Read Manikion KORINTUS HOM 16 Bible Online

KORINTUS HOM 16 - Manikion bible

KORINTUS HOM 16

¹Doba eisaugb aregoufu naugb sug yen yousa Allah men lusud se leng Yudea meren hancob, kaba, dan douwan naugb yen yaimo goucimdeb se leng Galatia meren hancob len laugwan an areg dan den dou len se aremer ginohob toua namcir.

²Dangga hang, astesda Ari se lonamenmen, kaba, yen yekeba ingma dau meijen aregoufu, era ariloboc, aimo dau areg yen yesmohob. Hanoba yen yobdeb debinim naungmei, dauntoba sug dan dedebeij yen, kaba, yen yemehilonim an gin touwero, doba eb naugb dan debohob.

³Gin dauwohob, kaba, yen youci merug hosa gedig yen yod meijina debsa lenohob naugb gin toua. Hanoba yen yesa len naugb len lodo meijen aregoufu an indan surad aud leng se Yerusalemeda. Anai sug dan dedebeij yenohob, kaba, dan dog surad dou len. Dauntoba leng se Yerusalem ingga, kaba, lecinaga len gin asesa toua.

⁴Era edeinyum naugb sug dan deihweda se Yerusalem toua, kaba, eigouhw naugb len laimo danin dous.

⁵Doba aimougtut, kaba, dan desedeb naugb dan dedeiya goucimdeb se leng Makedonia meren hancob len laugwanahabi. Dangga sug dan dedebeij goucimdeb se leng Makedonia meren hancobohob, kaba, dan dedeiya yen yaugwan se cinogo Korintus gin toua.

⁶Dara sug dan dedebeij yenohob, kaba, dan deigtou desij yen se igda hom era hwaiyahabi. Era se igda goho dugurij augwan touei? Dan demecinaga gini dag misen touebma. Anai dan demouwan naugb dan dedebeij yen se lona hom, era hwai dousero. Doba sug maman Adehsud en ouwan, kaba, dan deigtou desij yen se lona einyanahabi. Dangga sug dan deigtou desij yen bedeinyumohob, kaba, yen yousa dan dara ared, era aregoufu naugb dan deihwedig cinogo gus gus, aimo dau areg dan dogod an ginohob toua.

⁸Doba iteitogin, kaba, dan douwan deigtou se cinogo Epesus terimda Lona Pentakosda gin ouwa dauwahabi. Anai Allah ec misis dau danohob naugb dan dera mera einyana. Dara indan moc, kaba, leinyana merugwenggini naugb len lebehnehino dougwo dan toua.

¹⁰Sug Timotius edebeij yenohob, kaba, yen yebin en dara geigouhw namcir, dauntoba en medoc momogo touwero. Doba en medoc esgirahesa yen, anai en esai maman Adehsud en moro, aninim dag dan touohob.

¹¹Dangga hang, yen yemesbes an en. Dara yen yemowun en moho dau sug en edag godeh mesaba gin touwero. Doba sug en esai dan induro augwan dou yenohob, kaba, yen yousa en. Dauntoba en ecicugb aud dan dara en mena agau toua. Anai dani dara maman mamaguner gus, kaba, emen emaugwan emeigtou sugini naugb en. Dauntoba en ecic dau meijen geicara augwan asesa dou emenahabi, emen ememen aud yen toues.

¹²Doba eisaugb maman mamaguna Apolos, kaba, dan denara dad en medoc mes mougwa einyanohob naugb sug en aimo Timotius an maman mamaguner gus len laugwan aud yen toua. Doba en medoc emesgirahesa gin namcirbuma. Anai en auwam an dag Allah emousa deisa en an gin touebma. Dangga hang, ebeij lona sug Allah ens cumougt dou enohob, kaba, dan decinaga dag en emedebeij yen sungga toues.

¹³Doba naugb yenin, kaba, dan desulou yen naugb yen meiju auti augwan terimda. Dauntoba yen yemobsara dau sug yen meigdoc ebdebin an Krisdus touwero. Doba yen yaimo ucina gin esesa terimda. Hang yen yemahau dau sug lusud leic mog erij dou yen touwero. Doba yen yaiyan meigdocesem naugb yen yes agadgeij naugb gin toua namcir.

¹⁴Dara se meijen geicara augwan, kaba, yen meigdoc gororougwim terimda toua.

¹⁵Doba eisaugb Sdepanus, kaba, yen yecinaga eni dara leng leigtou desij en se men tu, kaba, dag len laugwan ledag mebin se yeng Akaya meijen hancobohob. Dara yen yecinaga dau sug len merdoc ebdebin an Krisdus ginohob, kaba, dag len lemaimo areg gus augwan toua deitero. Doba len leic meruwemougb esesa naugb len leicara dou Allah men lusud len laugwan terimda touohob.

¹⁶Dangga hang, dan indagunerij, dara dan indamouwerij, dan desulou yen dara goubesa namcir. Dauntoba yen yemohoiya len merir touwero. Doba yen yesogwa deisa len meruhotimei mohw an aremer areg len larougb yen an gin toua terimda. Dara yen yemeicara yemaimo dag gin dou Sdepanus an men lusud gin dousero. Doba gareg en ousa len naugb en esai Krisdus moro dou lusud, kaba, yen yesogwa deisa len merir an areg len larougb yen an gin toua namcir.

¹⁷Dan indoc eigouhw sug yen yesa Sdepanus an Portunatus dara Akaikus aud dan sugini. Anai sug len ledebeij dan dara meijen suradohob, kaba, len leperwei yen meijuhw naugb len lenara lagaha dan indoc mes terimda. Aninim dag dan decinaga len lenara laded yen meigdoc mes sug nosa touohob.

¹⁸Dangga hang, sug len lecicugb aud yenohob, kaba, yen yemowun len meroho touwero. Doba yen yeigdoumesa len meroho terimda. Anai iteitogin, kaba, ara ara gus emata dougwo dan deitero. Doba len leic dan indoc esgiraha ucugwohob.

¹⁹Goucimdeb se leng Asia Mogurei meren hancob sugin, kaba, len laugwan lou yen. Dara Akwila an Priskila dara leng leis Ari se maran tu, kaba, len laugwan lou yen dara merdoc an yen toua. Anai len toua, laugwan ledag hom dara maman Adehsud ginohob.

²⁰Dara maman mamaguner dara maman mamdamouwer se goucimdeb sugin, kaba, len laugwan lou yen toua. Dara yen toua sug yen youcimdeb, kaba, yen you meijufesem, dara yen meigdoc ecabeci anim terimda.

²¹Dara danin toua dou yen. Hang dan demog hom gini ai dan insira dou yen toua.

²²Gareg en medoc gororougb maman Adehsud ginero, kaba, dan douwara dougwo en namcir. Hanoba dan dogugwo en se maman Adehsud enin mesira naugb en eic mor mor dou en dous. Maranata. Gini meijouhw dag maman Adehsud en ecicugwen dedemeda.

²³Maman Adehsud Yesus en medoc an yen terimda.

²⁴Dan indoc gororougb yen yaugwan, anai maman maugwan mamdoc hom dara Krisdus Yesus gin touohob. Augwan gini asesa dag misen namcir.