Read Manikion KORINTUS HOM 12 Bible Online

KORINTUS HOM 12 - Manikion bible

KORINTUS HOM 12

¹Dan indagunerij, dara dan indamouwerij, yen yecinaga dau sug nosa, kaba, lusud lahwan yen aud seiseij gedig len lemenara mohoro naugb yen yesijaresa len terimda. Anai se lona ingga, kaba, yen meigdoc emebdebin an Krisdus touebma. Doba yen yedag leng medigo Yesusaba. Hang dan douwan dens dau mou gouforoho dara goubesa areg Mena Gogoufu eic dou mamanohob meijouhw augwan asesa dou yen toua. Dauntoba yen yemeija meijuwesa gin deitero. Doba yen meigdoc eica gin namcir. Anai gini aimo dau areg yen yeijidougwo dan an se meijen suradohob.

³Dangga aimougtut, kaba, dan douwan naugb yen yecinaga dag gareg en ouwara dougwo Yesus terimda, kaba, gini ansins dag Mena Gogoufu emeinesa en medoc mes touebma. Doba en aimo merna mog mog len merir smougb mougwaba. Anai sud hom areg en eicara baimo Mena Gogoufu en mer, kaba, en emeicara dag gin deitero. Doba en arges dau namcirohob. Dangga toua, sud hom areg en eic mos naugb en os badi Yesus moho dag men mougt mera medam deseino lusud, kaba, gini ansins dag Mena Gogoufu einesa en medoc mes dag misen touohob. Anai sug Mena Gogoufu emeinesa se en medoc mesbuma, kaba, men goubesa naugb gin toua ingmaro. Doba en ahau dau gin namcir.

⁴Doba mou gouforoho dara goubesa areg geb naugb maman gin, kaba, naugb aremer hom dousero, doba naugb aremer aingma aingma augwanda. Dara emen dau merna mog mog einyana touwero, doba en dau Mena Gogoufu hom gin dous.

⁵Hang ucina naugb sug maman maicara, kaba, emedag hom touwero. Doba susugb namcir. Doba augwan gini, kaba, naugb maman Adehsud hom gin dous.

⁶Dara mou gouforoho dara goubesa naugb sug maman maimo maman ucina gin, kaba, augwan aninim touwero, doba susugb toua terimda. Doba Allah hom eng eic gin augwan dou maman dous.

⁷Dangga hang, astesda sud hom dau maman, kaba, Mena Gogoufu eic mou ouforoho era goubesa naugb ara ara dou en. Hanoba ens dou maman dag en einesa maman mamdoc mes toua namcirohob. Dara mou gouforoho dara goubesa areg en eic dou maman ginohob, kaba, naugb mamanin touwero, doba naugb sug maman mausem ucucugb terimda.

⁸Dangga hang, dou sud hom gus, kaba, Mena Gogoufu eic mou ouforoho dou en. Dauntoba sug en ecinaga areg asesa Allah enin medoc mes augwanohob, kaba, eic dag en ens ucina se geica asesa dou lusud. Dara sud hom gus, kaba, Mena Gogoufu eic mou auti dou en naugb sug en edidib meijouhw augwan asesa debin gin dou len toua.

⁹Dara sud hom deit, kaba, Mena Gogoufu eic goubesa dou en. Dauntoba sug en acgeij ara ara dau Allah naugb len gus, kaba, en emeija mouwesa gin touwero. Doba en od mena debsa en an gin namcir. Hang Allah emeic dou en. Dara sud hom gus, kaba, Mena Gogoufu eic goubesa dou en naugb sug en eic geingmos agauwesa dou leng areber toua.

