Read Manikion ROMA 12 Bible Online

ROMA 12 - Manikion bible

ROMA 12

¹Dan indagunerij, dara dan indamouwerij, sug Allah medoc eineg an maman eiseisaugb dag ginohob, kaba, dan desulou yen dara goubesa namcir dag yen yemaimo areg yenin youwan deitero. Doba yen yogod se yenin meigdoc mes naugb yen yaimo areg Allah enin ouwan dous. Dauntoba meijen geicara augwan, kaba, eic Allah medoc eigouhw an yen. Anai sug yen yedag Allah men lusud dag ginohob, kaba, esloulougb naugb yen yeicara yaimo dangga terimda. Augwan gini aninim dag lusud sug len leic ara ara lauwaharo dou Allah. Anai sug len leic ara ara dou enohob, kaba, emedag meren toua deitero, doba Allah enin men augwan namcirohob.

²Dangga hang, yen yemaimo lusud gedig Bilis oiharaga len se cinogo gini se meren gaben toua deitero. Doba yen yacgeij Allah naugb en eperwei yen meigdoc mes dara yen meiju augwan namcir. Dauntoba yen yecinaga areg asesa Allah enin medoc mes augwan gin toua. Anai sug yen yecinaga augwan dag misenohob, kaba, eic dag yen yemedreg areg Allah en arougb yen an gini hom touwero. Doba yen yaimo areg edag beim dara areg geic Allah medoc agahugouhw an yen augwan gin toua terimda.

³Dara yen yemeigdoumesa yenin meijoho emagas augwougb touwero. Doba dan desulou yen, dauntoba yen yeigdoumesa yenin meijoho, aimo dau areg yen meiju ens dou yen gin dous. Anai gini aimo dau areg Allah enin ouwan toua. Dan desulou yen dag gini, anai Allah eigdoumesa dan indoho naugb dan desai Mer Geigouhw eisaugb Krisdus dou yenohob. Dangga hang, astesda dau yen, kaba, en auwam an mou ouforoho areg Allah eic dou enahabi. Hanoba en eigdoumesa enin moho aimo dangga toua.

⁴Anai maman mamaga, kaba, homto dous. Doba areg geb se maga hom gin, kaba, einyana. Dara areg geb se maga gin, kaba, meren geicara dag hom touwero, doba susugb toua namcir.

⁵Gini aninim dag mamang Krisden toua. Anai maman, kaba, mainyana gougwa. Doba sug maman maugwan dag hom dara Krisdusohob, kaba, maman madag maga hom toua. Dangga sug maman madag maga homohob, kaba, astesda dau maman en medoc dag hom darem se maga hom gin toua.

⁶Sug Allah eic mou ouforoho dou astesda dau mamanohob, kaba, maman marges dau gin touwero. Doba maman maimo augwan gini anim ucucugb terimda toua. Anai mou ouforoho areg Allah eic dou maman gin, kaba, augwan aninim touwero. Doba susugb toua namcir, aimo dau areg Allah enin medoc eigouhw an maman icira dous. Dangga hang, gareg Allah eic mou ouforoho dou en naugb sug en esai en moro dou lusud, kaba, en esai en moro gini, aimo dau mou ouforoho areg Allah eic dou enohob naugb gin toua.

⁷Era sug Allah eic mou ouforoho dou sud hom naugb sug en ousa lusud, kaba, en ousa len. Era sug en eic mou ouforoho dou sud hom naugb sug en edidib meijouhw eisaugb Krisdus augwan asesa dou lusud, kaba, en aimo dangga esesa terimda toua.

⁸Era sug Allah eic mou ouforoho dou sud hom naugb sug en esulou lusud dara enara bad len merdoc mes, kaba, en emarges dau gin touwero. Doba en es agadgeij naugb en eicara baimo dangga an lusud. Dara gareg Allah eic mou ouforoho dara goubesa dou en naugb sug en esma aremougb einyanohob, kaba, en emecgun mesira debin gin touwero. Doba en agaha mesira an besesa dou lusud. Dara gareg Allah eic mou ouforoho dou en naugb sug en edag mougt, kaba, en emeigtou an moho ginero. Doba sug en esedougwo lusud, kaba, en eic mouwemougb esesa naugb len terimda. Dara sud hom areg Allah eic mou ouforoho dou en naugb en medoc eineg an lusud, kaba, en emaimo ucina gini dareg emarerei ara an len touwero. Doba en eicara baimo dangga dareg en medoc esgiraha an len dous.

