Read Manikion GALATIA 5 Bible Online

GALATIA 5 - Manikion bible

GALATIA 5

¹Sug Krisdus esga maman dau Musa men gomnomna ginohob, kaba, yen yemamsoho gembala areibahau naugb len lagaigeij yen. Hanoba len lahwan yen naugb yen yedag Musa men gomnomna men sogougb toua deitero. Doba yen yaiyan meigdocesem naugb yen yes agadgeij dougwo len namcir. Anai sug Krisdus esga maman dag ginohob, kaba, en emouwan naugb maman mamedag sogougb deitero. Doba en ouwan naugb maman madag lusud misen terimda.

²Dangga yen yemousa deisa gembala areibahau naugb len lemec yen meijus dau yen touwero. Doba yen yes agadgeij dau gin namcir. Anai sug yen yamsoho len an gin, kaba, Krisdus men geicara taiba sogo salib emeb naugb yen toua deitero. Doba augwan ediyebeiya dau yen deitohob. Yen youman dan indir an areg dan den dou yen gini deigeigouhw namcir. Anai dang, Paulus, eng desulou yen an gini.

³Dan den dougwo yen mougwa hom deit, dendagai: Gareg dau yen en amsoho len gus naugb len lec en mos dau, kaba, esloulougb medam naugb en emedreg dau Musa men gomnomna hom touwero. Doba en aimo augwan aududi terimda. Naro, kaba, sesar men gogom eb naugb en toua deitohob.

⁴Dangga gareg dau yen en aimo Musa men gomnomna gin ucugb, hanoba en ouwan Allah eic gesgigouhwesa dou en ogdoc men geicara gin toua, kaba, en ogod ameiji dougwo Krisdus enohob. Hang Allah medoc an en emoiharaga en toua deitero, doba en edreg dau gin namcirohob.

⁵Doba emen, kaba, emen emdoc ebdebin an Krisdus men geicara naugb emen gin dous. Dangga hang, emen emod emina debsa Allah naugb en eic gesgigouhwesa dou emen ogdoc sug emen emaimo Musa men gomnomna ginero. Doba emen emod emina debsa en dag en eic gesgigouhwesa dou emen ogdoc Krisdus men geicara gin dous. Hang emen emobsara dau gin touwero. Doba ogdoc Mena Gogoufu men goubesa, kaba, emen emaiyan emdocesem naugb emen emeigtou emateteij naugb gin toua terimda.

⁶Anai sug maman madag hom dara Krisdus Yesus ginohob, kaba, emesloulougb naugb sug maman mac mamus dau, era sug maman mamec mamus daubuma. Doba aremer hom esloulougb namcir, kaba, dag maman mamdoc ebdebin an Krisdus hom gin dous. Hanoba arautut maman naugb sug maman mamdoc gororougwim toua terimda.

⁷Sug nosa, kaba, yen meigdoc ebdebin an Krisdus eiseisaugb namcirohob. Dangga gareg en agaresa yen meigdoc mes, hang yen yobsara dau mer misen eisaugb Krisdus naugb yen yemaimo gin toua deitero?

⁸Anai gini dau Allah gedig en eija yen aud en sug nosa ginero, doba dau sud hom gus dous.

⁹Dara sud hom dous eng edeinyum naugb sug en ahwan lusud leinyana dau ucina se geica gin toua. Anai yen yecinaga dau aremeijouhw dag augwu mei getaha hom eb se iyohob, kaba, cum, esij geigouhw augwan betaha namcir toua.

¹⁰Doba dan, kaba, dan decinaga yen yaugwan dag misenohob. Dangga hang, dan dod indina debsa yen dag yen yemobsara aud sud hom areg en arougb yen naugb yen yec meijus dau gin touwero. Doba yen yobsara aud dan se aremer hom gin dous. Anai maman maugwan madag hom se maman Adehsud ginohob. Dara sud hom areg en enara baic yen meigdoc mes dau gin, kaba, dan decinaga dag Allah emeic gogom medam dou en toues.

¹¹Dara yen yauweila dau leng Krisden dau leng Yahudi meren geicara dou dan toua. Anai len gin, kaba, len lerei dou lusud, lendagai: Paulus, kaba, en emebedbed dou lusud dag len merdoc ebdebin an Krisdus toua dousero. Doba en arougb len dag len lec merus dau. Hanoba len laimo Musa men gomnomna aud gousanara laos dara ginahabi, kaba, emedeinyum naugb sug Allah eic gesgigouhwesa dou len ucugb toua. Naro, kab, naro. Doba dan indagunerij, dara dan indamouwerij, sug dan debedbed dou lusud dag gin, kaba, dagiro, naugwe hang, leng Yahudi gini len leic gogom dou dan terimda? Naro, len lemeic gogom dou dan icira ginero. Anai indan gebedbed gin, kaba, eic len merdoc esgiraha an gin namcirohob. Dobnaro. Dan debedbed dou lusud dag len lemec merus dauwero. Doba len merdoc ebdebin an Krisdus dous, kaba, edeinyum naugb sug Allah eic gesgigouhwesa dou len ucugwohob. Hang leng Yahudi gini len lemeic mog erij dou dan toua terimda. Anai len merdoc esrougb an indan gebedbed gin namcir.

