Read Manikion KORINTUS HOM 5 Bible Online

KORINTUS HOM 5 - Manikion bible

KORINTUS HOM 5

¹Dan denara dag graga dou yen, anai lusud leden dou dan dag aremer mesira ebsa moonggebga se meijen goucimdebohob. Dara aremer gin, kaba, ogom medam edreg dau areg leng medigo Yesus laimo namcir toua. Anai len leden dou dan dag sud hom obsara an mena mesouwa godeh ucucugb terimdohob. Hang aremer gin, kaba, dag loungmen touwero, doba dag misen namcir.

²Dangga dagiro, naugwe hang, yen yeimiman yenin deseino lusud dag yen yaimo augwan namcirohoba? Naro, eigouhw, kaba, yen meijus obsara naugb yen meigdoc momogo an gin terimda. Hanoba yen yocirma sud hom gedig en aimo men geicara gecgu gini dau meijen goucimdeb toua.

³Dan darougb yen an dangga, anai ogdoc goubesa areg maman Adehsud Yesus eic dou danohob, kaba, dan dogod gogom deinaugb sud hom gedig en aimo sesar gecgu gini, aninim dag dan toua indugwengga desij yen touohob. Anai dan indug, kaba, aigusi dau yen namcir. Doba se dan indoc mes, kaba, dan indugwengga desij yenaba. Dangga sug yen youcimdeb, kaba, yen yemamsoho en deb touwero. Doba ogdoc maman Adehsud Yesus men goubesa gin, kaba, yen yogugwo sud hom gini se Setan mesira ucugb. Dauntoba sug Setan eic mor mor dou en maga, kaba, en emomom namcir se dum smougb touwero. Doba en mena agau se Lona Sug Maman Adehsud En Ecicugwen gin toua namcir. Anai sug yen yaimo dan indir naugb yen yogod gogom deinaugb en dag gin, kaba, gini aninim dag dan indugwengga desij yen icira aremer gin touohob.

⁶Dangga hang, yen yemeimiman yenin an meijen geicara augwan graga deseino lusud deitlo. Doba yen meijus obsara an gin namcir. Anai sug areg geic gerisa dou roti gurereito eb se gin, kaba, cum, roti augwan erisa touohob. Yen yemecinaga aremeijouhw gini dag misenbumei? Naro, yen yecinaga gini dag misenohob.

⁷Hang yen yemaimo areg dag sesar gin deitero. Doba yen yocirma areg geic gerisa dou roti augwan gini dau meijen goucimdeb toua namcir. Dauntoba yen yedag roti gedig areg geic erisa dou roti gin, kaba, hom emeb se touwero. Doba yen yedag roti gemerisero naugb yen yaimo areg gecabeci gin dous, aninim dag sug nosa toua, kaba, yen yaimo areg ecabeci gini touohob. Anai Krisdus, kaba, en omom taiba sogo salib naugb en mogwihi esga maman dau sesar men gogom augwan ginohob. Aninim dag sug nosa, kaba, leng Israel leic domba mogwihi naugb mogwihi gini oiharaga len dau gomom touohob.

⁸Dangga sug Krisdus mogwihi esga maman dau sesar men gogom dag ginohob, kaba, maman masedeb mamanin mamdoc mes naugb maman mamet roti gerisa gin toua deitero. Doba maman mat roti gemerisero mogud debin men Lona Gohw Bedreg gin dous. Anai roti gerisa, kaba, dag maman maimo areg dag sesar dara mog mog terimda. Doba roti gemerisero, kaba, dag maman maimo areg gecabeci dara areg se geica namcir.

⁹Augwan gini aimo dau areg dan desulou yen an se indan surad sug nosa touohob. Anai se surad ingga, kaba, dan den dougwo yen naugb yen yemeigtou desij leng lohw meraga doum aibibra touwero. Doba yen yasid yenin dau len namcir.

¹⁰Doba areg dan dog dou yen gin, kaba, men meijouhw dag yen yemasid yenin dau leng medigo Yesus ginero. Doba men meijouhw dag yen yasid yenin dau yen meijaguner se Krisdus gedig len leicara gecgu gin dous. Anai sug yen yasid yenin dau leng medigo Yesus gedig len lohw meraga doum aibibra, era leng lagungunara, era leng leiyohora, era len gedig len lecguna dou seiseij, kaba, emedeinyum naugb yen yemeigtou se cinogo gin deitero. Doba yen yeihwededau namcir.

¹¹Dangga hang, yen yemasid yenin dau leng medigo Yesus gedig len leicara gecgu ginero. Doba sug sud hom eigdoumesa enin moho dag yen meijaguna se Krisdusohob. Hanoba en ohw en maga aibibra, era en agungunara, era en ecguna dou seiseij, era en esmesman len gus, era en eg ahwei mohu ed bomom, era en eiyohora, kaba, yen yemeigtou desij en deitero. Doba yen yasid yenin dau en namcir. Hanoba yen yemetara desij en mougwa hom touwero. Doba yen yasid yenin dau en namcir.

¹²Dara yen yemamsoho en touwero. Doba Surad Injil Meb Mohon arougb yen naugb yen yocirma en dau meijen goucimdeb toua terimda. Anai leng medigo Yesus, kaba, len leigtou dig medigo. Hang maman mamogod aremer debin len touwero. Doba Allah enin dous eng ogod aremer gogom debin len. Doba leng se goucimdeb, kaba, meijen goubesa inggebga naugb yen yogod aremer gogom debin len. Anai len leinesa Krisdus men uro mes ginohob.