Read Manikion KORINTUS HOM 3 Bible Online

KORINTUS HOM 3 - Manikion bible

KORINTUS HOM 3

¹Doba dan indagunerij, dara dan indamouwerij, yen, kaba, emedeinyum naugb sug dan denara dou yen dag lusud gedig len leiji dag lusud mos se Krisdusohob touebma. Doba eigouhw naugb dan denara dou yen aninim dag lugdeh mahaniheni se Krisdus dous. Anai meijen geicara emedag lusud gedig Mena Gogoufu einesa len merdoc mesohob meren geicara touwero. Doba meijen geicara augwan aninim dag lusud gedig Bilis oiharaga len se cinogo gini meren geicara namciraba.

²Dangga hang, sug dan dedebeij yen sug aimougtut. Hanoba ucan deit, kaba, dan demens dau Allah en mer meijouhw gebdededero dou yen touwero. Doba dan dens dau en mer meijouhw geb ainyes dag meiyo dou yen terimdaba. Aninim dag lusud lemeic ared misen dou lugdeh mahaniheni touwero, doba len leic aring mohu dou len dous. Dara iteitogin, kaba, emedeinyum naugb sug dan dens dau Allah en mer meijouhw gebdededero gin dou yen touebma.

³Anai yen yemarges dau sug yen yaimo lusud aud areg len merdoc etrij icira ginbuma. Doba yen yaimo len aud augwan gin terimdaba. Anai sug yen meigdoc esdigeijim, dara yen yenara yaisedim ucucugb, kaba, gini ansins dag yen yomom dau areg yen meigdoc etrij icira ginohobei? Naro, doba gini ansins dag yen meigdoc dag hom dara lusud se cinogo gin smougb mougwaba.

⁴Anai sug merug hosa dau yen, kaba, len lenara dag len laimo dani aud areg dan debedbed dou yen gin dous. Dara lingma, kaba, len lenara dag len laimo Apolos enin dous eng an areg en edidib dou yen, kaba, gini ansins dag yen yedag lusud mos se Krisdusohobei? Naro, doba meijen geicara aninim dag lusud gedig Mena Gogoufu emeinesa len merdoc mesbuma meren geicara gin dousaba.

⁵Doba dagiro, eisaugb Apolos aman gina? Aman eng amedag mougt mera medam naugb yenei? Naro, aman amedag Allah men sogougb gedig aman amahwan yen aud Krisdus naugb yen meigdoc ebdebin an en dous, aimo dau ucina areg maman Adehsud enin eng ogod an deb naugb amanohob.

⁶Anai dan, kaba, dan deba Mer Geigouhw eisaugb Krisdus dag meij se yen meigdoc mes aimougtut. Dara Apolos, kaba, en oucan dan naugb en eir duhu debin meij gin. Anai en, kaba, en edidib meijouhw dau areg dan desai dou yenohob augwan asesa ucan dou yen toua. Doba Allah enin dous eng men goubesa edeinyum naugb sug en eic meij gini eiji se yen meigdoc mes toua namcir.

⁷Dangga sud hom geba meij dara sud hom geir duhu debin meij ingga, kaba, lan maroho emesloulougwero. Doba Allah enin dous eng en moho esloulougb namcir. Anai enin eng esedougwo meij gini naugb eiji se yen meigdoc mes terimda.

⁸Dangga hang, gareg en eba meij dara gareg en eir duhu debin meij gin, kaba, laingma maran geicara emesloulougb emedreg daum touwero. Doba Allah eic siouwa dou lan lahwas, aimo dau maran geicara dou lan toua.

⁹Anai Apolos aman, kaba, aman amahwas amedag Allah men sogougb naugb aman ameicara dou en dous. Dara yen, kaba, yen yedag Allah men lo naugb sug aman ameicara. Dara yen yedag Allah men tuari gedig aman amousa en naugb amohud deb naugb en toua.

¹⁰Dangga hang, sug yen yedag Allah men tuariohob, kaba, dan dogo buc gototo geigouhw naugb yen sug nosa toua, aimo dau mou gouforoho areg Allah en eic dou dan naugb ginohob. Dau, kaba, sud hom gus en ucan dan naugb en ohud tu icira buc gin toua. Doba astesda sud hom gareg en ohud tu icira buc gin, kaba, eigouhw naugb en mou auti an areg en ohud gini decicijahabi.

¹¹Anai Allah, kaba, en eic Yesus Krisdus dag buc gototo hom eng dou maman dous. Buc gus, kaba, ingmaro.

