Read Manikion KORINTUS HWAI 9 Bible Online

KORINTUS HWAI 9 - Manikion bible

KORINTUS HWAI 9

¹Sug dan desulou yen eisaugb aregoufu naugb Allah men lusud se Yudea dag graga bedeinyumohob, kaba, dan demog eisaugb aremer gin dou yen deitero. Doba dan darges dan indir dau namcir.

²Anai dan decinaga dag yen meigdoc erleij naugb yen yousa leng sireber se Yudea dau sug aimougtut. Hang dan deimiman yen an gin dou leng Krisden se leng Makedonia meren hancob sugin touohob, endagai: Leng Krisden se leng Akaya meren hancob, kaba, len lesedeb merdoc mes se arisogomoc gragacinohob naugb sug len lousa leng sireber se Yudea toua. Dangga hang, sug leng Krisden sugin len louman dau gin, kaba, eic dag len toua laseseijim namcir.

³Doba dan desa Titus dara maman mamaguna lahwai graga len leino dan indin aud yen naugb len lousa yen sug yen yesedeb aregoufu gini. Dauntoba areg emen emeimiman yen an dou leng Krisden suginohob, kaba, augwan dag areg emen ememenara augwougb dou len touwero. Doba esogwa deisa dag emen emen dou len gin toua namcir.

⁴Anai sug merug hosa dau leng Makedonia len laicira dan aud yen. Hanoba len leiya, doba yen yemesedeb aregoufu naugb leng se Yudea augwan debbuma, kaba, meijen geicara gini eic igdebes dou emen namcir. Anai dan deimiman yen an gini deseino len laugwanohob. Dara emeic igdebes dou emen dousero. Doba eic igdebes dou yen toua. Doba dan demenara dau gini dou yenero. Anai yenin yecinaga dau ginohob.

⁵Dangga hang, sug dan dogod se dan indoc mes debohob. Doba esloulougb medam naugb yen youci aregoufu augwan debinim deb nosa touahabi, kaba, dan desulou Titus an maman mamaguna lahwai graga naugb len leino dan indin aud yen. Hanoba len lousa yen an aregoufu graga, dauntoba areg yen meigdoc edugsa gin deb sug nosohob, kaba, yen youci augwan gini terimda edebeij sug ouwedoc toua. Dauntoba sug dan dedebeij yen, kaba, yen yemehilon aregoufu deitero. Doba yen yesedeb augwan meij mogudohob. Anai sug yen yeicara dag gin, kaba, gini ens ainyes dou lusud dag yen youci augwan gini dau sug dan demagodgod yen an touero. Doba aimo dau areg yen meigdoc erleij naugb gin dous.

⁶Areg dan desulou yen an graga, kaba, men meijouhw dag gini: Gareg en eic ara ara dou lusud, doba dau sug len gus lagodgod en an, kaba, gini dag en eic gurereito dous. Doba gareg en eic ara ara dou lusud dara en medoc erera, kaba, gini dag en mesira emakebin ingma debero. Doba en eic einyana dou lusud toua. Anai en ogod dangga se enin medoc mes sug nosohob. Augwan gini aimo dau maman aremeijouhw dangga touohob. Anai mer gini esulou maman dau sug maman maba meij gurereito, kaba, maman mac mera gurereito. Doba sug maman maba meij einyana, kaba, maman mac mera einyana toua.

⁷Dangga hang, sug yen youci meijen aregoufu naugb leng se Yudea, kaba, yen yemeic aregoufu dara yen meigdoc momogo, dara yen yemoudesa dag emen emagodgod yen an touwero. Doba yen yeic aregoufu gini dara yen meigdoc esgiraha an dous, aimo dau areg astesda sud hom yom dau yen en ogod se enin medoc mes naugb ginohob. Anai sug yen yeic aregoufu dara yen meigdoc esgiraha dag gin, kaba, Allah medoc agahugouhw an yen icira gini toua terimda.

⁸Dara men goubesa edeinyum naugb sug en eic ara ara bedreg medam dou yen toua. Dauntoba meijen ara ara gini emedeinyum naugb yen dousero. Doba edeinyum beiseisaugb namcir naugb sug yen yaimo ucina geigouhw dara edag beim an lusud se aremer augwan toua terimda.

⁹Anai sug Allah eic meij edeinyum dou lusud naugb sug len leba, hanoba en eic ared edeinyum dou len naugb sug len let astesda lona terimda toua, kaba, en eic meij edeinyum dou yen naugb sug yen yeba an len gus. Hanoba en ousa yen naugb yen yera mera geigouhw einyana gougwa an len toua terimda. Augwan gini aimo dau areg sud hom gerba Ugwaremer en og deb se Surad Injil Meb Mohon deb sug nosa touohob, endagai: Gareg en aimo areg asesa Allah enin medoc mes, kaba, en emecgun mesira debin men aremougb touwero. Doba en agaha en mesira an dou len gus dara en ousa len merunggwereij toua. Hanoba en emarges dau gin touwero, doba en eicara baimo dangga esesa an len toua terimda.

¹¹Sug Allah men goubesa edeinyum naugb sug en eic ara ara einyana gougwa dou yen dag ginohob, kaba, yen yemarges dau sug yen yagaha meisira an dou leng sireber se Yudea touwero. Doba yen yeicara yaimo dangga an len terimda. Dauntoba sug emen emeic einyana gini dou len, kaba, aic len merdoc mes naugb len len sijo medam dou Allah icira gin toua.

¹²Anai meijen geicara geigouhw gin, kaba, emousa len an areg emebdebin len dousero. Doba arautut len merdoc mes naugb len lagahugouhw an Allah icira areg yen yagaha aibibra dou len eiseisaugb namcir toua.

¹³Dara ens ainyes dou len dag yen yemos yemadi Mer Geigouhw eisaugb Krisdus deseino lusud dousero. Doba sug len leiya dag yen yagaha meisira an meijen aremougb dou len dara len gus laugwan dag ginohob, kaba, ens ainyes dou len dag yen yaimo Mer Geigouhw gini se meijen geicara augwan touohob.

¹⁴Hang len merdoc esesa an yen, kaba, len locuncum dou Allah naugb en eic geigouhw dou yen. Dara len leigdoumesa en moho an gin toua terimda. Anai sug len leiya dau meijen geicara gin, kaba, len lecinaga dag Allah medoc eigouhw an yen eiseisaugb namcir touohob.

¹⁵Dangga hang, maman mamarges dau sug maman man sijo dou Allah naugb areg en eic dou maman ogdoc Krisdus gin touwero. Doba maman maicara maimo dangga esesa terimda toua. Anai areg en eic dou maman ginohob, kaba, mera eisaugb medam edreg dau areg maman mamu edeinyum naugb sug maman macic toua namcir.