Read Manikion ROMA 8 Bible Online

ROMA 8 - Manikion bible

ROMA 8

¹Dangga gareg en medoc dag hom dara Krisdus Yesus, kaba, Allah emogod gomom deinaugb en toua deitero. Doba en mena agau dau gin namcirohob.

²Anai sug Mena Gogoufu oiharaga maman dag gin, kaba, sesar dara gomom lamoiharaga maman deitero. Doba maman marges dau lan namcirohob. Hang maireseb menau geb huhugb emediyebeiya dau maman touwero. Doba eb naugb maman toua terimda. Anai sug maman madag hom dara Krisdus Yesus dag ginohob, kaba, Mena Gogoufu oho maireseb menau geb huhugb gini deinaugb maman toua namcir.

³Dangga hang, maireseb menau geb huhugb gin, kaba, emogdoc Musa men gomnomna men goubesa ginero. Doba ogdoc Allah men goubesa gin dous. Anai sug maman mamdoc etrij icira naugb sug maman mabesesar dag gini terimda, kaba, eic dag Musa men gomnomna omomtom namcir touohob. Doba Allah, kaba, en esa enin Meisi ouwaden dau bogo se cinogo gini naugb en aiyan sesar men goubesa geb se maman mamaga mor mor dau maman ogdoc en Meisi gini. Hanoba en eic en maga bauwaharo dou Allah naugb maman sesar gin toua. Dauntoba sesar men goubesa emahud maman toua deitero. Doba ediyebeiya dau maman namcir. Anai en maga gin, kaba, dag masud misen gedig maman mabesesar terimda maman mamaga gin touohob.

⁴Allah eicara dag gini, dauntoba maman mamedreg areg asesa enin medoc mes toua deitero. Doba maman maimo areg en ens dou maman se men gomnomna ogdoc Musa gin toua terimda. Anai sug Mena Gogoufu en edag mougt mera se maman mamdoc mesohob, kaba, maman mamaimo areg maman mamdoc etrij icira aud sesar gin toua deitero. Doba maman maimo en mer aud areg en ouwan dous.

⁵Anai gareg en aimo areg en maga mou ehigehi gin terimda, kaba, en medoc augwan ebdebin an gin toua. Doba gareg en aimo Mena Gogoufu en mer aud areg en arougb en an gin, kaba, en medoc augwan sungga dous.

⁶Dara gareg en mou augwan ebdebin an areg en maga mou ehigehi, hanoba en aimo toua terimda, kaba, men geicara gini ahwan en aud gomom beb huhugb namcir. Doba gareg en mou augwan ebdebin an areg Mena Gogoufu arougb en an gini, hanoba en aimo toua, kaba, Allah eic gesgigouhwesa dou en ucugb. Hang maireseb menau geb huhugb emediyebeiya dau en touwero, doba en esma namcir.

⁷Dangga gareg en mou augwan ebdebin an areg en maga mou ehigehi gin terimda, kaba, en edag Allah men moc namcirohob. Anai sug en aimo areg en maga mou ehigehi dag gin terimda, kaba, men goubesa ingma naugb sug en aimo Allah men gomnomna emeb naugb en touwero, doba en eicara baihagab en mer gin dous.

⁸Hang leng leicara dag gini, kaba, Allah medoc emeigouhw an len touwero. Doba en medoc esrougb an len namcir.

⁹Doba yen, kaba, yen yemaimo areg yen meijaga mou ehigehi gin deitero. Doba sug Mena Gogoufu einesa yen meigdoc mes dag misenohob, kaba, yen yeicara yaimo areg en ens dou yen gin terimda. Naro, kab, naro. Anai sud hom areg Krisdus emesa Mena Gogoufu se en medoc mesbuma, kaba, en emedag men godeh touwero, doba en eigtou dau namcir.