¹²Dangga lusud areg len lenara lai yen meigdoc mes dag gin terimda, kaba, eigouhw naugb len lemec merus dau dousero, doba len letin lenin namcir toua. Anai areg len lenara dou yen gini, kaba, eic dag yen meigdoc eijisa medam dou yen touohob.

¹³Doba dan indagunerij, dara dan indamouwerij, yen, kaba, yen yemedag sogougb naugb Musa men gomnomna gin deitero. Doba sug Allah eija yen sug nosa naugb yen meigdoc ebdebin an Krisdus, kaba, en esga yen dau gin toua namcirohob. Doba deciciji. Sug gomnomna hom emeb naugb yen dag gin deiterohob, kaba, yen yemeic gini naugb yen yemaiyeiyo dougwo areg yen meigdoc etrij icira gin touwero. Doba yen yeic gini naugb yen yeicara yaimo anim dareg yen meigdoc gororougwim dous.

¹⁴Anai Allah men gomnomna augwan, kaba, eb debin gomnomna hom dag gini: Yen meigdoc gororougwim, aninim dag yen meigdoc gororougb yenin toua.

¹⁵Doba sug yenin yaum, era yetim terimda, kaba, decicijahabi. Anai cum, kaba, yen yaugwan yediyebeiya dau cinogo gin dangga.

¹⁶Dangga areg dan den dou yen gin, kaba, men meijouhw dag gini: Eigouhw naugb yen yaimo Mena Gogoufu en mer an areg en arautut yen aud gin dous. Anai sug yen yeicara dag gin, kaba, yen yemaimo areg yen meigdoc etrij icira gin toua deitero, doba yen yarges dau namcir.

¹⁷Anai areg yen meigdoc etrij icira gin, kaba, susugb dau areg Mena Gogoufu ouwan. Dangga toua, areg Mena Gogoufu arautut yen aud gin, kaba, susugb dau areg yen meigdoc etrij icira arautut yen aud gin toua namcir. Hang yen youwan yaimo ara geigouhw toua dagiro? Anai lan labemocedoum se yen meigdoc mes terimda.

¹⁸Doba sug Mena Gogoufu en edag meijen mougt naugb yen yaimo areg en arautut yen aud gin dous, kaba, Musa men gomnomna emedag mougt, hang emeic gogom dou yen toua deitero. Doba yen yarges dau namcirohob.

¹⁹Dara leng laimo areg len merdoc etrij icira gin, kaba, maman macinaga dau meren geicara augwan dag misen touohob. Anai len, kaba, meren geicara dag mihi meren geicara naugb len lohw len meraga doum, dara len laimo areg gogor anim toua terimda.

²⁰Dara len lesijaresa seiseij. Dara len meru ouforoho an ara moung mohu naugb len lagaresa lusud merdoc mes. Dara len lemarges dau sug len lebemocedoum touwero. Doba len lenara ledregim, dara laisedim. Dara len merdoc mog mog anim, dara len merdoc etrij icira len gus meren aremougb toua terimda. Hang len lemauwam an len gus meren aremer naugb len lemousa len touwero. Doba len lauwam an lenin dous. Dangga sug lusud lemobsara aud lenero, kaba, len lenara lakeba lusud naugb len largesim namcir toua.

²¹Dara len lehigdud len gus an meren aremougb. Dara len leg ahwei mohu ed len lomom. Hanoba len logo ara gaihim, dara areg gecgu gus gus dag gin toua terimda. Dara leng leicara dag gin, kaba, len lemeinesa Allah men uro mes naugb en oiharaga len touwero. Doba len leigtou dig medigo namcir dous. Dan desulou yen an aremer gini sug nosohob, hanoba dan demesulou yen ucan deit toua.

²²Doba leng laimo Mena Gogoufu aud areg en arautut len aud ginohob, kaba, len lemesenagan lusud toua deitero. Doba len merdoc gororougwim. Dara len merdoc agahugouhw anim. Dara len laigdougwom dara leic gesgigouhwesem toua terimda. Dangga hang, len merdoc mog mog naugb len lemeic gogom dou len gus dedemeda touwero. Doba len leigtou lateteij an meren geicara. Hanoba len merdoc an len dara len merdoc edag beim anim toua. Dara len lemaimo ucina agabgebi an lusud touwero. Doba se meren geicara augwan, kaba, len merdoc dag hom an len toua namcir.

²³Dara len lemenara gouji dou lusudero. Doba len lenara dara mer arjaga dou len dous. Dara len lemobsara aud areg len merdoc etrij icira dedemeda touwero. Doba len lebehnehino lenin merdoc mes dougwo augwan gin terimda. Dara meren geicara gin, kaba, gomnomna hom ingma emen dougwo len an gin touwero, doba ousa deisa len an gin dous.

²⁴Dangga hang, eigouhw naugb maman mameimiman mamanin an maman geicara deseino len gus. Dara maman mameic gesrougb doum. Dara maman mamehigdudim an aremougb touwero. Doba sug Mena Gogoufu eic maireseb menau geb huhugb dou maman dag ginohob, kaba, en edag mougt naugb maman maimo en aud areg en arougb maman an gin dous. Anai sud hom areg en edag Krisdus Yesus men logodehohob, kaba, en emaimo areg en medoc etrij icira, dara areg edarougb en gin toua deitero. Doba en ogod se enin medoc mes dag en omom dau gin namcirohob.