Read Manikion ROMA 14 Bible Online

ROMA 14 - Manikion bible

ROMA 14

¹Sug sud hom Krisden gedig en eija mouwesa an ara ara ginaba en edebeij yen, kaba, yen yemenara yemaisid en an areg en eija mouwesa gin touwero. Doba yen meigdoc an en, hanoba yen yebin en dara geigouhw namcir dous.

²Anai sud hom, kaba, en medoc esgiraha namcir naugb sug en et mog gedig lusud lesijaresa dou seiseijohob. Doba sud hom gus deit, kaba, en eija mouwesa ginaba. Hang en medoc emesgiraha naugb sug en et mog gin touwero. Doba en et ared gus mogud dous.

³Sud hom gedig en et mog gedig len lesijaresa dou seiseijohob, kaba, en emesbes an sud hom gedig en emet mog ginero. Dara sud hom gedig en emet mog ginero, kaba, en emowun sud hom gedig en et mog gini dag en obsara dau Krisdusohob touwero. Anai Allah eigdoumesa lahwas dag en mogwihi mogo lan dag misenohob.

⁴Sug Allah eigdoumesa lahwas dag en mogwihi mogo lan dag ginohob, kaba, dagiro, naugwe hang, yen yowun sud hom en moho dag en obsara dau maireseb menau geb huhugb ginohoba? Yen eng yen yogod gogom deinaugb sud hom gus men sogougb ginei? Naro, meijen goubesa naugb gin touwero. Doba enin men mougt mera dous eng emogod deinaugb en dag en einesa se maireseb huhugb, era obsara dau toua. Dara en emobsara dau ucina maireseb geb huhugb gin touwero. Doba en aimo ucina gini terimda en edebeij usi gin toua namcir. Anai men Adehsud gin, kaba, men goubesa edeinyum naugb ginohob.

⁵Dangga toua, sud hom, kaba, en oudesa dag lona hom en moho agas edreg dau lona gus augwanohob. Doba sud hom gus, kaba, en oudesa dag lona augwan aninim dous. Doba sug sud hom eigdoumesa lona hom edreg dau lona gus, era en eigdoumesa lona augwan aninim, kaba, augwan gini emesloulougwero. Doba esloulougb, kaba dag astesda sud hom en emeija mouwesa ginero. Doba en ogod se enin medoc mes dag areg en aimo gin, kaba, ucina misen naugb enohob.

⁶Gareg en eigdoumesa lona hom edreg dau lona gus augwan, kaba, en eicara dangga naugb en eigdoumesa maman Adehsud en moho se lona ingga. Dara gareg en et mog gedig lusud lesijaresa dou seiseijohob, kaba, en eicara dangga naugb en eigdoumesa maman Adehsud en moho toua. Anai en en sijo dou Allah naugb en eic mog gini dou enohob. Dangga toua, dara sud hom gedig en emet mog ginero, doba en et ared gus mogud dous. En toua en sijo dou Allah debin men geicara gini. Anai en oudesa dag men geicara gin, kaba, eigdoumesa maman Adehsud en moho gin touohob.

⁷Dara sud hom ingma dau maman, kaba, en maireseb naugb eninero. Era sug maman mamom, kaba, maman mamom naugb mamanin touwero.

⁸Doba sug maman maireseb, kaba, maman mamireseb naugb maman Adehsud. Era sug maman mamom, kaba, naugb en toua. Dangga hang, sug maman mamireseb, era sug maman mamom, kaba, maman madag maman Adehsud menohob.

⁹Anai Krisdus en omom. Hanoba en eisa dau gomom ucugb, dauntoba en edag mougt mera medam naugb leng merireseb dousero. Doba naugb leng lomom len laugwan toua namcir.

¹⁰Sug Krisdus en edag len laugwan meren mougt mera medam dag ginohob, kaba, dagiro, naugwe hang, yen yowun yen meijaguner len meroho dag len lobsara dau maireseb huhugb, dara yen yesbes an len sug len let mog, era len lemet mogero gin toua? Anai se lona hom, kaba, astesda dau maman en edeseino Allah men maija moc naugb en ogod aremer meijouhw augwan asesa dou en, aimo dau men geicara an en toua.

¹¹Augwan gini aimo dau areg maman Adehsud en enara deb ogdoc Yesaya se Surad Injil Meb Mohon deb sug nosa touohob, endagai: Se lona hom, kaba, astesda sud hom en ecgun mohorbrida adedeic cinogo deseino dan. Hanoba len leigdoumesa dan indoho dag dan hom dous eng Allah misen. Dan dou danin indireseb debin gin toua, dauntoba yen yecinaga dag augwan gini acgunog dag misen namcirohob.

¹²Dangga hang, se lona hom, kaba, astesda sud hom dau maman en emenara aremeijouhw dau men geicara augwan asesa dou Allah gin toues.

