Read Manikion ROMA 15 Bible Online

ROMA 15 - Manikion bible

ROMA 15

¹Sug Krisdus en omom taiba sogo salib naugb leng leija meruwesa dag gin touohob, kaba, eigouhw naugb maman mamaimo areg geic maman mamdoc eigouhw dou maman ginero. Doba sug maman macinaga meijouhw eisaugb mog era mohu augwan dag misenohob, kaba, maman mausa len dara areg len leija meruwesa gini. Dauntoba len lecinaga meijouhw asesa toua. Anai meren geija mouwesa gin, kaba, edag aguci naugb len terimdaba.

²Dangga hang, astesda dau maman, kaba, en emaimo areg geic medoc eigouhw dou enin touwero. Doba en aimo ucina aud areg geic geigouhw dou en maguner dara medamouwer gin dous. Dauntoba len leiji dag lusud mos se Krisdus gin toua terimda.

³Anai Krisdus en toua emaimo ucina areg geic en medoc eigouhw dou enin touwero. Doba en aimo ucina naugb sug en eic geigouhw dou lusud gus dous. Augwan gini esogwa deisa areg Krisdus en enara deb dou Allah an gini se Surad Injil Meb Mohon deb sug nosa touohob, endagai: Areg lusud lesedeb naugb len loududa ban an gini, kaba, augwan emaiyan banero, doba aiyan dan dous.

⁴Dan dens dau areg len log se Surad Injil Meb Mohon gin dou yen, dauntoba sug maman macinaga dau areg Allah esedeb naugb maman meijouhw augwan dag misenohob, kaba, eic dag maman mamobsara dau ucina mog erij ginero. Doba maman maigtou mateteij. Dara maman mas agadgeij naugb maman maiyan mamdocesem toua namcir. Hang emousa maman naugb sug maman mamobsara dau Krisdus gin touwero. Doba maman maod mamina debsa Allah an areg en os dou maman ogdoc Krisdus gin toua terimda.

⁵Dara dan docuncum dou Allah naugb en ousa yen, dauntoba yen yemowunim toua deitlo. Doba yen yesogwa deisa Krisdus Yesus en mohotimei mohw naugb yen meigdoc anim ucucugb terimda. Dauntoba sug yen yaugwan yaimo ucina hom dag ginohob, kaba, eic dag yen yagahugouhw an maman Adehsud Yesus Krisdus en Mena Allah. Dara yen yeigdoumesa en moho dara yen meigdoc hom toua namcir. Anai Allah, kaba, en edag mebin naugb en enara bad maman mamdoc mes. Dauntoba maman mamobsara dau Krisdus touwero. Doba maman maigtou mateteij dara maiyan mamdocesem naugb mas agadgeij toua terimda.

⁶

⁷Dangga hang, sug Krisdus ebin yen yaugwan dag men lusudohob, kaba, yen yemowunim dara yemesbes anim dag graga toua deitlo. Doba yen yebinim dara yen meigdoc anim ucucugb dag gin terimda. Dauntoba yen yeigdoumesa Allah en moho ogdoc meijen geicara gin toua namcir.

⁸Dara yen yemobsara dau gin touwero. Doba yen yeicara dag gin ucucugb anim terimda. Anai Allah esa Krisdus aud leng lec merus dau dag meren sogougb ginohob naugb sug en aimo areg Allah os dou len merjemouwer augwan audud an len toua. Dauntoba maman macinaga dag areg Allah en os dou len gin, kaba, en emereiyara dou len touwero. Doba en aimo areg en os gini dara en medoc hom an len namcir.

⁹Dara ousa lugmahara len toua. Dauntoba sug len leiya dag Allah medoc eineg an len dag gin touohob, kaba, eic dag len leigdoumesa en moho agas medam an gin toua terimda. Yen youman dan indir an areg dan den dou yen gini deigeigouhw namcir. Anai augwan gini esogwa deisa dau areg Daud en erba Ugwaremer eisaugb gin deb se Surad Injil Meb Mohon deb sug nosa touohob, endagai: Sug ban bousa dan dag ginohob, kaba, dan dos dadi ban bedag Allah misen deseino leng lugmahara. Dara dan derba Ugwaremer an ban aboho deb dou len laugwan toua terimda.

