Read Manikion KORINTUS HOM 14 Bible Online

KORINTUS HOM 14 - Manikion bible

KORINTUS HOM 14

¹Dangga hang, yen yemasid yenin dau sug yen meigdoc gororougb len gus touwero. Doba yen yaimo ucina gini anim ucucugb terimda. Hanoba yen yacgeij Mena Gogoufu naugb en eic mou ouforoho dara goubesa aingma aingma ucan gin dou yen toua. Doba areg esloulougb edreg dau areg gus augwan namcir, kaba, dag yen yacgeij en naugb en eic mou ouforoho dou yen. Dauntoba yen yesai Allah en moro dou lusud terimda.

²Anai gareg dau yen en mou ouforoho naugb en eci mer susugb, kaba, en emenara dou men lusud se meijen goucimdeb touwero. Doba en eic banara dou Allah enin dous. Anai en eci dau areg misen gedig Mena Gogoufu ens dou enohob. Doba se mer susugb dou len dous. Hang len lemecinaga meijouhw augwan asesa touwero.

³Doba gareg en esai Allah en moro dou lusud, kaba, en emenara dou Allah enero, doba en enara dou lusud. Anai areg en ens dou len gin, kaba, se mer susugwero, doba se lenin meren leci dous. Hang emousa len naugb len leiji dag lusud mos se Krisdus. Dara len laiyan merdocesem, hanoba enara bad len merdoc mes toua terimda.

⁴Dangga gareg en eci mer susugb, kaba, en ousa enin dous naugb en eiji se Krisdus. Doba gareg en esai Allah moro se lenin meren leci dou lusud, kaba, en ousa len laugwan naugb len leiji dag lusud mos se Krisdus toua.

⁵Hang areg esloulougb bedreg dau areg gus augwan namcir, kaba, dag dan douwan naugb yen yaugwan yesai Allah moro dou lusud nosahabi. Anai gareg en esai en moro dou lusud, kaba, en ousa len edreg dau sud hom areg en eci mer susugb gin namcir. Anai en esai Allah moro se lenin meren leci dou lenohob. Gin dauwohob, kaba, eigouhw naugb yen yaugwan yec meijir susugb ucan gin toua. Doba sug yen yec meijir susugb gin se meijen goucimdebohob, kaba, esloulougb naugb sud hom gedig en mou ouforoho en toua moongga se goucimdeb naugb en ens meijouhw ucan gini dou lusud. Dauntoba ousa len naugb len leiji se Krisdus toua.

⁶Anai sug dan dedebeij yen se meijen goucimdeb. Hanoba, dan desai dau areg Allah en esedeb naugb lusud, dara dan dens meijouhw dau gini dou yen. Dara dan dens dau aremer areg Allah en ouwan, hanoba dan dedidib meijouhw augwan ucan dou yen toua. Doba augwan gini se mer susugb, kaba, dan demousa yen naugb yen yemeiji dag lusud mos dagiro? Naro, dan demousa yenero. Doba sug sud hom en eperwei areg dan debedbed dou yen gini se meijen leci. Hanoba en ens meijouhw dau augwan gin dou yen, kaba, gini dag dan dousa yen naugb yen yeiji dag lusud mos se Krisdus gin touohob.

⁷Dangga toua, sug lusud lohw sulin era lod isadum, doba augwougb dous, kaba, dagiro, naugwe hang, lusud lemecinaga men meijouhw gina? Anai hwas gin, kaba, emedag lusud naugb lenara mohoro. Doba lan marir augwougb dangga dous. Doba sug lusud lohw hwas gini aimo dau mer aududi, kaba, lusud lecinaga moho asesa toua.

⁸Era sug lusud lohw higbei mougb, doba augwougb dous, kaba, dagiro, naugwe hang, sadodor lesedeb naugb len lesara dara meren moca? Naro, len lemesedeb touwero. Doba sug len lohw higbei mougb sug sadodor lecinaga meijouhw asesa, kaba, eic dag len lesedeb naugb lesara dara meren moc toua.

