Read Manikion KOLOSE 1 Bible Online

KOLOSE 1 - Manikion bible

KOLOSE 1

¹Surad gini dau dang, Paulus, dou Allah men lusud se cinogo Kolose yen yaugwan. Anai Allah enin eng ouci dan, hanoba en eigdoumesa dan naugb dan desai Mer Geigouhw eisaugb Krisdus Yesus dou lusud laugwanohob. Dara maman mamaguna Timotius en ouma debin areg dan dog dou yen gin toua.

²Dan dog surad gini dou yen, anai yen toua yedag aman amaguner dara aman amdamouwer se Krisdus. Dara yen yemobsara dau en touwero, doba yen yaiyan meigdocesem. Hanoba yen yes agadgeij naugb yen yaimo en dara yen meigdoc hom toua namcirohob. Dangga hang, aman amacgeij maman Mamina Allah naugb en medoc eigouhw an yen, dara en eseyeiyo yen dougwo areg gecgu augwan toua terimda.

³Dara emen ememarges dau sug emen emocuncum dou maman Adehsud Yesus Krisdus en Mena Allah naugb yen touwero. Doba astesda sug emen emocuncum dou en, kaba, emen emen sijo medam dou en naugb yen terimda.

⁴Anai emen emouman dag yen meigdoc ebdebin an Krisdus dara yen meigdoc gororougb Allah men lusud len laugwan toua namcirohob.

⁵Yen yeicara dag gini, anai sug lusud lesai Mer Geigouhw eisaugb Krisdus dou yen sug aimougtut, kaba, len lens dau areg Allah esedeb naugb lusud ogdoc Krisdus augwan asesa dou yen touohob. Dangga hang, sug yen youman dau areg se geica gin, kaba, yen yemobsara dau sug yen meigdoc ebdebin an Krisdus dara sug yen meigdoc gororougb Allah men lusud gini touwero. Doba arautut yen naugb yen yeicara yaimo dag gin toua terimda. Anai yen yecinaga dag areg Allah os dou yenohob, kaba, augwan emediyebeiya dau yenero. Doba eb naugb yen beb huhugb se bogo namcir. Hang yen yemetogoto en mer an areg en os dou yen gin touwero. Doba yen yod meijina debsa en an gini toua terimda.

⁶Dara Allah en Mer Geigouhw eisaugb Krisdus gin, kaba, era mera bagaha becinten dou lusud se cinogo augwan. Aninim dag yen toua, sug yen youman dau Allah medoc an yen. Hanoba yen meigdoc obgesa augwan dag misen, kaba, eic dag yen yera mera einyana icira gin toua namcirohob.

⁷Mer Geigouhw gin, kaba, yen youman dau emen emsi hom, moho Epapras, sug en esai mer augwan gini dou yen sug nosa. En, kaba, emen emdoc gororougb en namcirohob. Anai en, kaba, en emobsara dau sug en esai Mer Geigouhw eisaugb Krisdus gin touwero, doba en aimo augwan gini dara en medoc hom an terimda. Hanoba en eperwei emen emuhw naugb en ens augwan dou yen toua.

⁸Dangga sug en ecicugb aud emen suginohob, kaba, en ecic dau meijen geicara sug yen meigdoc gororougb lusud ogdoc Mena Gogoufu men goubesa meijouhw augwan asesa dou emen toua.

⁹Sug emen emouman dag ginohob, kaba, emen ememarges dau sug emen emocuncum dou Allah naugb yen touwero. Doba ebiji dau lona sug emen emouman dau meijen geicara ginohob, kaba, emen emacgeij en naugb en eic mou ouforoho dara mou auti bauloulo ogdoc Mena Gogoufu men goubesa dou yen. Dauntoba yen yecinaga areg Allah esedeb naugb sug yen yaimo augwan asesa dag misen toua namcir.

¹⁰Anai sug yen meiju ouforoho dag ginohob, kaba, yen yemeigtou augwougb touwero. Doba eic dag se aremer augwan, kaba, yen yera mera areg geigouhw einyana. Dara yen yecinaga areg geb se Allah enin medoc augwan bauloulo. Hang Allah medoc emesrougb an yen touwero, doba eic dag en medoc eigouhw an yen esesa terimda. Anai yen yemedis dau areg en ouwan mougwa hom touwero. Doba yen yaimo areg en arougb yen an augwan dag misen namcir touohob.