¹⁰Dara Musa en toua arougb leng lugmahara se Surad Injil Meb Mohon dag gin deb sug nosa touohob, endagai: Yeng yugmahara, kaba, yen toua yaimo emen gedig Allah ouci emen debinim naugb enohob, dauntoba maman maugwan magahugouhw an en namcir.

¹¹Dara leng gus, kaba, len lerba Ugwaremer dag gin deb sug nosa touohob, lendagai: Yeng yugmahara, kaba, yen toua yagahugouhw an maman Adehsud gin toua namcir. Dara yeng se cinogo gus, kaba, yen yaugwan yeigdoumesa en moho bagas medam toua terimda.

¹²Dara Yesaya en ens dau gin deb se men surad sug nosa touohob, endagai; Se lona daiyamo gacin, kaba, Isai medebeito hom en emagunyen. En, kaba, Allah eigdoumesa en moho naugb en edag leng lugmahara meren mougt mera medam. Hang len toua lod merna debsa en dag en eigdoc len dau sesar men gogom aud maireseb menau geb huhugb gin toua.

¹³Dangga hang, sug Allah men geicara eic dag yen yod meijina debsa en an areg en os dou yen ginohob, kaba, dan dacgeij en naugb en eic yen meigdoc agahugouhw dara ebtou naugb ara ara augwan dou yen toua. Dauntoba yen yemobsara dau areg yen yod meijina debsa Allah an gin touwero. Doba yen yeicara yaimo dag gin bedreg dau nosa ogdoc Mena Gogoufu men goubesa gin toua terimda.

¹⁴Dan indagunerij, dara dan indamouwerij, dan decinaga dag meijen geicara augwan edag beim dara obosboro an lusud, dara dan decinaga dag yen meiju ouforoho naugb yen yedidib meijouhw dau Allah en mer eisaugb Krisdus doum toua. Anai yen yecinaga augwan gini dag misen namcirohob.

¹⁵Doba eisaugb aremer hom yom se surad gin, kaba, dan denara dou yen dara goubesa, dauntoba yen meigdoc moc dougworo, doba yen yeiseisan terimda.

¹⁶Dan deic indus dag gin dou yen, anai Allah eigdoumesa dan indoho naugb dan dedag Krisdus Yesus men sogougb dou yeng yugmahara naugb dan dousa yen. Dauntoba sug Mena Gogoufu ouci yen debinim naugb Allah enohob, kaba, yen yedag gouwaharo gedig en medoc eigouhw an yen toua terimda. Anai sug dan desai Allah en Mer Geigouhw eisaugb Krisdus dou yen, kaba, dan dedag gembala gesa taij naugb yen touohob.

¹⁷Dangga hang, sug dan dedag hom dara Krisdus Yesus ginohob, kaba, dan demowun danin indoho an indan geicara areg Allah eic dou danohob gin touwero. Doba dan deimiman danin an gini deseino lusud namcir.

¹⁸Anai en, kaba, en ousa dan naugb dan dahwan leng lugmahara aud Allah. Dauntoba len lemedreg en mer gin deitero, doba len leicara laimo en aud areg en arougb len an gin toua terimda. Dangga dan demeimiman danin an ara ara gus touwero. Doba dan deic indus naugb dan deimiman danin an indan geicara areg Krisdus ousa dan an gin dous. Augwan gini ogdoc sug dan desai Allah en Mer Geigouhw eisaugb Krisdus dara indan geicara geigouhw dou len. Dara dan daben ganusbus dara gansins debin areg dan desai dou len. Dara len leiya dau Mena Gogoufu men goubesa gin toua. Sug Krisdus ousa dan dag ginohob, kaba, dan desai en Mer Geigouhw gini dou lusud laugwan, ebiji dau Yerusalem terimda dan dedebeij leng Ilirikum meren hancob gin touohob.

¹⁹

²⁰Anai dan demouwan naugb dan desai Mer Geigouhw eisaugb Krisdus dou leng louman dau enohob touwero. Doba dan indoc erleij namcir naugb dan desai en mer gini dou leng lemouman dau en mougwa hom touebma. Dauntoba dan demohud tuesa len gus meren buc meb gedig len logo ginero. Doba dan dogo buc naugb dan dohud indan tuesa dous.

