Read Manikion EPESUS 3 Bible Online

EPESUS 3 - Manikion bible

EPESUS 3

¹Sug maman maugwan madag Allah men meijouhuda hom dag ginohob, kaba, dan demarges dau sug dan docuncum dou en naugb yen touwero. Doba dan deicara daimo dag gin esesa an yen terimda. Anai areg Allah en esedeb naugb yeng yugmahara, kaba, en ogod dan dag domom sug nosa. Hanoba en ens meijouhw dau gin augwan asesa dou dan. Dauwohob, kaba, en eigdoumesa dan indoho naugb dan desai augwan gini dou yen toua. Sug dan deicara dag gin naugb yen, hang lusud lemouf dan se tu gesisug icira gin touohob. (Yen yemecinaga dau areg graga augwan dag misen touebmei? Naro, yen yecinaga dau augwan gini dag misen. Anai sug nosa, kaba, dan dog dau gini gurereito dou yenohob.

⁴Dangga sug yen yecic dau gini se indan surad gin, kaba, yen yecinaga dag dan demog augwougb dou yen touwero. Doba dag dan decinaga meijouhw eisaugb Krisdus men geicara dau augwan gini asesa dag misen namcirohob. Hang dan demog dou yen toua.)

⁵Anai Allah emens dau areg en esedeb naugb lusud ogdoc Krisdus gin, kaba, dou sud hom ingma dau len sug nosa touebma. Doba iteitogin, hang en emens dau augwan ogdoc Mena Gogoufu dou leng lesai Mer Geigouhw eisaugb Krisdus, dara leng lesai Allah en moro dou lusud emen emaugwan, anai en ouci emen debinim naugb ginohob.

⁶Dara areg en ens dou emen, kaba, dag gini: Sug yen yedag hom dara Krisdus ginohob, kaba, yen yemedag lugmahara toua deitero. Doba yen yeigtou desij emen se men uro mes. Hanoba en ekeba geigouhw areg en esedeb naugb emeng Yahudi gin dou yen. Dara en eic dau areg en os dou emeng Yahudi ogdoc Krisdus augwan gin dou yen toua. En eicara baimo augwan gini an yen ogdoc sug emen emesai en Mer Geigouhw eisaugb Krisdus dou yenohob.

⁷Mer Geigouhw gin, kaba, Allah eigdoumesa dan indoho dag men sogougb. Hanoba en eic mou ouforoho dara men goubesa dou dan naugb dan desai augwan gini dou lusud toua. Anai en medoc eigouhw an dan naugb ginohob.

⁸Dara en eicara dangga dou dan gedig dan indoho eb tainya se men lusud laugwan merufu namcir. Anai sug nosa, kaba, dan deic mog erij dou men lusud laugwan touohob. Doba en medoc eineg an dan. Hang en emarougb dan naugb dan desai Mer Geigouhw eisaugb Krisdus gin dou yeng yugmahara gin toua. Dauntoba yen yecinaga dau areg en esedeb ogdoc Krisdus naugb yenohob augwan asesa dag misen toua. Anai augwan gin, kaba, mera eisaugb edreg dau areg lusud lauwam an gin toua namcirohob.

⁹Dara en arougb dan naugb dan dens dau men ucina areg en esedeb naugb lusudohob meijouhw augwan asesa dou yen toua. Dauntoba sug leng se bogo dara merna mog mog se bogo meniha an meren mougt mera len louman dau areg Allah en esedeb naugb men goucimdeb maman dag gin, kaba, len lecinaga dag en mou ouforoho an aingma aingma augwan toua namcirohob. Anai sug nosa, kaba, Allah emens dau areg en esedeb naugb maman ogdoc Krisdus gini dou sud hom ingma touebma. Doba en ecgoneh augwan gini dau acgunog terimda iteitogini dau len namcir. Anai en, kaba, en sud hom gedig en ahasesei dara en esinsin augwanohob.

