Read Manikion ROMA 16 Bible Online

ROMA 16 - Manikion bible

ROMA 16

¹Dan douma debin maman mamdamouwa hom, moho Pibi, anai en, kaba, en ousa leng se goucimdeb se cinogo Kenkrea namcirohob.

²Dangga hang, sug en edebeij yenohob, kaba, yen yemasid en touwero. Doba yen yebin en, anai en medoc dag hom dara maman Adehsud en touohob. Dara sug ara ara emeb naugb enero, kaba, yen yousa en dara gini. Anai en, kaba, en ousa lusud leinyana dara danin mougwa einyana sug nosa touohob. Yen yeicara dangga an en, anai gini aimo dau areg mamang Krisden maman maicara dag gini aninim ucucugb terimda.

³Yen yen dou Priskila dara Akwila gedig lan lausa dan naugb emen emesai Mer Geigouhw eisaugb Krisdus Yesus dou lusud dag lan mairiresi.

⁴Anai lan laohw lan marugt edug naugb danohob. Hang dan den sijo medam dou lan. Dara dan dousero, doba lugmahara meren goucimdeb, kaba, len laugwan len sijo medam naugb lan toua.

⁵Dara yen yen dou leng loucimdeb se maran tu dag len laugwan meriresi toua. Dara yen yen dou Epenetus gedig dan indoc gororougb en dag en mairesi toua. Anai en, kaba, eni sud hom gedig en medoc ebdebin an Krisdus aimougtut se leng Asia meren hancob inggohob.

⁶Dara yen yen dou Mariam dag en toua mairesi, anai en eic mog erij medam naugb sug en ousa yen toua terimdohob.

⁷Dara yen yen dou Andronikus dara Yunias gedig lan toua dau emeng Yahudi dag lan toua mairiresi. Anai len louf lan se tu gesisug desij dan sug nosa. Dara leng lesai Krisdus moro len laugwan, kaba, lecinaga lan. Dara sug dan indoc emebdebin an Krisdusbuma, kaba, lan eng mardoc ebdebin an en sug nosa touohob.

⁸Dara yen yen dou dan insi misen se maman Adehsud, moho Amplias, dag en toua mairesi.

⁹Dara yen yen dou Urbanus gedig en ousa emen naugb sug emen emesai Mer Geigouhw eisaugb Krisdus dou lusud. Dara yen yen dou dan insi misen, moho Sdakis, dag lan toua mairiresi.

¹⁰Dara yen yen dou Apeles dag en toua mairesi. Anai en, kaba, en aimo ucina mog erij medamohob, doba en es agadgeij namcir. Hang en ens enin ainyes dou maman dag en medoc ebdebin an Krisdus dag misenohob. Dara yen yen dou leng leigtou desij Arisdobolus se men tu dag len laugwan meriresi toua.

¹¹Dara yen yen dou Herodion gedig en toua dau emeng Yahudi. Dara yen yen dou dan indaguner, dara dan indamouwer gedig len leigtou desij Narkisus se men tu dag len laugwan meriresi. Anai len toua dag hom dara Krisdus aninim dara mamanohob.

¹²Yen yen dou Tripena dara Triposa lagida lahwai gini dag lan mairiresi. Dara yen yen dou Persis gedig dan indoc gororougb en namcir dag en toua mairesi. Anai len, kaba, len leic merug erij icira maman Adehsud ginohob.

¹³Dara yen yen dou Rupus dag en toua mairesi. Anai en, kaba, men geicara icira Krisdus eigouhw edreg dau lusud gus laugwan ginohob. Dara yen yen dou en mem dag en toua mairesi. Anai en mem gin, kaba, en ebin dan dag dan indim misen gin touohob.

¹⁴Dara yen yen dou Asinkritus, Plagon, Hermes, Patrobus, Hermas, dara dan indaguner dara dan indamouwer gedig len merdoc ebdebin an Krisdus desij len dag len laugwan meriresi toua.

¹⁵Dara yen yen dou Pilologus, Yulia, Nereus an mesgwida, dara Olimpas, dara Allah men lusud gedig len leigtou desij len se meren tu dag len laugwan toua meriresi.