²¹Augwan gini esogwa deisa areg Yesaya en og deb se Surad Injil Meb Mohon deb sug nosa touohob, endagai: Leng gedig lemouman eisaugb en mougwa hombuma, kaba, len lemecinaga meijouhw aseses. Dara len gedig lusud lemecic eisaugb en dou len touebma, kaba, len merdoc emobgesa dau gin toues.

²²Sug dan indoc erleij aud lusud dag gin, kaba, dan demedebeij yen se Roma touebma. Anai dan desedeb mougwa einyana naugb dan den aud yenohob. Doba len gedig lemouman Mer Geigouhw eisaugb Krisdus mougwa hombuma gin, kaba, len lata dougwo dan namciraba.

²³Doba iteitogin, kaba, lusud se hancob gini len laugwan louman Mer Geigouhw eisaugb Krisdus ginohob. Dangga hang, dan dod indina debsa dag cumougt inggebga naugb dan dekirsa yen sug dan deihwedig leng Sbanyol meren hancob gini. Dauntoba sug maman maic mamdoc agahugouhw doum ucucugb lona aibibra dag ginohob, kaba, yen yousa dan dara ara ara naugb ucina mogumsi sug dan deihwedig cinogo ingga toua. Anai dan indoc erleij naugb dan dedeiya yen se arisogomoc einyanohob.

²⁴

²⁵Doba aimougtut, kaba, dan decicugb dig cinogo Yerusalem naugb dan dedousa Allah men lusud sunggahabi.

²⁶Anai leng Krisden se leng Makedonia dara leng Akaya meren hancob, kaba, len logod an naugb len lousa Allah men lusud gedig len merunggwereij namcir se Yerusalem dara aregoufu toua. Dara dan demogodgod len an gin touwero. Doba len logod dag gini se lenin merdoc mes teiteiyohob.

²⁷Dangga hang, len leic aregoufu augwan dara len merdoc esgiraha an namcir. Doba areg len lesa dou len, kaba, aninim dag len loc leng Krisden dau leng Yahudi meren aremeij gin dous. Anai sug leng Krisden dau leng Yahudi leic dau areg Allah eic dou len ingma dou lugmahara naugb sug len merna maireseb dag ginohob, kaba, eigouhw naugb leng Krisden dau lugmahara len leic dau meren aremougb areg Allah eic dou lenohob ingma dou leng Krisden dau leng Yahudi naugb len meraga toua.

²⁸Dangga sug dan dodo aregoufu areg leng se Makedonia dara Akaya meren hancob len leic ladedim dou dan naugb leng se Yerusalem dauwohob, kaba, dan deisa ij aud leng Sbanyol meren hancob gin toua. Anai sug dan deic aregoufu gini deb se len merisirohob, kaba, indan geicara se Yerusalem toua ouwa namcirohob. Hanoba dan demekirsa yen touwero. Doba dan deigtou desij yen sungga touahabi.

²⁹Dara dan decinaga dau sug dan dedebeij yen, kaba, dag dan demeic areg geigouhw dau Krisdus augwan dou yen toua.

³⁰Dan indagunerij, dara dan indamouwerij, sug maman mamdoc ebdebin an maman Adehsud Yesus Krisdus aninim dag gin, dara Mena Gogoufu ousa maman naugb maman mamdoc gororougwim dag gin touohob, kaba, dan desulou yen dara goubesa namcir naugb yen yemarges dau sug yen yocuncum dou Allah naugb dan touwero.

³¹Doba yen yousa dan naugb maman macuncum dou en esesa terimda. Dauntoba en eseyeiyo dan dougwo leng medigo Yesus se leng Yudea meren hancob naugb len lemeic gogom dou danero. Dara en arautut men lusud leng Krisden merdoc mes se Yerusalem naugb len merdoc esgirahesa an dan sug dan deic lugmahara meren aregoufu dou len toua.

³²Sug Allah ousa dan dag gin dara en medoc gesgiraha naugb dan den aud yen dag gin touohob, kaba, dan demedebeij yen dara dan indoc momogo touwero. Doba dan dedebeij yen dara dan indoc agahugouhw an gin namcir. Hang sug dan deigtou desij yen sungga, kaba, dan indoc emomomtomero, doba dag eiloboro terimda toua.

³³Dan dacgeij Allah naugb en eseyeiyo yen yaugwan dougwo areg gecgu augwan terimda. Anai eni mobisamougb naugb ginohob. Augwan gini asesa dag misen namcir.