Read Manikion ROMA 13 Bible Online

ROMA 13 - Manikion bible

ROMA 13

¹Astesda dau yen, kaba, en emotogoto pemerintah mer ginero. Doba en owun enin medoc mes arjaga naugb en aimo areg len larougb en an gin toua terimda. Anai gareg en edag mougt mera naugb yenohob, kaba, en emeigdoumesa enin moho naugb ginero. Doba Allah enin eng eigdoumesa astesda dau len, hang len lemesedougwo yen toua.

²Dangga hang, gareg en ohoiya len merir an areg len larougb en an gin, kaba, gini aninim dag en eic mos dougwo areg Allah esedeb naugb en gini touohob. Dara gareg en eic mos dougwo areg Allah esedeb gini, kaba, gogom medam eb naugb en namcir.

³Anai len gedig lowun len merdoc arjaga deseino mougt mera naugb len laimo en an areg en arougb len an gini terimda, kaba, len lemahau dau en touwero. Doba leng leicara gecgu dous eng lahau dau mougtir gini. Dangga hang, sug yen youwan naugb yen yemahau dau mougt mera ginero, kaba, eigouhw naugb yen yaimo areg geigouhw mogud dous. Anai sug yen yeicara yaimo dag gin, kaba, mougt mera emeic gogom dou yen touwero, doba en eigdoumesa yen meijoho an gin terimda.

⁴Anai Allah eigdoumesa en moho dag men gedeij an naugb en ousa yen, dauntoba yen yera mera areg geigouhw terimda. Doba sug yen yaimo areg gecgu gin, kaba, yen yahau dau en namcir. Anai Allah emeigdoumesa en moho naugb en eic gogom dou yen augwougwero. Doba sug en edag Allah men gedeij an dag misenohob, kaba, Allah eic goubesa dou en naugb en eic men gogom dag misen dou yen toua, aimo dau areg Allah en esedeb naugb gini touohob.

⁵Sug pemerintah eperwei Allah en mohw naugb eic men gogom dou yen dag ginohob, kaba, yen yemeic meijus dou len naugb yen yohoiya len merir an areg len larougb yen an gin touwero. Doba yen yowun yenin meigdoc mes arjaga naugb yen yaimo len merir gin terimda. Dara yen yemaimo len merir dau sug len leperwei Allah en mohw naugb sug len leic men gogom dou yen dousero. Doba yen yaimo len merir an areg len larougb yen an gini. Anai yen yecinaga se yen meigdoc mes dag ucina gin, kaba, edag beim dara misen touohob.

⁶Sug yen meigdoc mes ens dou yen naugb yen yaimo pemerintah len merir dag ginohob, kaba, eic dag yen yemamsoho naugb sug yen yohw cinogo dou len touwero. Doba yen yeicara yaimo dangga toua terimda. Anai yen yecinaga dau sug len leic geigouhw dou leng merdoc edag beim dara len leic gogom dou leng leicara gecgu, kaba, gini dag len leicara lesogwa deisa areg Allah arougb len an gin dag misen namcirohob.

⁷Dangga hang, sug len lacgeij naugb yen yohw cinogo aingma aingma dou len, kaba, yen yemohoiya len merir an touwero. Doba yen yowun yenin meigdoc mes arjaga naugb yen yeicara yaimo dangga toua terimda. Hanoba yen yemesbes len dara yen yemowun len meroho an gin touwero. Doba yen yeigdoumesa len meroho se aremer augwan namcir.

⁸Dara yen yemahud yenin dara cufu hom touwero. Doba yen yohud yenin dara cufu dag yen meigdoc gororougwim naugb yen yoc gin dous. Areg gus, kaba, yen yoc dedemeda, dauntoba lusud meren aremeij hom emeb dou yen touwero. Doba augwan ediyebeiya dau yen namcir. Anai gareg en medoc gororougb len gus, kaba, en aimo areg Allah arougb en an se men gomnomna geic dou Musa augwanohob.

⁹Anai areg Allah arougb maman an dag maman mamsira emebsa ligida gus aibibra, dara maman mamohud len gus, dara maman mameiyohora, dara maman mameclulan len gus an meren aremougb, dara areg en arougb maman an gus gus toua, kaba, augwan gini ebsa Allah men gomnomna hom dag maman mamdoc gororougb len gus, aninim dag maman mamdoc gororougb mamanin touohob.

¹⁰Dangga gareg en medoc gororougb lusud, kaba, en emaimo ucina gecgu an len mougwa hom touwero. Doba en asid enin dau namcir. Hanoba en aimo areg edag beim an len dous. Anai sug en eicara dag gin, kaba, en aimo areg Allah arougb en an se men gomnomna geic dou Musa augwanohob.

¹¹Yen yeicara yaimo dag gini, anai lona naugb sug Allah eigdoc maman dau sesar men gogom aud maireseb menau geb huhugb, kaba, ebeij deinyor bedreg dau lona sug maman mamdoc ebdebin an Krisdus sug aimougtut gin touohob. Sug yen yecinaga dag lona gini edagasa dag ginohob, kaba, yen yematou toua deitero. Doba yen yeisa dau yatouda.

¹²Anai cum, kaba, loba deitero, doba lona esga namcirohob. Dangga hang, maman mamaimo lusud gedig len leigtou se lobeigbogo aud meren geicara gin toua deitero. Doba maman mas mouf men aregog augwan icira maman mamsira. Hanoba maman masara dara loba men geicara dag areg gecgu augwan toua terimda.

¹³Dara maman mamogo ara gaihim, dara mameg ahwei mohu bemad maman, dara maman mamsira emebsa ligida gus aibibra, dara maman mamaimo areg ogor, hanoba maman mamir emeisaugwum ucucugb, dara maman mameclulan len gus meren aremougb touwero. Doba sug maman mainesa mouf dag ginohob, kaba, maman geicara augwan aninim dag lusud gedig len leigtou se lonohob meren geicara gin dous.

¹⁴Hang yen yesedougwo yenin dau areg geic yen meigdoc etrij icira aud sesar naugb yen yemaimo toua deitero. Doba yen yeg maman Adehsud Yesus Krisdus dag sansun kermum dougwo yen meijagahabi, yen yemeicara yemaimo en mohotimei mohw se men geicara augwan toua terimda.