¹⁰Dangga hang, yen meijaga, kaba, aimo ucina aud gomom namcir. Anai yen yebesesar terimdohob. Doba sug Krisdus einesa yen meigdoc mes dag ginohob, kaba, Mena Gogoufu emeic maireseb menau geb huhugb dou yen toues. Anai Allah eic gesgigouhwesa dou yen ucugb touohob.

¹¹Hang yen meijaga getaha gin, kaba, emomom terimda touwero. Doba sug Allah esa Mena Gogoufu se yen meigdoc mes naugb en eigtou sungga dag ginohob, kaba, en eigdoumesa yen meijaga getaha gini dau gomom aud maireseb menau geb huhugb ogdoc Mena Gogoufu geigtou se yen meigdoc mes men goubesa gin toua. Anai en, kaba, en eigdoumesa Krisdus dau gomom aud maireseb menau geb huhugb ogdoc Mena Gogoufu men goubesa sug nosa touohob.

¹²Dangga dan indagunerij, dara dan indamouwerij, sug Allah eigdoc maman dau maman mamaga gahwan maman aud sesar dag ginohob, kaba, maman mamaimo areg maman mamaga mou ehigehi gin toua deitero. Doba maman maimo areg Mena Gogoufu ens dou maman dous. Anai maman mamaga gin, kaba, men aremeij ingmemeb naugb maman deitero. Doba maman marges dau namcirohob.

¹³Anai sug yen yaimo areg yen meijaga mou ehigehi gin terimda, kaba, cum, yen yedomom se dum smougb beb huhugb dangga. Doba sug yen yaiyan meijen geicara dag sesar gini ogdoc Mena Gogoufu men goubesa bomom dau yen terimda, kaba, yen yesma maireseb menau geb huhugb toues.

¹⁴Anai leng leicara laimo Mena Gogoufu aud areg en arougb len an gin, kaba, len ingga dous eng ledag Allah mogwihi mogo len dag misen namcir.

¹⁵Sug maman madag Allah mogwihi mogo maman dag ginohob, kaba, Mena Gogoufu arautut maman naugb sug maman maigdoumesa Allah en moho dag maman Mamina toua terimda. Anai sug Allah esa en dou yen sug nosa, kaba, en emowun yen meijoho dag Allah men sogougb naugb yen yahau dau en touwero. Doba en eigdoumesa yen meijoho dag Allah mogwihi mogo yen dag misen namcirohob.

¹⁶Hanoba en auma debin gini se maman mamdoc mes toua terimda dag maman gin, kaba, madag Allah mehir maman misenohob.

¹⁷Hang areg Allah esedeb se bogo naugb maman, dara areg en esedeb naugb Krisdusohob, kaba, augwan gini emediyebeiya dau maman touwero. Doba en emeic areg geigouhw gini dou maman aninim dara en toues. Anai sug maman maimo Krisdus se men ucina mog erij gin terimda, kaba, maman mamaigtou desij en se men gogouf cucugb gin toua namcir.

¹⁸Dangga hang, sug Allah esedeb maman naugb maman maigtou se men gogouf cucugb dag ginohob, kaba, dan demeigdoumesa gogom areg maman maimo iteitogini en moho emagas aninim dag gogouf cucugb gin touwero. Doba dan dowun gogom en moho eb tainya dau gin namcir.

¹⁹Dara areg Allah en esinsinohob, kaba, len gus laugwan leigtou lebehibeh naugb lona sug Allah ens en mogwihi mogo maman mab ainyes deseino len laugwan toua.

²⁰Anai sug Allah agaresa cinogo sug nosa, kaba, en agaresa areg en esinsin augwan gin toua. Hang len lemaimo areg Allah ogod deinaugb len toua deitero, doba len leigtou augwougb dous. Doba sug en agaresa augwan dag ginohob, kaba, en eic ara se len merdoc mes naugb len lod merna debsa en dag getaha gin, kaba, emoiharaga len dag sogougb beb huhugb touwero. Doba dag se lona daiyamo gacin, kaba, len laugwan larges dau getaha gini naugb len leigtou desij Allah en mehir maman se gogouf cucugb gin toua namcir. Anai gagaresa gin, kaba, emoiharaga len dau lenin merdoc mesero. Doba Allah enin eng ogod dag gin deinaugb len dous.

