Read Manikion ROMA 7 Bible Online

ROMA 7 - Manikion bible

ROMA 7

¹Dan indagunerij, dara dan indamouwerij, yen yaugwan yecinaga dau Musa men gomnomna meijouhw augwan asesa touohob. Hang yen yecinaga dag gomnomna gini men goubesa eb naugb sud hom sug en mairesebaba dous. Doba sug en omomohob, kaba, gomnomna men goubesa toua ediyebeiya dau en namcir.

²Dangga dan deic dainyen dau gida hom sug en es mesuwohob debin gin dou yen toua. Anai yen yecinaga dag Musa men gomnomna gini, kaba, ohud en dag mesouwa sug en mesuwa mairesebaba dous. Doba sug en mesuwa omom dau enohob, kaba, gomnomna emohud en dag gin deitero, doba en esesa gedisi namcirohob.

³Dangga toua, sug en mesuwa mairesebaba, hanoba en edag hom dara ligiji gus deitohob, kaba, gomnomna owun en moho dag gida gedig en maga eijouhw namcir. Doba sug en mesuwa omom dau eni, hanoba en edes mesuwa ingma deit, kaba, gomnomna emowun en dag gin deitero. Anai en esesa gedisi dau gomnomna ginohob.

⁴Dan indagunerij, dara dan indamouwerij, areg graga augwan, kaba, aninim dag yen toua. Anai sug Krisdus eic en maga dag omom taiba sogo salib naugb meijen sesar dag ginohob, kaba, Musa men gomnomna emohud yen naugb ara ara toua deitero. Doba yen meigdoc omom dau gin namcirohob. Dangga hang, Musa men gomnomna emoiharaga yen naugb yen yemedag en mesouwa toua deitero. Doba yen yedag Krisdus gedig Allah eigdoumesa en dau gomom ucugwohob en mesouwa dous. Dauntoba maman mamera mera areg gecgu toua deitero. Doba se maman geicara augwan, kaba, maman mara mera areg geigouhw mogud naugb Allah dous.

⁵Anai sug nosa, kaba, maman mainyen naugb sug maman maimo Musa men gomnomna gin terimdohob. Doba maman mamdoc getrij icira edag mougt se maman mamdoc mes. Hang maman mamaimo areg Musa men gomnomna arougb maman anohob hom touwero. Doba maman maimo areg maman mamdoc etrij icira gin dous. Anai areg Musa men gomnomna arougb maman an gin, kaba, eic dag ederougb maman mamdoc getrij icira gini naugb maman maimo sesar augwan toua terimdohob.

⁶Sug maman madreg dau Musa men gomnomna dag ginohob, kaba, men gomnomna gini agaigeij maman dag sud hom geigtou se tu gesisug naugb sug Allah eic gomom dou maman icira gin toua namcir. Doba Allah esga maman dau Musa men gomnomna ginohob. Anai Krisdus men gomom taiba sogo salib, kaba, oiharaga maman. Hang Musa men gomnomna gin, kaba, emeb naugb maman toua deitero, doba maman toua mamom dauwohob. Dangga hang, maman mamaimo men gomnomna geb se igdahab toua deitero. Doba maman maimo Mena Gogoufu aud areg en arautut maman se ucina menau gin dous.

⁷Doba sug Musa men gomnomna ederougb maman mamdoc getrij icira gini naugb maman mabesesar terimda dag ginohob, kaba, maman man dagiro eisaugb gina? Maman manara dag Musa men gomnomna gin toua dag sesarohobei? Dangga, isnaro. Anai Musa men gomnomna gini, kaba, ens dou maman dag maman mabesesarohob. Anai sug men gomnomna gini emen dougwo dan dag dan indoc emetrij icira len gus meren ara ara touwero, kaba, dagiro dan decinaga gini dag sesarohoba? Naro, dan demecinaga dau gin touwero.

⁸Doba sug gomnomna en dougwo dan dag gini, kaba, eic cumougt dou sesar naugb ococi dan indoc mes naugb dan indoc etrij icira len gus meren ara ara aibibra namcir. Anai sug gomnomna ingmaro, kaba, sesar toua ebtou namcir.

⁹Aimougtut, kaba, dan toua doudesa dag dan indina agau namcir. Anai dan demecinaga Musa men gomnomna gini dag misenbuma. Doba sug dan decinaga men gomnomna gini dag misenohob, kaba, sesar eisa maireseb deit.

¹⁰Hang emogod dan demomom toua. Dangga gomnomna gedig Allah esedeb naugb eic merna agau dou lusud, kaba, emeic maireseb dou danero. Doba naugb dan, kaba, eic gomom dou dan dous.

