Read Manikion KORINTUS HWAI 13 Bible Online

KORINTUS HWAI 13 - Manikion bible

KORINTUS HWAI 13

¹Doba Surad Injil Meb Mohon enara, endagai: Sug lahwai era merug homoi len louma debin sud hom men aremer ginohob, kaba, edeinyum naugb sug lusud logod gogom deinaugb en toua. Dangga hang, dan desulou yeng yebesesar dau mohonohob, dara yeng yebesesar menenau gini yen yaugwan dara goubesa namcir, dag dan demamsoho yen deitero. Doba sug dan dedebeij yen, hanoba yen yemarges dau meijen sesar touwero, kaba, dan dogod gogom medam deinaugb yen yaugwan toua namcir. Anai sug dan dedebeij yen mougwa hom gin, kaba, aninim dag mougwa cumoi enggohob. Dan desulou yen dangga sug dan dedebeij yen mougwa cuhwai sug nosohob. Dara iteitogin, kaba, dan desulou yen dag gin deit sug dan deigtou aigusi dau yenaba.

³Anai yen yagodgod dan naugb dan deic gansins dou yen, dauntoba yen yecinaga dag Krisdus eigdoumesa dan indoho dag misenohob. Hang dan demesai en moro gin dou yen toua. Dangga se lona sug en ogod gogom deinaugb yen ogdoc dan icira meijen sesar gin, kaba, yen yeiya dag en emomomtom dou yen touwero. Doba en mobisamougb namcir naugb en eic gogom medam dou yen toua.

⁴Anai sug lusud letob en se sogo salib sug nosa, kaba, en owun enin medoc mes arjaga dag en maga omomtom namcir deseino len toua. Doba en maireseb menau gini, kaba, ogdoc Allah men goubesa dous. Dangga hang, emen gedig emen emesai Krisdus moro dou lusud, kaba, emen emowun emenin emdoc mes arjaga dag emen emaga omomtom deseino lusud aninim dara en. Anai emen emdoc dag hom dara enohob. Doba emen toua sug emen emogod gogom deinaugb yen an meijen sesar, kaba, emen emaimo Allah men goubesa an yen. Anai emen dag hom dara Krisdus se en maireseb menau gin touohob.

⁵Dangga hang, eigouhw naugb yen yeiyahaiya dara yen yogmac yenin meigdoc mes debinbin toua terimda. Dauntoba yen yecinaga dag yen meigdoc ebdebin an Krisdus dag misenohobei? Era yen yedag Krisden areibahau dousei? Anai sug yen yedag Krisden misenohob, kaba, Krisdus einesa yen meigdoc mes. Hang ens ainyes dou yen dag yen yedag Krisden misen touohob. Doba sug yen yedag Krisden areibahau dous, kaba, en emeigtou se yen meigdoc mes touebma. Yen yemecinaga dau augwan gini dag misenbumei? Naro, yen yecinaga augwan gini dag misen namcirohob.

⁶Doba eisaugb emenin, kaba, dan decinaga dau sug emen emedebeij yenohob, kaba, dag yen yeiya, doba emen emedag gembala misen dous. Anai emen emens dau Allah men goubesa dou yen toua.

⁷Doba sug emen emens eminin dag gembala misen ogdoc Allah men goubesa dou yen. Era sug lusud lowun emen emoho dag gembala areibahau ogdoc sug emen emamsoho dau men goubesa an yen toua, kaba, augwan gini emesloulougwero. Doba areg esloulougb, kaba, dag yen yaimo areg asesa Allah enin medoc mes an gin terimda. Hang dan docuncum dou Allah, dauntoba yen yemaimo meijen sesar deitero. Doba yen yarges dau augwan gin deb namcir.

⁸Anai Allah emeic men goubesa dou emen naugb sug emen ememedag sogo maga dougwo lusud sug len laimo areg se geica ginero. Doba naugb sug emen emousa len icira sug len laimo ucina se geica gin terimda dous.

⁹Dangga sug lusud leigdoumesa yen meijoho dag meijubisamougb, anai yen yaimo areg asesa Allah enin medoc mes gin terimdohob. Era sug len lowun emen emoho dag emomomtom dous. Anai emen emens dau Allah men goubesa dou lenero, kaba, augwan gini inggaida. Doba sug yen yaimo areg asesa Allah enin medoc mes dag gin, kaba, emen emdoc eigouhw an gin namcir. Hang emen ememarges dau sug emen emocuncum dou Allah naugb yen touwero. Doba emen emocuncum dou en, dauntoba yen yeiji dag lusud mos se Krisdus esesa terimda toua.

¹⁰Dan dog dau sug yen yobsara dau meijen sesar dag graga dou yen, dauntoba sug dan dedebeij yen, kaba, dan demaimo maman Adehsud men goubesa areg en eic dou danohob augwan an yen touwero. Doba dan damsoho yen namcir. Anai en emeic men goubesa gin dou dan naugb sug dan daic gogom dou yenero. Doba en eic men goubesa gini dou dan naugb dan dausa yen. Dauntoba yen yeiji dag lusud mos se Krisdus dous.

¹¹Dan indagunerij, dara dan indamouwerij, sug dan dog surad gini sug ouwedoc, kaba, dan dou yen yaugwan meijiresou toua. Dangga hang, yen yemohoiya dan indir an areg dan desulou yen an se indan surad gin touwero. Doba yen yeic meijuwemougb esesa naugb yen yogod meijen aremer augwan ouwa dau yen namcir. Hanoba yen yaigdougwo meijen aremer gin daum toua terimda, dauntoba yen meigdoc emedregim deitero. Doba se aremer augwan, kaba, yen meigdoc anim ucucugb dous. Anai sug yen yeicara dag gin, kaba, Allah en toua moongga desij yen. Hanoba en medoc gororougb yen dara en eseyeiyo yen dougwo areg gecgu augwan toua namcir.

¹²Dara sug yen youcimdeb, kaba, yen you meijufesem dara yen meigdoc ecabeci anim terimda. Allah men lusud sugini len laugwan lou yen toua.

¹³Dan dacgeij maman Adehsud Yesus Krisdus naugb en medoc an yen. Hanoba dan dacgeij Allah naugb en medoc gororougb yen. Dara dan dacgeij Mena Gogoufu naugb en ousa yen se aremer augwan toua terimda.