Read Manikion KORINTUS HOM 10 Bible Online

KORINTUS HOM 10 - Manikion bible

KORINTUS HOM 10

¹Dangga dan indagunerij, dara dan indamouwerij, sug Allah esedeb ara ara naugb maman dag ginohob, kaba, yen yemamsoho yenin meijaga naugb ahwan yen aud areg yen meigdoc etrij icira deitero. Doba yen yowun yenin meigdoc mes arjaga dau augwan gin namcir. Dauntoba Allah emdecicugb yen touwero. Doba areg en esedeb naugb yenohob, kaba, ebsugeb naugb yen namcir. Anai yen yecinaga dau sug maman mamjemouwer lagunya dau cinogo Mesir sug nosa, kaba, Allah men umer oiharaga len laugwan. Dara sug len laiga duhu, kaba, en eic duhu besa dau len namcir. Hanoba len laugwan leraga se medi terimda len ledos dig nagama toua.

²Dara len laugwan gin, kaba, Musa en edag mougt mera medam naugb len touohob. Anai sug umer oiharaga len dara len leraga se duhu medi, kaba, gini aninim dag Allah ouci len laugwan dig nagama dou Musa ginohob.

³Dara len laugwan gin, kaba, len let ared, dara len leg duhu dau bogo toua. Anai Krisdus enin eng aiseisa len laugwan terimda. Hang sug merijeba len, kaba, en eperwei enin dag igdahab naugb eic duhu dou len toua.

⁴

⁵Dangga sug aimougtut, kaba, Allah eic geigouhw dou len laugwan toua terimda. Doba se lona daiyamo deit, kaba, en eic gomom dou leinyana se lomougwisa. Anai len lemaimo en merero. Doba len leicara laihagab en mer gin namcir. Hang en medoc emeigouhw an len toua deitero. Doba en medoc esrougb an len terimda. Dan demouwan naugb yen meigdoc moc dougwo Allah men geicara areg geb dou maman mamjemouwer gin touwero. Doba dan douwan naugb yen meigdoc eiseisan gin terimda.

⁶Anai augwan gini esulou maman, dauntoba maman mamdoc emetrij icira areg gecgu aninim dag len ginlo. Doba maman mabehnehino mamanin mamdoc mes dougwo augwan gin namcir.

⁷Hang maman toua, mamesogwa deisa meren geicara naugb maman mamecguna dou seiseij. Dara maman mamohw maman mamaga doum, aninim dag merug hosa dau len touwero. Doba maman mabehnehino mamanin mamaga dau gin terimda. Anai sug len leicara dag gin, kaba, Allah en ogod merug ribu sud hom homoi edeisu se lona hom naugb len lomom debin gin touohob. Augwan gini esogwa deisa areg lusud len log deb se Surad Injil Meb Mohon eisaugb meren geicara gin deb sug nosa touohob, endagai: Sug len lougwan ared debin meren seiseijohob, kaba, len leigtou naugb len letara dara legara aninim debin gin. Hanoba len leisa naugb leinuhwera dara lohw meraga doum deseino meren seiseij gin toua.

⁸

⁹Dara maman mamainyen maman Adehsud naugb sug en ens men goubesa augwougb dou maman. Aninim dag maman mamjemouwer len lainyen Allah sug nosa touwero. Doba se aremer augwan, kaba, maman maod mamina debsa en dous. Anai sug len leicara dag gin, kaba, Allah esa hinogo debin len naugb len lau leinyana dau len lomom toua namcir.

¹⁰Dara maman mamenara ucucugb an maman Adehsud eisaugb areg en eic dou maman mougwa hom aninim dag leng nosa gin touwero. Doba areg en eic dou maman, kaba, maman mamdoc ebtou an gin namcir. Anai sug len merdoc aihagab en an areg en eic dou len dag gin terimda, kaba, en esa men malaikad hom aud len naugb en eic gomom dou leinyana dau len toua.

¹¹Dangga hang, gareg dau yen en oudesa endag en ogo Yesus dag buc gototo se en medoc mesohob, kaba, eigouhw naugb en emeicara bemaimo areg gecgu graga augwan touwero. Doba en ebehnehino enin medoc mes dougwo augwan gin namcir. Dauntoba maireseb menau geb huhugb emediyebeiya dau en touwero, doba eb naugb en namcir. Anai Allah men geicara geb dou maman mamjemouwer gin, kaba, dag ansins dou maman. Hang len lemog dau augwan gini se Surad Injil Meb Mohon deb naugb maman toua deit. Dauntoba maman mameicara aninim dag len inggaro. Doba areg len log eisaugb len gin, kaba, esulou maman dougwo. Dauntoba maman masid mamanin dau meren geicara augwan gin namcir. Anai lona naugb sug augwan ouwedoc, kaba, ebeij deinyorohob.

