Read Manikion KORINTUS HWAI 1 Bible Online

KORINTUS HWAI 1 - Manikion bible

KORINTUS HWAI 1

¹Surad gini dau dang, Paulus, anai Allah enin eng ouci dan. Hanoba en eigdoumesa dan indoho naugb dan desai Mer Geigouhw eisaugb Krisdus dou lusud laugwan toua. Dan dog surad gini dou Allah men goucimdeb se cinogo Korintus. Dara men lusud se leng Akaya meren hancob, yen yaugwan. Dara maman mamaguna Timotius en ouma debin areg dan dog dou yen gin toua.

²Dangga hang, aman amacgeij maman Mamina Allah dara maman Adehsud Yesus Krisdus naugb lan mardoc eigouhw an yen. Dara lan laseyeiyo yen dougwo areg gecgu augwan toua terimda.

³Dan den sijo medam dou maman Adehsud Yesus Krisdus en Mena Allah gini. Anai en, kaba eni maman Mamina gedig en medoc eineg an maman. Dara en edag maman Allah gedig en ousa maman se aremer augwan toua namcirohob.

⁴Hang astesda sug emen emaimo ucina mog erij icira Krisdus gin, kaba, en enara bad emen emdoc mes toua. Dauntoba sug en aiyan emen emdocesem dag ginohob, kaba, emen toua emenara emad lusud gus merdoc mes sug len laimo ucina mog erij icira Krisdus gini toua. Dauntoba len lemobsara dau gin touwero. Doba len laiyan merdocesem naugb len les agadgeij se gin terimda, aimo dau Allah men geicara geb dou emenohob an len toua.

⁵Dangga sug emen emesogwa deisa Krisdus mohotimei mohw se ucina mog erij mougwa einyana dag ginohob, kaba, emen emaimo en naugb sug Allah enara bad emen emdoc mes ucucugb terimda toua, aninim dag Allah enara bad Krisdus en medoc mes sug nosa touohob. Anai emen emedag hom dara enohob.

⁶Dangga hang, sug emen emaimo ucina mog erij dag gin, kaba, emen emaimo augwan gini naugb emenin dousero. Doba naugb sug emen emousa yen, dauntoba yen yemobsara dau ucina aud maireseb menau geb huhugb gin touwero. Doba yen yaiyan meigdocesem naugb yen yes agadgeij namcir. Anai sug Allah enara bad emen emdoc mes se ucina mog erij dag ginohob, kaba, emen emu ouforoho naugb sug emen emenara emad yen meigdoc mes sug yen yaimo ucina mog erij aninim dara emen gin toua.

⁷Sug emen emecinaga dag yen yemaimo emen se ucina mog erij gin dousero. Doba yen yaimo emen naugb yen yaiyan meigdocesem dag gin touohob, kaba, emen ememeija emuwesa yen toua deitero. Doba emen emod emina debsa yen dag yen yemobsara dau ucina maireseb menau geb huhugb gin touwero. Doba yen yes agadgeij naugb yen yaimo gin terimda.

⁸Dan indagunerij, dara dan indamouwerij, sug Allah eigdoc emen dau gogom medam einyana dag ginohob, kaba, dan douwan dens dau gogom areg emen emaimo se leng Asia meren hancob augwan dou yenahabi. Dauntoba yen yecinaga dag misen toua. Anai gogom areg emen emaimo gin, kaba, medam gougwa edreg namcir. Hang emen emoudesa endag lusud logod aremer gomom deinaugb emen touohob.

⁹Dangga emen emesai emen emdoc mes ohwohu dag emen emires emeb toua deitero. Doba augwan gini acgunog, dauntoba emen ememod emen emina debsa emenin emen goubesa touwero. Doba emen emod emen emina debsa Allah enin an men goubesa dous. Anai enin dous eng mobisamougb edeinyum naugb sug en eigdoumesa lusud dau gomom ucugb toua.