¹¹Dara areg en esedeb gin, kaba, dag menenau touwero. Doba en esedeb augwan gin dau acgunog naugb mamanohob. Hanoba en ogugwo augwan gini se maman Adehsud Krisdus Yesus mesira naugb en aimo areg Allah esedeb gini an maman toua.

¹²Sug maman madag hom dara Krisdus dag ginohob, kaba, maman mamahau dau sug maman madebeij Allah touwero. Doba sug maman mamdoc ebdebin an Krisdus dag misenohob, kaba, maman maic mamus naugb maman man aud Allah en toua namcir. Anai maman macinaga dag areg Allah en os dou maman ogdoc Krisdus ginohob, kaba, en emobsara dau hom touwero. Doba en aimo augwan gini an maman toua terimda.

¹³Dara sug yen yeiya dag dan deigtou se tu gesisug icira yenohob, kaba, yen yemeija meigdocesa gin touwero. Doba yen yagahugouhw naugb gin namcir. Anai areg dan daimo gin, kaba, naugb yen yera mera dag yen yeigtou se gogouf cucugb gin toua terimda.

¹⁴Dangga hang, dan demarges dau sug dan docuncum dou maman Mamina naugb yen touwero. Doba sug yen yedag men lusud, aninim dara emeng Yahudi dag gin touohob, kaba, dan dacgeij en naugb en ekeba dau men geigouhw aingma aingma geinyana gougwa areg geb se bogo ingma dou yen toua. Dauntoba yen meigdoc emomomtomlo. Doba areg en eic dou yen gin, kaba, ousa yen naugb yen yaiyan meigdocesem dougwo areg gecgu. Dara arautut yen naugb yen yes agadgeij se ucina aud maireseb menau geb huhugb ogdoc Mena Gogoufu men goubesa, areg en esa se yen meigdoc mesohob gin toua namcir. Anai Allah gin, kaba, en esinsin leng se bogo dara leng se cinogo len laugwan. Hanoba en eic moho dou astesda len laugwan touohob.

¹⁷Dara dan dacgeij Allah dau sug yen meigdoc ebdebin an Krisdus ginohob, kaba, dag en ousa yen, dauntoba Krisdus emeihwededau yen touwero. Doba en eigtou se yen meigdoc mes ogdoc yen meigdoc ebdebin an gin terimda. Hanoba en arautut yen meigdoc mes, dauntoba yen yemobsara dau sug yen meigdoc gororougwim touwero. Doba yen yogod se yenin meigdoc mes naugb yen yeicara yaimo dangga, anim ucucugb edag buc gototo namcir. Aninim dag sogo dara tu lan lamedreg dau lan maruhw touwero. Doba labsugeb se maruhw hom ingga toua terimda.

¹⁸Dara dan dacgeij Allah dau sug Krisdus eigtou se yen meigdoc mes touohob, kaba, dag en eic mou ouforoho dara mou auti dou yen. Dauntoba Allah men lusud yen yaugwan yecinaga dau sug Krisdus medoc gororougb yen men meijouhw geiyara, geisaugb, gagas, dara gouwada augwan asesa toua terimda. Anai men medoc gororougb gin, kaba, edreg dau lusud meren goubesa naugb sug len lauwam an ara ara namcir. Dara dan dacgeij Allah naugb en ousa yen, dauntoba yen meigdoc eica Krisdus men medoc gororougb augwan gini dag misen toua. Anai sug yen meigdoc obgesa augwan gini asesa dag misen namcir, kaba, eic dag yen meigdoc atij an areg geb se Allah enin medoc mes augwan gin touohob.

²⁰Dangga hang, sug maman madag hom dara Krisdus dag ginohob, kaba, eigouhw naugb maman maugwan maigdoumesa Allah en moho, dara maman masijaresa en beb huhugb ogdoc Krisdus Yesus gin toua terimda. Anai ogdoc men goubesa geb se maman mamdoc mes, kaba, en ousa maman edreg medam dau areg maman mauwam an dara macgeij dau en touohob. Augwan gini asesa dag misen namcir.