Read Manikion GALATIA 4 Bible Online

GALATIA 4 - Manikion bible

GALATIA 4

¹Dangga areg dan den dou yen graga, kaba, men meijouhw dag gini: Sug mena ecug mecigbougb deb dodo en meis mebinohob, doba sug en edag godehaba, kaba, lusud gus lesedougwo en. Hanoba len laresbes en edebeij lona sug mena medoc agug deb naugb enahabi, mena emeic augwan dou en toua. Dangga hang, mecigbougb augwan gin, kaba, en men namcirohob. Doba sug en edag godeh dag ginaba, kaba, len lowun en moho dag sogougb dous.

³Augwan gini aninim dag maman touohob. Anai sug nosa, kaba, maman toua mamedag sudbuma, doba maman madag lugdehaba. Dangga hang, se lona ingga, kaba, mecigbougb areg Allah esedeb naugb mamanohob, kaba, en emeic dou maman touebma. Doba merna mog mog gedig len loiharaga lusud se cinogo gin, kaba, len laresbes maman aud ara ara terimda, anai maman madag sogougb dou lenaba.

⁴Doba sug cumougt edagasohob, kaba, Allah esa enin Meisi mohora hom naugb en ouwaden dau bogo se cinogo gini. Dara sug en ouwaden gin, kaba, en emedag merna touwero. Doba mem ouwadan en dag lusud misen. Dangga sug mem ouwadan enohob, kaba, en emedreg Allah men gomnomna mougwa hom touwero. Doba en owun enin medoc mes arjaga naugb en aimo augwan gini an maman toua terimda. Dauntoba maman mamedag gomnomna men sogougb deitero. Doba Allah eigdoumesa maman dag en mogwihi mogo maman ucugb deit. Anai sug en eic en maga ancoho aga maman dou Allah naugb maman sesar dag ginohob, kaba, en eigdoc maman dau gomnomna men gogom toua namcir.

⁵

⁶Sug yen yedag Allah mogwihi mogo misen dag ginohob, kaba, en esa Mena Gogoufu ogdoc en Meisi gini bansins se yen meigdoc mes toua. Hanoba en arautut maman naugb maman magahugouhw an Allah dag maman Mamina gedig maman mamdoc gororougb en toua namcir.

⁷Dangga hang, Allah men mecigbougb areg en esedeb naugb en mehir yenohob, kaba, en emerses dau yen touwero, doba en obdeb naugb yen terimda. Anai yen yemedag sogougb dou merna mog mog dara Musa men gomnomna gin deitero. Doba yen yedag Allah mogwihi mogo yen dag misen namcirohob.

⁸Dara sug nosa, kaba, yen yemecinaga areg asesa Allah misen enin medoc mes augwan dag misenbuma. Doba yen yedag len gedig lusud leigdoumesa len meroho dag Allah misen meren sogougb naugb yen yaimo len aud areg len larougb yen an gin toua terimda. Dobnaro. Len laugwan lemedag Allah misen teiteiyero. Doba len ledag merna mog dous.

⁹Doba iteitogin, kaba, yen yecinaga areg asesa Allah enin medoc mes augwan dag misen namcirohob. Era eigouhw edreg, kaba, dan denara dou yen dag Allah enin ecinaga yen yaugwan dag misen touohob. Dangga dagiro, naugwe hang, yen youwan yeineg dau en naugb yen yedag sogougb dou merna mog mog gedig len loiharaga lusud se cinogo gin deita? Anai len, kaba, len lemedag Allah misenero, doba len ledag merna dous. Hang meren goubesa emedeinyum naugb sug len lemeic ara ara dou yen touwero. Doba len lomomtom namcir.

¹⁰Dan dahau dag dan deic dan indug erij icira yen, doba dag augwougb dousei? Anai yen yeigdoumesa lona gouji, dara igda loba, dara cumougt, dara arisogomoc augwan an meren lona naugb yen yesijaresa dara yen yougwan ared debin augwan gini ucugb deitohob.