¹⁰Dangga hang, emen ememod emen emina debsa emenin emen goubesa toua deitero. Doba emen emod emen emina debsa Allah enin an men goubesa gin dous. Anai sug en eigdoc emen dau gogom dag ginohob, kaba, emen emecinaga dag men goubesa edeinyum naugb sug en eigdoc emen dau gogom gus gus augwan se lona daiyamo gacin toues.

¹¹Anai dan decinaga dag yen toua yousa emen naugb sug yen yocuncum dou Allah naugb emenohob. Dangga sug yen yeiya, doba en auni yen meijir naugb en ousa emen dag gin touohob, kaba, eic dag lusud leinyana lagahugouhw an en namcir.

¹²Emen emacgeij naugb yen yousa emen dara yocuncum dag gini, anai emen emecinaga se emen emdoc mes dau sug emen emesai Mer Geigouhw eisaugb Krisdus dou lusud, kaba, dag emen ememaimo areg gecgu mougwa hom an len touwero. Doba emen emesogwa deisa Allah mohotimei mohw naugb emen emaimo areg edag beim dara gecabeci dara emen emdoc dag hom an len se aremer augwan toua terimdohob. Hang emen emeimiman emen an gin toua namcir. Dara emen ememeicara dangga dou len gin dousero. Doba emen emaimo augwan gini edreg dou yen sug nosa touohob. Dangga toua, sug emen emesai Allah moro dou lusud, kaba, emen ememaimo lusud meren gauwamara emaos dara dou len touwero. Doba emen emaimo mou gouforoho areg Allah enin eic bedeinyum dou emenohob naugb gin dous, anai en medoc an emen naugb ginohob.

¹³Sug emen emaimo areg edag beim dara ecabeci an lusud laugwan dag ginohob, kaba, yen yemeija meijuwesa emen an areg emen emog dou yen toua deitero. Doba yen yod meijina debsa emen dag areg emen emog dou yenohob, kaba, augwan se geica namcir. Anai areg emen emog dou yen gin, kaba, emen emaunun dougwo, dara emen emecgoneh aremer hom dau yen touwero. Doba areg yen yecic, kaba, men meijouhw ingga dous eng naugb yen yecinaga toua. Dan den dou yen dag gini, anai dan decinaga dag iteitogin, kaba, yen yemecinaga dau areg emen emog gini meijouhw augwan asesa touebma. Doba yen meigdoc ogdogda emen an einyana ginaba. Doba dan dod indina debsa yen dag cum, kaba, yen yecinaga dau areg emen emog dou yen ginohob meijouhw augwan asesa toua namcir. Anai dan decinaga dau sug yen meigdoc obgesa dag areg emen emog dou yen gini. Doba augwan edag beim an yenohob, kaba, yen meigdoc emogdogda emen toua deitero. Doba eic dag yen yeimiman emen se Lona Sug Maman Adehsud En Ecicugwen. Hanoba emen emeimiman yen se Lona ingga toua.

¹⁴

¹⁵Sug dan decinaga dag cum, kaba, yen yecinaga dag areg emen emog dou yen gini, doba augwan se geica namcirohob, kaba, dan desedeb aimougtut dau sug dan deihwededau cinogo gin, kaba, dag dan dedebeij yen nosahabi. Hanoba dan demeihwedig len gus meren hancob deitda. Dauntoba dan deic geigouhw dag mougb cuhwai icira dou yen toua.

¹⁶Anai dan desedeb dau sug dan deihwedig leng Makedonia meren hancob, kaba, dag dan dedebeij yen nosahabi. Dara dan demdebeij yen sug dan decicugb dau meren hancob gin toua deit. Hanoba yen yousa dan dara ara ara sug dan deihwedig leng Yudea meren hancob toua. Dobnaro. Anai meijen aremer edag sogo maga eb dougwo dan. Hang dan demdebeij yen touwero. Doba dan deihwedaud se leng Makedonia meren hancob nosahabi.

