Read Manikion KORINTUS HWAI 6 Bible Online

KORINTUS HWAI 6 - Manikion bible

KORINTUS HWAI 6

¹Sug emen emousa Allah naugb sug emen emesai en Mer Geigouhw eisaugb Krisdus dou lusud dag gin, kaba, emen ememarges dau sug emen emesulou yen ucucugb touwero. Doba emen emeicara dag gin dou yen terimda, dauntoba yen yemamsoho geigouhw areg Allah eic dou yenohob augwan gin deb touwero. Doba yen yecgun meisira debin gin naugb yen yera mera einyana toua. Anai en medoc an yen namcirohob.

²Augwan gini aimo dau areg Allah en enara dou yen se Surad Injil Meb Mohon deb sug nosa touohob, endagai: Sug lona edagasa naugb dan indoc eigouhw an yen, kaba, dan douman yen meijir an areg yen yacgeij dau dan. Dara sug lona edebeij naugb sug dan deigdoc yen dau meijen gogom, kaba, dan dousa yen touohob. Yen youman areg Allah enara debohob gin augwan deigeigouhwahabi. Anai lona naugb sug en medoc eigouhw an yen, kaba, edagasa. Dara lona naugb sug en eigdoc yen dau sesar men gogom augwan, kaba, edebeij namcir touohob.

³Sug emen emedag Allah men sogougb dag ginohob, kaba, emen emeic emouwemougb esesa, dauntoba lusud lemowun emen emoho an aremer homero. Doba len leigdoumesa emen emoho se aremer augwan toua terimda. Anai emen ememouwan naugb sug emen geicara hom edag sogo maga dougwo len aud Krisdus touwero. Doba emen geicara augwan eic len merdoc eiloboro aud en dous. Dangga hang, sug lusud leic mog erij dara len leigdoumesa gogom debin emen, hanoba len loho aremer einyana debin emen.

⁵Era sug len labosbos emen dara len louf emen se tu gesisug, era len lebara eijideijo debin emen icira sug emen emesai Allah mer eisaugb Krisdus dou len, kaba, emen ememobsara dau emen geicara gin touwero. Doba emen emaiyan emdocesem naugb sug emen emeicara emaimo dag gin terimda. Dauntoba sug lusud len leiya gin, kaba, len lecinaga dag emen ememedag gembala areibahauero. Doba emen emedag Allah men sogougb dag misen namcirohob. Dara sug emen emesai Allah en mer gini dou lusud, kaba, cicir dara sireba emen icira gin mougwa einyana touohob. Anai emen ememarges dau gin touwero. Doba emen emeic emen emug erij naugb gin terimda. Hang emedeinyum naugb sug emen ematou debin emen emug se loba touwero. Doba emen emaimo emen geicara gini naugb lona loba namcir.

⁶Dara emen ememaimo ucina gecgu hom an len touwero. Doba se emen geicara augwan, kaba, emen emaimo ucina gecabeci dara gedag beim an len dous. Dara sug lusud lenara gouji dou emen, kaba, emen emdoc mogmog an len touwero. Doba emen emeigtou emateteij len an meren geicara. Hanoba emen emauni areg geigouhw dou len dous. Dauntoba sug len leiya dau gin, kaba, len lecinaga dag emen emdoc gororougb len dara emen emirs dousero, doba emen emdoc gororougb len dag misen namcirohob. Dara sug emen emedidib meijouhw eisaugb Krisdus asesa dou len, kaba, Mena Gogoufu eic ganusbus bauma debin areg emen emebedbed gini dou len toua. Dauntoba sug len leiya, doba emen emu ouforoho naugb emen emecinaga meijouhw augwan asesohob, kaba, len lecinaga emen emedag Allah men sogougb misenohob.

⁷Hang emen ememebedbed areg dag mer areibahau dou len touwero. Doba emen emesai areg se geica dou len dous. Hanoba emen emaimo areg asesa Allah enin medoc mes augwan an len. Anai emen geicara gin, kaba, dag krawan mec dara kebtemaga gedig sud hom os se en mesira misen dara metigi naugb en esara dara men moc toua. Dara emen emens dau Allah men goubesa debin areg emen emesai dou len gin toua. Dauntoba len lecinaga dag Allah enin men lusud emenohob.