¹¹

¹²Dangga hang, dan indagunerij, dara dan indamouwerij, dan desulou yen dara goubesa namcir. Dauntoba yen yemedag sogougb naugb yen yaimo merna mog mog dara Musa men gomnomna gin deitero. Doba yen yedag dan naugb yen yarges dau augwan gin namcir, aninim dag dan dedag sud hom dau yeng yugmahara gin touohob. Anai dan demaimo Musa men gomnomna dag nosa toua deitero, doba dan darges dau gin toua terimdohob.

¹³Dan dacgeij yen dag gini, anai yen yemeic gecgu an dan mougwa hom touebma. Doba yen meigdoc eigouhw an dan terimdohob. Anai yen yecinaga dag aimougtut, kaba, dan demesedeb naugb dan desai Krisdus moro dou yenero. Doba sug dan dedebeij se meijen hancob ingga, kaba, areba dan medam gougwa. Hang emeic cumougt dou dan naugb dan demesai Krisdus moro sug aimougtut ingga dou yen toua.

¹⁴Dangga hang, sug areba dan dag gin, kaba, yen yemeigdorus meimeij dara yen yemesdigeij dan touwero. Doba yen yeic meijus naugb yen yagauwesa dan terimda. Hanoba yen yebin dan, aninim dag sug Allah men malaikad, era Yesus Krisdus enin ladebeij yen toua. Anai yen meigdoc agahugouhw medam naugb dan sug dan desai Krisdus moro dou yenohob.

¹⁵Doba iteitogin, kaba, meijen gagahugouhw gini inggiro deitohoba? Era ediyebeiya dau yendohobei? Anai dan decinaga dag sug nosa, kaba, yen yemeija meigdocesa sug yen yeihwa yen meijiresi dauwero. Doba emedag dan demacgeij dau yen, kaba, yen yaimo dan indir an. Hanoba yen yeic dou dan toua.

¹⁶Dangga dagiro, naugwe hang, yen yowun dan indoho aninim dag meijen moca? Anai dan desai areg se geica dou yen danggangei? Era dagiro?

¹⁷Doba yen yesa decicijahabi, anai dan decinaga dau leng Krisden dau leng Yahudi gin, kaba, dag len leic meruwemougb esesa naugb len lenara laineg yen meigdoc mes terimda. Doba meren gauwamara an yen, kaba, ecgu namcir. Anai len louwan lasid yen dau emen, dauntoba yen yemaimo emen aud areg se geica gin touwero. Doba yen yeic meijuwemougb esesa desij len se Musa men gomnomna dous.

¹⁸Doba areg dan den dou yen eisaugb genara gaineg gin, kaba, dag ecgu namcir inggei? Naro. Anai sug sud hom en mou en dou eigouhw an lusud, kaba, ara ingma emeb dougwo gin touwero. Doba en enara baineg len merdoc mes aud gin terimda. Doba areg esloulougb, kaba, aud areg geigouhw dous. Naro, kab, naro. Dangga sug dan indugwengga an yen, era dan indugwero toua, doba sug lusud meru en dou eigouhw an yen, hanoba len lenara laineg yen meigdoc mes, kaba, eic gerleij dou yen naugb yen yaimo len terimda.

¹⁹Dan indihirija, dan indoc erij an yen deit, aninim dag gida sug en ouwadan meh, kaba, en menuhwa mogo erij an en toua. Dara dan demarges dau gin touwero. Doba dan indoc erij an yen terimda Krisdus men maireseb augwan ens ainyes se meijen geicara augwan ucugb deitahabi. Anai yen yobsara dau gin namcirohob.

²⁰Dangga hang, dan indoc esesa an yen terimda naugb dan douwan dedeiya yen sungga iteitogin toua. Dauntoba dan demenara se goubesa dou yen dag nosa deitero. Doba dan denara dara garjaga dou yen dous, kaba, gini eic dag yen yecicugb aud Krisdus enggei? Era naroei? Anai dan demeb ara naugb yen deita?

²¹Sug yen meigdoc erleij naugb yen youwan yaimo Musa men gomnomna naugb sug Allah eic gesgigouhwesa dou yen ucugb, kaba, dagiro, naugwe hang, yen yemouman dau areg Musa men gomnomna ens dou yen ginero? Yen yauni gin ucucugb dou danahabi.

²²Anai men gomnomna gin, kaba, enara, endagai: Abraham, kaba, en meisi lahwai. Laingma, kaba, dau mesouwa men sogougb. Doba laingma, kaba, dau mesouwa sud misen.

