Read Manikion EPESUS 6 Bible Online

EPESUS 6 - Manikion bible

EPESUS 6

¹Yugdeh sug yen yedag hom dara Krisdusohob, kaba, yen yemohoiya yen meijina dara meijim len merir touwero. Doba yen yaimo len an areg len larougb yen an augwan toua terimda. Anai gini, kaba, aimo dau areg asesa Allah enin medoc mesohob.

²Augwan gini aimo dau areg Allah arougb yen an se men gomnomna sug nosa touohob, endagai: Yen yeigdoumesa yen meijina dara yen meijim len meroho deseino yen terimda. Anai sug yen yeicara dag gin, kaba, yen yemomom dedemeda touwero. Doba dan deseyeiyo yen dougwo areg gecgu augwan namcir. Dauntoba yen meijireseb terberba se cinogo gin toua terimda. Hang yen yemowun yen meijina dara yen meijim len meroho touwero. Doba yen yeigdoumesa len meroho namcir. Anai Allah men gomnomna gin, kaba, gomnomna gaimougtut gedig Allah os ara ara ingma dara debin gin naugb yen touohob.

⁴Dangga toua, yen gedig yeic meijirohob, kaba, meijen geicara emeic len merdoc emesrougb ucucugb dou len touwero. Doba yen yesedougwo len. Hanoba yen yomnomnan dau areg maman Adehsud en arougb maman an ginohob augwan dou len toua. Dara sug len ledreg maman Adehsud men gomnomna gin, kaba, yen yen dougwo len. Dobnaro, kaba, yen yogod len, dauntoba len lahau an dougwo. Hanoba len laimo men gomnomna augwan toua terimda.

⁵Dara yeng Krisden gedig yen yedag sogougb, kaba, yen yemohoiya meijen mougtir len merir touwero. Doba yen yeigdoumesa len meroho dara yen yahau dau len namcir. Hanoba yen yaimo len merir an areg len larougb yen an dara yen meigdoc hom toua terimda. Aninim dag yen yemohoiya Krisdus en mer touwero. Doba yen yaimo en mer an areg en arougb yen an dara yen meigdoc hom touohob.

⁶Dara yen yemaimo len merir an areg len larougb yen an sug len lauweila yen. Dauntoba len leigdoumesa yen meijoho an gin touwero. Doba sug yen yedag Krisdus men sogougb dag ginohob, kaba, yen yeic meijuwemougb esesa naugb yen yaimo len merir dara yen meigdoc augwan sug len lemauweila yenero toua terimda. Anai gini aimo dau areg asesa Allah enin medoc mes ginohob.

⁷Dara sug yen yeicara yaimo areg meijen mougtir larougb yen anohob, kaba, yen meigdoc momogo an gin touwero. Doba yen yaimo augwan dara yen meigdoc agahugouhw an dous. Anai yen yemeicara dou meijen mougtir se cinogo gin dousero. Doba yen yeicara dou maman Adehsud gin toua.

⁸Anai sug yen yedag sogougb, era yen yedag sogougwero, kaba, augwan gini inggaida deseino maman Adehsud. Doba gareg en aimo men geicara dara geigouhw namcir, kaba, en emeic areg geigouhw dag siouwa dau en toues.

⁹Dangga toua, yeng yedag mougt mera, kaba, yen yemeic kwag dou meijen sogougwir dag yen yeic mog erij dou len ucucugb touwero. Doba meijen geicara augwan dou len, kaba, aninim dag Allah arougb meijen sogougwir an meren geicara augwan dou yen toua. Anai en emedag meijen sogougwir meren mougt mera medam gin dousero. Doba en edag yenin meijen mougt mera medam gedig en eigtou se bogo naugb yen touohob. Hang en emobsara aud yen se Lona Sug En Ogod Aremer Aga Lusud touwero. Doba en medoc edag beim naugb en ogod aremer aga lusud laugwan aninim dous.

¹⁰Dangga hang, sug ouwedoc gin, kaba, dan desulou yen dauntoba yen yes agadgeij se maman Adehsud men goubesa namcir. Anai yen yedag hom dara enohob.

¹¹Dara yen yacgeij Allah naugb en eic enin men ariloboc kermum dou yen, dauntoba Bilis emaugwohosa yen aud areg gecgwero. Doba yen yes agadgeij terimda.

¹²Anai maman mamesara dara lusudero. Doba maman masara dara merna mog mog geb se bogo meniha, dara meren mougt mera, an meren gedeijan len laugwan toua terimda. Anai len merubisamougb medam gougwa dara len loiharaga lusud gedig len leigtou se lobeigbogo len laugwan dara goubesa toua namcir.

¹³Sug len merubisamougb dag gin, kaba, yen yacgeij Allah naugb en eic enin men ariloboc kermum dou yen. Dauntoba edebeij lona sug Bilis ainyen yen, kaba, meijen moc gini en emaiyan yen touwero. Doba yen yes agadgeij dougwo en namcir. Dara ousa yen naugb sug yen yemobsara dou en touwero. Doba yen yeic meijimihec mougb erebero dou en terimda edebeij lona sug ouwedoc gin toua.