¹²

¹³Dangga yen yemaimo areg gecgu ginlo. Doba yen yebehnehino yenin meigdoc mes dougwo namcir. Anai areg ainyen yen, kaba, susugb dau areg ainyen lusud gus touwero. Doba Allah medoc an yen medam namcir, hang en emamsoho yen touwero. Doba sug ara ara ainyen yen, kaba, en ehilon ucina susugb dau gin naugb yen toua. Dauntoba gainyenara gini emaiyan yen touwero. Doba yen yaiyan meigdocesem dougwo gin terimda. Anai en emouwan naugb sug gainyenara hom ingma emedreg dau meijen goubesa touwero.

¹⁴Dangga hang, dan indagunerij, dara dan indamouwerij gedig dan indoc gororougb yeni, sug Allah eic gomom dou maman mamjemouwer ansins dou maman dag ginohob, kaba, yen yemaimo leng medigo Yesus naugb yen yemet mog gedig len lesijaresa dou meren seiseij se men igtia touwero. Doba yen yousan yenin dau augwan gin namcir. Anai sug yen yet, kaba, gini aninim dag yen yesijaresa dara yen meigdoc dag hom dara meren seiseij gin touohob.

¹⁵Yen yecinaga dag areg dan desulou yen an gin, kaba, dag misen namcir. Anai yen meiju auti aremer augwan ginohob.

¹⁶Hang yen yecinaga dau sug maman man sijo dou Allah debin mog an Sogo Mera Mohu. Hanoba maman mag gin toua, kaba, gini aninim dag maman maugwan mamdoc dag hom dara Krisdus naugb en mogwihi oiharaga mamanohob. Dara sug maman makris roti, hanoba maman mat gin toua, kaba, gini aninim dag maman maugwan mamdoc dag hom dara Krisdus naugb sug en maga oiharaga maman gin touohob.

¹⁷Anai maman mainyana, doba sug maman matara aninim, kaba, gini dag maman mameinyana deitero. Doba maman maugwan madag maga hom, anai maman maugwan mat dau roti mogo hom ginohob.

¹⁸Dara yen meigdoc eiseisan maman mamjemouwer leng Israel meren geicara gin toua. Anai sug len let dau areg gembala gesa taij en eic bauwaharo ingma, kaba, gini aninim dag len laugwan merdoc dag hom dara Allah. Anai areg gembala en ob se boromei gin, kaba, en eic bauwaharo dou Allah enohob.

¹⁹Dangga hang, areg dan den dou yen graga, kaba, men meijouhw dag seiseij toua, aninim dag Allah misenei? Era sug len leic mog lauwaharo dou en, kaba, dag en oiharaga mog gin dag misen, hanoba len merdoc dag hom dara seiseij gin touohobei?

²⁰Naro, dan demenara dangga dou yenero. Doba dan den dou yen dag areg lusud leic lauwaharo dou meren seiseij gin, kaba, len lemauwaharo dou Allah misenero, doba len louwaharo dou merna mog mog dous. Dangga hang, yen yemaimo leng medigo Yesus naugb yen yemet mog gedig len lesijaresa dou meren seiseijero. Doba yen yasid yenin dau gin namcir. Anai dan demouwan naugb yen meigdoc dag hom dara merna mog mog touwero.

²¹Era yen youdesa dagiro? Meijen goubesa edreg dau maman Adehsud gini, hang yen youwan naugb yen yeic en medoc eclul dou en touei? Naro, meijen goubesa emedeinyum naugb ginero. Dangga emedeinyum naugb sug yen yeg maman Adehsud men mog an mohu dara merna mog mog meren mog an mohu hwas darem. Dara yen yet dau areg geb se men boromei dara areg geb se merna mog mog meren boromei hwas darem touwero.

