Read Manikion PILIPI 2 Bible Online

PILIPI 2 - Manikion bible

PILIPI 2

¹Dan denara daino yen meijin an areg dan dog dou yen graga, dendagai: Sug yen meigdoc dag hom dara Krisdus gin, kaba, eic dag yen meigdoc ongkogos naugb aremer augwan. Dara sug en medoc gororougb yen, kaba, eic dag en oho geigouhw se yen meigdoc mes. Dara sug yen meigdoc dag hom ucucugb dara Mena Gogoufu, dara sug yen meigdoc eigouhw, dara eineg anim dag gin touohob, kaba, dan desulou yen dara goubesa namcir. Dauntoba yen yemobsara dau gin touwero. Doba yen yedag hom naugb yen yohw yen meiju anim se aremer augwan. Dara yen meigdoc anim ucucugb. Hanoba yen meijir dag hom naugb yen meiju, aimo ucina hom gin toua terimda. Anai sug yen yeicara dag gin, kaba, eic dag dan indoc eigouhw medam, dara ebtou dou dan touohob.

³Dangga hang, se meijen geicara augwan, kaba, yen yemaugb meijaga dougwo len gus. Dara yen yemeic ara ara naugb yemaimiman yenin an gin deseino len gus touwero. Doba yen yowun yenin meigdoc mes arjaga anim ucucugb. Hanoba yen yeicara yaigdoumesa len gus meroho agas bedreg dau yenin toua.

⁴Dara yen yemauwam an yenin meijen aremer eng esloulougb emedreg dau len gus touwero. Doba yen yauwam an len gus meren aremer ucucugb ginahabi, yen yemauwam an yenin meijen aremer gin toua.

⁵Dangga hang, se meijen geicara augwan, kaba, yen yemedreg dau Krisdus men geicara hom touwero. Doba yen meiju aninim dag en toua namcir. Hanoba yen yesogwa deisa en mohotimei mohw an meijen geicara augwan toua terimda.

⁶Anai en, kaba, en mog toua dag Allah teiteiyohob. Doba en emauwam an en moho dag Allah gin touwero.

⁷Doba en arges gin augwan deb, aimo dau areg enin ogod an deb sug nosohob. Dangga sug en eic en maga dag lusud misenohob, kaba, en owun enin moho dag sogougb toua.

⁸Hang sug en edag lusud misen dag ginohob, kaba, en owun enin medoc mes arjaga naugb en aimo Allah en mer aud sug en omom taiba sogo salib naugb maman toua.

⁹Hang Allah emeic moho dou en, hanoba eigdoumesa en moho agas medam bedreg dau lusud gus laugwan namcir.

¹⁰Dauntoba leng se bogo, dara leng se cinogo gini, dara leng leigtou se cinogo mei len laugwan lecguna dou en dara lesijaresa en.

¹¹Hanoba len los ladi Yesus Krisdus en moho deseino len gus dag meren Adehsud toua terimda. Anai sug len leicara dag gin, kaba, eic dag lusud leigdoumesa en Mena Allah en moho agas terimda touohob.

¹²Dangga dan indagunerij, dara dan indamouwerij gedig dan indoc gororougb yen, sug Krisdus medoc edag beim an Allah en mer dag ginohob, kaba, dan dacgeij yen naugb yen yemarges dau areg dan darougb yen an gin touwero. Doba yen yaimo dan indir sug dan deigtou aigusi dau yen gin bedreg dau nosa deit. Aninim dag yen yaimo dan indir sug dan indugwengga desij yen sug nosa touohob. Hanoba yen yemarges dau ucina aud maireseb menau geb huhugb gin touwero. Doba yen yeic meijuwemougb esesa naugb yen yaimo ucina gin dareg yen meigdoc eijesa dara yahau dau Allah toua terimda.

¹³Anai enin eng moongga se yen meigdoc mes naugb en arautut yen meigdoc mes. Hanoba en eic goubesa dou yen naugb yen yaimo areg enin ouwan toua namcir.

¹⁴Hang se meijen geicara augwan, kaba, yen yemenara ucucugb anim. Dara yen meijir yemauwim touwero.

¹⁵Doba sug yen yeigtou desij lusud gedig len merdoc agabi, dara len merdoc ogor naugb leicara ecgu se cinogo gin, kaba, yen yedag beim naugb yen yaimo areg gecabeci dara obosboro an len terimda. Anai sug yen yeicara dag gin, kaba, yen yens yenin ainyes dou len dag yen yedag Allah mogwihi mogo gedig yen yedag lusud mos ginohob. Hanoba len lemowun yen meijoho an aremer hom touwero. Doba len leigdoumesa yen meijoho an meijen geicara gin terimda.

