Read Manikion KORINTUS HOM 2 Bible Online

KORINTUS HOM 2 - Manikion bible

KORINTUS HOM 2

¹Dangga dan indagunerij, dara dan indamouwerij, sug Allah aiyan lusud meren gauwamara dara mou gouforoho augwan eb tainya dag ginohob, kaba, dan demen aud yen sug nosa naugb dan demebedbed se moho geb taiba dara dan demeic lusud meren gauwamara an mou gouforoho ingma demaos dara augwan gin dou yen touwero.

²Doba dan desedeb se dan indoc mes dag sug dan indugwengga desij yen, kaba, dan dens dau Yesus Krisdus sug en omom taiba sogo salib naugb lusud meren sesar hom gin dou yen dous.

³Dangga hang, sug dan indugwengga desij yen sug nosa, kaba, dan demeigdoumesa dan indoho an areg dan desai gin dou yen touwero. Doba dan dowun danin indoc mes arjaga deseino yen namcir. Hanoba dan dahau dareg dan indoc eijesa icira gin toua terimda. Dauntoba dan demesai Allah en mer dag areibahau dou yen touwero. Doba dan debedbed augwan gini se geica mogud dou yen dous.

⁴Dangga hang, dan demeic lusud meren gauwamara an mou gouforoho, dara dan demenara demaic yen meigdoc mes naugb sug yen meigdoc ebdebin an Krisdus gin touwero. Doba sug dan desai Allah mer misen eisaugb Krisdus dou yen sug nosa, dara dan dedidib meijouhw dau augwan gini asesa dou yen, kaba, dan daben ganusbus dara dan deic gansins ogdoc Mena Gogoufu men goubesa debin gin dou yen toua. Dauntoba yen yemod meijina debsa Allah an en mer emogdoc lusud meren gauwamara gin touwero. Doba yen meigdoc ebdebin an en ogdoc sug yen yeiya dau men goubesa gaimo en mer gin dous. Anai en esa Mena Gogoufu se dan indoc mes naugb ginohob.

⁶Doba sug dan demeic lusud se cinogo gini meren gauwamara debin areg dan desai dou lusud ginero, kaba, gini men meijouhw dag areg dan desai gin, kaba, dag dan indu emaiyero dousei? Naro, gini men meijouhw danggero. Anai sug dan desai ara dou leng ledag lusud mos se Krisdusohob, kaba, dan deic mou gouforoho misen ingma daos gin dou len toua. Doba mou gouforoho misen gin, kaba, emen dau lusud dara merna mog mog gedig len loiharaga lusud se cinogo gin touwero.

⁷Doba mou gouforoho misen areg emen emesai dou leng ledag lusud mos gin, kaba, en dau Allah enin dous. Anai merna mog mog gin, kaba, len lemedag mougt mera naugb lusud se cinogo gin deitero. Doba meren goubesa, kaba, augwan ebiji naugb ediyebeiyohob. Dara areg Allah en esedeb naugb maman ogdoc en mou gouforoho gin, kaba, menenau touwero. Doba en esedeb augwan gini dau sug en emahasesei cinogo ginbuma. Dara areg graga gin, kaba, dag en eigdoc maman dau sesar men gogom. Hanoba en eigdoumesa maman mamoho naugb sug maman maigtou desij en se men gogouf cucugb gin toua namcir. Hang en emens dau augwan gini dou merna mog mog an lusud len laugwan touwero. Doba en ecgoneh augwan dau len terimda.

⁸Anai sug merna mog mog graga len lecinaga deb dag Yesus omom taiba sogo salib gin, kaba, eic areg graga augwan dou maman, kaba, len lemarautut meren lusud se cinogo naugb len lemetob maman Adehsud Moho Agas gini se sogo salib touwero. Doba len larges dau namcir. Doba len lemecinaga dau areg Allah en esedeb naugb maman sug nosohob gin touwero. Hang len lemarougb meren lusud naugb len lemetob maman Adehsud se sogo salib toua namcir.