¹²Dangga lingma, kaba, eic emas, era perag, era igdahab mera eisaugb naugb len lahud meren tu icira buc gototo gini. Dara lingma, kaba, len leic sogo, era loung meh magaci, era tramdad maga mogud dous.

¹³Doba inggaida. Krisdus en emens dau areg len lahud tu icira buc gini augwan asesa dou len se men Lona sug en ecicugwen naugb en ogod aremer aga lusud gin toues. Anai se Lona ingga, kaba, en eic smougb naugb en ainyen astesda sud hom yom men tu an men geicara dag men tu gin, kaba, en eic areg misen bahudohobei? Era en eic areibahau bahud dousei?

¹⁴Dangga sug sud hom areg smougb emait en men tu mor morero, kaba, Allah eic siouwa dou en icira gini.

¹⁵Dara sud hom areg smougb ait en men tu mor mor namcir, kaba, Allah emeic siouwa hom dou en touwero. Doba augwan ediyebeiya dau en namcir. Doba enin mog, kaba, smougb emait enero. Doba Allah eigdoc en dau. Hanoba en eic maireseb menau geb huhugb dou en toua. Anai en ainyen naugb ohud men tu icira buc gini, doba emedeinyumero. Hang en emedag sugwa gedig lusud leic dau smougb sug smougb emait mor mor touebma.

¹⁶Dara yen yaugwan, kaba, yen yedag Allah men tuari. Hang Mena Gogoufu en eigtou se yen meigdoc mes. Anai en, kaba, en en dau Allah aud yenohob. Yen yemecinaga augwan gini dag misenbumei? Naro, yen yecinaga augwan gini dag misen namcirohob.

¹⁷Dangga hang, yen yemenara meijir emedregim. Dara yen yemekebim dag nosa toua deitlo. Doba yen meigdoc dag hom namcir. Anai gareg dau yen en ot Allah men tuari gini baisoboro ogdoc sug en arautut lusud merdoc mes naugb len lekebem, kaba, Allah emamsoho en deb touwero. Doba en emot en dag tu emaisoboro se dum smougb toues. Anai en ouci tuari gin deb dag menohob. Hang yen yedag men tuari gini toua.

¹⁸Dangga hang, eigouhw naugb sud hom ingma dau yen, kaba, en emauwam an didi eisaugb Allah men geicara graga touwero. Doba en medoc obgesa namcir. Anai gareg dau yen en oudesa dag en mou ouforoho an areg lusud se cinogo len leigdoumesa dag mou gouforoho ginohob, kaba, eigouhw naugb en owun en moho dag en mou edgom an augwan gin namcir. Dauntoba sug areg se geica einesa en medoc mesohob, kaba, eic dag en mou ouforoho dag misen toua terimda.

¹⁹Anai areg lusud se cinogo gini len leigdoumesa dag mou gouforoho, kaba, Allah en owun augwan gini dag mou emaiyero dous. Augwan gini esogwa deisa areg sud hom, moho Elipas, en enara deb dou Ayub se Surad Injil Meb Mohon deb sug nosa touohob, endagai: Leng meru ouforoho se cinogo gin, kaba, len lou meren digoro naugb eica lusud. Doba Allah eic lenin meren digoro naugb eica lenin dous.

²⁰Dara sud hom gus, kaba, en erba Ugwaremer se Surad Injil Meb Mohon eisaugb gin deb sug nosa touohob, endagai: Maman Adehsud en ecinaga dag areg leng meru ouforoho se cinogo gini len lauwam an, kaba, augwan emedeinyum naugb sug len lera mera ara ara geigouhw hom touwero, doba len lera mera areg gecgu mogud dous.

²¹Doba yen, kaba, yen meigdoc dag hom dara Krisdus. Aninim dag Krisdus, kaba, en medoc dag hom dara Allah touohob. Dangga hang, yen yemeigdoumesa yenin meijoho an sud hom ingma dag yen yaimo en deitlo. Doba yen yarges dau gin deb namcir. Anai sug yen yedag hom dara Krisdus dag ginohob, kaba, dani, dara Apolos, dara Kepas, dara lusud se cinogo gini, dara maireseb, dara gomom, dara areg Allah en esedeb naugb lona iteitogini, dara areg en esedeb naugb lona daiyamo gacin, kaba, augwan gini emedag mougt naugb yen touwero. Doba yen yedag mougt naugb augwan gini, dauntoba ousa yen dous.