Read Manikion KORINTUS HOM 11 Bible Online

KORINTUS HOM 11 - Manikion bible

KORINTUS HOM 11

¹Dangga hang, yen yemarges dau gin touwero. Doba se meijen geicara augwan, kaba, yen yesogwa deisa dan indohotimei mohw se gin terimda. Aninim dag dan toua demarges dau Krisdus en mer gin touwero. Doba dan desogwa deisa en mohotimei mohw an areg en arougb maman an gin toua terimdohob.

²Dan den sijo medam dou yen, anai yen yen dou dan dag yen meigdoc moc dougwo areg dan desai dou yen sug nosa touwero. Doba yen meigdoc eiseisan augwan gin naugb yen yaimo terimdohob.

³Danggohob, kaba, dan douwan naugb yen meigdoc moc dougwo ligida len lemedag mougt naugb ligiji touwero. Doba yen meigdoc eiseisan dag ligiji, kaba, len ledag mougt naugb ligida dous. Aninim dag Krisdus, kaba, en edag mougt naugb ligiji. Dara Allah, kaba, en edag mougt naugb Krisdus touohob.

⁴Sug yen yedag mougt naugb ligida dag ginohob, kaba, yen yemeic serei naugb yen yemohud yen meijugt sug yen yocuncum, era sug yen yesai Allah en moro se tuari touwero. Doba yen yeicara yaimo dangga dara yen meijugt mogud dous. Anai sug yen yeic serei naugb yen yohud yen meijugt, kaba, gini aninim dag yen yowun yenin meijoho dag ligida. Hang yen yeic igdebes dou Krisdus meijen mougt gin touohob.

⁵Dangga toua, yigida sug yen yocuncum se tuari, era sug yen yesai Allah en moro dou lusud se meijen goucimdeb, kaba, eigouhw naugb yen yeic serei naugb yen yahud dougwo yen meijugt nosahabi, yen yemacuncum, era yemasai Allah moro dou len toua. Anai sug yen yocuncum dara yen yesai Allah en moro dou lusud dara yen meijugt mogud dous, kaba, yen yeic igdebes medam dou meijen mougtir dau ligiji laugwan namcir. Anai sug yen yeicara dag gin, kaba, yeni aninim dag ligida gedig len legina len merugt modi dau. Hanoba len lohw len meraga dou ligiji gus aibibrida touohob.

⁶Doba sug meijen geicara aninim dag ligida gedig len meraga eijouhw dag ginohob, kaba, eigouhw naugb yen yegina yen meijugt modi dau, aninim dag len toua. Dobnaro. Anai sug yen yeicara dag gin, kaba, eic igdebes medam dou yen toua namcir. Dangga hang, yen yemocuncum dara yen yemesai Allah en moro dara yen meijugt mogud touwero. Doba yen yeic serei naugb yen yahud dougwo yen meijugt nosahabi, yen yemacuncum dara yemasai Allah en moro dou lusud toua.

⁷Doba ligiji, kaba, Allah emouwan naugb len lemeic serei naugb lemahud dougwo len merugt touwero. Doba yen yehig dau namcir, anai en esinsin ligiji eng se men obob. Hanoba en ogugwo enin men gogouf cucugb ingma dou len touohob. Doba ligida, kaba, Allah ogugwo ligiji men gogouf cucugb ingma dou len.

⁸Anai en emesinsin ligiji dau ligida ginero. Doba en esinsin ligida dau ligiji dous.

⁹Dara en emesinsin ligiji naugb ledeijan ligidero. Doba en esinsin ligida dous eng naugb ledeijan ligiji.

¹⁰Dangga hang, sug Allah esinsin ligida naugb len ledeijan ligiji dag ginohob, kaba, en emouwan naugb len locuncum dara len lesai en moro dara len merugt mogud touwero. Doba sug len leicara dangga se men goucimdeb, kaba, en ouwan len leic serei naugb len lahud len merugt nosahabi, len lemaimo toua. Anai sug yen yeis Ari, kaba, malaikadir toua merugwengga desij yenohob. Dangga sug len leija ligida dag len lemeigdoumesa len meroho aninim dag ligijero. Doba len lowun lenin merdoc mes arjaga naugb len leb tainya len terimda, kaba, gini ansins dou len naugb len laimo toua.

