Read Manikion PILIPI 4 Bible Online

PILIPI 4 - Manikion bible

PILIPI 4

¹Dangga dan indagunerij, dara dan indamouwerij gedig dan indoc gororougb yen, sug maman madag magun se bogo dag ginohob, kaba, maman mamobsara dau maman Adehsud gin touwero. Doba maman maiyan mamdocesem naugb maman madag hom dara en terimda. Dan desulou yen dag gin ucucugb. Anai dan indoc gororougb yen dousero. Doba meijen geicara eigdoumesa dan indoho. Hang dan dagahugouhw dara dan indoc emerleij aud yen toua namcir.

²Dara dan desulou Yodia dara Sintiki yan, dauntoba yan maijir emedregim toua deitero. Doba yan maigdoc aninim terimda. Anai yan yahwas yadag hom dara maman Adehsud gin touohob.

³Dara dan dacgeij dan insi ban, dauntoba ban bemarges lan gin deb touwero. Doba ban besa se lan marufu, dauntoba lan ladag hom deit. Anai lan gini dara Klemens an dan insir gus sungga, kaba, len laugwan leic len merug erij desij dan naugb emen emesai Krisdus moro dou lusud sug nosohob. Aninim dag ban bemarges dan deb touwero. Doba ban beic ban abug erij desij dan sug nosa naugb nanan nasai Krisdus moro dou lusud terimda touohob. Hang len gin, kaba, Allah emogu len meroho deb se Surad Maireseb Huhugb gin toua namcir.

⁴Dangga hang, sug yen meigdoc dag hom dara Krisdus dag ginohob, kaba, yen meigdoc momogo touwero. Doba yen meigdoc agahugouhw namcir. Dara dan dou dan indir se hom gin deit dag yen meigdoc momogo touwero. Doba yen meigdoc agahugouhw terimda.

⁵Hang yen yemeicara ohonohobo touwero. Doba yen yeb ara arjaga an len gus laugwan. Anai Lona Sug Maman Adehsud En Ecicugwen, kaba, ebeij deinyor namcirohob.

⁶Dara yen meigdoc emeijesa an ara ara touwero. Doba sug meijen ara ara ingmemeb naugb yenero, kaba, yen yacgeij augwan gin dau Allah enin dous. Hanoba yen yen sijo debin gin dou en toua terimda.

⁷Anai sug yen yeicara dag gin, kaba, yen meigdoc emeijesa icira ara ara touwero. Doba sug yen yedag hom dara Krisdusohob, kaba, Allah eic yen meigdoc ebtou dou yen. Dara yen meigdoc gebtou gin, kaba, edreg dau areg mamanin mamou maiso toua terimda.

⁸Dan indagunerij, dara dan indamouwerij, sug areg dan dog dou yen se surad gini deinyor sug ouwedoc gin, kaba, dan douwan desulou yen mougwa hom deit, dauntoba yen yemamimiri an areg gecgu mougwa hom toua deitero. Doba yen yauwan an areg gedag beim dara areg lusud leigdoumesa yen meijoho an gin dous. Dangga hang, yen yemereiyara dara yen yemerba mohoisa toua deitero. Doba yen yaimo areg se geica, dara areg mera eisaugb, dara areg obosboro, dara areg gecabeci, dara areg geic lusud merdoc eigouhw an, dara areg len leigdoumesa dag moho agas augwan gini dous. Hanoba yen yeicara yaimo anim toua terimda. Anai sug yen yeicara dag gin, kaba, yen yaimo areg mera eisaugb dara areg geic lusud merdoc agahugouhw an yen icira gin toua namcirohob.

⁹Dara areg gus gedig dan desulou yen an gin, hanoba yen yeiya dau indan geicara sug nosa touohob, kaba, yen yemehig dau gin touwero. Doba yen yeicara yaimo augwan gin terimda. Anai sug yen yeic meijuwemougb esesa se gin dangga, kaba, maman Allah eseyeiyo yen dara eic gesgigouhwesa dou yen dougwo areg gecgu augwan toua namcir.