⁹Dangga toua, sug yen yebedbed dou lusud, doba augwan gini se meijir susugb, kaba, dagiro, naugwe hang, len lecinaga meijouhw asesa dau areg yen yen dou lena? Naro, len lemecinaga meijouhw augwan dag misenero. Hang areg yen yen gini, kaba, dag yen meijirs obdobdem an gin dangga dou len dous.

¹⁰Anai se cinogo gin, kaba, lusud lemeci merir hom dousero, doba leci merir einyana inggebga. Hanoba astesda meren leci gin, kaba, men meijouhw toua moongga.

¹¹Doba sug dan demecinaga meijouhw dau areg sud hom en eci dou dan ginero, kaba, dan deija en dag lugmahara. Hanoba en toua eija dan dag lugmahara namcir.

¹²Dangga hang, sug yen meigdoc erleij naugb Mena Gogoufu eic mou ouforoho dara goubesa aingma aingma dou yenohob, kaba, yen yacgeij en naugb en eic mou ouforoho dara goubesa areg ousa goucimdeb dou yen toua. Dauntoba yen yousa len naugb len leiji dag lusud mos se Krisdus, anai gini esloulougb edreg dau areg gus augwan namcir. Hanoba yen yecgun meisira debin gini naugb yen yaimo augwan an len toua terimda.

¹³Dangga gareg dau yen en mou ouforoho naugb en eci mer susugb ginohob, kaba, esloulougb medam naugb en acgeij Mena Gogoufu. Dauntoba en eic mou ouforoho dou en naugb en ens dau areg en eci se mer susugb gini men meijouhw asesa dou goucimdeb toua.

¹⁴Anai sug dan dec dan indir susugb dag gin, kaba, dan indu emauwam an meijouhw naugb sug dan dedidib dou lusud touwero. Doba gini aninim dag dan denara se dan indoc mes dou Allah dous.

¹⁵Dangga hang, areg dan den dou yen gragohob, kaba, men meijouhw augwan dag gini. Sug dan docuncum dou Allah se mer susugb ginohob, kaba, dan docuncum dou en se goucimdeb meren leci. Era sug dan dohw aresgwemer naugb dagahugouhw an Allah se mer susugwohob, kaba, dan dohw aresgwemer se goucimdeb meren leci gin toua.

¹⁶Anai sug yen yagahugouhw dara yen yen sijo dou Allah. Doba se mer susugb mogud dous, kaba, dagiro, naugwe hang, len gus lemouma debin areg yen yen sijo gin dag augwan asesa dara misen toua? Anai Mena Gogoufu emeic mou ouforoho dou len naugb len lecinaga meijouhw asesa touebma.

¹⁷Hang yen yemousa len naugb len leiji dag lusud mos se Krisdus touwero. Doba gini naugb yenin dous. Anai areg yen yen dou Allah se mer susugb gin, kaba, eigouhw namcirohob. Doba len gus, kaba, len lemecinaga meijouhw ginero.

¹⁸Dan den sijo dou Allah, anai dan denara dou en se mer susugb edreg dau yen yaugwan namcir.

¹⁹Doba sug dan doucimdeb dara len gus, kaba, eigouhw naugb dan denara gurereito se meren leci edreg dau sug dan denara einyana se mer susugb dou len toua. Anai sug dan denara einyana dou len. Doba se mer susugb mogud dous, kaba, dan demens meijouhw ara dou lena? Doba sug dan denara gurereito dou len se lenin meren leci, kaba, gini dag dan dens areg se misen dou len, anai len lecinaga meijouhw augwan asesa touohob.

²⁰Dangga dan indagunerij, dara dan indamouwerij, yen meiju edag logodeh meren gauwamara, doba eisaugb areg gecgu dous. Doba eisaugb aremer gec mer susugb, kaba, yen yemedag logodeh deitero. Doba meijen gaugwanara edag lusud mos se gin namcir.

