Read Manikion KORINTUS HWAI 10 Bible Online

KORINTUS HWAI 10 - Manikion bible

KORINTUS HWAI 10

¹Doba areg dan desulou yen an se tainya gin, kaba, dau len gusero. Doba dang, Paulus, eng denara eisaugb gin dou yen. Anai dan douman dag ligbum dau yen, kaba, len lesbes an danohob dag indan geicara emedag Krisdus men gembala misenero. Doba edag lusud se cinogo gini meren geicara dous. Hanoba len lenara, lendagai: Sug Paulus eigtou ai gusi dau maman, kaba, en eic mos dou maman namcir. Doba sug en eigtou desij maman, kaba, en emeic mos touwero. Doba en enara dara mer arjaga dou maman dous.

²Dangga hang, dan dacgeij dara goubesa naugb yen yemesbes an dan dag gin deitero. Doba yen yarges dau namcir. Dauntoba sug dan dedebeij yenohob, kaba, yen yemeicara yemaic dan indoc mes naugb sug dan deic gogom dou yen touwero. Anai dan demouwan naugb dan denara gouji dou yen dag nosa deitero. Doba dan douwan desogwa deisa Krisdus mohotimei mohw an yen naugb dan dowun danin indoc mes arjaga deseino yen se aremer augwan. Aninim dag Krisdus eicara dangga sug nosa touohob. Hang dan demens dau men geicara gin eng dou yen toua. Dobnaro, kaba, indan goubesa inggebga naugb sug dan deic gogom dou lusud areg len lowun dan indoho len laugwan toua namcir. Anai len lesbesan dan dag se indan geicara augwan, kaba, dan daimo lusud gedig Bilis oiharaga len se cinogo gini meren gauwamara an lusud dous.

³Dobnaro. Anai emen emaga dous eng aimo areg geb se cinogo gini. Doba sug emen emesara dara Bilis an men logodeh gin, kaba, emen ememaimo lusud se cinogo gin meren gauwamara. Dara emen ememeic meren ariloboc naugb gin touwero.

⁴Doba emen emeic ariloboc areg Allah eic dou emen naugb gin dous. Dangga hang, lusud meren geicara dag los es medam dougwo emen terimda. Doba Allah men ariloboc gini dag sidgwa naugb sug emen emoho emainesa gin namcir. Dara ousa emen naugb sug emen emaiyan mer areibahau augwan mor mor toua.

⁵Dara gembala areibahau gin, kaba, len lob sogo maga dougwo lusud aimo dau len merdoc agas. Dauntoba len lemecinaga areg asesa Allah enin medoc touwero. Doba Allah men ariloboc gin, kaba, edeinyum naugb sug emen emagririj sogo maga augwan dau len. Hanoba emen emeigdoc meren gauwamara, dauntoba len laimo areg asesa Krisdus enin medoc mes toua terimda.

⁶Sug Allah eic goubesa dag gin dou emenohob, kaba, yen yemesbes an emen toua deitero. Doba yen yaimo areg emen emarougb yen an ginohob augwan deigeigouhw namcir. Anai sug emen emedebeij yenohob, hanoba gareg dau yen en edreg emen emir terimda, kaba, emen emesedeb emen emdoc mes naugb sug emen emeic gogom medam dou en toua.

⁷Dangga hang, sug yen yemogod ara ara eisaugb emen, kaba, yen yemaimo dau areg yen yeiya se emen emaga ginlo. Doba yen yaimo areg se geica an emen dous. Anai sug sud hom dau yen en eimiman enin moho deseino yen dag Krisdus eigdoumesa en moho naugb en esai en mer dou lusudohob, kaba, eigouhw naugb sud hom gin, kaba, en ecinaga dag Krisdus emeigdoumesa enin moho naugb gin dousero. Doba Krisdus eigdoumesa emen emoho naugb sug emen emesai en moro dou lusud touohob.

⁸Hanoba en eic enin men goubesa debin gin dou emen touohob. Doba men goubesa areg en eic dou emen gin, kaba, naugb sug emen emaic mor mor dou yenero. Doba naugb sug emen emousa yen. Dauntoba yen yeiji dag lusud mos se Krisdus dous. Dan decinaga dag dan deimiman dan indoho an goubesa areg maman Adehsud eic dou dan edreg gurereito dou yen sug nosohob. Doba dan decinaga dag augwan gini misen namcir, hang emeic igdebes dou dan touwero.