¹⁶Dara yen toua sug yen yagasem, kaba, yen youm dareg yen meigdoc anim ucucugb. Dara Krisdus men goucimdeb sugin, kaba, len laugwan lou yen toua.

¹⁷Dan indagunerij, dara dan indamouwerij, dan den dougwo yen dara goubesa namcir dauntoba yen yemaimo lusud gedig len loholas lusud daum, dara len laugwohosa len naugb len laijahasero dau ucina misen, dara len lenara laised yen an areg emen emesai dou yen sug nosa gin touwero. Doba yen yogmac len. Hanoba yen yasid yenin dau len toua namcir.

¹⁸Anai len leicara laimo dag gin, kaba, len lemauwam an ucina naugb sug len lousa maman Adehsud Krisdus en touwero. Doba meren gauwamara augwan naugb areg len let dara areg len leg gin dous. Hang len lenara laceca, dara len louseij merir larerei lusud gedig meru emaiyero naugb len laugwohosa len dau ucina misen gin toua.

¹⁹Doba yen, kaba, dan indoc agahugouhw an yen. Anai yen yemobsara dau Mer Geigouhw eisaugb Krisdus ginero. Doba yen yes agadgeij naugb yen yeicara yaimo en mer gin namcir. Hang meijen geicara gin, kaba, agaha becinten dou lusud se cinogo augwan touohob. Dangga dan douwan yen meiju ouforoho naugb yen yaimo areg geigouhw gin dous. Doba eisaugb areg gecgu, kaba, dan douwan yen yedag lusud gedig len meru edgom dougwo gin terimda.

²⁰Sug yen yeicara dag gin, kaba, Allah en aiyan Setan eb tainya yen meijohora dedemeda toua. Dauntoba en emedag mougt mera naugb yen deitero. Doba yen yedag mougt dougwo en dous. Anai Allah en mobisamougb namcir naugb en eseyeiyo yen dougwo areg gecgu augwan toua. Dan dacgeij maman Adehsud Yesus Krisdus naugb en medoc eigouhw an yen yaugwan terimda.

²¹Timotius gedig en ousa dan naugb aman amesai Mer Geigouhw eisaugb Krisdus dou lusud, kaba, en ou yen yaugwan. Dara Lukius, Yason, dara Sosipater len lou yen toua. Anai emen emaugwan dau meijouhuda leng Yahudi gini.

²²Dang Tertius gedig dan dog surad gini, kaba, dan dou yen yaugwan. Anai dan dedag hom dara maman Adehsud, aninim dag yen touohob.

²³Gayus gedig en ebin dang Paulus, dara leng Krisden gedig len loucimdeb se men tu, kaba, len laugwan lou yen. Dara Erasdus gedig en esedougwo leng Korintus meren aregoufu dag meiyo, dara maman mamaguna se Krisdus, moho Kwartus, kaba, lan lau yen toua. [

²⁴Maman Adehsud Krisdus en medoc eigouhw an yen yaugwan terimda. Augwan gini asesa dag misen namcir.]

²⁵Allah, kaba, en mobisamougb namcir naugb en eseyeiyo yen. Dauntoba yen yemobsara dau sug yen meigdoc ebdebin an Krisdus gin touwero. Doba yen yes agadgeij terimda. Augwan gini aimo dau Mer Geigouhw eisaugb Yesus Krisdus areg dan desai dou yen sug nosa. Dara aimo dau areg Allah ens dou maman an touohob. Anai sug nosa, kaba, en ecgoneh mer eisaugb Krisdus gini dau lusud se arisogomoc einyanohob.

²⁶Doba iteitogini, kaba, leng lesai Allah moro dou lusud len lens mer gini eb ainyes ogdoc areg len log se meren surad ginohob. Hanoba en arougb men lusud naugb len lesai mer gini dou lusud se cinogo augwan toua. Dauntoba sug len louman, kaba, len merdoc ebdebin an Krisdus. Dara len laimo areg en arougb len an gin toua terimda. Anai Allah gin, kaba, en eis huhugb sugragohob.

²⁷Dangga hang, eigouhw naugb maman maugwan magahugouhw an en, dara maigdoumesa en moho ogdoc Yesus Krisdus beb huhugb namcir. Anai enin dous eng Allah misen. Dara en mou ouforoho naugb augwan touohob. Augwan gini asesa dag misen namcir.