²¹Anai maman Adehsud, kaba, en og deb se Surad Injil Meb Mohon deb sug nosa touohob, endagai: Dan desa dan indir se mer aingma aingma ingma dara dou indan logodeh. Hanoba dan desa lugmahara toua dou len naugb len lesai dan induro se meren leci dou len toua. Doba len merdoc emeica dan indir ogdoc len gin touwero.

²²Dangga hang, mer susugb gin, kaba, emedag ansins dou leng medigo Yesusero. Doba gini dag ansins naugb mamang Krisden misen. Dara gesai Mer Geigouhw eisaugb Krisdus, kaba, edag ansins naugb mamanero, doba edag ansins naugb leng medigo Yesus dous.

²³Dangga sug yen youcimdeb, kaba, yen yemec mer susugb mogud dousero. Doba yen yec ara ara se meijen leci toua. Anai sug len gus era leng medigo Yesus len leinesa, hanoba len louman, doba yen yaugwan yec mer susugb mogud dous, kaba, len leigdoumesa yen meijoho an ginei? Naro, len lowun yen meijoho dag mereiyeba yen yaugwan namcirohob.

²⁴Doba sug sud hom dau leng medigo Yesus era dau len gus en einesa meijen goucimdeb, hanoba en ouman dau sug yen yaugwan yesai Allah en moro se meijen leci dou len, kaba, areg yen yesai gin, kaba, ogod en medoc mes dag en ebesesarohob. Hang en esga men sesar augwan asesa dou Allah toua. Anai areg en ouman gin, kaba, ens dou en dag Allah ogod gogom medam deinaugb enohob. Hanoba en toua esijaresa Allah. Dara en ouma debin yen dag Allah en toua moongga desij yen dag misenohob.

²⁵

²⁶Dangga dan indagunerij, dara dan indamouwerij, areg dan den dou yen gragohob, kaba, men meijouhw augwan dag gini. Sug yen youcimdeb naugb yen yesijaresa Allah, kaba, sud hom en einoisa yen naugb yen yaugwan yougbdemer. Dauwohob, kaba, sud hom en edidib meijouhw dau Surad Injil Meb ucan gin deit. Dara sud hom gus deit, kaba, en esai Allah moro ucan gin dou yen toua. Dau, kaba, sud hom gus en eci dau areg se geica se mer susugb gin dou len. Dara sud hom gus, kaba, en ens dau areg en eci se mer susugb gini meijouhw augwan asesa dou goucimdeb naugb sug len lecinaga toua. Anai esloulougb medam dau sug yen yeis Ari gin, kaba, dag augwan ousa lusud. Dauntoba len leiji dag lusud mos se Krisdus namcir.

²⁷Dangga toua, sug lusud merugwengga se meijen goucimdeb gedig len louwan leci merir susugb, kaba, yen youci lahwai era merug homoi dau len dous. Hanoba len lemenara sesem touwero. Doba sud hom enara mer obsara dauwahabi, sud hom en emenara deit. Hanoba sud hom en eisa naugb en ens dau areg len leci se mer susugb gini meijouhw augwan asesa dou len toua.

²⁸Doba sug sud hom ingma en mou emouforoho naugb ginero, kaba, leng leci merir susugb gin, kaba, len lemenara se goucimdeb touwero. Doba len lenara se lenin merdoc mes dou Allah dous.

²⁹Dangga toua, dau leng lesai Allah en moro, kaba, yen youci lahwai era merug homoi dous naugb sug len lens en mer dou yen toua. Dara leng meru aiso gin, kaba, len louma debin len dag areg len lesai gin, kaba, dau Allah dag misenohobei? Era dau mena mog mog dousei? Anai Mena Gogoufu eic mou ouforoho dou len naugb ginohob.