¹⁰Dara sud hom gus, kaba, Mena Gogoufu eic mou ouforoho dou en naugb sug en esai Allah moro dou lusud. Dara sud hom deit, kaba, en eic goubesa dou en naugb en aben ganusbus debin areg lusud lesai gin toua. Dauntoba len lecinaga dag augwan gin, kaba, dau Allah dag misenohob. Dara sud hom deit, kaba, Mena Gogoufu eic mou aiso dou en. Dauntoba en ecinaga dag areg lusud lesai dou len gus, kaba, en dau Allah era en dau merna mog mog dousei? Hanoba en ed aremer meijouhw daum asesa dou lusud toua. Dara sud hom gus, kaba, en eic mou ouforoho dou en naugb en enara se leci aingma aingma. Dara sud hom deit, kaba, Mena Gogoufu eic mou auti dou en. Dauntoba sug en ecinaga sud hom graga en mer gec aingma aingma ginohob, kaba, en ens meijouhw augwan asesa dou leng se goucimdeb toua.

¹¹Doba aremer gin augwan, kaba, en dau Mena Gogoufu hom dous. Hang en emaimo maman an areg mamanin mauwam an touwero. Doba en eic mou ouforoho era goubesa dou maman aimo dau areg enin ouwan toua.

¹²Dangga hang, maman maugwan madag hom se Krisdusohob. Doba maman geicara, kaba, susugb namcir. Aninim dag maman mamaga, kaba, dag hom. Doba areg ged maga hom gin, kaba, einyana toua. Dara areg ged maga hom gin, kaba, meren geicara naugb lenin touwero. Doba augwan naugb maga hom gin dous.

¹³Dangga toua, sug nosa, kaba, emen dau leng Yahudi. Dara yen, kaba, dau lugmahara. Dara lingma deit, kaba, len ledag lusud misen. Dara merug hosa, kaba, len ledag sogougb toua. Doba sug Mena Gogoufu einesa maman mamdoc mesohob, kaba, maman mamoho emedregim toua deitero. Doba maman maugwan madag Krisdus en maga hom dous. Anai sug Allah esa Mena Gogoufu dou maman, kaba, en emesa mena einyana susugb aud mamanero. Doba en esa Mena Gogoufu hom dous eng naugb en oiharaga maman se maga hom gin toua terimda.

¹⁴Hang maman maugwan dag Krisdus maga hom dous. Doba maman geicara, kaba, susugb namcir, aninim dag maman mamaga dag hom. Doba areg ged maga hom gini, kaba, einyana toua.

¹⁵Dangga sug sud hom en enara dou maga, endagai: Dan demedag mesirero, doba dan dedag mohora dous, kaba, gini aninim dag eni susugb dau magahobei? Naro, eni susugb dau maga touwero. Doba en toua ed maga gin terimda.

¹⁶Era sug sud hom en enara dou maga, endagai: Dan demedag mairesero, doba dan dedag moms dous, kaba, gin edeinyum naugb en susugb dau maga gin touohobei? Naro, eni susugb dau maga touwero. Doba en ed se maga hom gin toua terimda.

¹⁷Anai sug maga augwan edag mairesi dous, kaba, dagiro, naugwe hang, sug en oumana? Era sug augwan edag moms, kaba, dagiro, naugwe hang, sug en ohu mebes an ara ara gin toua?

¹⁸Dobnaro. Anai Allah en emesinsin maga augwan dag hom ginero, doba en eic augwan susugb. Hanoba len laugwan led maga hom gin namcir, aimo dau areg enin ouwan toua.

¹⁹Dangga hang, maga, kaba, dag hom namcir. Doba areg ged maga gin, kaba, einyana. Anai sug maga augwan edag moms, era mairesi, era mohora dous, kaba, dagiro naugb maga gina? Maga toua moonggei? Naro, maga toua ingmaro.

²⁰

²¹Dangga hang, sud hom en edag mairesi, kaba, en emowun sud hom gedag mesira dag eni emesloulougb naugb en. Dara sud hom en edag mougt, kaba, en emesbes an lusud gedig len ledag mohora dag len lemesloulougb naugb en touwero. Doba len larges merir dau gin namcir.

²²Anai maman maugwan, kaba, masloulougb animohob. Dara gin dousero, doba areg edag omomtom se maman mamaga, kaba, maman maigdoumesa augwan gini dag esloulougb naugb maman.