¹⁰Dara dan indoc esgiraha an yen toua. Anai yen yens dag yen meigdoc an dan mougwa hom dou dan deitohob. Dan decinaga dag yen meigdoc moc dougwo danero. Doba dau sug nosa terimda iteitogin, kaba, cumougt ingmemeb naugb yenero. Hang yen yemens yen meigdoc mes dou dan touwero gini. Dan denara dou yen dag gin, anai dan dedag hom dara maman Adehsud gin touohob.

¹¹Areg dan den dou yen gini, kaba, dag dan demenara ucucugb an yen touwero. Anai sug ared moongga, era sug mogero naugb dan, kaba, dan dainyen se augwan. Hang emeic dan indoc eijesa dou dan touwero. Doba areg eb naugb dan, kaba, dan indoc ebtou an ginohob.

¹²Dangga sug dan det ared geigouhw, era sireba dan toua, dara sug dan desma ara einyana, era desma gurereito, kaba, augwan gini emeic dan indoc momogo dou dan deitero. Doba sug dan dainyen se aremer augwan dag ginohob, kaba, eic dag dan indoc esgiraha an namcir. Anai dan decinaga dau sug ared ingmaro, era ared einyana eb naugb dan men meijouhw augwan asesa dag misen namcirohob.

¹³Dara dan indoc emebtou icira ared gin dousero. Doba sug dan dedag hom dara Krisdus dag ginohob, kaba, en eic goubesa dou dan naugb dan daiyan indocesem se aremer gus augwan toua terimda.

¹⁴Dangga areg dan dog dou yen graga, kaba, yen youdesa dag dan dowun yen meijoho an gin touei? Naro, dan demowun yen meijoho an ginero.

¹⁵Anai yen yenin yecinaga dau sug dan deihwededau yen se leng Makedonia meren hancob naugb dan desai Mer Geigouhw eisaugb Krisdus dou len gus sug aimougtut, kaba, dag goucimdeb hom ingma emousa dan touwero. Doba yen dous eng yousa dan dara aregoufu ucucugb terimdohob.

¹⁶Dangga sug dan desai Krisdus moro dou leng se cinogo Tesalonika, kaba, yen yemehig dau dan touwero. Doba yen yousa dan dara aregoufu mougwa hom icira touohob. Dangga hang, areg yen yesa dou dan gin, iteitogin, kaba, dag dan demesbes an gin touwero. Doba dan deigdoumesa yen meijoho an gin namcir.

¹⁷Dara areg dan den dou yen dag yen yousa dan ucucugb dag ginohob, kaba, dag dan demenara dematagaij yeng Pilipi an meijen aremougb touwero. Doba dan dahilon, dauntoba yen meijisoho mougb namcir. Anai dan decinaga dau sug yen yousa dan dara aremougb dag gin terimda, kaba, yen yeised huga medam deinaugb yeninohob.

¹⁸Dara areg yen yesa dou dan ogdoc Epaproditus gin, kaba, aninim dag yen yemoc indan aremeij dou dan dousero. Doba yen yeic edreg dau gin dou danohob. Dangga hang, Allah en ohu mebesesa gin namcir. Anai augwan gini dag yen yeic areg mena ouwedebeda naugb yen yauwaharo dou en touohob.

¹⁹Hang ogdoc Krisdus, kaba, indan Allah en emeic areg emeb naugb yenbuma augwan dou yen toua. Anai en mesoho mougb namcir.

²⁰Dangga eigouhw naugb maman maigdoumesa maman Mamina Allah en moho an gin toua beb huhugb terimda. Augwan gini asesa dag misen namcir.

²¹Dara yen yen dou Allah men lusud hom yom sungga dag len laugwan meriresi. Anai len toua ledag hom dara Krisdusohob. Dara dan indaguner gedig len leigtou desij dan an leng Krisdus sugin, kaba, emen emaugwan emou yen. Doba aimougtut, kaba, leng leigtou se mougt mera medam men tu len lou yen toua.

²³Maman Adehsud Yesus Krisdus eic geigouhw dou yen yaugwan toua terimda.