Read Manikion EPESUS 5 Bible Online

EPESUS 5 - Manikion bible

EPESUS 5

¹Dangga hang, yen yemaimo areg gecgu dag mohon deitero. Doba sug Allah eigdoumesa yen dag en mogwihi mogo yen dag ginohob, kaba, yen yesogwa deisa en mohotimei mohw se aremer augwan toua terimda, anai en medoc gororougb yen namcirohob.

²Dara yen meigdoc gororougwim toua ucucugb terimda. Aninim dag Krisdus medoc gororougb maman sug nosa touohob. Anai en emougbda dau ucina mog erij touwero, doba en ohw enin mougt edug naugb maman. Hang en emeic enin maga dag gauwaharo gouwedebeda dou Allah naugb maman sesar augwan toua. Anai men geicara gini, kaba, eic Allah medoc eigouhw dou en toua namcirohob.

³Dara sug yen yedag Allah men lusud dag ginohob, kaba, yen yemohw yen meijaga doum, dara meijen geicara emedag mihi, dara yen yemogungun len gus an meren aremougb. Hanoba yen yemecic dau gin mougwa hom doum touwero. Doba yen yarges dau gin namcir. Dauntoba yen yemeic cumougt dou lusud naugb len lemecic yen meijoho an gin touwero. Anai augwan gini, kaba, emaimo lusud gedig Allah ouci len debinim naugb enohob meren geicarero, doba edreg dau gin namcirohob.

⁴Dangga toua, yen yemogmohosa naugb ligida dara ligiji meraga. Hanoba yen yemeicir yemacecim, dara yen yemobohuba an len, dara yen yemecic len dag len gedig len meru emaiyero touwero. Doba areg agunya dau yen meijirs, kaba, dag yen yen sijo dou Allah an areg en eic dou yenohob gin dous.

⁵Anai gareg en ohw en maga dou len gus, dara men geicara dag mihi men geicara, dara gareg en agungun len gus an meren aremougb terimda, kaba, en emeinesa Krisdus dara Allah maran goiharaga touwero. Doba en eigtou dig medigo beb huhugb namcir. Dara gareg en agungun lusud an meren aremougb, kaba, en eigdoumesa aremougb gini dag seiseij naugb en ecguna dou touohob. Yen youman dan indir areg dan den dou yen gini deigeigouhw namcir.

⁶Dangga yen yemaimo lusud gedig len ledarougb yen se areg graga augwan touwero. Doba yen yasid yenin dau len namcir. Anai leng leic merus sug lugdeh teiteiyohob, kaba, len leicara dag gin terimda. Hang Allah esedeb gogom medam naugb len, anai en medoc obgos an lenohob.

⁷

⁸Sug nosa, kaba, yen yaugwan yedag lobeigbogo men logodeh toua namcir. Doba sug yen yedag hom dara maman Adehsud dag ginohob, kaba, yen yemedag lobeigbogo men lusud toua deitero. Doba yen yedag mouf men lusud dous. Dangga hang, meijen geicara augwan, kaba, emedag lobeigbogo men geicara toua deitlo. Doba sug yen yedag mouf men lusudohob, kaba, yen yera mera areg geigouhw, dara areg asesa Allah enin medoc mes, dara areg se geica terimda. Anai gin, kaba, aimo lusud gedig len leinesa moufohob meren geicara toua namcir.

⁹

¹⁰Hang yen yemarges dau gin touwero. Doba yen yeic meijuwemougb esesa naugb yen yecinaga areg geic maman Adehsud medoc eigouhw dou en, hanoba yen yaimo augwan toua terimda.

¹¹Dangga hang, yen yemaimo lusud aud areg len leicara se lobeigbogo gin toua deitero. Doba yen yowun yenin dau gin namcir. Anai meren geicara augwan gin, kaba, emera mera geigouhw hom dou yen touwero. Doba era mera gecgu dou yen dous. Hang yen yemaimo len touwero. Doba yen yens meren geicara gin augwan ainyes dou len dous. Dauntoba sug len leiya dau gin, kaba, len lecinaga dag augwan gin, kaba, ecgu namcirohob. Anai geicara areg geb se mouf, kaba, dag lobeigbogo deitero, doba eperwei dag moufohob. Hang maman mamecinaga areg geigouhw, era gecgu augwan dag misen toua. Dara yen yemecic dau meren geicara areg len laimo se lobeigbogo ucucugb toua deitlo. Anai areg len laimo gin, kaba, eic igdebes dou lusud namcir.

¹²

¹³

¹⁴Hang sud hom enara eisaugb gin deb sug nosa, endagai: Bang bedag bomomohob, kaba, ban bemomom deitero. Doba ban beisa besa namcir. Anai sug ban beicara dag gin, kaba, Krisdus esa mouf se ban abdoc mes toua.

¹⁵Dangga sug yen yeiya, doba leng lobeigbogo meren geicara emera mera geigouhw dou yenero, kaba, yen yemaimo len touwero. Doba yen yebehnehino yenin meigdoc mes dougwo meijen geicara augwan namcir. Dauntoba yen yemedag leng meru emaiyero touwero. Doba yen yedag lusud gedig len meru auti ara ara dous.

¹⁶Dara yen yemaisan gurog dau sug yen yos yadi Krisdus en moho deseino lusud laugwan touwero. Doba astesda sug cumougt eb naugb yen, kaba, yen yesai en moro dou len terimda. Anai iteitogin, kaba, lusud leinyana meren geicara dag mog mog namcirohob.