²³Hang areg meroho eb tainya se maga gin, kaba, maman mamesbes an len touwero. Doba maman masedougwo len deigeigouhw edreg dau len gus laugwan namcir. Dara areg geic igdebes dou maman, kaba, maman mamens ainyes dou lusud touwero. Doba maman mag sansun maihiron dougwo edreg dau areg geb se maga hom gini augwan toua terimda.

²⁴Hang Allah esinsin maga edeinyum naugb maman maigdoumesa areg geb tainya dara areg geic igdebes dou maman edreg dau areg geb se maga gus gus augwan toua. Anai areg gus augwan gin, kaba, eigouhw teiteiyohob.

²⁵Anai en emouwan naugb maman mamdoc emedregim se maga hom ginero. Doba en ouwan naugb maman mamdoc anim ucucugb namcir dous.

²⁶Dangga sug gogom eb debin sud hom dau yen, kaba, yen yaugwan yaimo en se ucina mog erij gini. Dara sug len gus leigdoumesa sud hom dau yen en moho, kaba, yen yaugwan yaimo en se gin toua.

²⁷Anai astesda dau yen, kaba, en ed Krisdus maga ginohob. Hang yen yemedag hom gin toua.

²⁸Sug yen yedag hom se Krisdus maga dag ginohob, kaba, Allah eic mou ouforoho dara goubesa susugb dou yen toua. Dangga aimougtut, kaba, en eic mou ouforoho dou ligbum dau yen naugb len lesai Mer Geigouhw eisaugb Krisdus meijouhw augwan asesa dou lusud. Anai hom gin, kaba, esloulougb edreg dau areg gus augwan namcir. Dauwohob, kaba, en eic mou ouforoho dou lingma deit naugb len lens en mer dou yen sug aremer inggebga, era naugb areg gen daiyamo toua. Ucan deit, kaba, en eic mou ouforoho dou ligbum naugb len ledidib Allah men meijouhw augwan asesa dou yen. Doba lingma, kaba, en eic goubesa dou len naugb len laben ganusbus lauma debin en mer. Dara lingma deit, kaba, en eic goubesa dou len naugb len leic geigouhw dou leng areber. Hanoba len locirma merna merna mog mog dau lusud toua. Dara merug hosa dau yen, kaba, Allah eic goubesa dou len naugb len merdoc erij an lusud namcir. Hanoba len lousa leng merunggwereij dara leng mecicgu toua terimda. Doba lingma deit, kaba, en eic mou ouforoho dara goubesa dou len daunto(...)

²⁹Dangga hang, astesda dau yen, kaba, emedeinyum naugb sug en esai Mer Geigouhw eisaugb Krisdus. Dara en ens areg asesa Allah enin medoc mes. Dara en edidib meijouhw eisaugb Krisdus augwan asesa dou lusudero.

³⁰Dara astesda dau yen, kaba, men goubesa emedeinyum naugb sug en aben ganusbus. Dara en eic geigouhw dou leng areber. Dara en mou ouforoho emedeinyum naugb sug en ec merir aingma aingma. Dara en ens dau areg len lec gini meijouhw asesa dou lusud touwero. Doba Allah eic mou ouforoho dara goubesa bedreg dou astesda sud hom yom se meijen goucimdeb ginohob.

³¹Dangga hang, yen meigdoc emerleij icira naugb sug yen yaben ganusbus. Dara yen yec merir aingma aingma gin touwero. Anai augwan gini, kaba, moho eb tainya dous. Doba yen yacgeij Allah ucucugb terimda. Dauntoba en eic mou ouforoho dou yen naugb sug yen yesai Mer Geigouhw eisaugb Krisdus. Dara yen yens areg asesa Allah enin medoc mes. Dara yen yedidib meijouhw eisaugb Krisdus augwan asesa dou lusud. Anai augwan gin, kaba, moho eb taiba namcir. Doba sug yen yaimo mou ouforoho era goubesa areg Allah ekeba dou yenohob, kaba, areg esloulougb edreg dau ara gus augwan, kaba, dag yen meigdoc gororougwim debin gin toua.