²³Dara gida gedag sogougb gin, kaba, en aimo dau areg lusud misen merdoc etrij icirim an dous. Hang en emouwadan meh gini. Doba gida gedig sud misen en meh gin, kaba, emen dau lusud misenero. Doba aimo dau areg Allah enin eng os dou en sug nosohob. Hang en emouwadan en toua.

²⁴Dangga lagida lahwai gin, kaba, aimeh an dag Allah men gos dou hwai geb naugb mamanohob. Gida gedig en mehir dag sogougb gin, kaba, en moho Hagar. Hang eni aimeh an dag Allah men gos dou mohon gedig en eic dou Musa se menmod Torsina sug nosohob. Anai gareg en aimo Allah men gos dou mohon gin, kaba, en toua dag sogougb. Aninim dag Hagar en medebeitor len laugwan, kaba, len ledag sogougb namcir. Anai Hagar enin toua dag sogougb an len teiteiyohob.

²⁵Sug Hagar eni aimeh an menmod Torsina geb se leng Arabia meren hancob dag ginohob, kaba, en toua dag aimeh an Yerusalem geb se cinogo gini an men lusud dau leng Yahudi len laugwan toua. Anai len laugwan gin, kaba, len laimo Allah men gomnomna geic dou Musa se menmod Torsina. Hang len ledag sogougb, anai len ledag Hagar medebeitor touohob.

²⁶Doba leng leinesa Yerusalem geb se bogo, kaba, len lemedag sogougb dou Musa men gomnomna toua deitero. Doba len larges dau gin namcirohob. Hang Hagar, kaba, en emedag mem naugb maman toua deitero. Doba Sarai enin eng edag mem naugb maman, anai en aimeh an Yerusalem geb se bogo gedag mem naugb mamanohob.

²⁷Augwan gini esogwa deisa areg maman Adehsud en ens deb se Surad Yesaya deb sug nosa touohob, endagai: Bang bedebdena naugb ban bemeic abihero, kaba, ban abdoc edeigouhw deit. Era ban gedig ban abinuhwa emerij an ban abih ingmebma, kaba, ban bagahugouhw namcir. Anai ban gedig ban absuwa arges ban debohob, kaba, cum, ban abihir leinyana medam edreg dau gida hom gedig mesuwa eigtou desij en terimda.

²⁸Dangga hang, dan indagunerij, dara dan indamouwerij, yen yemedag Allah mogwihi mogo dau sug yen yaimo Musa men gomnomna ginero. Doba yen yedag en mehir dau areg en os dou yen ogdoc Krisdus gin dous. Aninim dag Sarai en emouwadan Isag dau areg lusud louwan touwero. Doba en ouwadan meisi gini, aimo dau areg Allah enin os dou en dous.

²⁹Dangga se lona ingga, kaba, Hagar meisi Ismael eic gecgu an Sarai meisi Isag gin toua. Anai Ismael gin, kaba, mem ouwadan en, aimo dau areg lusud misen merdoc icirim an en. Doba Isag, kaba, en ouwaden dau mem, aimo dau areg Mena Gogoufu enin ouwan dous. Hang iteitogin, kaba, leng Yahudi leic mog erij dou yen toua. Anai len, kaba, len ledag Hagar medebeitor naugb len laimo Musa men gomnomna gin terimdaba. Doba naugb yen, kaba, yen yarges dau gomnomna gin namcir. Anai yen meigdoc ebdebin an areg Allah os dou yen ogdoc Krisdus ginohob.

³⁰Doba gida gedag sogougb an en meh, kaba, Surad Injil Meb Mohon enara dagiro eisaugb lana? En enara dag gini, endagai: Ban berba gida sogougb gin an en meh namcirda. Anai sogougb meisi gin, kaba, en emesma mena mecigbougb aninim dara gida gedig sud misen en meh touwero. Doba en edag sogougb terimda.

³¹Dangga hang, dan indagunerij dara dan indamouwerij, maman gedig maman madag Krisdenohob, kaba, maman mamedag gida sogougb gini en mehir maman toua deitero. Doba maman madag gida gedig sud misen en mehir maman dous.