¹⁴Dangga yen yeic Allah en mer gini dag hwigbeimos naugb yen yohud yen meijida moc. Dauntoba yen yesedeb yen meigdoc mes naugb yen yesara dara Bilis terimda. Anai Allah en mer gin, kaba, dag geica namcir. Hanoba yen yaimo areg asesa Allah enin medoc mes toua terimda. Anai gini edag sansun kermum dougwo yen meigdoc mes.

¹⁵Dara yen yesedeb yen meigdoc mes naugb yen yesai Mer Geigouhw eisaugb Krisdus dou lusud. Dauntoba len lecinaga dag Allah esedeb en medoc mes naugb en eic gesgigouhwesa dou len ucugb. Anai sug yen yeicara dag gin, kaba, aninim dag yen yeg hwigbeimos dougwo yen meijohora touohob.

¹⁶Dara yen yemarges dau sug yen meigdoc ebdebin an Krisdus touwero, doba yen meigdoc ebdebin an en terimda. Anai sug yen yeicara dangga, kaba, Sud Hom Mobgos Maha men hu smougb emeinesa yen meigdoc mes touwero. Doba yen meigdoc ebdebin an gini dag tomeh dougwo sug hu augwan en, doba ousros icira namcir.

¹⁷Dara yen yemarges dau maireseb menau geb huhugb areg Allah eic dou yenohob gin touwero, doba yen yecgun meisira debin gin terimda. Anai gini dag topi kermum dougwo yen meijugt. Dauntoba Bilis emogod yen naugb yen yomom deit touwero, doba maireseb eb naugb yen namcir. Hanoba yen yesai Allah en Mer Geigouhw eisaugb Krisdus dou lusud terimda. Anai gini dag krawan gedig Mena Gogoufu eic dou yen naugb yen yasara dara Bilis toua.

¹⁸Dara sug yen yeicara dag gin, kaba, yen yacgeij Allah naugb en ousa yen toua. Dara astesda sug yen yocuncum dou en, kaba, yen yemocuncum augwougb touwero. Doba yen yaimo dau areg Mena Gogoufu arautut yen se dous. Dangga hang, yen yemeisan gurog dau sug yen yacgeij Allah an ara ara touwero. Doba yen meiju auti naugb yen yocuncum esesa naugb gin terimda. Dara yen yemocuncum naugb yenin dousero, doba yen yeicara yaimo dag gini an Allah men lusud laugwan esesa toua terimda.

¹⁹Dara yen yocuncum dou Allah naugb dan toua. Dauntoba astesda sug cumougt inggebga naugb dan desai Mer Geigouhw eisaugb Krisdus dou lusud, kaba, en eic mou ouforoho dou dan naugb dan dens dau areg dan denara dou len meijouhw augwan asesa dou len toua namcir. Dara yen yocuncum dou en, dauntoba en ousa dan naugb dan demahau dau gin touwero. Doba en aiyan dan indocesem naugb dan desai Mer Geigouhw gini dara goubesa dou len toua. Anai Allah emens dau mer gin men meijouhw dou sud hom ingma sug nosa mougwa hom touebma. Doba iteitogin, kaba, en ens dau meijouhw augwan gin dou danohob.

²⁰Sug en ens meijouhw gin dou dan dag ginohob, kaba, en eigdoumesa dan indoho naugb dan desai en moro eisaugb Krisdus dou lusud laugwan. Hang len lemouf dan se tu gesisug icira en mer gin toua. Dangga yen yocuncum dou Allah naugb dan, dauntoba sug dan desai Mer Geigouhw eisaugb Krisdus dou lusud, kaba, dan demahau touwero. Doba dan deic indus naugb dan desai mer gin terimda, aimo dau areg Allah esedeb naugb danohob.

²¹Tikikus en emdecic dau aremer geisaugb dan augwan asesa dou yen, dauntoba yen yecinaga meijouhw augwan asesa toua. Anai dan indoc edangga, hang dan demarougb en aud yen. Dauntoba yen yecinaga dau emen geicara augwan dag misen namcir. Dara en enara bad yen meigdoc mes, dauntoba yen yaiyan meigdocesem dara yes agadgeij toua terimda. Dan desa en aud yen, anai en edag maman mamaguna se Krisdus gedig maman mamdoc gororougb en namcir. Dara en emobsara dau sug en edag maman Adehsud men sogougb gin touwero. Doba en aimo en an areg en arougb en an gini dara en medoc augwan terimda touohob.

²³Dan dacgeij maman Mamina Allah dara maman Adehsud Yesus Krisdus naugb lan lausa yeng se goucimdeb yaugwan, dauntoba yen meigdoc dag hom namcir. Dara yen meigdoc gororougwim, hanoba yen meigdoc ebdebin an Krisdus toua terimda.

²⁴Dara gareg en emobsara dau sug en medoc gororougb maman Adehsud Yesus Krisdus gin touwero, doba en eicara baimo dangga beb huhugb namcir, kaba, dan dacgeij Allah naugb en medoc eigouhw an en toua terimda. Augwan gini asesa dag misen namcir.