²²

²³Doba ligbum dau yen, kaba, len lesbes an dan, lendagai: Sug emen emedag Krisdenohob, kaba, gomnomna hom ingma emen dougwo emen toua deitero. Doba ediyebeiya dau emen namcirohob. Dangga areg emen emouwan, kaba, emen emaimo toua terimda. Gini misen. Doba igbum, kaba, dag sogo maga dougwo yen naugb sug yen yemera mera geigouhw touwero. Dara ligbum dau yen, kaba, len lesbes an dan deit, lendagai: Sug emen emedag Krisdenohob, kaba, gomnomna hom ingma emedag mougt naugb emen toua deitero. Doba emen emedag mougt naugb emen emaimo areg emen emouwan gin terimda. Gini misen toua. Doba ingma, kaba, emeinoisa len gus naugb len lemeiji dag lusud mos se Krisdus touwero.

²⁴Hang se meijen geicara augwan, kaba, yen yemed yenin an meijen aremer hom eng emesloulougb naugb yenin dousero. Doba yen yed len gus se meren aremer augwan, dauntoba len lera mera geigouhw terimda toua.

²⁵Sug yen yedouma mog gedig lusud len lohw se usmougb gedig lohwaresa, kaba, yen yemeija meigdocesa gin. Hanoba yen yemeijidougwo len an mog ingga dag lusud leic gini naugb lasijaresa dou seiseijohob touwero, doba yen yet augwan dareg yen meigdoc esgiraha namcir.

²⁶Anai Daud en erba Ugwaremer an gini deb se Surad Injil Meb Mohon deb sug nosa touohob, endagai: Cinogo dara areg geb se gin, kaba, maman Adehsud en moho aiga augwanohob.

²⁷Dangga toua, sug sud hom dau leng medigo Yesus en acgeij yen naugb yen yetara desij en se men tu. Hanoba yen yousa deisa en mer naugb yen yedetara desij en toua, kaba, yen yemeija meigdocesa gin. Hanoba yen yemeijidougwo en an ared ingga dag lusud leic gini naugb lesijaresa dou seiseijohob touwero, doba areg en eic dou yen, kaba, yen yet augwan gini dara yen meigdoc esgiraha an dous.

²⁸Doba sug sud hom geigtou desij yen se sud hom graga men tu en en dou yen dag ared ingga, kaba, lusud lesijaresa dou seiseijohob, kaba, yen yemeic meijus naugb yen yemet ginero. Doba yen yesga deb namcir. Dauntoba yen yemeic medoc momogo dou sud hom areg en en dougwo yen gin touwero. Doba yen yeic medoc esgiraha dou en. Anai yen, kaba, yen meigdoc esgiraha naugb ared ginohob. Doba en, kaba, en eija mouwesa ared ingga, anai en ecinaga dag lusud lesijaresa dou seiseijohob. Hang en oudesa dag seiseij oiharaga dag misen touohob.

²⁹Doba sud hom dau yen, kaba, en auni dan indir ucugb dou dan, endagai: Dagiro, naugwe hang, sud hom areg en eija mouwesaba gin, kaba, men goubesa inggebga naugb en en dougwo dan an areg dan indoc esgirahesohob gin anara?

³⁰Anai sug dan det gini, kaba, dan den sijo dou Allah naugb ginohob. Dangga hang, sug dan deicara dag ginohob, kaba, dagiro, naugwe hang, sud hom gus en owun dan indoho icira areg dan det gina?

³¹Dobnaro. Anai sug yen yet, era sug yen yeg, dara se meijen geicara gus gus augwan, kaba, esloulougb dag yen yemeic lusud merdoc mes naugb len lesbes an Allah se aremer hom touwero. Doba eic dag len merdoc agahugouhw an en dous.

³²Dangga se meijen geicara augwan, kaba, yen yemeic merdoc momogo dou leng Yahudi, dara lugmahara, dara leng se Allah men goucimdeb len laugwanlo. Doba yen yaimo ucina gedag beim dara obosboro an len, dauntoba yen yeic len merdoc esgiraha dou len terimda.

³³Aninim dag dan toua daimo ucina gedag beim dara obosboro an lusud laugwan. Dauntoba len merdoc momogo icira indan geicara homero. Doba dan deic len merdoc esgiraha dou len terimda toua. Dangga hang, se aremer augwan, kaba, dan demed danin deseino lenero. Doba dan ded len gus se meren aremer augwan namcir, dauntoba len lemetohob dan aud dum smougb touwero. Doba indan geicara augwan, kaba, ahwan len naugb Allah eigdoc len dau sesar men gogom augwan dous.