³⁰Doba sug Allah esa en mer menau dou sud hom sug yen yeis Ari, kaba, sud hom graga en emenara terimdero. Doba en arges mer cum dauwahabi. Hanoba en eic cumougt dou sud hom gin deit naugb sug en esai Allah mer menau gin dou yen toua.

³¹Anai aremer gesai Allah moro gin, kaba, naugb sud hom yom gin dousero. Doba gareg Allah en esa en mer dou enohob, kaba, len laugwan meren goubesa inggebga naugb sug len lesai en mer gin toua. Doba esloulougb medam naugb yen yeicara yaimo gini hom yom aududi dous. Dauntoba sug lusud louman deigeigouhwohob, kaba, len lecinaga dau areg Allah en ouwan meijouhw augwan asesa toua. Dara eic len merdoc aiyansem dou len naugb sug len les agadgeij toua terimda.

³²Dangga mer areg Allah esa dou sud hom ginohob, kaba, emedag mougt naugb enero, doba en edag mougt naugb gini. Hang en emesai Allah moro gini augwougb touwero. Doba en esedeb naugb sug en aimo augwan gini aududi namcir.

³³Anai Allah en emouwan dau sug maman maucimdeb, kaba, dag maman mamsdemaga emembreij touwero. Doba en ouwan dag maman geicara augwan, kaba, eic maman mamdoc edouder anim terimda. Hang en emouwan naugb maman mamenara sesem touwero. Doba en ouwan naugb maman maimo augwan gin aududi dous.

³⁴Dara dan demouwan ligida, kaba, dag len lemeic merus naugb len lemenara augwougb se meijen goucimdeb toua deitero. Doba len leigtou dag losum dous. Anai gini aimo dau areg Allah en ogod deinaugb len se Surad Injil Meb Mohon deb sug nosa touohob. Hang len lemeigdoumesa lenin meroho dag mougt se goucimdeb touwero. Doba len lowun lenin meroho eb tainya namcir. Anai sug len lenara augwougb dag gin, kaba, eic igdebes dou len gus laugwan toua. Areg dan dens dou yen gini, kaba, susugb dau goucimdeb gus touwero. Doba len laugwan laimo dag gin touohob.

³⁵Dangga sug ligida leija meruwesa an areg len louman dau Allah en mer gin, kaba, len lemeijidougwo mougtir eisaugb gin se goucimdeb ingga touwero. Doba len leigtou terimda len ledebeij se meren tuahabi, len lemdeijidougwo len mersuwer, era sud hom dau len merusur an gin dous. Anai sug ligida leic merus naugb len leijidougwo mougtir an ara ara augwougb se goucimdeb, kaba, meren geicara gini edeinyum naugb eic igdebes dou lusud laugwan toua namcirohob.

³⁶Era dagiro? Sug Allah esa en mer se cinogo gin, kaba, en esa mer gin dou yen hom dousei? Era en dau yen hom touei? Naro, en mer gini, kaba, edebeij len gus laugwan naugb len laimo touohob.

³⁷Gareg dau yen en oudesa Mena Gogoufu eic mou ouforoho dou enohob naugb en esai Allah en moro dou lusud, kaba, en ecinaga dag areg dan den dou yen gin, kaba, dan demen dau danin indoc mes dou yenero. Doba gini dag maman Adehsud enin eng arougb yen an ginohob.

³⁸Dangga hang, sug yen yeiya, doba sud hom graga en emaimo gomnomna ginero, kaba, yen yemebin en touwero. Doba yen yasid en dau yen namcir.

³⁹Anai esloulougb medam naugb sug yen yeis Ari, kaba, meijen geicara augwan edouder anim terimda. Hanoba lusud merdoc mes dag len lagahugouhw an toua. Dangga hang, dan indagunerij, dara dan indamouwerij, yen yemen dougwo lusud an sug len leci merir susugb gin touwero. Doba naugb sug yen yesai Allah en moro dou lusud, kaba, yen yecgun mesira debin gin namcir.