⁹Augwan gini esogwa deisa areg sud hom, moho Yesaya, en og deb se Surad Injil Meb Mohon deb sug nosa touohob, endagai: Areg Allah en esedeb naugb lusud areg len merdoc gororougb en, kaba, sud hom gus ingma dau len medigo Yesus gini kaba, en emeiya, dara en emoumam dau Allah men ucina gini naugb hom touebma. Anai Allah ecgoneh areg en esedeb naugb men lusud gini augwan dau len namcir. Hang leng medigo Yesus gini, kaba, len lemauwaman areg Allah acgoneh gini mougb hom touwero. Doba len meru edgom an augwan gin namcir dous.

¹⁰Doba naugb maman, kaba, Allah ens dau areg en esedeb gini augwan ogdoc Mena Gogoufu dou maman. Anai Mena Gogoufu gini, kaba, en ecinaga areg geb se Allah enin medoc mes dara areg Allah esedeb augwan toua dag misen namcirohob.

¹¹Anai gareg en ecinaga areg geb se sud hom ingma enin medoc mesa? Dangga toua, sud hom ingmaro. Doba enin dous eng ecinaga dau men gauwamara augwan dag misen dous. Dangga toua, sud hom ingma kaba, emecinaga dau areg geb se Allah enin medoc mes touwero. Doba Mena Gogoufu enin dous eng ecinaga dau augwan gini dag misen namcir. Anai enin dous eng en dau Allah aud mamanohob.

¹²Dangga hang, sug emen emesai dau areg Allah en esedeb dag mogud naugb maman gini, kaba, emen ememeic dau lusud se cinogo gini meren gauwamara, dara emen emaimo dau areg len ledidib gini naugb emen emaos dara dou yen touwero. Doba emen emaimo meijouhw dau areg Mena Gogoufu enin ens dou emen naugb augwan gin dous. Anai Allah en emesa merna gedig len larautut lusud se cinogo gin se maman mamdoc mesero. Doba en esa Mena Gogoufu enin eng se maman mamdoc mes. Dauntoba maman macinaga dau areg en esedeb dag mogud naugb maman augwan dag misen toua.

¹⁴Dangga sud hom areg Mena Gogoufu emeinesa en medoc mesbuma, kaba, en emebin areg Mena Gogoufu ens dou en touwero. Doba en otogoto an dous. Anai areg Mena Gogoufu eic dou maman, kaba, en ousa maman an naugb maman mamu obgesa meijouhw augwan asesa toua. Hang sud hom areg Mena Gogoufu emeinesa en medoc mes touebma, kaba, en medoc emobgesa meijouhw touwero. Doba en owun augwan gini dag moho emaiyero namcir.

¹⁵Doba sud hom areg Mena Gogoufu einesa en medoc mes dag misenohob, kaba, en mou obgesa naugb en ecinaga dau areg Allah esedeb gini meijouhw augwan asesa toua. Hang en mou ai naugb en ogod an lusud gus meren geicara augwan asesa toua terimda. Doba naugb enin, kaba, lusud gedig Mena Gogoufu emeinesa len merdoc mesbuma, kaba, sud hom ingma dau len en mou emai naugb emouma debin en an men geicara hom touwero. Doba en amsoho en deb dous. Anai en mou emobgesa men geicara augwan dag misen touebma.

¹⁶Augwan gini esogwa deisa areg sud hom, moho Yesaya, en og deb se Surad Injil Meb Mohon deb sug nosa touohob, endagai: Dau leng se cinogo gin, kaba, gareng en ecinaga dau areg geb se maman Adehsud enin medoc mesa? Dara gareg dau len en esulou en se aremer hom touohoba? Naro, sud hom ingma dau len, kaba, en emecinaga areg geb se enin medoc mes. Hanoba en emesulou en an aremer hom touebma. Doba maman, kaba, maman macinaga areg geb se Krisdus medoc mes augwan dag misen namcir. Anai Mena Gogoufu einesa maman mamdoc mes naugb ginohob.