¹¹Anai ogdoc gomnomna gin, hang emeic cumougt dou sesar naugb augwohosa dan. Hanoba eic gomom dou dan toua.

¹²Dangga hang, Allah men gomnomna ogdoc Musa gin, kaba, augwan ecabeci namcir. Dara areg men gomnomna arougb maman an gin, kaba, augwan ecabeci, edag beim, dara geigouhw mogud toua.

¹³Doba sug Allah men gomnomna augwan eigouhw dag ginohob, kaba, men meijouhw dag areg geigouhw gini eic gomom dou danohobei? Naro, gini men meijouhw danggero. Doba sesar eng eicara dag gini debin dan dous, anai en os areg geigouhw gini. Hanoba en aic gomom dou dan touohob, dauntoba maman macinaga dau sesar men geicara augwan asesa toua. Anai sug sesar os gomnomna geigouhw gini, hanoba eic gomom dou dan ogdoc gin dou dan touohob, kaba, men geicara gini ens ainyes dou maman dag sesar gin, kaba, ecgu medam namcirohob.

¹⁴Dangga maman macinaga dag Musa men gomnomna gini, kaba, dau Mena Gogoufu naugb ahwan maman mamdoc mes aud areg geigouhw gin toua. Doba dan dedag sesar men sogougb, anai dan indaga getaha gin, kaba, eb naugb danaba.

¹⁵Hang indan geicara augwan, kaba, eic dag dan deija induwesa an toua namcir. Anai areg dan deigdoumesa en moho dag geigouhwohob, kaba, dan demaimo ginero. Doba areg dan dowun en moho dag ecgu, kaba, inggang dan daimo augwan gin dous.

¹⁶Doba sug dan daimo areg dan dowun en moho dag ecguohob augwan gin terimda, kaba, dan douma debin Allah men gomnomna ogdoc Musa gini eb ainyes dag augwan eigouhw namcirohob.

¹⁷Dangga sug dan demaimo areg dan douwanero, doba dan daimo areg dan demouwanero gin terimda, kaba, gini ansins dag danin demarautut dan indoc mes aud areg gecgu ginero. Doba sesar geb se dan indoc mes, hang emarautut dan aud gin dous.

¹⁸Hang dan decinaga dau sug dan deb se dan indaga dag lusud misen gin, kaba, dan demaimo areg geigouhw hom touwero. Doba dan indaga gin, kaba, ahwan dan aud areg gecgu gin dous. Anai se dan indoc mes, kaba, dan douwan naugb daimo areg geigouhw gin terimda. Doba sug dan daimo, kaba, indan goubesa ingmemeb naugb gin touwero.

¹⁹Anai geigouhw areg dan douwan naugb dan daimo, kaba, dan demaimo ginero. Doba gecgu areg dan demouwan naugb dan demaimoro, kaba, dan daimo gin dous.

²⁰Doba sug dan daimo areg dan demouwanero gin namcir, kaba, gini meijouhw dag danin demeicara dau danin indoc mes dag gin deitero. Doba sesar edag mougt mera se dan indoc mes, hang emarautut dan indoc mes aud gin toua.

²¹Dangga hang, dan deiya, doba gomnomna hom eb naugb dan dag gini: Dan douwan daimo areg geigouhw terimda. Doba areg dan dogod an gini, kaba, dag dan daimo areg gecgu mogud dous.

²²Anai se dan indoc mes, kaba, dan dagahugouhw an Allah men gomnomna geic dou Musa gin namcir.

²³Doba se dan indaga gini, kaba, gomnomna gus toua moongga. Gomnomna gin, kaba, ebemoc dou Musa men gomnomna gedig dan indoc eicohob gin namcir. Hang dan demaimo areg geigouhw touwero. Doba gomnomna gini, kaba, agaigeij dan dag men sogougb, hanoba ahwan dan aud sesar terimda. Anai gomnomna gin, kaba, edag mougt naugb dan indaga augwanohob.

²⁴Dangga hang, indan geicara, kaba, dag gini: Dan danin, kaba, dan douwan daimo Allah men gomnomna gin terimda. Doba dara dan indaga, kaba, dan daimo gomnomna geb se dan indaga gini aud sesar dous. Ayou, dantogini. Gareg mog eng emeigdoc dan dau dan indaga gahwan dan aud gomom gina? Anai gini eic dan indoc eijesa medamdaha. Doba dan den sijo medam dou Allah. Anai ogdoc sug maman Adehsud Yesus Krisdus en omom taiba sogo salib naugb indan sesar, kaba, en eigdoc dan dau areg gahwan dan aud gomom gin toua namcirohob.