¹⁷Dara yen meiju emedgom dougwo geicara areg asesa maman Adehsud enin medoc mes gin touwero. Doba yen yeic meijuwemougb esesa naugb yen meiju obgesa augwan dag misenahabi, yen yemaimo toua terimda.

¹⁸Dara yen yemeg ahwei mohu emed yen yemomom touwero. Doba yen yebin Mena Gogoufu naugb en edag mougt se yen meigdoc mes dous. Hanoba yen yaimo en mer an areg en arougb yen an gin toua terimda. Anai sug yen yeg ahwei mohu, kaba, ahwan yen naugb sug yen yogo ara gaihim. Hang eic dag yen yaimo areg gecgu toua namcir.

¹⁹Doba sug Mena Gogoufu batij yen meigdoc mesohob, kaba, yen yeic Ugwaremer, dara aresgwemer, dara areg Mena Gogoufu ens dou yenohob naugb sug yen yohu, kaba, yen yeic gin eng yerba doum dous. Hanoba yen yerba Ugwaremer dara yen yohu aresgwemer dou maman Adehsud dareg yen meigdoc agahugouhw an en toua namcir.

²⁰Dara yen yemarges dau sug yen yen sijo dou maman Mamina Allah touwero. Doba se aremer augwan, kaba, yen yen sijo dou en se maman Adehsud Krisdus Yesus, en moho, besesa terimda. Anai yen yedag hom dara enohob.

²¹Dara yen meigdoc emagas anim ucucugb touwero. Doba sug yen yeigdoumesa Krisdus dag meijen mougt mera medamohob, kaba, yen yowun yenin meigdoc mes arjaga anim ucucugb terimda.

²²Dangga hang, yigida yen, kaba, yen meigdoc emagas emedreg dau yen meisuwer touwero. Doba yen yowun yenin meigdoc mes arjaga naugb yen yaimo len merir se aremer augwan toua terimda. Aninim dag yen yemohoiya maman Adehsud en mer an areg en arougb yen an gin touwero. Doba yen yaimo en mer se aremer augwan gin toua namcirohob.

²³Anai yen meisuwer gini, kaba, len ledag mougt naugb yen, aninim dag Krisdus en edag mougt mera medam naugb maman maugwan touohob. En, gin, kaba, en ohw en mougt edug naugb en eigdoc maman dau sesar men gogom augwan aud maireseb menau geb huhugb, anai maman maugwan madag en maga ginohob.

²⁴Dangga hang, yigida yen yemeicara yemedreg yen meisuwer len merir touwero. Doba astesda dau yen, kaba, en aimo en mesuwa en mer se aremer augwan toua namcir. Aninim dag maman mamedreg dau Krisdus en mer gin touwero, doba maman maimo en mer an areg en arougb maman an gin toua terimda.

²⁵Dara yigiji yen, kaba, yen meigdoc emesrougb dara mog mog an yen meisouwer touwero. Doba astesda sud hom yom dau yen, kaba, en medoc gororougb en mesouwa. Aninim dag Krisdus en medoc gororougb maman, hang en emohw en mougt edug aud gomom naugb mamanohob. Dauntoba sesar men gogom emeb naugb maman toua deitero. Doba en edu maman becabeci namcir ogdoc en mogwihi, aimo dau areg en os deb se en mer geigouhw gini an maman toua. Anai en ouci maman debinim dag enin mesouwa touohob.

²⁶

²⁷En eicara dag gini, dauntoba areg gecgu dara areg gogor gus gus augwan mohw hom emeb naugb maman. Dara en emowun maman an aremer hom toua deitero. Doba maman madag en mesouwa gecabeci deseino en namcir.

²⁸Sug Krisdus medoc gororougb maman dag ginohob, kaba, esloulougb medam dag astesda dau yen en medoc gororougb en mesouwa aninim dag en medoc gororougb enin maga toua. Anai yan yamedag hwai deitero, doba yan yedag homohob. Dangga gareg dau yen en medoc gororougb en mesouwa, kaba, gini dag en medoc gororougb enin maga touohob.

²⁹Anai sud hom ingma, kaba, en medoc emesdigeij enin maga touwero. Doba en agauwesa dara esedougwo enin maga dougwo areg gecgu augwan namcir. Aninim dag Krisdus medoc emesdigeij maman touwero. Doba en agauwesa dara en esedougwo maman dougwo areg gecgu augwan toua terimda, anai maman madag en maga gin touohob.

³⁰

³¹Augwan gini esogwa deisa areg len log deb se Surad Injil Meb Mohon deb sug nosa touohob, endagai: Sug Allah esinsin gida dau giji dag ginohob, kaba, giji emeigtou desij en mena dara en mem toua deitero. Doba en eihwededau lan naugb en eigtou desij en mesouwa. Hang lan lamedag hwai touwero, doba lan ladag hom namcir dous.

³²Se aiyad gin, kaba, Allah ens dau areg se geica dag meiyo dou maman toua. Anai dan doudesa dag men meijouhw, kaba, emeisaugb mesuwa dara mesouwa sug lan lamedag hom ginero. Doba men meijouhw dau sug Krisdus dara maman madag hom gin dous.

³³Doba inggaida. Aiyad gin, kaba, naugb yen toua. Dangga hang, yigiji astesda dau yen, kaba, en medoc gororougb en mesouwa, aninim dag en medoc gororougb enin maga. Dara yigida, kaba, astesda dau yen en eigdoumesa en mesuwa en moho terimda toua.