⁹Dara yen yemeicara yemarerei lusud meriresi dag yen meigdoc gororougb len touwero. Doba yen meigdoc gororougb len dag misen namcir. Dara areg gogor, kaba, yen meigdoc emeigouhw an touwero. Doba yen meigdoc esdigeij dau yen namcir. Hanoba yen yebin areg geigouhw se yen meigdoc mes naugb yen yaimo gin dous.

¹⁰Dangga hang, sug yen yedag meijagunem dara meigdamouwem se Krisdus dag ginohob, kaba, yen meigdoc mog mog anim toua deitero. Doba yen meigdoc gororougwim deigeigouhw namcir. Dara yen meigdoc erleij naugb yen yeigdoumesa yen meijoho ucucugb toua terimda.

¹¹Dara gurog emeba yen touwero. Doba sug yen meigdoc erleij aud maman Adehsud enohob, kaba, yen yeicara yaimo areg en arougb yen an gini dara yen meigdoc augwan toua namcir.

¹²Dangga toua, sug yen yaimo ucina mog erij, kaba, yen yemobsara dau gin dedemeda touwero. Doba yen yaiyan meigdocesem naugb yen yes agadgeij namcir. Dara yen meigdoc moc dougwo areg Allah os dou yen gin touwero. Doba yen meijina eiseisan gin terimda. Anai sug yen yod meijinesa Allah an areg en os dou yen gin, kaba, eic dag yen meigdoc momogo touwero. Doba eic dag yen meigdoc agahugouhw namcir. Hang yen yemarges dau sug yen yocuncum dou Allah touwero. Doba yen yaimo dangga esesa terimda toua.

¹³Dara yen yemecgun yen meisira debin meijen aremougb dau yen meijaguner dara yen meigdamouwer leng Krisden gus gedig len merunggwereij touwero. Doba yen yagaha yen meisira an gini dou len dag mogud dous. Dara sug leng Krisden gus gedig lugmahara len len aud yen, kaba, yen yemoung misis dougwo len touwero. Doba yen yebin len, hanoba yen yec misis dau len toua.

¹⁴Dara sug lusud leic gogom dou yen, kaba, yen yemacgeij Allah naugb en emouwara dougwo len touwero. Doba yen yacgeij en naugb en eic geigouhw dou len dous.

¹⁵Dara leng merdoc agahugouhw an meren ara ara, kaba, yen yaimo len naugb yen meigdoc agahugouhw an gin. Dara sug len leb an ara ara, kaba, yen yousa len naugb yen yeb an gin toua.

¹⁶Dara yen yemesi sud hom aiyei naugb yen meigdoc eigouhw an en emedreg dau lusud gus touwero. Doba yen meigdoc eigouhw an len laugwan aninim dous. Hang yen meigdoc emagas naugb yen yesbes an leng meroho eb tainya dau yen touwero. Doba yen yeigdoumesa len dag yen meisir misen gin toua. Dara yen yemeigdoumesa yen meijoho dag yen yecinaga meijouhw augwanohob touwero. Doba yen yaimo dau areg yen meiju ens dou yen dous.

¹⁷Sug sud hom eic gecgu dou yen, kaba, yen yemauni gecgu ucugb dou en touwero. Doba yen yauwam an aremer areg lusud leigdoumesa dag geigouhwahabi, yen yemaimo gini an lusud terimda dous.

¹⁸Dangga toua, yen yehilon ucina dara meijen goubesa augwan namcir naugb sug yen yaic lusud merdoc mes, dauntoba len merdoc emesrougb an yenero. Doba yen yaugwan meigdoc edouder anim ucucugb terimda dous. Naro, kab, naro.

¹⁹Dangga hang, dan insirija, yen yemauni gecgu dou sud hom ingma mougwa hom touwero. Doba yen yogugwo len se Allah en mesira naugb enin eng auni ara ara ucugb dou len dous. Anai en enara deb se Surad Injil Meb Mohon deb dag gini sug nosa touohob, endagai: Danin dous eng dauni gecgu dou lusud. Dara danin dous eng dauni meren gogom ucugb dou len toua.

²⁰Sug Allah en dougwo maman dag ginohob, kaba, maman mamauni gogom ucugb dou leng leic gogom dou maman toua deitero. Doba maman maimo areg Solaiman esulou maman an se Surad Injil Meb Mohon deb sug nosa an len dous, anai en esulou maman, endagai: Sug aban moc sirebeni, kaba, ban beic ared dou en. Era sug merijebeni, kaba, ban beic duhu dou en toua. Anai sug ban beicara dag gini, kaba, ban beic igdebes dou en namcirohob.

²¹Dangga hang, yen yaiyan meigdocesem dougwo areg gecgu namcir, dauntoba areg gecgu gini emaiyan yen touwero. Doba yen yaiyan areg gecgu ogdoc meijen geicara geigouhw gin dous.