¹¹Dangga hang, emen emacgeij Allah naugb en eic men goubesa geigouhw medam gini augwan dou yen. Dauntoba sug yen yaimo ucina mog erij gin, kaba, yen yemahau dau gin touwero. Doba yen yaiyan meigdocesem naugb yen yaimo gin terimda. Dara sug lusud leic mog erij dara gogom dou yen dag gin, kaba, yen yemauni gogom ucugb dou len touwero. Doba yen yeigtou yateteij dara yen meigdoc agahugouhw an gin toua namcir.

¹²Dara yen yemarges dau sug yen yen sijo dou maman Mamina Allah gin touwero. Doba yen yeicara yaimo dangga besesa terimda. Anai areg en esedeb naugb men lusud se men goiharaga dag gogouf cucugb ginohob, kaba, augwan emediyebeiya dau yen touwero. Doba en eigdoumesa yen meijoho naugb en ogugwo areg en esedeb gin augwan dou yen toua namcir.

¹³Anai sug maman madag hom dara Krisdus gin, kaba, maman sesar emeb naugb maman toua deitero. Doba sug Krisdus eic enin maga ancoho aga maman dou Allah naugb maman sesar dag ginohob, kaba, Allah eigdoc maman dau sesar men gogom augwan. Hanoba en aigdougwo gin augwan dau maman toua namcir. Dangga hang, maman mamedag lobeigbogo men sogougb toua deitero. Doba Allah eigdoc maman dau men goubesa augwan. Hanoba en esohw maman se en Meisi men uro mes deb naugb sug en oiharaga maman ucugb toua terimda. Anai en medoc gororougb en Meisi gin toua namcirohob.

¹⁴

¹⁵Dara maman, kaba, maman mameiya Allah se maman mamires mougwa hom touebma. Doba Krisdus, kaba, en ens Allah eb ainyes dou maman. Anai en, kaba, en edag Allah en mog teiteiyohob. Dangga hang, en emedag Allah en Meis Mebin Geis Huhugb gedig en moho agas edreg dau areg Allah ahasesei dara esinsin augwan toua namcir.

¹⁶Anai areg geb se bogo dara areg geb se cinogo, dara areg maman maiya dara areg maman mameiyero dag malaikad, dara merna mog an meren mougtir, dara leng lesedougwo lusud, dara leng meroho agas, kaba, Allah emahasesei dara emesinsin augwan gini dau enin dousero. Doba en esinsin augwan ogdoc en Meis mebin gin, hang en emedag mougt naugb augwan toua. Anai areg Allah en ahasesei dara en esinsin gin, kaba, augwan ogdoc en Meisi gin dous.

¹⁷Sug en edag mougt naugb augwan dag ginohob, kaba, areg en ahasesei dara esinsin augwan toua emedregim touwero. Doba men goubesa edeinyum naugb augwan ec dara gesgiraha namcir. Anai sug augwan gini emebbuma, kaba, eni moongga sug nosohob.

¹⁸Dara en edag mamang Krisden maman mougt mera medam. Hanoba en eic maireseb menau geb huhugb dou maman, aninim dag mougt eic maireseb dou maga toua. Anai en emomom terimdero. Doba Allah eigdoumesa en Meisi mebin gini acgunog dau leng lomom len laugwan ucugb touohob. Dauntoba se aremer augwan, kaba, en moho eb taiba dau augwan toua namcir.

¹⁹Anai Allah enin eng ogod an deb dag en Meisi mebin gin, kaba, men goubesa emeb tainya men goubesa touwero. Doba en medoc esgirahesa en namcir naugb en ogugwo men goubesa augwan dou en. Dauntoba areg geb se Allah enin medoc mes, kaba, augwan eb se en Meisi gini en medoc mes toua.

²⁰Hanoba en ogod an toua dag ogdoc en Meisi mebin gin, kaba, en eic gesgigouhwesa dou leng se bogo dara maman se cinogo gin maman maugwan toua namcir. Anai sug en Meisi gini en omom taiba sogo salib dag ginohob, kaba, eic dag leng se bogo dara leng se cinogo len laugwan lemedag Allah men moc toua deitero. Doba edeinyum naugb sug maman maugwan mamdoc dag hom dara en ucugb touohob.

