Read Manikion ROMA 6 Bible Online

ROMA 6 - Manikion bible

ROMA 6

¹Doba sug maman sesar eic dag Allah medoc eineg an maman beiseisaugb dag ginohob, kaba, maman man dagiro eisaugb gina? Maman manara dag maman mabesesar terimda, dauntoba Allah en medoc eineg an maman beiseisaugb namcir dag gin terimda touei?

²Dangga, isnaro. Anai sug lusud logun maman se duhu sug nosa, kaba, gogun se duhu gini ansins dag maman mamdoc dag hom dara Krisdus Yesus naugb sug maman mamom dara en dau areg mohon ginohob. Anai men gomom taiba sogo salib gin, kaba, oiharaga maman. Hang maman mamom dau sesar men gogom augwan touohob. Sug maman mamom dau sesar dag ginohob, kaba, dagiro, naugwe hang, maman mamaimo areg dag sesar gin deita? Naro, maman marges dau augwan gin namcir. Yen yemecinaga augwan gini dag misenbumei? Naro, yen yecinaga augwan gini dag misenohob.

⁴Dangga hang, sug lusud logun maman se duhu sug nosa, kaba, gini ansins dag maman momom dara Krisdus dau areg mohon ginohob. Hanoba len lec maman desij en toua. Dauntoba maman mamaimo areg mohon gin toua deitero. Doba maman maimo areg se maireseb menau gin dous. Aninim dag Krisdus sug en omom sug nosa, kaba, en emomom terimda touwero. Doba en Mena eigdoumesa en dau gomom aud maireseb menau geb huhugb ogdoc men goubesa gogouf cucugb gin touohob.

⁵Maman maimo areg menau gini, anai sug maman madag hom dara Krisdus naugb sug maman momom dau sesar men gogom dag ginohob, kaba, maman macinaga dag maman mamdoc dag hom dara en naugb sug Allah emeigdoumesa maman dau gomom aud maireseb menau geb huhugb. Aninim dag Allah eigdoumesa Krisdus dau gomom aud maireseb menau geb huhugb sug nosa touohob.

⁶Dara gin dousero, doba maman macinaga dag sug nosa, kaba, maman mamdoc getrij icira edag mougt mera naugb ahwan maman aud sesar toua terimdohob. Doba sug Krisdus en omom taiba sogo salib naugb maman sesar dag ginohob, kaba, en etob maman mamdoc getrij icira gini se sogo salib bomom namcir. Hanoba en eic mor mor dou gin touohob, dauntoba maman mamedag sesar men sogougb deitero. Doba maman madag lusud misen dous.

⁷Anai sug sud hom en omomohob, kaba, sesar men goubesa ingma emarautut en aud areg gecgu toua deitero. Doba ediyebeiya dau en namcirohob.

⁸Dangga hang, sug maman mamom dara Krisdus dau areg mohon dag ginohob, kaba, maman maod mamina debsa en dag maman mamaimo en se maireseb menau geb huhugb gin toues.

⁹Anai maman macinaga dau sug Allah eigdoumesa Krisdus dau gomom aud maireseb menau sug nosa, kaba, dag en emomom deitero, doba en maireseb huhugb namcir. Hang gomom men goubesa emoiharaga en toua deitero.

¹⁰Anai sug Krisdus en omom naugb maman sesar sug nosa, kaba, en emomom mougwa einyana touwero. Doba en omom mougwa cum dous. Anai gini ogodlo naugb sesar augwan beb huhugb namcirohob. Dangga sug en omom naugb sesar mougwa hom dag ginohob, kaba, en emecicugb aud sesar gin toua deitero. Doba en maireseb menau iteitogin, kaba, naugb sug en aimo areg Allah arougb en an gin dous.

¹¹Sug Krisdus asid enin, hanoba en edag omom dau sesar dag gin, kaba, yen toua yogod se yenin meigdoc mes dag yen yemaimo sesar deitero. Doba yen yedag yomom dau gin namcir toua. Hanoba yen yaimo areg Allah arougb yen an gin toua terimda, anai yen yedag hom dara Krisdus Yesus ginohob.

¹²Dangga hang, yen yemeigdoumesa sesar dag mougt mera naugb yen meijaga getaha gin toua deitero. Doba yen yarges deb namcir. Anai sug yen yemarges debero, kaba, cum, en ehin yen meigdoc etrij icira aud areg gecgu naugb yen yaimo toua deit.