¹¹Yenin toua yauwam an ginahabi. Anai sug gida hom en ocuncum dou Allah se men tuari. Hanoba en esai en moro dou lusud. Doba augwan gini dara en mougt mogud dous, kaba, gini eic dag yen meigdoc esgirahesa gin touohobei? Naro, gini emeigouhw deseino yenero. Doba yen yowun men geicara gini dag gecgu namcirohob. Dara areg Allah en esinsin, kaba, ens meijouhw dag gin dou yen touohob. Anai sug giji en mougt modi agas, kaba, en owun enin moho dag ligidohob. Hang eic igdebes medam dou en toua namcir. Doba naugb ligida, kaba, Allah eic mougt modi agas dag serei dou len teiteiyohob. Hang emeic igdebes dou len touwero. Doba eic dag len leic merus an gin deseino lusud terimda. Dangga sug yen youcimdeb naugb yen yeis Ari, kaba, ligiji dous eng ledag mougt naugb ligida. Anai Allah esinsin len dau ligiji ginohob. Doba se Krisdus, kaba, ligiji len meroho emagas emedreg dau ligida. Era ligida toua, len meroho emedreg dau ligiji touwero. Doba deseino maman Adehsud, kaba, len laugwan meroho aninim namcir. Anai aimougtut, ka(...)

¹⁶Doba sug sud hom dau yen, en ohoiya dan indir an areg dan dog dou yen gini, kaba, dan dauni dou en dag Allah men goucimdeb se cinogo gus augwan, kaba, len lemaimo ucina gus touwero. Doba len laimo ucina hom gin terimdohob. Anai emen emesa ucina gus darero. Doba emen emesa ucina hom gin eng dou lusud dous.

¹⁷Doba eisaugb areg dan desulou yen an ginda, kaba, dan demeigdoumesa yen meijoho an ginero. Doba dan den dougwo yen an gin namcir. Anai aimougtut, kaba, dan douman dau sug yen yeis Ari, kaba, dag yen meigdoc aninim touwero. Doba yen meigdoc edregim naugb yen yenara yaisedim terimda. Dangga hang, meijen geicara gin, kaba, emahwan lusud naugb len leiji dag lusud mos se Krisdus touwero. Doba augwan gini eic dag len merdoc omomtom dau en dous. Dara areg len lenara dou dan eisaugb ginohob, kaba, dan decinaga dag lingma, kaba, len leigdoc loungmen an dous. Doba lingma, kaba, dan dod indina debsa len merir an dag len lenara se misen dou danohob.

¹⁸

¹⁹Anai dan decinaga Allah en ouwan dag leng areibahau, kaba, len merdoc agas naugb len lenara laised an areg lusud lebedbed se tuari gin toua terimda. Dauntoba maman maiya dau leng Krisden misen len laugwan asesa toua. Anai len, kaba, len lemenara lemaised lusud merir an areg len lebedbed ginero. Doba len lowun lenin merdoc mes arjaga naugb len laimo augwan gin toua. Hang Allah ouma debin len dag len ledag men lusud misenohob.

²⁰Dara lusud leden dou dan toua, dau sug yen youcimdeb naugb yen yeg Sogo Mera Mohu, kaba, dag yen yemeigtou naugwim habero. Doba astesda sud hom sug en einesa tuari mesohob, kaba, en etara dara egara ineino dou enin dous toua. Dangga eic dag cum, kaba, ligbum len mersdemaga embreij an namcir. Doba ligbum, kaba, sireber lenaba, anai yen yemekeba ared ingma an lenero. Doba yen yet augwan bouwa dau lenohob. Hang areg yen yet se Allah men tuari gin, kaba, dag Sogo Mera Mohu misen touwero, doba susugb namcir.

²¹

²²Doba dagiro, naugwe hang, yen yeicara dag gina? Meijen tu naugb sug yen yetara dara yegara sungga, kaba, ingmaro, hang yen yemebara danggei? Era yen youwan naugb yen yowun Allah men goucimdeb. Dara yen yeic igdebes dou leng meren ara ara emeb naugb lenero len laugwan toua ingginei? Yen youdesa endag dan deigdoumesa yen meijoho an gini touei? Naro, dan demeigdoumesa yen meijoho an ginero. Doba dan dowun yen meijoho an gin dous.