¹³Sug maman madenara aremeijouhw asesa dou Allah dag gin, kaba, eigouhw naugb maman mamouwunim dag maman mamobsara dau maireseb huhugwohob gin touwero. Doba maman magod se mamanin mamdoc mes dag maman geicara augwan, kaba, edeinyum naugb sug maman mamaguner dara maman mamdamouwer len laugwan lemetohob dau Krisdus, dara len lemobsara aud sesar icira maman geicara gin touwero.

¹⁴Anai sug dan dedag hom dara maman Adehsud Yesus dag ginohob, kaba, dan decinaga dag areg dan det, era areg dan dos, kaba, augwan emeic gogor dou dan deseino Allah enero. Doba sug sud hom en oudesa dag areg en et, era areg en os gin, kaba, eic gogor dou en deseino Allah. Hanoba en eic mos naugb en et, era en os toua, kaba, gini eic ogor dou en deseino Allah enohob.

¹⁵Doba deciciji, dauntoba areg yen yet gin, kaba, emdeic gogom dou yen meijaguner dara yen meigdamouwer gedig len leija meruwesaba ginero. Anai sug yen yet areg len leija meruwesa gin aisa len, hanoba len toua leic merus naugb len let, kaba, Allah eic mor mor dou len se dum smougb namcir. Anai len ledreg dau areg len merdoc esa docohob. Hang gini dag yen meigdoc gororougb len gin touwero. Doba yen yobsara aisa lendohob. Anai len toua Krisdus omom taiba sogo salib naugb lenohob.

¹⁶Dangga hang, areg yen yeigdoumesa en moho dag geigouhwohob naugb sug yen yaimo, kaba, yen yemaimo augwan gini augwougb touwero. Doba yen yesedougwo dara geigouhw namcir. Dauntoba lusud lemowun geigouhw areg yen yaimo gin dag gecgu touwero. Doba len leigdoumesa yen meijoho an gin terimda.

¹⁷Anai sug Allah oiharaga maman ucugb, kaba, gini emeisaugb areg maman mat dara areg maman mag ginero. Doba eisaugb sug Mena Gogoufu arautut maman naugb maman maimo areg asesa Allah enin medoc mes, dara sug maman maic gesgigouhwesem, dara sug maman magahugouhw an Allah gin dous.

¹⁸Dara gareg en eicara dag gin an Krisdus terimda, kaba, Allah medoc agahugouhw an en. Hanoba lusud leigdoumesa en moho an gin toua namcir.

¹⁹Dangga hang, yen yemeic mor mor dou Allah men lusud areg en ohud len dag men tu ogdoc mog areg yen yet ginero. Doba yen yehilon ucina aud areg geic lusud merdoc mes erleij dou len naugb len leic gesgigouhwesem ucucugb terimda. Dara yen yousa len naugb len laiyan merdocesem. Dauntoba len lemobsara dau Krisdus touwero. Doba len les agadgeij naugb len merdoc ebdebin an en terimda. Ared augwan, kaba, emeic gogor dou yen deseino Allah enero, hang yen yet toua. Doba sug areg yen yet gin, kaba, eic dag len gus letohob yen dau maireseb huhugb, kaba, yen yebesesar an lenohob.

²¹Dangga sug yen yet mog gedig lusud lesijaresa dou seiseijohob, era sug yen yeg ahwei mohu, era sug yen yaimo areg gus, doba ara ara dau augwan gini eic dag yen meijaguner dara yen meigdamouwer len lobsara dau maireseb huhugb, kaba, eigouhw naugb yen yemeicara yemaimo gin deitero. Doba yen yarges dau namcir. Anai sug yen yeicara dag gin, kaba, yen yaimo ucina gobosboro an lenohob.

²²Hang areg yen meigdoc eiloboro icirohob naugb sug yen yet, era naugb sug yen yeg, kaba, yen yemens gini ainyes dou lusud gedig len leija meruwesa ara ara ginero. Doba gini eb se yen meigdoc mes naugb Allah yen yecinaga dous. Dara gareg en emedreg dau areg en medoc ouma debin en naugb en et dara en eg ginero, doba en aimo gin dous, kaba, Allah eic geigouhw dou en namcir. Anai en emaimo augwan dau sug en eija mouwesa touwero, doba dau sug en medoc esgiraha an ginohob.

²³Doba gareg en oudesa dag areg en et, era areg en eg gin, kaba, eic gogor dou en deseino Allah, hanoba en eic mos naugb en et, era eg toua, kaba, Allah eic mor mor se dum smougb dou en namcir. Anai en emet dara medoc esgiraha an ginero. Doba en etara dara egara dareg en eija mouwesa gin dousaba. Hang en ebesesar. Anai gareg en emaimo ara ara dareg en medoc emebdebin anero, doba en eija mouwesaba, kaba, gini dag en obsara aud sesar namcirohob.