¹³Dara yen yemohw yen meisira, dara yen meijohora, an areg geb se yen meijaga gus gus augwan dou sesar naugb en arautut yen aud areg mog mog gin touwero. Doba sug Allah eigdoumesa yen dau gomom aud maireseb menau geb huhugb dag ginohob, kaba, yen yohw yenin an yen meijaga augwan dou en naugb en arautut yen aud areg asesa enin medoc mes augwan dous.

¹⁴Dangga hang, sug Musa men gomnomna emeb naugb yen deiterohob, kaba, yen yemedag sogougb naugb sesar deit touwero. Doba sug Allah en medoc eineg an yen dag ginohob, kaba, yen yedag sogougb dou en naugb yen yaimo areg en ouwan dous.

¹⁵Sug Musa men gomnomna emoiharaga maman deitero, doba Allah medoc eineg an maman dag ginohob, kaba, maman man dagiro eisaugb gina? Maman manara dag maman mabesesar terimdei? Naro, maman mamenara dangga touwero.

¹⁶Anai sud hom areg yen yowun yenin meigdoc mes arjaga deseino en naugb yen yaimo en mer terimda, kaba, gini aninim dag yen yedag sogougb dou enohob. Yen yemecinaga gin touweroei? Naro, yen yecinaga dag gareg yen yeicara yaimo en mer, kaba, yen yedag men sogougb dag misen touohob. Dangga hang, sug yen yaimo sesar aud areg en arougb yen an gin terimda, kaba, cum, yen yomom se dum smougb namcir. Doba sug yen yaimo Allah aud areg en arougb yen an gin dous, kaba, en emeic gesgigouhwesa dou yen ucugb toues. Yen yemecinaga augwan gin dag misenbumei? Naro, yen yecinaga augwan gini dag misen toua namcirohob.

¹⁷Dangga maman man sijo medam dou Allah besesa terimda. Anai sug nosa, kaba, yen yedag sesar men sogougb. Doba sug yen yebin Allah en mer an areg len lesai dou yen sug nosa, hanoba yen yaimo areg se geica gini dara yen meigdoc augwan toua terimda, kaba, en ancoho yen dau sesar men goubesa augwan toua namcirohob. Hang yen yemedag sesar men sogougb toua deitero. Doba yen yedag Allah men sogougb naugb yen yaimo areg asesa enin medoc mes gin dous.

¹⁹Anai sug nosa, kaba, yen yedag gogor dara mog mog maran sogougb naugb yen yaimo len aud areg lan larougb yen an gini dara yen meigdoc augwan beiseisaugb namcir. Doba iteitogini, kaba, Allah esga yen dau sesar men gogom augwanohob. Dangga hang, yen yemeic yen meijaga dou gogor dara mog mog dag maran sogougb naugb yen yemaimo lan aud areg gecgu dag nosa toua deitero. Doba yen yeic yen meijaga dou Allah dag men sogougb naugb yen yaimo areg asesa enin medoc mes augwan dous.

²⁰Anai sug yen yedag sesar men sogougb dag gin terimda, kaba, yen yemaimo areg asesa Allah enin medoc mes mougwa hom touwero, doba yen yarges deb namcir. Areg dan den dou yen gin, kaba, dan deic gainyenara dau areg eb ainyes dou yen. Dauntoba yen meigdoc obgesa men meijouhw toua. Anai yen yemedag lusud mos se Krisdusbuma, doba yen yedag mahanihenaba.

²¹Dangga toua, sug yen yaimo areg gogor dara mog mog dag gin terimda, kaba, era mera dag ara dou yena? Era mera dag maireseb menau geb huhugwei? Naro, augwan gini era mera dag yen yedomom se dum smougb dous. Hang emeic dag igdebeseba yen toua an namcir.

²²Doba iteitogin, kaba, Allah esga yen dau sesar men gogom augwanohob. Hang yen yemedag gogor dara mog mog maran sogougb toua deitero. Doba yen yedag Allah enin men sogougb dous. Dangga sug en ouci yen debinim naugb enin dag ginohob, kaba, yen yemaimo areg gecgu toua deitero. Doba yen yeicara yaimo areg edag beim dara ecabeci naugb yen yera mera dous. Anai sug yen yaimo dag gini, kaba, gomom se dum smougb emeb naugb yen toua deitero. Doba sug yen yaimo ucina gedag beim dara gecabeci gini terimda edebeij Lona Sug Ouwedoc, kaba, yen yesma maireseb menau geb huhugb ogdoc gin toua namcir.

²³Anai sesar, kaba, eic momsi dag gomom se dum smougb dou maman dous. Doba sug maman madag hom dara maman Adehsud Krisdus Yesus ginohob, kaba, Allah eic maireseb menau geb huhugb dag mogud dou maman terimda.