⁸Dangga sug lusud leigdoumesa emen emoho, era len lowun emen emoho. Dara len louma debin emen, era len lecic emen emoho gouhw genes. Era sug len lesbesan emen dag emen emaugwohosa lusud naugb len laijahasero, kaba, emen emarges dau areg misen ginero. Doba emen emesai mer misen gin dou lusud terimda.

⁹Dara lusud lowun emen emoho toua dag sogougb. Doba emen emoho, kaba, agaha becinten dou lusud laugwanohob. Dara len leic mog erij medam dou emen. Doba meren goubesa emedeinyum naugb sug len leic gomom dou emen touwero. Dangga emen emaimo ucina aud gomom mougwa einyanohob. Doba yen yeiya emen emina agau namcir.

¹⁰Hang meren geicara, kaba, eic momogo dou emen toua namcir. Doba emen ememarges dau sug emen emagahugouhw an Allah touwero. Dara emen emedag leng merunggwereij. Doba emen gebedbed gin, kaba, eic dag leinyana merisoho mougb icira ginohob. Dara se cinogo gin, kaba, emen aremougb hom touwero. Doba se bogo, kaba, augwan eb naugb emenohob. Se aremer augwan gin, kaba, emen emens emenin ainyes dou yen dag emen emedag gembala areibahau touwero. Doba emen emedag Allah men gembala dag misenohob.

¹¹Yeng Korintus, emen emens dau areg geb se emen emdoc mes augwan dou yen. Dauntoba yen yecinaga dag emen emdoc emarges dau yenero. Doba emen emdoc gororougb yen namciraba.

¹²Sug emen emens emen emdoc mes dag gini dou yenohob, kaba, yen yemog yen meigdoc mes gurereito dou emen touwero. Doba yen yens yen meigdoc mes augwan ainyes dou emen dag yen meigdoc gororougb emen toua namcir. Anai emen, kaba, emen emouf misis dougwo yenero. Doba yen yenin eng youf misis dougwo emen naugb sug yen meigdoc gororougb emen deiterohob. Dan denara dag gini dou yen, anai dan deija yen dag dan indihir yen misenohob.

¹⁴Sug dan dedag yen meijina dag ginohob, kaba, dan den dougwo yen, dauntoba yen yemaimo leng medigo Yesus se meren geicara augwan toua deitero. Doba yen yasid yenin dau len namcir. Anai sud hom areg en aimo areg asesa Allah enin medoc mesohob. Dara sud hom areg en edreg dau Allah en mer gin terimdaba, kaba, lan mardoc dag hom se maran geicara ginei? Naro, lan mardoc aninim se maran geicara gin touwero. Era dagiro, eisaugb sud hom areg en einesa moufohob, dara sud hom areg en eigtou se lobeigbogaba, kaba, lan toua laigtou desijimei? Naro, lan lemeigtou desijim touwero.

¹⁵Era dagiro eisaugb Krisdus dara Bilis lan gina? Lan gin toua mardoc dag homei? Naro, lan mardoc dag hom touwero. Era dagiro eisaugb leng merdoc ebdebin an Krisdus dara leng medigo Yesus len gina? Len gini toua leraga ucina homei? Naro, len lemaimo ucina hom touwero, doba meren ucina edregim namcir.

¹⁶Era dagiro, eisaugb Allah men tuari, dara seiseij men tuaria? Hwas toua aninimei? Naro, hwas aninimero. Dangga hang, yen yemaimo leng medigo Yesus deitlo. Doba yen yasid yenin dau len namcir. Anai mamanin dous eng madag Allah gedig en maireseb huhugb teiteiyohob men tuari misen gini. Augwan gini esogwa deisa areg Allah enara deb dou sud hom gesai en moro sug nosa, moho Hiskia, se Surad Injil Meb Mohon deb sug nosa touohob, endagai: Dan desedeb naugb dan demen aud len. Dara dan deigtou desij len. Hanoba dan dedag meren Allah. Dara len ledag indan lusud toua terimda.

¹⁷Dangga hang, maman Adehsud Gedig En Mobisamougb namcir, kaba, en arougb maman an gini se Surad Injil Meb Mohon deb sug nosa touohob, endagai: Yen yemeigtou desij leng lecguna dou seiseij. Dara yen yemaimo len aud areg geic gogor dou yen toua deitero. Doba yen yasid yenin dau augwan gin namcir.

¹⁸Anai sug yen yeicara dag gin, kaba, dan debin yen deit. Hanoba dan dedag yen Meijina. Dara yen yedag dan indisir dara dan indihider yen toua terimda.