²¹Sug nosa, kaba, Allah eija yen dag men moc ginohob. Anai areg yen yauwam an, dara areg yen yeicara yaimo, kaba, augwan dag mog mog terimda. Dangga hang, se lona ingga, kaba, yen yemeigtou desij Allah touwero, doba yen yeigtou aigusi dau en namcir.

²²Doba iteitogin, kaba, Allah eic gesgigouhwesa dou yen ucugb. Anai en Meisi hom gin, kaba, en ohw en mougt edug se sogo salib naugb meijen sesar augwan dau yenohob. Hang aremer hom emdagunya debin yen, dara sud hom ingma emowun yen an ara ara toua deitero. Doba se lona sug Krisdus ahwan yen aud Allah, kaba, yen yecabeci deseino en namcirohob. Dara sug en omom taiba sogo salib gin, kaba, en emedag merna touwero. Doba sug en ouwaden dau bogo, hanoba en edomom taiba sogo salib gin, kaba, en omom an maga dag lusud misen toua.

²³Dangga yen yesedougwo yenin, dauntoba len gus lemerses yen dau Mer Geigouhw eisaugb Krisdus areg yen yod meijina debsa dag misenohob gin touwero. Doba yen yaimo augwan gini dara yen meigdoc hom terimda. Anai mer gin, kaba, edag buc gototo naugb yen. Hang lusud lemesai bagaha becinten dou len se cinogo augwan. Dara Allah enin eng eigdoumesa dan toua dag men sogougb. Hanoba en arougb dan naugb dan desai dou lusud laugwan touohob.

²⁴Sug Mer Geigouhw eisaugb Krisdus agaha becinten dag ginohob, kaba, dan indoc momogo an danin sug dan deigtou se tu gesisug icira yen gin touwero. Doba dan dagahugouhw an gin namcir. Anai sug dan deicara daimo dag gin, kaba, gini dag dan toua deic dan indug erij desij Krisdus naugb dan douci men lusud laugwan dahidahim naugb en. Anai men lusud gin, kaba, dag en maga, doba augwan emouwesebma.

²⁵Ogdoc men maga gini, hang Allah emeigdoumesa dan indoho dag meren sogougb naugb len. Dauntoba dan desai en Mer Geigouhw eisaugb Krisdus meijouhw augwan asesa dou yeng yugmahara toua, aimo dau areg en ogugwo dou danohob. Dauntoba yen yera mera icira gin toua terimda.

²⁶Dara Mer Geigouhw eisaugb Krisdus gin, kaba, Allah emens dou sud hom ingma dau sug acgunog touebma. Doba iteitogin, hang en emens dau augwan gini dou men lusud emeng Yahudi. Anai en ouci emen debinim naugb en deb sug nosohob.

²⁷En ens dau areg en ecgoneh gini dou men lusud emen. Dauntoba emen emecinaga dag augwan gini naugb emen dousero. Doba naugb lusud se cinogo gus gus len laugwan toua. Anai areg en ens gin, kaba, dag mera eisaugb dara moho agas namcir. Dara areg en ens dou emen ginohob, kaba, dag Krisdus ouwan einesa yeng yugmahara yen yaugwan meigdoc mes toua. Dangga hang, yen yemeigtou augwougb dag nosa toua deitero. Doba yen yod meijina debsa en an men gogouf cucugb gin toua terimda. Anai sug Krisdus einesa yen meigdoc mesohob, kaba, yen yecinaga dag Allah men gogouf cucugb gini emesa ijes dau yen touwero, doba eb naugb yen toua namcir.

²⁸Sug Allah ouwan naugb Krisdus einesa lusud laugwan merdoc mes dag ginohob, kaba, dan demarges dau sug dan desai Mer Geigouhw eisaugb en dou lusud touwero. Doba ogdoc Krisdus men goubesa geb se dan indoc mes. Hang dan demeic dan indug erij dara dan demohw dan indugt edug naugb dan dedidib aremeijouhw debin gin dou lusud laugwan terimda, aimo dau mou ouforoho gedig Allah eic dou dan an gin toua. Hanoba dan desulou len toua dara goubesa namcir. Dauntoba len lemobsara dau sug len merdoc ebdebin an Krisdus gin touwero. Doba len les agadgeij namcir naugb len leiji dag lusud mos se en toua terimda. Anai dan demouwan naugb sug dan dahwan len aud Allah enohob, kaba, dag sud hom ingma dau len en emedag mahaniheni se Krisdus touwero, doba len laugwan ledag lusud mos deseino en dous.