Read Manikion GALATIA 1 Bible Online

GALATIA 1 - Manikion bible

GALATIA 1

¹Surad gini dau dang, Paulus, gedig dan desai Mer Geigouhw eisaugb Krisdus dou lusud. Dara lusud misen, kaba, len lemouci dan. Hanoba len lemeigdoumesa dan indoho naugb gin touwero. Doba Yesus Krisdus dara maman Mamina Allah gedig en eigdoumesa Krisdus dau gomom ucugwohob, kaba, lan eng laigdoumesa dan indoho naugb gin dous.

²Dara leng Krisden gedig len leigtou desij dan sugini, kaba, len laugwan lou yeng se goucimdeb se leng Galatia meren hancob yen yaugwan toua.

³Hang emen emaugwan emacgeij maman Mamina Allah dara maman Adehsud Yesus Krisdus naugb lan laic geigouhw dou yen, dara lan laseyeiyo yen dougwo areg gecgu augwan toua terimda.

⁴Anai Krisdus gin, kaba, en eic enin mogwihi ancoho aga maman dou maman Mamina Allah naugb maman sesarohob. Dauntoba maman mamaimo lusud gedig Bilis oiharaga len se cinogo gini aud meren geicara gecgu toua deitero. Doba maman marges dau augwan gini namcir, aimo dau areg maman Mamina Allah ogod an deb naugb en sug nosohob.

⁵Dangga hang, eigouhw naugb maman maugwan magahugouhw an Allah beb huhugb terimda. Augwan gini asesa dag misen namcir.

⁶Dan deimiman dau yen namcir, anai Krisdus, kaba, en medoc an yen naugb en eic en maga bauwaharo aga yen dou Allah naugb meijen sesar. Hang Allah eija yen aud en naugb en eigdoc yen dau sesar men gogom augwan aud maireseb menau geb huhugb ginohob. Doba yen, kaba, yen yeineg dau en dedemeda deit. Hanoba yen yaimo areg lusud leigdoumesa dag mer geigouhw susugb eisaugb Krisdus gin touohob.

⁷Dobnaro. Mer geigouhw gus, kaba, ingmaro, doba hom dous. Dan denara dangga dou yen, anai lusud gedig len louwan lauti mer geigouhw eisaugb Krisdus gini didi dou yen, kaba, len merugwengga desij yenohob. Dangga hang, emeic dag yen meigdoc emebdebin an Krisdus dag nosa toua deitero. Doba eic dag yen yeija meijuwesa areg emen emesai dou yen augwan toua deitohob.

⁸Doba gareg en esai mer geigouhw eisaugb Krisdus ingma susugb dau areg emen emesai dou yen sug nosohob, kaba, dan dacgeij Allah naugb en eic mor mor dou en se dum smougb namcir. Dangga toua, sug emen, era malaikad hom dau bogo, emen toua emesai mer geigouhw eisaugb Krisdus ingma susugb dau areg emen emesai dou yen sug nosohob, kaba, dan dacgeij Allah naugb en eic mor mor dou emen se dum smougb aninim dag len ingga toua.

⁹Emen emenara dag gin dou yen sug nosohob. Doba iteitogin, kaba, dan douma debin gin dou yen toua deit, dendagai: Gareg en esai mer geigouhw eisaugb Krisdus ingma susugb dau Mer Geigouhw eisaugb Krisdus areg yen yebin sug nosohob, kaba, dan dacgeij Allah naugb en eic mor mor dou en se dum smougb namcir.

¹⁰Dangga areg dan den dou yen graga, kaba, gini ansins dag dan douwan naugb lusud leigdoumesa dan indoho, dara len merdoc eigouhw an dan touei? Era dagiro? Naro, dan demainyen danggero. Doba dan douwan naugb Allah enin eng eigdoumesa dan indoho, dara en medoc eigouhw an dan dous. Anai sug dan dainyen naugb deic lusud merdoc esgiraha an dan, kaba, dan demedag Krisdus men sogougb toua deitero. Doba dan dobsara dau gin namcirohob.

¹¹Dan indagunerij, dara dan indamouwerij, dan douwan naugb yen yecinaga dag Mer Geigouhw eisaugb Krisdus areg dan desai dou lusud gin, kaba, emen dau lusud misen merdoc mes. Hang len lemeic dou dan. Dara len lemedidib meijouhw dau augwan gini dou dan touwero. Doba Yesus Krisdus enin eng ens dau augwan gini dou dan dous.

¹³Areg graga augwan, kaba, se misen namcir. Anai yen yecinaga dau sug dan daimo emeng Yahudi emen gomnomna sug nosa, kaba, dag dan demeisan gurog dau gin touwero. Doba dan deic induwemougb esesa naugb dan daimo emen gomnomna gini edreg dau dan insir gus len laugwan. Anai dan indoc ehin gunini icira emen emjemouwer meren gomnomna gin namcirohob. Dangga sug dan daimo emen gomnomna dara dan indoc augwan dag ginohob, kaba, dan indoc emeigouhw an Allah men lusud dau leng Krisden touwero. Doba dan dehilon ucina terimda naugb sug dan deic mog erij dara mor mor dou len laugwan. Anai dan indoc esrougb an len medamohob.

¹⁵Doba Allah medoc eineg an dan. Hang en emens en Meisi mohora hom gini dou dan naugb dan decinaga areg asesa enin medoc mes augwan dag misen namcir. Hanoba en eija dan dara en eigdoumesa dan indoho naugb dan desai Mer Geigouhw eisaugb en Meisi gini dou lusud laugwan toua. Anai sug dan demesogwen dau dan indim mohorabuma, kaba, en ouci dan teitei naugb ginohob. Dangga sug Allah ens en Meisi ainyes dou dan dag ginohob, kaba, dan demeija sud hom ingma naugb sug en ens aremeijouhw ara ara hom dou dan. Dara dan demeisaugb dig Yerusalem naugb dan demdehilon aremeijouhw dau merug sisa hobjerai gedig len lesai Krisdus moro nosohob len touwero. Doba dan deihwededau cinogo Damsig aud leng Arabia meren hancob naugb dan dedeigtou dou danin sungga. Hanoba dan decicugb se cinogo Damsig ucugb toua deit.

¹⁸Arisogomoc homoi debin gin, kaba, dan deisaugb dig Yerusalem naugb dan dedens dan indug dou Kepas. Hanoba dan datou desij en sungga se lona sorama toua.

¹⁹Doba dau merug sisa hobjerai gus, kaba, dan demeiya lenero. Doba dan deiya maman Adehsud magto Yakobus hom dous eng desij Kepas.

²⁰Areg dan dog dou yen gin, kaba, dag dan demereiyara dou yen touwero. Doba Allah ecinaga dag augwan gin, kaba, se geica namcir.

²¹Dangga sug dan datou desij Kepas se lona sorama ginohob, kaba, dan deihwededau en dig leng Siria dara Kilikia meren hancob deitda naugb dan desai Mer Geigouhw eisaugb Krisdus dou len toua.

²²Anai se lona sug dan dedebeij Petrus gin, kaba, Allah men goucimdeb se leng Yudea meren hancob len laugwan lemeiya dan indibes mougwa hom touebma.

²³Doba len louman dag dan demeic mog erij dara mor mor dou len dag nosa deitero, doba dan darges dau gin namcirohob. Hanoba dan desai areg len merdoc ebdebin an gini dou lusud laugwan toua.

²⁴Dangga hang, sug len lecinaga dag areg len louman gini, doba dag misenohob, kaba, len lagahugouhw an Allah an dan terimda.