²¹

²²Augwan gini misen namcir. Anai maman macinaga dau sug acgunog terimda iteitogin, kaba, areg Allah en esinsin gin, kaba, len laugwan leigtou dareg letagarij terimdohob. Aninim dag gida hom sug en ouwadan meh, kaba, en etagarij terimda toua.

²³Dara len gin, kaba, len lemetagarij dousero. Doba maman gedig Allah erba Mena Gogoufu dag lougb debin maman sug acgunogohob, kaba, maman toua matagarij dareg mamdoc mabehibeh naugb lona sug Allah esga maman mamaga augwan dau areg getaha. Hanoba en eigdoumesa maman dag en mehir misen gin toua namcir.

²⁴Anai ogdoc sug maman maod mamina debsa Allah an gin sug aimougtut, hang en emeigdoc maman dau sesar men gogom aud maireseb menau geb huhugb gin touohob. Anai sug maman maiya dau areg Allah os dou maman dag ginohob, hanoba maman maod mamina debsa Allah an gin toua terimda, kaba, gini emedag areg maman mamina debsa gin deitero. Doba dag maman macinaga dag misen namcirohob. Anai gareg en emod mena debsa areg en eiyohob gina? Naro, sud hom ingma emeicara dag gini touwero.

²⁵Doba sug maman mameiya areg Allah os dou maman augwan dag misenbuma. Hanoba maman maod mamina debsa an gini terimda, kaba, maman mamobsara dau gin touwero, doba maman maigtou mateteij namcir.

²⁶Dangga toua, sug maman maigtou mateteij naugb areg Allah os dou maman dag gini, kaba, Mena Gogoufu en toua moongga desij maman naugb en ousa maman. Anai mamanin, kaba, maman mamu emedeinyum naugb sug maman macgeij areg asesa Allah enin medoc mes an areg naugb maman touwero. Doba maman maija mamuwesa gin terimda. Hang Mena Gogoufu enin eng eperwei maman mamuhw naugb en enara dou Allah an maman. Dara sug en enara dou Allah an maman gini, kaba, en emenara dag lusud meren leci dou en touwero. Doba en enara dag engkingkan dou en dous.

²⁷Dara Allah ecinaga dau areg geb se lusud lenin merdoc mes augwan dag misen namcirohob. Dangga hang, en ecinaga dau areg Mena Gogoufu acgeij en an naugb maman augwan dag misen toua. Anai Mena Gogoufu eperwei maman mamuhw naugb en enara dou Allah an areg naugb men lusud maman, aimo dau areg Allah enin ouwan naugb maman toua terimda.

²⁸Sug Mena Gogoufu ocuncum dou Allah naugb maman, aimo dau areg Allah enin ouwan dag gin dous, kaba, maman macinaga dag se aremer augwan, kaba, Allah ousa maman gedig maman mamdoc gororougb en naugb maman madera mera geigouhw dau augwan gin toua. Anai en, kaba, en eija maman aud en sug nosa. Dauntoba maman madag men lusud, aimo dau areg enin eng esedeb sug aimougtut naugb maman ginohob.

²⁹Dara sug Allah esedeb maman deb dag men lusud sug nosohob, kaba, en ouci maman deb debinim dau sug acgunog naugb maman madag en Meisi mohora hom gin toua namcir. Dauntoba en Meisi gin, kaba, en edag Maman Mamaguna Mebin naugb maman toua terimda. Anai en ecinaga deb dau sug maman mauman en mer eisaugb en Meisi gin, kaba, dag maman mamohoiya en mer gin touwero. Doba maman mamdoc emebdebin an en Meisi gin toues.

