doba len laimo areg len merdoc etrij icira aud areg gogor dara areg lusud locuc an augwan anim terimda.

²⁵Anai sug len lecinaga areg asesa Allah enin medoc mes dag misenohob, kaba, len lemaimo areg se geica gin touwero. Doba len leic merus naugb len laimo areg areibahau dag seiseij gin dous. Hang len lemesijaresa Allah dara len lemeigdoumesa en moho an areg en ahasesei dara esinsin gin touwero. Doba len lesijaresa dara leicara laimo areg Allah en esinsin dara ahasesei gin terimda. Dobnaro. Allah enin dous eng edeinyum naugb sug lusud maman maugwan magahugouhw an en beb huhugb terimda. Augwan gini asesa dag misen namcir.

²⁶Dangga sug lusud lesijaresa areg Allah ahasesei dara esinsin augwan dag gin terimda, kaba, Allah emesedougwo len toua deitero. Doba en amsoho len debin gin naugb len laimo areg len merdoc etrij icira dag areg gogor toua namcir. Hang ligida len lemaimo meren geicara naugb len lohw len meraga dou ligiji toua deitero. Doba len ledreg dau gin naugb len lohw len meraga dou ligida lenin ucucugb dous.

²⁷Dangga toua, ligiji len lemaimo meren geicara naugb len laimo ligida touwero. Doba sug len merdoc etrij icira ligiji lenin dag ginohob, kaba, len lohw len meraga doum aibibra toua terimda. Sug len laimo areg eic igdebes dou lusud ucucugb dag gin, kaba, Allah esedeb en medoc mes naugb en eic gogom medam dou len, aimo dau meren geicara gecgu gin an len toua. Anai meren geicara augwan gini dag mog mog namcirohob.

²⁸Doba sug len lemouwan naugb len lemebin areg asesa Allah enin medoc mes augwan se len merdoc mes deitero, kaba, en emesedougwo len meru naugb len laimo areg geigouhw toua deitero. Doba en amsoho len debin gin. Hanoba len laimo areg en en dougwo len anohob augwan terimda, anai len meru eiyema namcirohob.

²⁹Dangga hang, len lemaimo areg edag beim anim toua deitero. Doba len laimo areg gecgu anim dag len lagungun len gus meren aremougb. Dara len loho aremer debinim toua terimda. Dara len merdoc esdigeijim. Hanoba len merdoc emeigouhw an lusud touwero, doba len les len dara len lesara darem. Dara len lerba mohoisa, kaba, len lehilon ucina naugb leic gogom doum toua terimda.

³⁰Dara len lemeigdoumesa len gus meroho touwero. Doba len lecic len gus meroho gouhw genes, dara len lesmesmanim toua namcir. Dara len merdoc mog mog an Allah. Hang len lemaimo en mer gin touwero. Doba sug len leic merus, dara len merdoc agas dag ginohob, kaba, len leimiman lenin an meren geicara deseino lusud. Dara len lehilon ucina naugb sug len leic gogom dou len gus aibibrida. Dara len lemaimo merner dara merimir len merir touwero. Doba len lohoiya len merir toua terimda.

³¹Dara len meru emaiso ara ara toua deitero. Doba sug len merdoc oungmogo namcirohob, kaba, len merdoc dag hom se areg len leic dara areg len los dour touwero. Doba len laimo augwan gini dara merdoc hwai an gin terimda. Dangga hang, len merdoc emerij an lusud naugb len lemaigdougwo lusud an meren aremer touwero. Doba len merdoc agadgeij naugb len leic gogom dou len namcir.

³²Dara len lecinaga dau areg Musa men gomnomna enara eisaugb lusud gini men meijouhw augwan asesa touohob. Anai men gomnomna gini enara endag astesda gareg en eicara gecgu dag gin, kaba, Allah esedeb gomom deinaugb lenohob. Dobnaro. Len lemarges dau meren geicara gecgu gin debero. Doba len leic merus naugb len leicara laimo terimda. Dara len lemaimo ucina gin naugb lenin dousero. Doba lusud gedig len leicara aninim dag gin toua, kaba, len lousa deisa, hanoba len leigdoumesa len meroho an gin toua namcir.