⁹Dan dens dau indan goubesa gin dou yen. Dauntoba yen yecinaga dau sug dan dog se indan surad gini dag dan deic gogom dou yen, kaba, dag dan demeic gemahau dou yen dousero. Doba indan goubesa inggebga naugb dan deic gogom augwan gini dag misen dou yen toua.

¹⁰Anai ligbum dau yen, kaba, len lesbes an danohob, lendagai: Sug Paulus og surad deinaugb maman, kaba, en og dara mer goubesa dou maman. Dara men surad augwan, kaba, mougb ogum naugb en ogod maman mamdoc mes ahau namcir toua. Doba sug en eigtou desij maman naugb en enara se enin mer dou maman, kaba, en enara dag sud hom gobob deisara dou maman dous. Dara men geicara augwan, kaba, dag sud hom ogonten deseino maman toua terimda.

¹¹Dan douwan naugb len gin, kaba, len lemauwam an didi deitero. Doba len merdoc eica dag areg emen emog se emen surad dou yen sug emen emeigtou aigusi dau yen gin, kaba, emen emaimo augwan gini an yen dag misen an yen sug emen emugwengga desij yen toua deit.

¹²Anai emen ememeic emus naugb sug emen emeigdoumesa emenin emoho, dauntoba emen emoho agas, aninim dag ligbum gedig len leigdoumesa lenin meroho an meren geicara deseino lusud. Dara emen ememeic meren geicara naugb sug emen ememainyen emen geicara touwero. Doba cinogo dara lusud areg Allah ens dou emenohob naugb sug emen emesai en moro dou len, kaba, emen emaimo ucina gini an len dous. Anai len gin, kaba, len lemeic areg Allah enin ouwan naugb len lemainyen lenin se meren geicara ginero. Doba len leic lenin meren gauwamara, hanoba len leic gin eng naugb len lainyen lenin. Dauntoba len lecinaga dag meren geicara geigouhw edeinyumohobei? Era narobmei? Hang meren geicara gin, kaba, aninim dag leng meru edgom meren geicara toua namcirohob.

¹³Doba emen, kaba, emen emedreg dau hancob areg Allah ens dou emen naugb sug emen emeicara se ginero. Doba emen emaimo gin dous. Dara hancob areg en ogugwo dou emen, kaba, edebeij yen se cinogo Korintus gin touohob.

¹⁴Dangga hang, sug emen emesai Mer Geigouhw eisaugb Krisdus dou yen sug nosa, kaba, emen ememedreg dau areg asesa Allah enin medoc mes touwero. Doba emen emaimo augwan gini dag misen namcirohob. Anai en emogugwo yen se gembala gus gus len merisirero. Doba sug aimougtut, kaba, en ogugwo yen se emenin emsira dous.

¹⁵Dara emen ememeigdoumesa emenin emoho an len gus meren geicara dag emenin emen geicara, aninim dag len gin touwero. Doba emen emeigdoumesa emen emoho an emenin emen geicara, aimo dau ucina areg Allah ogod deinaugb emenohob naugb sug emen emaimo gin dous. Dangga hang, emen emod emina debsa Allah. Dauntoba sug emen emedebeij yen deit, kaba, dag en ousa emen naugb sug emen emesma mera einyana edreg dau nosa dou yen toua. Dauntoba sug yen meigdoc ebdebin an Krisdus dag lusud mosohob, kaba, en esa emen dig cinogo gus naugb emen emesai Mer Geigouhw eisaugb Krisdus dou len toua deit, aimo dau cinogo areg Allah ogod an deinaugb emen touohob.

¹⁶Anai emen ememouwan naugb sug emen emeigdoumesa emenin emoho an len gus meren geicara dag emenin, aninim dag ligbum se meijen gusi ingga touwero. Doba emen emouwan naugb sug emen emesai Krisdus moro se cinogo sug lusud gus lemesai en mer dou lenbuma, gin dous.

¹⁷Augwan gini aimo dau areg sud hom en og deb se Surad Injil Meb Mohon deb sug nosa touohob, endagai: Gareg en ouwan eigdoumesa enin moho an ara ara, kaba, eigouhw naugb en eigdoumesa enin moho an maman Adehsud men geicara geb dou en dous.

¹⁸Anai sud hom areg en eigdoumesa enin moho an men geicara, kaba, maman Adehsud emeigdoumesa en moho touwero. Doba en eigdoumesa sud hom areg en medoc eigouhw an men geicara ginohob en dous.