³⁰Dara sug en ouci maman debinim dag ginohob, kaba, en eija maman dauntoba maman maimo en aud areg en esedeb naugb maman deb sug nosohob gin toua. Dara sug en eija maman aud enohob, kaba, en eic gesgigouhwesa dou maman ucugb toua namcir. Dara sug en eic gesgigouhwesa dou mamanohob, kaba, en ekeba dau men gogouf cucugb ingma dou maman touohob.

³¹Sug Allah ogugwo areg graga augwan dou maman dag ginohob, kaba, maman man dagiro eisaugb gina? Maman manara dag lusud meren goubesa inggebga naugb sug len laiyan maman mamoho eb tainya len deitei? Naro, anai sug Allah eija maman debinim naugb enin dag ginohob, kaba, gara mog eng emaiyan maman deita? Naro, sud hom ingma men goubesa emedeinyum naugb sug en owun maman touwero. Doba len laugwan leb tainya maman dous.

³²Anai sug Allah en medoc emagaigeij en Meisi misen dau mamanero. Doba en medoc ohw en naugb en eic en maga bauwaharo naugb maman sesar dag gin touohob, kaba, en emeic ara gus graga augwan dou maman touweroei? Naro, en emeic gin augwan dag mogud dou maman toues.

³³Dangga gara mog eng emoho bemas maman deseino Allah en deita? Naro, sud hom ingma en emoho bemas maman touwero. Anai Allah enin eng ouma debin maman dag maman sesar emeb naugb maman deitero. Doba augwan ediyebeiya dau maman namcirohob.

³⁴Sug Allah ouma debin maman dag ginohob, kaba, gara mog eng emowun maman an sesar deita? Naro, sud hom toua ingmaro. Anai Krisdus enin eng omom taiba sogo salib naugb maman sesar ginohob. Hanoba en edag maman gembala gesa taij naugb en ogod aremer aga maman deseino Allah. Anai Allah enin eng eigdoumesa en dau gomom ucugb naugb en edeigtou desij en se en mesira misen dag mougt mera medam naugb maman touohob.

³⁵Dangga sug Krisdus medoc gororougb maman dag ginohob, kaba, areng emasid maman dau gin deita? Yen youdesa dag aremer, era ara gogom, era maman masma mog erij, era sireba maman, era maman mamunggwerij, era maman masma gecgu, era gomom eb naugb maman touei? Naro, aremer augwan gini, kaba, emasid maman dau en touwero. Doba maman maiyan augwan gini ogdoc sud hom, moho Krisdus, gedig en medoc gororougb mamanohob, men goubesa gin toua terimda. Dara sug maman maimo ucina mog erij icira Krisdus gin, kaba, augwan gini esogwa deisa areg lusud lerba Ugwaremer an gin deb se Surad Injil Meb Mohon deb sug nosa touohob, lendagai: Allah, lusud lowun emen emoho dag domba gedig lusud lesedeb naugb leic gomom dou len. Hang astesda lona, kaba, gomom eb naugb emen toua terimda, anai emen emedag aban logodehohob.

³⁶

³⁷

³⁸Dangga hang, sug maman maiyan augwan gini ogdoc Krisdus men goubesa terimdohob, kaba, dan indoc eica dag sug maman mamiresebaba era sug maman mamomohob, dara malaikadir dara merna mog mog an meren mougt mera, dara aremer areg geb naugb maman iteitogini dara areg eb naugb maman se lona daiyamo gacin,

³⁹dara areg geb se bogo meniha dara areg geb se cinogo mei, dara areg Allah en esinsin gus gus, kaba, augwan gini meren goubesa emedeinyum naugb asid maman dau sug Allah medoc gororougb maman gin touwero. Anai en ens dau en medoc gororougb gini eb ainyes ogdoc maman Adehsud Krisdus Yesus dou mamanohob.