¹⁶Dangga hang, sug yen yesai mer geic maireseb menau geb huhugb dou len gin, kaba, yen yedag tebeij mouf gaisema len se ucina gin toua namcir. Sug yen yeicara dag gin, kaba, eic cumougt dou dan naugb dan deigdoumesa dan indoho an yen se Lona Sug Krisdus En Ecicugb gin toua. Anai meijen geicara geigouhw gini, kaba, ens ainyes dou dan dag dan demeic dan indug erij augwougwero. Doba mera einyana eb naugb danohob.

¹⁷Doba sug Allah ogod an dan dag len gus leir dan indugwihi debin meijen geicara gini dag gauwaharo dou en, kaba, gini emeic dan indoc emeijesa dou danero. Doba eic dag dan indoc agahugouhw medam an gin namcir. Hanoba dan douwan dag dan indoc gagahugouhw gin, kaba, aga gerleij se yen toua. Anai meijen geicara geigouhw gin, kaba, ansins dag yen meigdoc ebdebin an Krisdus dag misen. Hang edag gauwaharo misen dou Allah touohob.

¹⁸Dara dan douwan naugb sug yen meigdoc agahugouhw an ginohob, kaba, dag yen yeic gerleij dou dan toua.

¹⁹Doba sug maman Adehsud Yesus en ouwan, kaba, dan demesa Timotius aud yen. Dauntoba sug en ecicugb, hanoba en edens dau meijen geicara augwan dou dan, kaba, eic dag dan indoc ebtou dou dan. Anai dan dod indina debsa maman Adehsud dag dan demomom dau yen touwero. Doba dan indina agau an yen terimdahabi.

²⁰Dara dan desa Timotius enin eng aud yen. Anai len gus laugwan, kaba, len lemehilon areg esloulougb naugb Yesus Krisdusero. Doba len lehilon areg esloulougb naugb lenin dous. Doba Timotius gin, kaba, en hom eng medoc amimiri an meijen geicara augwan namcir. Anai en hom eng aman amdoc an yen dous. Dangga hang, dan demesa en aud yen toua.

²²Anai yenin yen yecinaga dau sug aman amesai Krisdus moro dou lusud sug nosa, kaba, dag en emobsara dau sug mog erij eb naugb aman touwero. Doba en aiyan medocesem naugb en es agadgeij namcir. Hang en edag areg mera eisaugb naugb dan, aninim dag meisi edeijan mena toua.

²³Dangga sug dan douman, doba len logod an dan dag dan indina agauwohob, kaba, dan demesa en dedemeda aud yen toues. Naro, kab, naro.

²⁴Dara dan dod indina debsa maman Adehsud dau sug dan indina agauwohob, kaba, dag en ousa dan naugb dan danin toua demdeiya yen dedemeda toues.

²⁵Doba len lemogod indan aremer deinaugb danbuma. Gin, kaba, dan dogod se dan indoc mes naugb dan desa maman mamaguna Epaproditus ucugb aud yen naugb en edesa baihnehina dougwo yenahabi. Anai en ouman dag yen toua yecinaga dau sug en areba medam desij dan suginohob. Dangga hang, en medoc erleij naugb en edens enin mog dedemeda dou yen, dauntoba en enara bad yen meigdoc mesahabi. Anai en medoc momogo eisaugb gin terimda.

²⁶En ouwan dangga, anai sug nosa, kaba, yen yesa en aud dan naugb en eperwei yen meijuhw an dan. Dauntoba areg ingmemeb naugb danero, kaba, en eic dou dan toua. Dara en emousa dan se dan indaga dousero. Doba en aimo dan naugb aman amahwas amesai Krisdus moro dou lusud. Dara en eic mos naugb sug aman amebehnehino dougwo Krisdus mer misen gin touohob.

²⁷Eisaugb en, kaba, en areba medam naugb sug en omom an namcir. Doba Allah medoc eineg an en naugb en eigdoumesa en ucugwohob. Dara Allah medoc emeineg an en dousero, doba en medoc eineg an dan toua. Dauntoba gini emeic dan indoc momogo ingma dara dou dan touwero.

²⁸Dangga sug yen toua youman eisaugb gareba ginohob, kaba, dan indoc eiloboro medam naugb dan desa en audi yenbo dedemeda toua. Dauntoba sug yen yeiya en mog se yen meijiresohob, kaba, yen meigdoc momogo deitero. Doba yen meigdoc ebtou namcir. Hanoba eic dan indoc ebtou dou dan toua.

²⁹Dangga sug en edebeij yenohob, kaba, yen yebin en dara yen meigdoc agahugouhw naugb en toua. Anai en ohw en mougt edug naugb en esai yen meijuro. Dauntoba en ousa dan icira Krisdus mer, hang aremebeni naugb en emahauwa icira gin touohob. Dara yen yemeicara dag gin dou en dousero. Doba gareg men geicara aninim dag enohob, kaba, yen yeicara dag gin dou len toua.