²³Anai maman Adehsud enin eng ens dou dan dag se loba sug Yudas ohw en se leng Yahudi meren mougtir merisirohob, kaba, en os roti mogo hom icira en mesira. Hanoba en en sijo dou Allah naugb gin toua. Dauwohob, kaba, en ekris roti ingga. Hanoba en enara dou men logodeh, endagai: Astesda sug yen yet roti dag gin se lona daiyamo gacin, kaba, yen yeiseisan dan. Anai roti gin, kaba, dan indaga gedig dan deic dou Allah naugb meijen sesar augwanohob.

²⁴

²⁵Dangga toua, sug len let roti dauwohob, kaba, en os mog an anggur mohu. Hanoba en enara dou len deit, endagai: Astesda sug yen yeg anggur mohu dag gin se lona daiyamo gacin, kaba, yen meijina eiseisan dan indugwihi gin terimda. Anai anggur mohu gini, kaba, ansins dag dan indugwihi eir naugb meijen sesar augwan touohob. Hang Allah men gos dou menau gin, kaba, emediyebeiya dau yen touwero. Doba ouma debin gin dag ebsugeb naugb yen terimda. Aremer gin, kaba, dan dens augwan gini dou yen sug nosa touohob.

²⁶Dangga gareg dau yen en et roti dara en eg sogo mera mohu, doba dag augwougb dous, kaba, gini aninim dag en owun maman Adehsud en moho. Hang en ebesesar an en maga dara en mogwihi gin touohob. Anai astesda sug yen yet roti dara yen yeg sogo mera mohu, kaba, gini ansins dou lusud dag maman Adehsud en omom taiba sogo salib naugb meijen sesarohob. Dara yen yemeigtou dau sug yen yeg sogo mera mohu gin touwero. Doba yen yeicara yaimo dangga terimda edebeij Lona Sug En Ecicugwen toua.

²⁷

²⁸Dangga hang, esloulougb medam naugb sug astesda sud hom yom dau yen, kaba, en ehilon enin medoc mes nosahabi, en emet roti dara en emeg sogo mera mohu gin toua.

²⁹Anai sug yen yetara dara yegara yaunun, kaba, cum, Allah eic gogom dou yen namcir. Anai yen yemeigdoumesa roti dara sogo mera mohu dag Yesus maga dara en mogwihi touwero. Doba yen youdesa dag roti dara sogo mera mohu gin, kaba, dag misen dous.

³⁰Hang leinyana dau yen, kaba, len meraga omomtom dara areber. Dara ligbum, kaba, len lomom icira gin touohob.

³¹Dangga eigouhw naugb mamanin mahilon mamanin mamdoc mes nosahabi. Dauntoba maman mameg Sogo Mera Mohu gin augwougblo. Doba maman mag dara maman mamdoc ecabeci namcir. Anai sug maman maogmac mamanin mamdoc mes dag gin terimda, kaba, Allah emogod gogom deb naugb maman touwero. Doba en amsoho maman namcir.

³²Doba sug maman Adehsud eic mog erij dou maman icira ginohob, kaba, maman mamen dougwo gogom areg en eic dou maman gin touwero. Doba maman maimo ucina gin terimda. Anai en eicara dangga an maman, dauntoba en emeic mor mor se dum smougb dou maman. Aninim dag lusud gedig Bilis oiharaga len se cinogo gin touwero. Doba sug maman marges dau maman geicara gecgu augwan debohob, kaba, maman mamoubro oho dau gin namcir.

³³Dangga dan indagunerij, dara dan indamouwerij, sug yen youcimdeb naugb yen yeg Sogo Mera Mohu, kaba, yen yemet roti, dara yen yemeg sogo mera mohu ineino dau len gus touwero. Doba yen yeigtou naugb len gus laugwan lacinimahabi, yen yaugwan yemeg Sogo Mera Mohu aninim toua. Anai sug yen yacinim naugb yen yogo ara gaihim se Allah men tuari dag gin, kaba, en eic gogom medam dou yen. Hang gareg dau yen sug sirebeni, kaba, eigouhw naugb en etara teitei se men tuahabi, en emeg Sogo Mera Mohu ucan gin toua. Doba aremer gus, kaba, yen yeigtou yateteij terimda dan dedebeij yenahabi, dan demens augwan asesa dou yen toues.