¹⁷Dangga hang, sug dan demaimo augwan gini an yenero, kaba, gini ansins dag dan indoc agag dau yenohobei? Era dan dedag lusud gedig Mena Gogoufu emeinesa len merdoc mesbuma naugb dan dousa yen meijir dag you, era naro, naugb dan daunun yen touei?

¹⁸Naro, areg dan dog dou yenohob, kaba, dan indoc emagag an gin touwero. Doba dan dog augwan gini dara indoc hom dou yen dous. Hang dan demeinegneg dan indiresa dag you dara naro dou yen touwero. Doba se aremer augwan, kaba, dan dousa dou yen dag you mogud dous.

¹⁹Anai sug Silas dara Timotius, emen emesai Mer Geigouhw eisaugb Allah Meisi Yesus Krisdus dou yen sug nosa, kaba, emen ememens en dag sud hom areg einegneg merisa dag you, era naro, dou yen touwero. Doba emen emens en edag sud hom gousa dou yen dag you mogud dous. Dara dan dou Allah en moho debin gin toua. Dauntoba yen yecinaga dag areg dan den dou yen gin, kaba, misen namcir. Anai en, kaba, en emereiyara mougwa hom touwero. Doba areg en os dou mamanohob, kaba, en aimo augwan gini dara medoc hom an maman toua terimda.

²⁰Anai sug Allah esa en dau bogo se cinogo gin, kaba, maman macinaga dag areg en os dou maman ogdoc enohob, kaba, en medoc emagag an hom dau maman touwero. Doba en aimo augwan gini dag misen an maman terimda. Dangga hang, sug Allah ousa dag you mogud ogdoc Krisdus dou maman dag ginohob, kaba, maman mamarges dau sug maman maigdoumesa Allah en moho agas medam touwero. Doba astesda sug maman macuncum dou en, kaba, maman mauma debin dou en dag men geicara augwan gin, kaba, asesa dag misen namcirohob.

²¹Dara gin dousero, doba enin eng ogo Yesus dag buc gototo se maman mamdoc mes. Hanoba en aiyan maman mamdocesem. Dauntoba maman mamobsara dau Krisdus touwero, doba maman mas agadgeij namcir. Dara enin eng ouci maman debinim naugb en. Dauntoba sug maman madag men lusudohob, kaba, maman masai en moro dou len gus. Dara maicara maimo en se areg en arougb maman an gin toua terimda.

²²Hanoba en esa Mena Gogoufu dag ansins se maman mamdoc mes. Dauntoba maman macinaga dag en moho aiga mamanohob. Dara maman mamdoc eica dag areg en os dou maman, kaba, hom emediyebeiya dau maman touwero. Doba eb naugb maman beb huhugb namcir.

²³Dangga sug dan demedebeij yenero, kaba, gini ansins dag dan demagag dan indoc mes dau yen touwero. Doba dan douwan naugb deic cumougt dou yen, dauntoba yenin yogod meijen aremer augwan ouwa dauwahabi, dan demedebeij yen toua. Anai dan demouwan naugb demeic yen meigdoc momogo dou yen dag nosa deitero. Doba dan indoc erleij naugb dan deic yen meigdoc esgiraha dou yen dous. Dauntoba yen meigdoc agahugouhw an Allah edreg dau nosa deit. Anai dan decinaga dag yen yes agadgeij naugb yen yaimo Krisdus namcirohob. Hang dan demesedeb naugb dan dedag meijen mougt naugb yen deitero, doba dan desedeb naugb dan dousa yen dangga dous. Dan dacgeij Allah naugb en ouma debin gin dou yen toua. Dauntoba yen yecinaga dag areg dan den dou yen gin, kaba, augwan asesa dag misen namcir. Anai en, kaba, en ecinaga areg geb se danin indoc mes augwan dag misenohob.